تابعونا عبر فيس بوك

قوقل ‏+‏ ‏
Use the English Language

مهرجان العدالة الثاني .. قلم في الساحة .. مامون ابو شيبة

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

24012016

مُساهمة 

مهرجان العدالة الثاني .. قلم في الساحة .. مامون ابو شيبة




قلم في الساحة
مامون ابو شيبة
مهرجان العدالة الثاني
قلم في الساحة  مامون ابو شيبة
.
* محمد عبدالماجد بعد ما أوجع الرؤوس بالغزل المبالغ في تيم الهلال يوم مباراة القور الكيني ولدرجة أن )كج( الفريق.. تجاهل أمس التعليق على المباراة واكتفى بالقول )لو دي كورتكم ركزوا في الجوهرة الزرغاء أحسن(! ثم أكمل صفحته بمقال عن محجوب شريف.. أظنه كان خاتيه إحتياطي ليدفع به للمطبعة كلما تطرشق صفحته عندما ينهزم الهلال!!
* المدرب )كافالي( برر الهزيمة وهدف القور الكيني لعدم التفاهم بين ابيكو وعمار الدمازين لأن الأول وعلى حد قوله بتكلم انجليزي وما بعرف عربي والثاني بتكلم عربي وما بعرف انجليزي!!
* كردنة قال للخواجة: إنت يا )كافي البلاء( الكورة دي بلعبوها بالكرعين ولا بلعبوها بالحوار والونسة بالإنجليزي.. والله العملوها ناس بيكو وعمار دي ناس الحوار الوطني ما بعملوها!!
* يعني تبرير )فطير( للفرنسي.. زي تبرير )اللقيمات( بتاع الكاردينال.
* المهاجم الكيني )الوك( لما جاء شاقي بين الدمازين وابيكو الظاهر الغاني قال لعمار )ماين( وعمار افتكرها )عاين( قام اتلفت فانتهز الوك الفرصة ومر بسهولة جوار عمار وواجه )ماكسيم( ليحرز هدف )جامبو( ثمنه كأس محمولة جواً..
* يعني ابيكو لخم عمار الدمازين بكلمة )ماين( فأتاح الفرصة للمهاجم الوك ليسير بهدوء جوار عمار الدمازين دون أي مضايقة وخشونة ويضع الكرة في المرمى..
* يمكن ده السبب الخلى ناس السياحة يمنحوا كاس )حسن السير والسلوك( للغاني ابيكو مخرج هدف قورماهيا!!
* الخوف من الجايات تحصل لخبطة تاني بسبب اللغة.. وعينك ما تشوف إلا النور..
* ابيكو يقول للدمازين )come( )كم( يعني تعال ساعدني!! الدمازين يقول له )خمسة دقائق( يعني الباقي من الزمن خمس دقائق!!
* وما بعيد تقوم شكلة بين عمار الدمازين وابيكو.. فإذا قال ابيكو للدمازين )go.. go( )قو.. قو( يعني أمشي بالكورة لي قدام.. يفتكر عمار إن ابيكو بيكاوي فيه ويقصد )قورماهيا.. قورماهيا( وطوالي يدورها معاه!!
* أثناء الشكلة ابيكو يقول لعمار بلغة عربية مكسرة )انتي تويلة زي نخلة ومخ سغيرة زي سخلة(.. عمار يقول الزول ده قال فيني شنو بالانقليزي؟
فيرد ابيكو )انقليزي ده يا مرسي؟!(!!
* الله يقطع اللغة وسنينها..
* حسه مشكلة اللغة دي يحلوها كيف.. دايرين مقترحات يا ود عبدالماجد..
* ممكن تجيبو مترجم يقيف على الخط جوار )اللاين مان( وكلما ابيكو يقول حاجة، المترجم يكورك للدمازين )قال ليك غطي العقرب(..
* .. )قال ليك أعمل حسابك من ألوك(..
* .. )قال ليك تعال كش عنكبة ده أنا ما بكشو عيني على كأس حسن السير والسلوك(!
* كردنة سأل )كافي البلاء( عن حل مشكلة اللغة دي.. الخواجة قال له اسمع يا كردونة يا نعلم ابيكو عربي.. يا تودو عمار الدمازين معهد سلتي.. أو ننتظر لحدي ما مساوي يرجع..
* كردنة قال له طيب لما مساوي يرجع يلعب كيف مع ابيكو.. مساوي ذاتو انجليزيته نص نص..!
* الخواجة قال له ابيكو يقعد كنبة.. شن بسوي بي محترف جاي يشيل كاسات حسن السير والسلوك.. هو أصلو جاي يلعب كورة ولا جاي يتقدم لوظيفة حكومية؟!
* جرايد الهلال قالت كردنة غادر المقصورة قبل نهاية المباراة..
* انتو خجلانين مالكم؟ اكتبوا الخبر كاملاً مع التحليل.. قولو كردنة زاغ من المقصورة قبل نهاية المباراة عشان ما يتحرج في مراسم التتويج!!
* وبالأصح تقولو كردنة )انسحب( من المقصورة أصلو غاوي انسحابات وما بتحمل الهزيمة!
مهرجان العدالة الثاني
* بعد هزيمة بورتسودان وضياع كأس السياحة نتوقع أن يعقد كردنة لقاءاً جماهيرياً في استاد الهلال بمسمى مهرجان العدالة الثاني ويلقي خطبة بتراء وهو مرتدياً الكسكتة السوداء: )يا جماهير سيد البلد.. لن يبطرنا نصر ولن تهزنا هزيمة.. ايش يعني غورماهيا.. نحن هزمنا هرغلة.. وهرغلة دي أكان ما عارفين أسسها هرغل ملك الرومان عندما فتح شمال أفريقيا.. معليش هزيمتنا من غورماهيا سببها عامل اللغة بين الدمازين وابيكو.. ونحن قادرون لاستجلاب أشطر استاذ من بريطانيا ليعلم عمار اللغة الإنقليزية.. موش عمار بس حرّم الدمازين كلها نعلمها إنقليزي.. وأوعدكم خلال 3 شهور حتشوفوا الدمازين كلها بتتكلم لغة أولاد جون.. وحتشوفو ناس الدمازين مبسوطين وكلهم لابسين كسكتات كمان.. وبعدين أصلاً نحن كأس السياحة دي ما عاجبانا.. نحن ما بتاعين سياحة.. نحن ناس قتال ووغي.. كيف نشيل كاس سياحة؟.. كاسات السياحة دي خليناها لي ناس غورماهيا والناس الهناك ديل "مشيراً إلى جهة استاد المريخ في العرضة جنوب".. وأقول ليكم حاجة.. لقد تعرضنا لمؤامرة في بورتسودان وراءها الاتحاد الفاسد.. والحكام المرتشين.. شفتو كيف الحكم عاد البنلتي؟.. مافي أي سبب يخلي الحكم يعيد البنلتي.. وحتى ناس سيحة لبدو وما جابوها في التفلزيون يوم الجمعة، لأنهم عارفين مافي سبب يخلي الحكم يعيد البنلتي.. وجاتنا معلومات ناس غورماهيا في الخرطوم عزموا ناس الاتحاد في الفندق شاي كيني باللقيمات.. ودي ما غريبة موش غورماهيا دي من سيكافا.. طيب رئيس اتحاد سيكافا منو؟.. هذه المؤامرات ما بتنطلي علينا.. نحن أغوياء وحتشوفوا في الدوري حنهزمهم كيف اتحاد اتحاد وفريق فريق وشارع شارع وزنغة زنغة.. ونحن ناوين السنة دي الدوري نشيلو بدون هزيمة وبدون تعادل ورجالة وحمرة عين.. لكن إذا شعرنا بأي مؤامرة على سيد البلد.. انتو عارفين الغرار حيكون شنو.. وأقول ليكم حاجة لما حسيت بالمؤامرة لما الحكم عاد البنلتي وضاعت.. طوالي انسحبت من المغصورة.. نحن لحمنا مر ما بنقبل الظلم.. أي مؤامرة طوالي بننسحب.. عشان يعرفوا حجمنا وقوتنا..
*.. يا جماهيرنا العظيمة انظروا لجوهرتنا الزرغاء ارتفعت إلى عنان السماء لتؤكد إننا الأعلى والأشمخ مثل شموخ هلال السماء الزرغاء داك ولا نحتاج لكاس سياحة لتأكيد عظمتنا وشموخنا.. وعليكم أن تستعدوا للافتتاح العظيم "أول شهر أبريل" وحتشوفوا أعظم فرق العالم حتجي تلعب في افتتاح أجمل وأروع وأعظم استاد في أفريقيا.. والشماتة بتاعين العرضة جنوب البقولو لصرحنا العظيم زريبة العيش حتشوفوهم يسفوا التراب ويتوارون خجلا.. بل ستشاهدوهم يولولون ويكيلون التراب على رؤوسهم عندما يجي شهر خمسة.. فقد أعددنا لهم مفاجأة حزينة في التسجيلات.. عندما يشاهدون لاعب سوداني في تونس يأتي ويرتدي شعارنا العظيم.. لكن ما تسألوني عن اسم اللاعب هسع لأنه ممكن يعمل لينا مشكلة لو اتكلمنا.. لكن أقول ليكم اللاعب ده حيكون سبب في فوزنا بكأس "الأميرة السوداء" لنأتي به محمول بالجو ونحتفل به في الجوهرة الزرغاء.. وحتشوفوا فريقكم العظيم في بطولة كأس العالم في اليابان.. وناس الشاي الكيني واللقيمات حيموتوا كمداً وغيظاً.. والسلام عليكم(..
* هتافات داوية وتصفيقات وأناشيد سيد البلد سيد البلد.. وقو.. قو.. يا سوبرمان!!

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى