قوقل ‏+‏ ‏
Use the English Language

وان طال السفر .. محمد عبدالماجد - البرتقال لا يتحدث )البرتغالية(

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

16022016

مُساهمة 

وان طال السفر .. محمد عبدالماجد - البرتقال لا يتحدث )البرتغالية(





وان طال السفر
محمد عبدالماجد
البرتقال لا يتحدث )البرتغالية(
ـــــــــــــــــ

- الهدوء والوسامة اكتشاف خاص لمحمد سعيد دفع اللـه – الذي كتب للطيف قبل أن يستخرج أوراق ثبوتية ورقم وطني ويعمل ليه )رقم تلفون(
- في فقه )الشوفة( – محمد ميرغني عنده أجمل )ابتهالية( لها ..شلالات فرح كلها في )شفتك وابتهجت وين يا غالي أنت؟(
- الليل زمان فعلاً طويل ..ما زي ليل الأيامات دي لو ما لحقت )العشاء( تشرق عليك الشمس وأنت بي وضوك
- كنا بنعتقد أن اللغة العربية ..هي اللغة دي ... وتاني أي كلام )مجلبق( آخر بكون إنجليزي
• ما تبقى زي الزول اللافح ليه كلام – وعاوز يقولو في أي مناسبة.
• منتظر المناسبة بس.
• الحديث عن )القرع( لن يضير )البطيخ( في شيء.
• توفيق الحكيم كان يكتب عن )حماره( – وكان رئيس المحلية عندما يقابله في مناسبة عابرة يقول لهأوعك تكون قاصدني أنا بالحمار دا(.
• وتوفيق الحكيم كان يضحك بشح واضح وهو قد اشتهر ببخله...وهو يقول له لو فعلت ذلك لاعترض )الحمار(.
• بعد أول حفلات عبدالحليم حافظ كتب ناقد فني حصيف عن توقعه بارتفاع أسعار الطماطم والبيض.
• وذلك كان لأن الجمهور كان يرمي عبدالحليم حافظ وهو في المسرح بالطماطم والبيض.
• قبل أن نأتي للخرطوم )ونفكها في نفسنا( كنا نتوقف كثيرًا عند )النعام آدم( – كان يعجبنا منه )الزول الوسيم في طبعو دائماً هادي(.
• الهدوء والوسامة اكتشاف خاص لمحمد سعيد دفع اللـه – الذي كتب للطيف قبل أن يستخرج أوراق ثبوتية ورقم وطني ويعمل ليه )رقم تلفون(.
• وكان عندما نسمعه في )راديو( قديم ....حجارتو شغالات بـ )الدعوات( وبركة رضا الوالدين وهو يغني )لا شوفتن تبل الشوق ولا ردن يطمئن(.. نقوم ونقع.
• طريقة النعام آدم في أداء هذه الأغنية ..طريقة )أوبراوية( – لم نكن نعرف غناء )الأوبرا( إلّا كنا نتلمسه في طبيعة صوت النعام آدم وهو ينزل ويطلع في )الوصفة(.
• يخش بيك في حتة.
• ويرجع براهو.
• ذلك يوضح عندما )يعرض( إلى )قولن ليه ليلو طويل طولاً يجنن(.
• النعام آدم كان بجيب ليك )طول( الليل قدامك.
• الليل زمان فعلاً طويل ..ما زي ليل الأيامات دي لو ما لحقت )العشاء( تشرق عليك الشمس وأنت بي وضوك.
• كنا بنتخيل الزول دا قاصدنا - )الشوفة( وقتها كانت )مستعصية( ليست كما هى الآن مبذولة بغير جهد وغير شوق.
• في فقه )الشوفة( – محمد ميرغني عنده أجمل )ابتهالية( لها ..شلالات فرح كلها في )شفتك وابتهجت وين يا غالي أنت؟(.
• الشوفة كانت الوكيل الرسمي للبهجة – ذلك كان قبل أن تكون )البهجة( عبر استنفار وسائل غير شرعية.
• وقتها كان محمود المليجي يظهر في مسلسل عربي ...كنا ننتظره عند الثامنة ليقطع التيار الكهربائي.
• المسلسل كان )13( حلقة ..ما زي هسع ..المسلسل يشتغل من الثانوي إلى أن تتخرج من الجامعة ما ينتهي.
• 13 حلقة بنشوف فيها تلاتة حلقات فقط ..والباقي بنتمو )قوالات(.
• كنا بنعتقد أن اللغة العربية ..هي اللغة دي ... وتاني أي كلام )مجلبق( آخر بكون إنجليزي.
• يعني كنا بنحسب )الطنطنة( دي إنجليزي.
• الواحد يتكلم تحت نخرتو ..ويضغط على السين ..فكرتنا عن )الإنجليزي( كانت كدا.
• مرة جانا )إنجليزي( في الحلة.
• الإنجليزي دا قدر ما صاقعناه ما فهمنا منو حاجة.
• عملنا ليه )ليمون( ما فهمنا شيء.
• وصفنا ليه )المحطة( ما فهمنا شيء.
• آخر حاجة في واحد مننا قال امشوا نادوا ليه )التريم ود العوض( – الزول دا ما في زول بتافهم معاهو غيرو.
• جرينا على )التريم ود العوض( لقيناها فاكي ليه )راديو( قدامو وبيربط فيه.
• الراديو ما فاهم فيه حاجة.
• التريم ود العوض كان عندو شوية )إنجليزي(.
• إنجليزي بيتزا ساكت.
• بيتزا وسجنال تو.
• التريم ود العوض وصل المنطقة والخواجة دور ليك في )النضمي(.
• إنجليزي صر.
• أقل حاجة فيه )فش(.
• ما فيه تاني حاجة أقل من كدا.
• يا التريم ود العوض الزول دا بقول ليك )فش( ..يا التريم منطقو ..اقنعو يا التريم الزول أبو عوينات متل ملاح الخضره دا.
• بعد ساعة ونص ..قلنا للتريم ود العوض – الخواجة الما عندو رأس دا بقول في شنو؟.
• التريم ود العوض قال لينا بقول في العقوبات الأمريكية على السودان.
• قلنا ليه والدخل )الفش( في العقوبات الأمريكية شنو؟...الزول دا فعلاً ما عندو رأس.
• الجماعة من سمعوا كلمة )العقوبات الأمريكية( اتخارجوا.
• واحد وقف مافي.
• الوقت داك كانت الأوضاع صعبة ..يعني لو جبت سيرة )أمريكا( ساكت بيعتبروك )عميل(.
• شوف الخواجة دا ..عاوز يضيعنا كمان.
• وبعيد عن ذلك.
• محمد المكي إبراهيم ...أول زول أثبت لينا علاقة البرتقالة بها.
• أول من استنطق )الرحيق( في قصيدته الحريرية )بعض الرحيق أنا والبرتقالة أنت(.
• التداخل هنا بين أنا وأنت يحدث بين البرتقالة والرحيق.
• ثقافة )البرتقال( دي ما كانت عندنا.
• كنا صعبين شوية.
• لو بالغنا كدا ..بنتمها )دوم(.
• ونبق ولألوب.
• محمد المكي إبراهيم أدخل )البرتقال( في المشاعر – من يومها ...ونحن مدهوشين الدهشة دي.
• البرتقال بقى يتكلم عربي.
• ما شرط البرتقال يتكلم برتغالي.
• حسب فهمنا.
• ميسي بيكفيه محمد المكي إبراهيم عملها ليك في )البرتقال(.
• كان ذلك من ميسي في تنفيذه لضربة جزاء فريقه أمام فريق سيلتا فيجو الأحد الماضي وسجل منها لويس سواريز الهدف الرابع للبارسا في الليغا الأسبانية.
• ميسي نفذ ضربة جزاء جعلت العالم كله يدخل )رابط( الهدف الذي سجله سواريز.
• العالم كلو مقيل في )النت(.
• الغريبة الزول دا لا اتكلم مع سواريز ولا إتلفت عليه.
• ما في زول جاب خبر – ميسي مرر الكورة من نقطة ضربة الجزاء بلمسة على خفيف وجاء سواريز من الخلف وسجل منها.
• الطريقة خادعة وماكرة.
• رغم أن بيريز فعلها من قبل مع هنري لكن هنري لم يسجل منها وفعلها هنري مع ملودا أيضاً واكتملت ، حتى كرويف فعلها سابقاً.
• غير أن الطريقة التى اتبعها ميسي والتنفيذ )الجيد( الذي كان بين ميسي وسواريز كان في منتهى الروعة.
• وأن كان السيناريو قد رسم في التدريبات بين ميسي ونيمار ..لكن سواريز جاء وخطف الهدف.
• الهدف أكد التفاهم والانسجام بين لاعبي برشلونة فهم وصلوا إلى مرحلة أصبحوا لا يحتاجون فيها إلى النقاش.
• لا عربية.
• ولا برتغالية.
• ولا حتى )إشارات( ساكت.
• الكورة مشت في العالم ..ونحن لسه متأخرين ..واقفين في أزماتنا ..وطالعين ليها.
• في واحد زعلان قال :
• الناس بيلبسوا في )الكسكتات( – أنتوا تلبسوا لي في )الكمامات(.
• يمكن ما عندنا موضوع.
• ولا عندنا شغلة.
• كورتنا بقينا نتمها )كسكتات(.
• وكمامات.
• والعالم ماشي ..ونحن واقفين.
• لمن نعمل لينا حاجة كبيرة كدا ..نحوِّل الموقف من مكانه القديم إلى مكان جديد.
• دي العبقرية عندنا.
• الناس تقوم وتقعد.
• الجرايد تتكلم.
• والناس تشتغل )نقة(.
• والعالم ماشي ..ونحن واقفين.
• كوبري كوبر أظن عملوه في )6( شهور.
• نحن بعد التقدم الذي حدث ..والتطور الذي كان في العالم ..صيانته تمت في سنة ونص.
• ميسي تاني لمن يضع الكورة لتنفيذ ضربة الجزاء- الناس ح تقول الزول دا ح يطبق النظرية كيف المرة دي؟.
• ح يعمل شنو؟.
• ميسي دا أتوقع منو أي شيء.
• ممكن يعمل أي حاجة.
• عشان كدا أي حارس بقيف أمام ميسي بكون مشتت الذهن ..وما عارف البيحصل شنو؟.
• الزول دا اتجاوز )التوقعات(.
• فات )الخيال( بي غادي.
• ناس المريخ لغاية الآن بتحدثوا عن هدف محمد كوكو التسلل.
• يا جماعة ميسي اتجاوز الحتة دي.
• مرق بدري من المنطقة دي.
• وأنتوا واقفين لغاية الآن في )الطابق الثالث(.
• ...........
• ملحوظة : وبنرجع ليكم.
• هوامش
• في انتظار )عصر( تاني فيه مرور الهلال وروعته.
• أقوان العصر زي دكاترة المرور.
• الرابطة كوستي يمتلك مدرب شاطر ..وعارف بيعمل في شنو عمر الملكية.
• عشان كدا الحذر واجب.
• أظن أن مبارك سليمان قادر على التعامل مع المباراة.
• ملعب كوستي أفضل من كثير من الملاعب.
• وجمهور كوستي دائماً مع الهلال.
• قناة النيلين ..عليكم اللـه ما تقسمو لينا الصورة.
• قناة النيلين مباريات الهلال بتقسم الشاشة على اتنين.
• نتمنى مشاركة مكسيم حتى يحتفظ بسجله بشباك نظيفة بإذن اللـه وتوفيقه حتى المباراة السادسة في الممتاز.
• هناك الكثير من نقاط الخلل سوف نعود لها لاحقاً.
• الكاردينال غير مستقر في البلاد وظروف عمله لن تمكنه من السفر دائماً مع الهلال...فكيف يكون الكاردينال رئيس القطاع الرياضي.
• رئاسة الهلال تغطي على كل هذه المناصب.
• هارون خبراته في القطاع الرياضي ضعيفة ..خاصة وهو رئيس لجنة المنشآت.
• نتمنى لاحقاً ألا يُعين الكاردينال محمد عبد اللطيف هارون )طبيباً( للفريق.
• فقدنا عاطف النور ..لا نريد في نفس الوقت أن نفقد فوزي المرضي.
• وابقوا..عارفين.
• ومفتحين كمان.
• الزميل عمر بشاشة قاد )قوون( بإجادة تامة في غياب الزميل طلال مدثر العائد بعد إجازته السنوية ومشاركته الإعلامية في الإمارات.بشاشة صاحب خبرات كبيرة في العمل الصحفي فله كل التقدير.
• الغاليين يس علي يس ومحمد الطيب الأمين شكَّلوا إضافة كبيرة لـ)قوون(.
• .......
• عاجل : الأيامات دي ما في أحلى من مشاهدة مباريات الهلال..إن شاء اللـه فرحتنا مكتملة اليوم‏

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى