تابعونا عبر فيس بوك

قوقل ‏+‏ ‏
Use the English Language

فرنسي من ولاد الكلاكلة اللفة - دق الدلجة محمد عبد الماجد

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

02022016

مُساهمة 

فرنسي من ولاد الكلاكلة اللفة - دق الدلجة محمد عبد الماجد




دق الدلجة
محمد عبد الماجد
فرنسي من ولاد الكلاكلة اللفة
دق الدلجة محمد عبد الماجد‏ ‏
• من اغرب الحاجات العندنا في السودان – اننا بنجيب لينا )مدرب اجنبي( خطير…ونقعد ننظر ليه.
• ونوريه يشتغل كيف؟.
• مدرب قاطع..بنقول دا اخطر مدرب في العالم.
• نستقبلو من مطار ابوظبي.
• ونتسابق على الحوار معه.
• ونشر صوره.
• وسيرته الشخصية.
• بنتعاقد معاهو.
• وقت نتفق معه …الجرايد ما بتصدق.
• بتقول ليك الهلال يتعاقد مع مدرب البطولات.
• مدرب الانجازات.
• وبنعمل شرط جزائي في العقد.
• وبعد المباراة التانية ليه.
• المباراة التانية طوالي..بنكفر نشيلو.
• ندور ليك فيه زي الما حصل حاجة.
• نخلي اي حاجة ونقبل على المدرب.
• نشيلو ليك – ونقول ونحن قاعدين في مكاتبنا دي ..المدرب دا ما عندو شيء.
• ودا مدرب بتاع )تنظير( ساكت.
• وما فاهم حاجة.
• نشيلو وندفع ليه الشرط الجزائي.
• كأننا بنستمتع بي دفع الشرط الجزائي.
• انتوا وقت عقليتكم كدا ..بتجيبوا ليكم )مدرب اجنبي( ليه؟.
• بتعملوا ليه شرط جزائي ..وقت بتشيلوه بالسرعة دي.
• والله لو دي حالتكم – اصلو ما مفروض تجيبوا ليكم مدرب اجنبي.
• مدرب اجبني عشان شنو؟.
• عشان تشيلوه.
• عشان تعلقوا فيه مشاكلكم.
• المدرب الاجنبي انتوا ما عندكم ليه صبر.
• جيبوا ليكم مدرب وطني ساكت.
• جيبوا محسن سيد.
• برهان تية.
• محمد محي الدين الديبة.
• جيبوا مازدا ذاتو.
• وابقوا شيلوه ..ورجعوه على راحتكم.
• مازدا دا هسع من الكورة دي بقت )مدورة( – هو مدرب المنتخب الوطني.
• من زمن ناس فاروق جبرة لاعبين كورة – هسع فاروق جبرة بقى مدرب – هو مدرب المنتخب.
• وهيثم مصطفى ذاتو بقى مدرب.
• ومازدا لغاية الآن بيدرب في المنتخب.
• الاتحاد العام وقت يضغط خالص كدا بقوم يشيل مازدا.
• عشان شنو؟.
• عشان يرجعو تاني؟.
• هسع الـ )15( سنة الاخيرة دي – في زول بتذكر ليه مدرب للمنتخب الوطني غير مازدا.
• يعينوه.
• ويمسكوه المنتخب.
• نقوم نخسر.
• ونخسر.
• يقوموا يشيلوه.
• يقوموا يقولوا المرة دي عاوزين لينا مدرب اجنبي.
• يدرسوا ليهم سيرة عشرين مدرب اجنبي.
• ويختاروا ليهم مدرب اجنبي.
• يقوموا يقولوا ليك الوزارة رفضت تدفع مرتب المدرب – عشان كدا ما عندنا خيار غير مازدا.
• يلفوا ويجوا لي مازدا.
• يشيلوه ويرجعوه.
• المدر القديم مازدا.
• المدرب الجديد مازدا.
• زي الزول الاسمو على جدو ..تقراه من الاتجاهين.
• زي علاج الملاريا.
• قدر ما تفحص يقولوا ليك ملاريا.
• ويكتبوا ليك نفس الدواء.
• انتوا مازدا دا هو المدرب الوطني الوحيد؟.
• في ناس فاروق جبرة.
• في شرف احمد موسى.
• في الفاتح النقر.
• وطني لي وطني شكلوا لينا شوية في الوطنيين.
• ليه وقت الاتحاد يبقى على المدرب الوطني ما بكون عندو خيار غير مازدا.
• ناس شرف والفاتح النقر وفاروق جبرة ديل ما عندهم )رقم وطني(.
• لو ما عندهم رقم وطني طلعوا ليهم رقم وطني من ابيي.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• هسع نحن عاوزين نحكم على مدرب فرنسي من خلال مباراتين.
• عاوزين نشيل مدرب بعد مباراتين.
• مباراة انتصر فيها.
• ومباراة اتعادل فيها.
• وعاوزين نشيل المدرب.
• وقت عاوزين تشيلوه بالسرعة دي جايبنو فرنسي ليه.
• كان تجيبوه من السوق العربي دي.
• فرنسي على شنو؟.
• وانتوا صبر على الفرنسيين ما عندكم.
• اي واحد فينا عامل ليك فيها مدرب.
• الصحفي والاداري والمشجع العادي.
• الواحد فيهم يقول ليك ..الزول دا ليه بيلعب ابوعاقلة طرف يمين.
• سيسه مالو؟.
• وليه طلع موكورو.
• وليه ما بيبدأ بي ايشيا.
• يا جماعة الزول دا لو ما بعمل الحاجات دي يبقى ما مدرب اجنبي.
• جيبوا ليكم صحفي ..وقت شاطرين كدا في الشغل الفني.
• المدرب من حقو يطبق اي نظرية في رأسو.
• كل ما النظرية تكون غريبة ..كل ما كان المدرب شفت ..وعندو حاجة في رأسو.
• يعني الزول دا لو ما جاب ابوعاقلة ولعبو طرف يمين ..يبقى لا اجبني ولا حاجة.
• الزول دا لو كان تقليدي ..بيلعب ليك ابوعاقلة ارتكاز.
• وسيسه طرف…بيبقى فرقو من محسن سيد شنو؟.
• انتوا وقت عاوزنو يعمل ليكم كدا ..جيبوا ليكم اي مدرب )محلي( ممكن يمشي ليكم بي الوصف حقكم دا.
• جيبوا ليكم صحفي.
• الزول دا التدريب درسو.
• وعندو فيه خبرات.
• وبعرف لغة فرنسية كمان.
• عاوزين تجوا انتوا في مدرجاتكم دي ..توروهو بيعمل شنو؟.
• لو كافالي بينفذ كلامكم دا ..بتصرفوا ليه بالعملة الصعبة ليه؟.
• جايبين ليه مترجم على شنو؟.
• اعطيتوه شقة وعربية ليه؟.
• كافالي دا في مباراة هلال كادوقلي جاب وليد الشعلة من وين ما عارف ؟ واشركه.
• وليد الشعلة جاب ليه قون.
• ما كان في اي زول بيتخيل وليد الشعلة ح يشارك في المباراة.
• كل الناس كانت بتتكلم عن صلاح الجزولي…وولاءالدين.
• ما في صحفي واحد جاب سيرة وليد الشعلة.
• في مباراة هلال الابيض ..كافالي اخرج وليد الشعلة…الجماعة قاموا فيه قالوا كيف الزول يطلع وليد الشعلة؟.
• وليد الشعلة عرفت من متين؟.
• وليد الشعلة جبتوه انتوا؟.
• في مباراة هلال كادوقلي ..اشرك كافالي ايشيا كبديل.
• ايشيا جاب ليه قون.
• الناس كلها قالوا الزول دا معلم.
• في مباراة هلال الابيض …ايشيا ما جاب ليه قون ..الجماعة قالوا ليه ايشيا ما بيبدأ وهو الذي سجل في المباراة السابقة.
• يشرك ليهم نيسلون.
• يقولوا ليك وين نزار حامد؟.
• يشرك نزار حامد ..يقولوا ليك نيسلون ما مفروض يقعد برة.
• يشرك وليد الشعلة ..يقولوا ليك وين ولاءالدين؟ ..الزول دا ما بدوه فرصة.
• يجيب ليهم ولاءالدين يقولوا ليك وين وليد الشعلة؟ ..المباراة السابقة جاب ليه قون.
• الناس دي عاوزة شنو؟.
• بالمناسبة عندما تحصل هزيمة او تعادل ..ساهل جدا اي زول ينتقد التشكيلة.
• المدرب بيلعب بـ )11( لاعب.
• وممكن يعمل )3( تغيرات.
• يعني كل الذين يشاركوا في المباراة 14 لاعب..عندما تفقد نقاط المباراة من السهل جدا ان تسأل عن الـ )16( لاعب الاخر.
• وقت ينتصر ..ما في زول بقول حاجة.
• بل ممكن يقولوا ليك الاداء بس ما مقنع.
• يا جماعة كافالي دا اسبوعين في البلد ما كملها.
• الزول دا لعب مباراتين.
• عاوزنو يعمل ليكم شنو؟.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• من حق المدرب انو يجرب.
• ومن حقو ان يفعل ذلك حتى في المباريات الرسمية.
• ما في مدرب بيصل الى النتيجة النهائية من خلال التمارين والمباريات الودية.
• المباريات الرسمية ذاتو قاعدين يجربو فيها.
• عشان كدا – ما تسغربوا..الزول دا من حقو يقعّد افضل لاعب في الهلال كنبة.
• ومن حقو يلعب مساوي رأس حربة.
• ويرجع صلاح الجزولي وراء.
• كل هذه الاشياء ..منطقية ومقبولة.
• عاوزين تحكموا على مدرب..احكموا عليه بعد الدورة الاولى.
• بعد الموسم كلو.
• لو كان كافالي بهذا السوء ..وما نافع ..وما عندو شيء ..يبقى الكاردينال هو المسؤول من ذلك.
• معقولة الكاردينال جايب ليه مدرب بهذا السوء.
• عليه يجب ان يهاجم الكاردينال وينتقد ..عشان ما بعرف يجيب مدربين.
• ما معقول اي مدرب يجيبو الكاردينال يشيلو بعد المباراة التانية.
• كدا المشكلة بتبقى في الكاردينال وليس في المدرب.
• كافالي دا ما جابوا صلاح ادريس.
• ولا الامين البرير.
• ولا شبشه.
• ولا عماد الطيب.
• كافالي هذا جابو الكاردينال ..عشان كدا لو في اي مشكلة في المدرب – هاجموا الكاردينال.
• كافالي ذنبو شنو؟.
• عاوزنو يجيب ليكم بطولة الممتاز من الاسبوع التاني.
• الزول دا بيلعب بي عمار الدمازين وابيكو وايشيا وموكورو ولاءالدين وابوعاقلة ..)ديل اول مرة يلعبوا للهلال(.
• عاوزنو يعمل ليكم شنو؟.
• خلوا عندكم منطق.
• وابعدوا من المنطقة الفنية.
• نحن في الغالب …او الصحافة هي البتفسد عمل المدرب.
• الغريب ان صحافة الهلال ..كانت قد رفعت الهلال السماء ..وطلعتوا ليك في الاعدادا اخطر فريق.
• هسع قلبوا على المدرب ..وطلعوا منها.
• وين الفريق الكنتوا بتنفخو فيه داك.
• عاوزين كافالي يشيل الليلة كلها.
• ……..
و
• ثبات الكاردينال وشخصيته تبدأ من خلال حفاظه على استقرار الفريق وعلى استمرار المدرب.
• الكوكي هرب بسبب كلام الجرايد.
• الحمدلله ان كافالي ما بعرف عربي.
• لكن قالوا الزول دا فرنسي ..من ولاد الكلاكلة.
• عارف اي حاجة.
• الهلال سوف يظهر شكله الحقيقي في المباريات المقبلة.
• انتظروا ..وشوفوا الهلال بداية من المباراة القادمة.
• كفي كافالي انه قدم عمار الدمازين بهذه الصورة المدهشة.
• وكفاية ابوعاقلة.
• ووليد الشعلة عاد وظهر معه.
• انتظروه – الزول دا عندو الكتير.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• ………
• السيد )ل( – الصبر ذاتو الايامات دي عاوز ليه قروش…ما في صبر بدون قروش.
• وقرّط على كدا.

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى