في السلك .. بابكر سلك .. مضارب قبيلة بنو كسكتان

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

21012016

مُساهمة 

في السلك .. بابكر سلك .. مضارب قبيلة بنو كسكتانn




في السلك
بابكر سلك
مضارب قبيلة بنو كسكتان

في السلك .. بابكر سلك
.
< امس الوزير جدد للجنة التسيير
< وهو قرار منطقي وواقعي ويتماشى مع المرحلة
< فجمال مصمم على عدم العودة
< وتعيين لجنة تسيير جديدة ما فيها جمال
< لا يخدم القضيه ابداً
< وستتفاجأ اللجنة الجديدة بالاعباء مثل سابقتها
< يبقى اللجنة التي قوي عودها انسب وصاحبة اصلحية
< فهي الاصلح لحضانة النادي في هذه المرحلة
< ايها الناس
< يجب ألا ننظر للنصف الفارغ من الكوب عند تقييم اداء اللجنة
< فالجزء الفارغ لا يمثل غالبية الكوب
< لأنه شريط صغيييييييييييييييييير
< رفييييييييييييييييع
< فلنستصحب معنا نظرة بطرف العين للجزء المليان من الكوب
< ونظرة من عينيك كفاية
< لأنه الجزء الاكبر من الكوب
< يا قوم
< ان القبيلة تمر بظروف حرجة
< ومضارب ابو كسكتة يجري العمل في نصب خيام جديدة عليها
< وقبيلة بنو كسكتان يهمها جداً ان تنشغل قبيلتنا بالجدل البيزنطي
< لتتسيد القبائل
< وتضرب ضربتها
< يا أهل الربع
< قبيلة بنو كسكتان الترابة ما عندها
< ولكنها تضخم اعمالها لتسحب بساط الالتفاف حول زعامة القبيلة عندنا
< وتفقدنا بساط زعامة كل القبائل الاخرى
< انها تستخدم ابناءنا في تفتيت عضد القبيلة
< يجب ان نلاحظ ذلك جيداً
< فجوهر يصب القهوة في مجالس شيوخ القبيله عندهم
< ويسمع ما يدور في ردهات خيمة كبير تلك القبيلة
< ويأتينا بالأخبار
< وسطوف اعياه النضال بعد ان كان فارساً تشهد له البادية
< ونتيجة للفتن فقدت القبيلة سطوف وانكشف ظهرها
< يا أهل الربع
< ان مضارب بنو كسكتان خالية من الانعام
< ولكنهم يعملون على وضع ابلهم وحلالهم القليل خارج المضارب
< حتى يوهموا بقية القبائل بأن الحلال عندهم كثير
< ولكن حتى الثلاثة ضروع في حلالهم
< جف اللبن فيها واضحت مثل اليقطين الناشف
< يجب الا ننخدع
< فمد اعمدة خيمتين صغيرتين لا يعني ان كل المضارب قد ثبتت عليها الخيام الجديدة
< فاهمني !!!!
< المهم
< التفافنا حول مجلسنا وعي كبير منا
< دعمنا لنادينا بتفعيل »2870« واجب علينا
< انزال الراية البيضاء وطرد اليأس الذي اصبح يدب فينا
< من اهم الاعمال لدينا
< والشفوت بتعرفوا وقت الحارة
< المهم
< لا اخاف من شيء
< الا تحقق كلام غرزة حول جدية اوكرا
< وعلى عادل ابو جريشة ان يهتم بهذا اللاعب اكثر من اهتمامه بطريقة تعيين محمد موسى.
< لأن تعيين محمد موسى مكسب للمريخ لا منقصة
< ولكن ترك اوكرا في استهتاره ينقص قوة المريخ
< الولد موهوب ولكنه غير مهتم
< وتراوري موهوب ولكنه موهوم
< واذا قرر ان يقدم شيئاً هذا الموسم
< بالتأكيد ليس للمريخ
< ولكن لتسويق نفسه سيما وهذا آخر مواسمه معنا
< ايها الناس
< اعظم الدول قامت من قناعاتها بالاعتماد على مواردها وتطويرها
< آخرها ماليزيا
< خلونا نبقى ماليزيا وشوفونا
< فموارد الزعيم وكوادره المؤهلة فقط تحتاج لمن يخطط التخطيط السليم للاستفادة منها وتطويرها
< ولمن ينفذ تلك الخطط بدقة دراستها
< ولمن ينسق بين الادارات المختلفة
< ليدوزن مقطوعة المريخ والزمن الجميل
< المهم
< الركشة شكيتها على الله
< الكراع يوم تورم
< مرات اشوفها سمييييييييييينه اقول يا ربي ده منو الراقد جمبي ده
< ومرات تفش عشان تورم من جديد
< اسلام قالت لي الركشه جات في الزمن الصعب
< قلت ليها ياتو زمن
< قالت لي الزمن المشى فيهو جمال
< في الزمن الجميل ما جات
< قلت ليها لو جات في الزمن الجميل يا بتي كراعي المكسورة كان رقدت في فضيل
< وكراعي السالمة كان رقدت في الفيصل
< ضحكت وقالت لي كان بختنا نحنا ننزل في المريديان عشان نمارضك
< زمن صعب
< لكن ما كعب
< طالما بخلينا ننجز ويعلو عندنا الكعب
< المهم
< الحبيب رمضان تمنى ان يقدم قورماهيا الكيني تجربة حقيقية للهلال
< اخاف ان يقدم الهلال تجربة حقيقية لقورماهيا يا رمضان
< ايها الناس
< ما يطلقون عليه طابق عند الاهله
< مجرد نسخ »كوبي بيست« لما شفناهو على المدرجات الشعبيه لاستاد الخرطوم
< حقو كردنة ما ينسى اللافتة الوقعت يوم فيتا
< بس ثبتوها كويس يا روشا
< ايها الناس
< إن تنصروا الله ينصركم
< أها
< نجي لي شمارات والي الخرتوم
< كان شفت يا والينا
< المويه تاني بقت بالنهار ما بتجينا
< برغم أنو الدنيا شتاء يا والينا
< أمال في الصيف ايش بتعمل فينا؟؟
< بتعضينا !!!!!
< موية في ماسورة يخربنا ويطرشنا ويعمينا
< لكن برضك ناس الموية لا اشتغلوا بيك ولا اشتغلوا بينا
< الخوف لو سألتهم يا والينا
< يقولوا ليك سد النهضة اثر علينا
سلك كهربا
ننساك كيف وكلبنا يلهث من العطش لمن حنن كلب عبد الجليل
والى لقاء.
سلك
واتساب ما كضابتقييم المستخدم: / 0
التفاصيل
نشر بتاريخ السبت, 16 كانون2/يناير 2016 16:21
< جهات بعينها تحاول الالتفاف على لجنة التسيير وامالتها
< ولا نظن ان لجنة التسيير بهذه البساطه
< فتلك الجهات تلتف حول لجنة التسيير لتصفية حسابات مع آخرين
< وبالتأكيد هذا الوضع لا يخدم الكيان ولا يفيد لجنة التسيير
< بل يمكن ان ينقص من مساحاتها في قلوب الشفوت
< لأن لجنة التسيير لو قبلت بأن تصبح عصا في يد الناس يحاربون بها خصومهم
< فإنها تفقد هيبتها واحترامها
< ايها الناس
< لجنة التسيير حقو تمتحن من يريد ان يلتف حولها
< تقول ليهم عليكم كذا مليار دعماً للكيان
< اكيد حا يقعدوا يقولوا
< الو ....الو ....الشبكه كعبه ولا شنو ؟؟؟ ويقفلوا الخط
< المهم
< الواتساب خشمو خفيف
< تقول بغم بجيبها ليك
< اذا جاك كلام مكتوب
< ممكن واتساب يكون صادق وممكن يكون كضاب
< واذا جاب ليك صورة ممكن تكون حقيقيه وممكن تكون فوتو
< لكن لو جاب ليك فيديو
< واتساب ما كضاب
< لانو اي لعب في الفيديو بكون واضح جدا
< واتساب الأيام الفاتت جاب لينا تلاته اهداف للاتحاد الليبي في شباك الهلال
< من القون الرقص فيهو اتير
< وللقون التالت
< واتساب ما كضاب
< جاب الاقوان واضحه
< لكن قالوا لينا الهلال كان غالب اربعه تلاته
< الاربعه بتاعات الهلال مشن وين ؟؟؟
< الواتساب ما جابن ؟؟؟
< والواتساب فيديو ما كضاب
< وطالما جاب اقوان الاتحاد
يبقي ديل الاقوان الفي
< اما اربعة ابو الهل
< فهي مجرد كلام قريناهو
< دخلنا عمك قوقل
< يا قوقل سمعت بي اقوان الهلال الاربعه في اتحاد ليبيا؟
< قال يطرشني
< البقول الهلال جاب اربعه اقوان
< يرسل لينا الفيديو في الواتساب
< المهم
< تلاتة تي شيرتات لا انساهن اطلاقا
< فنيلة محسن سيد
< وتي شيرتي الدقشتني الركشه وانا لابسو
< وفنيلة شيبوب
< مشى بيها الجنوب
< دخل بيها الفندق
< نطه بيها بالشباك
< مشى بيها كينيا
< رجع بيها السودان
< بات بيها في العمارات
< رجع بيها بيتهم
< مشى بيها بيت خالو
< بات هناك
< رجع بيها لي كردنه
< مشى بيها تونس
< رجع بيها من تونس
< فنيلة ولا ركشه حايم بيها شهرين يا زول؟
< ومن دولة لي دولة كمان
< برشوت يا كافي البلا؟
< ايها الناس
< الموسم القادم مبشر ومافي داعي للخوف
< والعمل الكبير الذي قامت به لجنة التسيير
< وكلفت به خبير كبير
< في ما يتعلق بالوك وشيبوب
< عمل يستحق التكتم عليه والسريه التامه
< الشغل احترافي
< ايها الناس
< اذا كان المكتب التنفيذي يرسل جوازاً للاعب لقطر للتأشيره
< جواز أخضر
< يبقي المكتب ده يا ما بعرف شغل
< يا قاصد يخرب الشغل
< يبقى ده ما مكتب تنفيذي
< يبقى مكتب تنفيسي يا ونسي
< فهل فعلاً ارسل ذلك المكتب الجواز الاخضر؟
< المهم
< داير احكي ليكم قصه
< بدري حصلت
< زمن نميري
< طبعا الحصان ولا الحمار بكبوا ليهو العيش في الخرج
< ويعلقوهو ليهو في رقبتو
< ياكل وياكل
< لما الشري يدخل ليهو في نخرينو
< بنفضو من نخرينو
< بنفضو فرررررررر
< وتاكل في المناطق ديك بقولا ليها تمجق
< العيش بطير من نخرينو في الواطه
< الطير ياكل والنمل ياكل والقمري ياكل
< اها نرجع لي قصتنا
< بدري الكلام ده زمن نميري
< قال ليك نميري مشى لمنطقة من مناطق اهلنا في كردفان
< عمل ليهم صلح في المنطقه واحتفلوا بيهو
< اثناء الاحتفال واحد كبييير ليهو شنبات
< رفع يدو
< نميري قال ليهو اتفضل ابوي
< بدري الكلام ده زمن نميري
< الراجل قال لنميري
< انتوا البقولوا عليكو مايويه ديل فوقكم تلاته خصال
< خصلتين سمحات وخصله كعبه
< اب عاج قال ليهو قولن لي التلاته
< بدري الكلام ده زمن نميري
< عمك قال
< اول خصله سمحه انتوا قدرتوا علي جانقي
< وتاني خصله سمحه موضوع الشريعه الاسلاميه دي
< اما الخصله الكعبه
< دخلولكم ريسينكم في المخالي دي وتمجقوا تمجقوا تمجقوا ولو كان فرررررر ما قلتوها
< بدري الكلام ده زمن نميري
< ايها الناس
< ان تنصروا الله ينصركم
< اها
< نجي لي شمارات والي الخرتوم
< والينا
< امجقوا زي ما دايرين يا والينا
< بس متين تفروووووووا لينا ؟؟؟
سلك كهربا
ننساك كيف والكلب بضحك علينا لما يلقاهم بمجقوا ونحنا راجينهم يفرررروا
وإلى لقاء.
سلك

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى