تابعونا عبر فيس بوك

قوقل ‏+‏ ‏
Use the English Language

دق الدلجة محمد عبد الماجد - جركانة العسل

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

28012016

مُساهمة 

دق الدلجة محمد عبد الماجد - جركانة العسل




دق الدلجة
محمد عبد الماجد
جركانة العسل
دق الدلجة محمد عبد الماجد‏ ‏
.
• اول مرة شافها..ما قدر يقول ليها اي حاجة.
• اتلملم في دواخلي متل عملية الرياضيات الما بطلع فيها باقي.
• الجغرافيا.
• الكيمياء.
• الفيزياء.
• التاريخ.
• حساب المثلثات – الدرسها كلها طارت من رأسو.
• رأسو الكبير داك ما فضل فيه غير )لا تكتب على الهامش(.
• وانبوبة الغاز بقت بـ )75( جنيه.
• تقول عاوزة تدخل طب!!.
• )لا تكتب على الهامش( ما عارف العبارة دي لزومها شنو؟…عشان يكتبوها لينا في كل ورقة امتحانات.
• العبارة دي مبارينا من سنة رابعة ابتدائي.
• فلهمة مدارس ساكت.
• عمرنا كلو كبينا في )الجغرافيا( ما طلعنا منها بي اي شيء.
• لا مشروع الجزيرة.
• ولا مليون ميل مربع.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• لكن الزولة دي يقولوا ليها شنو؟.
• وقت تقيف في بداية الشارع – الفصل كلو بيسمع جدول سبعة.
• الحافظ والما حافظ ..بيسمع.
• يا ربي يكلمها عن )شيبوب(.
• لكن يقول ليها شنو عن شيبوب؟.
• دي شيبوب ما بتكون فاهمو عنو اي حاجة.
• يكلمها عن هدف كينيدي الامس.
• هدف كينيدي بيظهر في عسل كادوقلي.
• يحدثها عن النحل.
• يا زول – الزولة دي مرتاحة بتكون )دوشتنا( دي ما عارفة فيها اي حاجة.
• ما ناقشة شيء.
• دي تكون فاكرة )مدني( عاصمة فرنسا.
• وتكون فاكرة عبدالفضيل الماظ ..بطل مسلسل تركي.
• دا ما عارفة اي حاجة.
• ولا عايشة في حياتنا دي.
• قالوا ليك دا مرة جابوا ليها دمعة بي قراصة ..ساعة ونص تصور فيها بالموبايل.
• لا خلت سيلفي ولا خلت صورة الغلاف.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• يا ريت لو الواحد كان بيعرف )فرنسي( – كان قدر يقول ليها حاجة.
• اصلو النوع دا – إلّا فرنسي.
• العربي حقنا دا ما بنفع معاها.
• العربي حقنا دا عندها زي )القراصة(.
• زي العصيدة.
• شافها حرن.
• دخل في مساماتو ولبد.
• ما قدر يقول ليها اي شيء.
• لا انت بنت منو؟.
• لا اسمك شنو؟.
• ولا شايفك وين؟.
• ولا حتى الساعة كم؟.
• ما عرف يقول ليها اي حاجة.
• يا ربي يكلمها عن )الغاز(.
• يا زول انت ما نصيح ..والله دا لو انبوبة الغاز عملوها بـ 900 جنيه ما فارقة معاهم.
• فكر.
• اتفلت لى وراء.
• عاوز يشوف في زول شايفو.
• طلع الموبايل – فتح الرسائل.
• اتشجع كدا ..واتنبل قال يكتب ليها جواب.
• يحكي ليها اي حاجة عن شيبوب.
• من )المهدية( لي )شبيبة القيروان(.
• تلب كيف؟.
• واتسلق المواسير.
• يا زول – الزولة دي ما بتكون عندها خلفية بـ )شيبوب(.
• لا بتعرف شيبوب لا مزمل ابوالقاسم.
• والله دي تجيب ليها سيرة )سلك( تمسكها حمى )15( يوم ما ترفع رأسها.
• لكن يقولوا ليها شنو؟..الزولة دي؟.
• شبيبة القيروان ذاتها ما بتكون عارفها فريق كورة وإلّا اكلة شعبية؟.
• شن خبرها كمان هي بالحاجات دي.
• معقولة هدف كينيدي امس ما سمعت بيه.
• البلد دي كلها وقفت فيه.
• الناس بتشهق متل اول الصباح.
• هدف وليد الشعلة ..ما في زول جاب ليه سيرة ليها.
• والله لو وافقتنا – الزولة دي الحاجات دي كلها ما بتكون عندها فكرة فيها.
• الزولة دي تلقاها لا بتعرف رمضان عجب.
• ولا احمد عبدالله ضفر.
• لكن ما في حل.
• بتعرف او ما بتعرف.
• لازم يكتب ليها جواب ..ويرتاح.
• ما معقولة الليل كلو مساهر زي سيد الضرس.
• وهي مرتاحة وما جايبة خبر.
• حقارة والله.
• احسن يقول ليها ويرتاح من )الطاحونة( المربوطة في قلبو دا.
• من الساقية الشغالة في اذينو الايمن.
• اتحمس.
• اتشجع.
• وكتب ليها الجواب.
• لكن عشان هو زول مهذب شديد – ما قدر يقول ليها اي حاجة في الجواب.
• كلمة ما كتبها.
• قال بتفهمها براها.
• الموضوع ظاهر وما عاوز ليه تفسير.
• بعدين انا وقت بقول ليها في الجواب – ما اقول ليها عديل.
• رمى الجواب.
• زمان ارسال الجواب بقولوا عليه )رماهو(.
• هسع ما عارف بقولوا عليه شنو؟.
• زولكم مع انو ارسل ليها جواب فاضي – قاعد منتظر الرد.
• قال بترد عليّ.
• ان شاءالله بي جواب فاضي برضو.
• وانا بفهم الحاصل.
• اصلو ما عاوزها تقول لي حاجة.
• بيفهمها وهي طايرة.
• لكن زولكم عشان شقى – الجواب الفاضي الكتبو ليها وقع في ايد اخوها.
• والبنت عندها اخو – وائل جمعة بس.
• ما بتفاهم.
• النوع الصعب داك – وقت تصلو رسالة بيتكي الموبايل ويعاين ليها بي طرف عينو.
• رسايلو كلها ..عباس اتنقل الى جوار ربه …والخليفة طقتو عربية في شارع التحدي – وحسن اتوفى الى رحمة مولاه.
• رسائل موبايلو كلها كدا.
• الزول الصعب دا – الجواب وقع في ايدو.
• اخو البنت شال الجواب ..ومشي عليه.
• قال ليه يا زول دا شنو البتعمل فيه دا؟ – انت بتكتب جواب لي اختي؟.
• زولكم نكر ليك الجواب حطب – قال ليه والله ما كتبت ليها اي حاجة.
• اخو البنت طلع الجواب – وقال ليه طيب دا خط منو؟..والله انا خطك وسط الف جواب بعرفو.
• صاحبكم قال ليه خط شنو يا زول؟..الجواب فاضي – كلمة ما فيه ..تقول لي دا خطك.
• اخو البنت قال ليه ما عشان كدا بقول ليك دا خطك ..من يومك عارفك جبان ..طول ما قدرت ما تكتب اي حاجة – تبقى دا انت…ما في زول بيعمل الحركة دي غيرك…بعدين انت العرفك انو الجواب فاضي شنو؟..لو ما رسلتو انت.
• اخو البنت حلف وقال ليه : والله يا زول ما تكلمني وتقول لي البنت دي كنت عاوز تكتب ليها شنو؟..إلّا اعلقك في الشجرة دي.
• والله دا الفضل – حصلت كمان تكتب لي اختي جواب.
• زولكم اتكشف ..لقى نفسو اتعرف – قال احسن يعترف.
• قام قال لي اخت البنت – والله يا ابوالشباب انا كنت عاوز اكتب ليها عن )شيبوب(.
• اخو البنت قال ليه عن شيبوب تكتب ليها شنو؟.
• قال ليها اكتب ليها الزول دا قفز كيف من الطابق الرابع.
• وكيف اتسلق المواسير.
• ورجع كيف للمريخ.
• وناس الهلال رجعوها تاني كيف؟.
• ومتين ظهر في شبيبة القيروان؟.
• وشهر خمسة ح يرجع كيف للهلال.
• اخو البنت )هلالابي( – قال ليه طيب وقت عاوز تقول ليها كدا – ما تجي بالباب عديل كدا – في داعي للف والدوران دا.
• الولد حريف – قال ليه – انا قلت ما اجيكم عديل – اجيكم بـ )شبيبة القيروان(…عشان ما نتكشف!!.
• اخو البنت قال ليه والله ما فيك اي كلمة.
• منتظرنك بكرة العصر ..وجيب اهلك معاك – عشان نعقد ليك طوالي.
• موضوع الزول دا هسع ذكرني ليك هدف )كينيدي(…في هلال كادوقلي.
• كينيدي طلع صاحب )جركانة العسل(.
• النحل الظهر امس الاول.
• امس شفنا عسلو.
• حكاية جركانة العسل دي عاوزة ليها عمود براهو.
• لو في فرصة بحكي ليكم قصتها.
• خلوني هسع مع شيبوب.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• ………..
و
• يلا يا شباب.
• يلا يا روابط.
• عاوزين نركز في مباراة الابيض.
• مباراة الابيض هي الاهم.
• وهي الاصعب.
• طبعا اصعب مباريات الولايات السنة دي في الابيض وشندي.
• ثم عطبرة وكادوقلي.
• ثم كوستي.
• ما عاوزين نفقد اي نقطة.
• الانتصار بلم الناس.
• وبجمع الاهلة.
• لموا كل الناس.
• وخلوهم يفرحوا.
• سعيد ان وليد الشعلة سجل هدف.
• وليد الشعلة يحتاج لمن يكتشفه.
• عاوز الفرصة.
• لو دخل التشكيلة شيبوب ما بطلع.
• شيبوب شنو؟.
• قصدي وليد الشعلة ما بطلع.
• تلخبطوا الزول.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• ………
• السيدة )ل( – قاعد معاها ساعة ونص بدل ما يحدثها عن عيونها الكبار– بيحدثها عن ازمة الغاز.
• وقرّط على كدا.

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى