قوقل ‏+‏ ‏
Use the English Language

شعب السودان .. يرفض العشاء - نبض الصفوة امير عوض

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

شعب السودان .. يرفض العشاء - نبض الصفوة امير عوضn

مُساهمة من طرف Admin في الخميس 28 يناير 2016 - 7:32

نبض الصفوة
امير عوض
شعب السودان .. يرفض العشاء
نبض الصفوة‏ ‏
.
★البدايات دائما صعبة..
★لذلك تخوفنا علي المريخ من حمي البدايات..
★و لكن..
★فرسان المريخ كان رأيهم غير..
★حلفوا علينا ما نتعشي..
★هسع البشوف قون أوكرا التاني ده بفكر بعدو في عشاء؟
★ده تورتة..
★عيد ميلاد.. أعلن عن بزوغ شمس هداف الدوري و أفريقيا بإذن الله..
★هدف عالمي..
★لوحة.. تمتع الناظرين..
★خلي السودان كلو نام بدون عشاء!!
★الصفوة ناموا متخمين حد التكريع بالفرحة و الإبهار..
★و ناس قريعتي راحت جاهم ورم في الفشفاش..
★إتخمدوا من سكات..
★بدون يتعشوا برضو..
★و بار الخبز في مخابز السودان..
★و تم توفير كميات من الغاز..
★أوكرا الفنان.. ساعد التنمية في السودان..
★وفر وجبة كاملة علي الحكومة..
★و إتعهد بتوفير وجبات ترفد الميزانية..
★علشان كده ما تستغربوا لو وزير المالية في الميزانية الجاية طلع واردات النفط و الذهب و أوكرا..
★ثروة قومية الولد ده..
★علماء الفيزياء في أمريكا حياخدوا أسبوع يتغالطوا في القون ده..
★لعبها كيف؟
★الخلاطة الشغلها قبل يهدف دي علاقتها بالسرعة الزاوية شنو؟
★الميلان الأخدو ده تقديرو الزاوي كم؟
★السرعة النهائية للكورة في التمانيات كم؟
★زاوية التسديد الحرجة!!
★علي سيرة الحرجة دي.. أوكرا أحرج خيارات غارزيتو الماضية..
★زي ده ما بقعد كنبه يا غرزة..
★إن شاء الله عندك تردد النيلين.. و تكون تابعت المتعه دي!!
★هي النيلين ما بتصل فرنسا صاح؟
★والله الوداها عرب سات ده ما كسب فينا خير اصلو..
★عرب سات ده ماف زول بتابعو..
★القنوات الفيهو كلها محنطة..
★نرجع لي قون أوكرا..
★الأول واللا التاني!!
★بالله أوكرا بقي الهداف من قولة تيت..
★الجماعة ليهم حق نفسهم تتسد..
★لسعهم لسعتين..
★سممهم..
★و تراوري ما قصر..
★إشتغل كومسنجي..
★يشيل و يجدع في باصات الأقوان..
★تراوري ده وجعو براهو..
★قريب لي وجع بكري..
★و نفس ألم نجاح علاء الدين و عمر بخيت..
★بعمل للجماعة خمة نفس بس..
★و بخليهم يشعروا بي عدم ثقة في الجيران..
★و عدم الثقة ده بتطور بعد فترة..
★بعد الإسبوع السادس..
★لي )كضمة( إنسحابية.. قريبة لي )كومة( السكري..
★ما بتتعالج إلا بي كأس..
★إن شاء الله كأس عدالة وهمية..
★إنتو مسعولين من الخير..
★كأس العدالة ده الفيفا معترفه بيهو؟!!
★بعد المهرجان و الهلوله الفيهو دي كلها.. ماف جهة معترفه بيهو؟
★لا اتحاد عام..
★لا محلي..
★لا روابط ناشئين حتي..
★كأس وهمي..
★مفروض الفيفا تعمل إدارة تسميها )قطاع الأوهام(..
★ترعي بيها الكاسات دي..
★و التكريمات المصنوعة..
★ذكرتوني..
★بالنسبة للفيفا..
★الأيام دي الدرب سالك للفيفا..
★الماشي فيكم قريب.. يشيل معاهو قون أوكرا..
★القون ده حينافس علي جائزة أجمل أهداف العام..
★في العالم..
★محليا دي إتحسمت..
★قون أوكرا الأول براهو كفاية علي المحلي..
★التاني ده ماشين بيهو قدام..
★حنوصلوا للمحكمة الرياضية برضو..
★لازم القضاة يشوفوهو..
★و نسترحمهم..
★لأنو حيوقفوا أوكرا تلاته سنة..
★بعد العملو في المدافعين التلاته بتاعين الرهيب..
★دي عقوبتها علي الأقل تلاته سنة..
★الخلاطة العملها في المدافع الأخير براها بتوقفو ستة شهور..
★دي ترقيصة )رقصة الموت(..
★دي عندها فصل كامل في لجنة الإنضباط..
★الفيفا ما بجامل في الأمور الزي دي..
★لأنها بتقطع عيش لاعبين..
★بتأدي لشطبهم..
★يعني لو أوكرا لمه في أتير الغرام علي لاين..
★أتير إلا يطير..
★لو رقص مع أوكرا أقل حاجه بتجيهو حصوة..
★أما عمو سيف..
★فغالبا ما حيعلن إعتزالو في اليومين الجايات ديل..
★قالوا أمس ما نام من الحمي..
★يكون إتخيل نفسو مع دفاع الرهيب..
★الليل كلو يرجف..
★الجماعة متخيلينو بردان..
★و هو يهضرب..
★أوكرا لا..
★ما تشوت.. أعكسها بره..
★و توووف أوكرا شات..
★في بلي ستيشن ماف زول بشوت من هنا..
★غايتو أنا صدقت أنو ميسي فيهو حاجة من أوكرا..
★إحتمال للموسم الجاي ميسي يتمكن من تقليد الهدف ده..
★ده لو عايز يخش معانا في أجمل الأهداف العالمية..
★مسكين ميسي..
★مشكلتو كانت في رونالدو..
★أمس طلع ليهو أوكرا الفنان..
★البرغوث إتشحتف..
★خليك مع رونالدو يا ميسي..
★أوكرا ده صعب عليك..
★أوكرا ده شغلو شغل رياضيات..
★جبر و حساب مثلثات..
★نظرية فيثاغورث..
★بتاعت الوتر..
★الهدف ده مشي في الوتر ذاتو..
★باقي الأضلاع كانت للمدافعين..
★علشان كده سمعنا بي كسر الضلوع..
★لكن تعرفوا..
★الحمدلله أوكرا ده ما لعب الموسم الفات..
★كنا حنكون جاين من كأس العالم للأندية مرهقين..
★و القون الحضرناهو أمس ده كنا حنشوفوا من فترة..
★حيبقي برنامج من الأمس..
★و المستشفيات كانت حتتملئ..
★ما بالزوار..
★بالمرضي..
★ناس )الكومة( كلهم حيتكوموا فيها..
★حيختوهم كوم كوم..
★كوم مباراة الإتحاد الجزائري..
★كوم مباراة مازمبي الأولي..
★كوم كورة الرد..
★ده حيكون أكبر كوم..
★لأنو في الوقت داك طيش الأربعة الكبار طار..
★الله شافكم..
★لكن ضروري الزول الحيودي قروش غارزيتو..
★الطالبهم مننا و من الهلال..
★ضروري يشيل معاهو فيديو القون التاني..
★الخواجة ده إلا يشوف القون ده..
★علشان يفهم أنو جمهور المريخ بفهم كورة أكتر من الخواجات و الخبراء الأجانب كلهم..
★علشان يعرف ليه الناس رفضت شطب أوكرا السنة الفاتت..
★و ليه كانوا بهتفوا بإسمو..
★جمهور الصفوة المعلم ما براهن إلا علي الخيل الرابحة يا غرزة..
★و إتخيل معانا أوكرا لاعب ضد مازمبي..
★كنت شلت النجمة التانية..
★و نحن شلنا النجمة التانية..
★و كان أوكرا قابل ميسي في نهائي العالم..
★و كان العالم عرف حاجه..
★و نصيحة أخيرة.. لكل لاعبي ممتاز سوداني..
★ماف واحد يتشالق و يحاول يقلد قون أوكرا..
★نحن ما ناقصين لاعب يجيهو إنزلاق غضروفي أو إلتواء في المصارين..
★شاهدوا و إستمتعوا.. بس ما تقلدوا..
★زي شغل مصارعة )WWE(..
★stay safe.. don’t try this at home.
★نبضات أخيرة★
★الحمد لله من قبل و من بعد علي نعمه الإنتصار..
★فاقدين: العقرب و كوفي و رمضان و ضفر.. و برضو غالبين..
★مريخ )٢٠١٦( بمن حضر..
★الدماء الحارة )ابراهومة و شمس الفلاح( بثت العافيه في جسد الزعيم..
★و لياقة سلمون جابسون دون الوسط بكثير..
★تراوري لاعب بمزاج عالي.. و شكلنا موعودين بموسم التميز..
★عنكبة قدم نفسه بصورة جيدة..
★و دخول علاء أثبت أن الذهب لا يصدأ..
★تمنينا مشاهدة عطرون..
★تشجيعنا و دعمنا الكامل للنجم علي جعفر و هو يلج التشكيلة الأساسية..
★نحترم خيارات الخبير )لوك( و نعلم أنه لم يستقر علي التشكيلة الأساسية المكتملة حتي الآن..
★أحلي إنتصار.. و تتويج لكوكب الجمال.
★نبضة أخيرة★
القادم أحلي بإذن الله.

Admin


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
تستطيع الرد على المواضيع في هذا المنتدى