قوقل ‏+‏ ‏
Use the English Language

دق الدلجة - كريم الحسن..تاني ما تجيبوه في مباراة )متلفزة(

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

14022016

مُساهمة 

دق الدلجة - كريم الحسن..تاني ما تجيبوه في مباراة )متلفزة(




دق الدلجة
محمد عبد الماجد
كريم الحسن..تاني ما تجيبوه في مباراة )متلفزة(
دق الدلجة‏ ‏
• الآن اتضح لنا لماذا يشارك علي جعفر بكل سلبياته في دفاع المريخ بشكل اساسي.
• علي جعفر بالنسبة ليه )كابتن ماجد(.
• علي جعفر بالنسبة ليه ..دفاع المنتخب السوداني باكمله سنة 1970.
• وجدنا العذر للجهاز الفني للمريخ في اشراك علي جعفر كلاعب اساسي في ظل
وجود كريم الحسن كبديل له.
• الزول دا من اليوم وصاعدا ننصحه يفتح ليه محل توكيل غاز.
• وقروش المريخ فيه ..منها العوض وعليه العوض.
• كريم الحسن افضل ليكم تمسكوه )طبيبا للفريق( من ان تشركوه في مباراة رسمية.
• احتمال يكون في )الطب( افضل من )الكورة(.
• غايتو لو دي كورتو ..قطع شك في )الطب( بكون افضل…حتى لو كان حقنة ما
بعرف يضربها في الطب.
• لكن في كل الاحوال …ح يكون افضل من ان يكون لاعب كورة.
• معقولة مدافع ..شغال الى الآن بنظام )التقريشة(.
• يتلفت ويقرش.
• تقول بيلعب قدام بيتهم.
• كريم الحسن اي كورة استلمها قبل على جمال سالم وقرشها ليه.
• ظاهر عليه مدافع قديم.
• دفعة ابراهيم عطا وكمال عبدالغني.
• جريتو في الملعب جرية قديمة.
• جرية الزول وقت يجري ويقيف ويتلفت …)الجرية دي صلاحيتها انتهت(.
• زول تقيل…تقول شايل ليه كاميرا فيديو.
• انتوا المحترفين ديل بتجيبوهم من وين؟.
• واحد اسمو )النعسان(…والتاني )نايم( عديل.
• مدرب المريخ طلع خطير.
• طلع بعرف كورة.
• البلجيكي بعد )5( دقائق ..قدم ليك كريم الحسن للوسط ورجع علاءالدين يوسف.
• عاوز يحافظ على الهدف.
• يحدث هذا والمريخ يلعب امام النيل شندي.
• النيل شندي الصاعد حديثا للدوري الممتاز.
• تخيلوا كريم الحسن بوضعه هذا في مباراة امام فريق كبير وعنده خبرات في
التعامل في مثل هذه المباريات.
• كريم الحسن لو اكمل المباراة في الدفاع ..شباك المريخ كانت اصيبت بي
)نيران صديقة(.
• محترف تقول جايبنو من )كتاب المطالعة(.
• نوع دا بكون داخل المباراة شايل فرشة اسنانو معاه.
• عشان الظروف ما معروفة.
• يمكن يبيت في اي حتة.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• كريم الحسن متل الزول الشايل )بطاريتو( وحايم في )المطرة(.
• ضاربوه مطرة ..ما بقدر اجزم ليكم.
• اصلا هو كدا ..ما بقدر احدد ليكم.
• الزول دا وقت سجلتوه كشفتوا ليه )النظر(.
• سمعو كيف؟.
• دا )اتقل( مخلوق الله خلقو.
• شفتوا )الضروس(.
• محترف عشان يتلفت ساكت عاوز ليه )شوط(.
• لمن يرفع رقبتو المباراة تنتهي.
• نوع الزول دا ما بشاركو بيه في مباراة تلفزة.
• التلفزة )فضيحة( ساكت.
• والله ما كان اصلو في داعي للفضائح دي.
• نوع الكريم الحسن بشاركو بيه في مباراة )مذاعة(.
• مباراة منقولة بالراديو ..)صوت بس(.
• كريم الحسن لو امس كان مشارك من بداية المباراة …كانت احمد شرفي فتحت
ليها فرع جديد.
• حوادث بحري.
• حوادث ام درمان.
• حوادث الخرطوم.
• كانوا رجعوا تاني فتحوها.
• الزول دا في )10( دقائق قطع قلب الجماعة.
• الحمدلله حلتنا كلها ما فيها مريخابي واحد.
• دا عاوز ليه قوة تحمل.
• عاوز ليه )صبر( براهو.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• علي جعفر مقارنة مع كريم الحسن يعتبر )طارق أحمد آدم(.
• ملاك عديل كدا.
• ملاك رسمي مقارنة مع كريم الحسن.
• انا في البداية قلت )كريم( دا جابها من وين؟.
• الزول دا )كريم( في شنو؟.
• كريم جابها من لعبو.
• كريم شديد ود الحسن.
• يمين ..وانتوا ما طالبني حليفة ..كريم الحسن دا يلموا فيه ناس كاريكا
وبشه إلّا يفرتكوه ليكم حرف – حرف.
• يلقوه ناس ولاءالدين وصهيب الثعلب ..جواز سفرو تاني ما تلمو فيه.
• تقول دافر ليه عربية باسطة.
• تقلة زي دي عمري ما شفتها في الملاعب السودانية.
• شوفوا ليه )كوتشينة( خلوه يتم فترتو )كشاتين(.
• لكن الزول ابو رأس دا ..كوتشينة ما بكون بيعرفها.
• شوفوا ليه )سيجة(.
• في السيجة بكون خطير.
• اخلصوا حقكم منو )سيجة(.
• الكورة اقنعو منها.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• يمكن منح علي جعفر )نجومية( المباراة اذا تمت المقارنة بينه وبين
المحترف الغاني كريم الحسن.
• علي جعفر رحمة.
• عرفنا ليه بتصبروا على علي جعفر.
• المريخاب قالوا يا حليل علي جعفر بعد ان شارك كريم الحسن.
• فرق معاهم.
• علي جعفر مع مستواه المتواضع هذا لو انه اكمل المباراة امس امام النيل
شندي وهو )مصابا( لكان افضل من كريم الحسن.
• لو نزل )مشجع( بي )كمامتو( من مدرجات المريخ بديلا لعلي جعفر لكان ذلك
افضل من مشاركة كريم الحسن.
• الزول دا )الكنبة( كتيرة عليه.
• الزول دا من هسع يمشي يشوف ليه )حصاد( سمسم او قمح يشارك فيه.
• يشوف ليه )نفير( قطن.
• كمينة طوب.
• مخزن سكر.
• كريم الحسن )الكنبة( كتيرة عليه.
• تاني الكنبة ما يقعد فيها.
• بتستحملوه كيف في الكنبة؟.
• كريم الحسن شارك عشرة دقائق في مباراة الامس امام النيل شندي ..قطع ليك
قلوب المريخاب.
• انا قلت )الكمامات( دي لابسنها في شنو؟.
• اتاريهم لابسنها لي كريم الحسن دا.
• جاينو بي كماماتكم.
• وعاوزين تعملوها في )التحكيم(.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• فريق المريخ كل مبارياته التى لعبها في الدوري الممتاز لعبها امام
اندية تفتقر للخبرة.
• لعب المريخ الاسبوع الماضي امام الامير..وهو صاعد حديث.
• ولعب امس امام النيل شندي وهو صاعد حديث ايضا.
• ولعب كذلك امام الرابطة ومريخ كوستي …وهما في مؤخرة اندية الممتاز.
• حتى مباريات الولايات ..لعب المريخ امام هلال ومريخ الفاشر.
• في الوقت الذي لعب فيه امام هلال الابيض وهلال كاوقلي في ملاعبهم ولعب
امام اهلي شندي في ام درمان.
• هذه مباريات صعبة وكبيرة ..لو خاض المريخ مباريات في حجمها كان المريخ
سوف يكون في مرخرة روليت الدوري الممتاز.
• الغريق ماشي عليكم.
• الغريب ان المريخ سوف يلعب مباراته القادمة امام )النسور(.
• كل هذه المباريات مباريات سهلة.
• مع ذلك فان المريخ ينتصر بهدف ..وبتجاوز طرد بكري المدينة وتراوري.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• ………….
و
• فريق النيل شندي …فريق مبشر.
• يمتلك نيل شندي عناصر جيدة ..وجهاز فني مقتدر.
• الفريق تنقصه الخبرات فقط.
• نتمنى ان تكون امكانيات الفريق المادية كبيرة.
• النيل شندي مباراته القادمة امام هلال الابيض في شندي ..وهي مباراة صعبة.
• النيل اذا ما جمع نقاط من الدورة الاولى سوف يكون عليه من الصعب جمع
نقاط في الدورة الثانية.
• الهلال عليه التركيز في مباريات كوستي.
• مباريات كوستي ..اختبار اخر ..ويمكن ان تشكل خطر كبير على الهلال في ظل
الاطاحة بالفرنسي كافالي.
• الكاردينال بكرر في نفس الاخطاء.
• ان لم يتخلص الكاردينال من هذه الاخطاء لن ييستطيع ان يحقق بطولات خارجية.
• استبدال المدرب بعد )5( مباريات وهو متصدر للممتاز ولم تستقبل شباكه
هدفا ..يعتبر )كارثة(.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• ……….
• السيدة )ل( – الصبر في البرد دا ..عاوز ليه )سيوتر(.
• وقرّط على كدا.

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى