المريخ السنة دي لا فريق لا جمال الوالي لا لجنة استئنافات - دق الدلجة .. محمد عبد الماجد

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

26022016

مُساهمة 

المريخ السنة دي لا فريق لا جمال الوالي لا لجنة استئنافات - دق الدلجة .. محمد عبد الماجد





دق الدلجة
محمد عبد الماجد
المريخ السنة دي لا فريق لا جمال الوالي لا لجنة استئنافات

• قالوا ليك في ناس اول مرة يشوفوا ليهم )مطرة(.
• حياتهم كلها ما صادفتهم مطرة.
• جاتهم )مطرة(.
• الجماعة اتهجموا ليك ..قالوا يا ربي دي شنو؟.
• اتخلعوا ليك خلعة شديدة – ما عرفوا يتصرفوا كيف؟.
• في واحد قال ليهم انا ما عارف غايتو لكن الشيء دي بتكون )طراوة( ساكت.
• والمطرة حدها النخرة.
• الزول دا كان اول مرة يسمع بـ )الطراوة( ما بعرف عنها اي شيء ..وقال احسن يستعملها ويدخلها في )جملة مفيدة(.
• موش في مرات في زول كدا بكون لابس نظيف ..بدخل ليكم كلمة )ثقافية( ما عندها اي معنى في جملة مفيدة.
• في واحد تاني – قال ليهم ..ناس الهيئة القومية للمياه مويتهم القاطعة اليوم كلو بدفعوني فيها الشيء الفلاني ..هسع مع )الموية( الكبت لينا من السماء دا ح يدفعوني شنو؟.
• مع الموية دي ..الواحد إلّا يبيع )دهب( المرا.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• ندخل ليكم في الحتة الصعبة.
• فريق المريخ الحالي واضح انه غير مؤهل لتحقيق اي انتصارات في بطولة الممتاز ان قادر الفريق الخرطوم ولعب بعيدا عن العاصمة.
• الجماعة ديل لو مشوا استاد )التحرير( رأسهم بقطع.
• حكايتهم ح تبقى متل حكاية الناس الاول مرة تنزل عليهم )مطرة(.
• المريخ في الموسم الماضي كان افضل كثيرا من هذا الموسم وهو بقيادة الفرنسي غارزيتو الذي لا مقارنة بينه وبين البلجيكي لوك.
• لن تكون المقارنة في صالح البلجيكي لوك إلّا اذا كانت المقارنة في )الشعر(.
• مدربكم دا ما شافين ليه حاجة غير )الشعر(.
• غير دا – فان كل المقارنات سوف تكون في صالح الفرنسي غارزيتو.
• المريخ في الموسم الماضي خسر في ملعبه امام مريخ الفاشر وخسر امام هلال الابيض.
• وكان بالتأكيد سوف يخسر المريخ بجلاجل لو لعب امام الهلال في ملعبه.
• في الولايات المريخ في الموسم الماضي اي منطقة مشي لهيا خسر.
• خسر في شندي.
• وخسر في عطبرة )متعودة دائما(.
• حتى المناقل القريبة دي خسر فيها بثلاثية امام الاهلي مدني.
• فارق النقاط بين الهلال والمريخ كان )10( نقاط لولا تدخل لجنة الاستئنافات التى اذابت هذا الفارق في فنجان.
• المريخ الآن بكل المعطيات ..هو اقل من مريخ الموسم الماضي بكثير.
• في نفس الوقت لا مقارنة بين الهلال في هذا الموسم والموسم الماضي رغم تصدر الهلال للممتاز في الموسم الماضي وتقدمه الجميل الذي كان في البطولة الافريقية…لكن هلال هذا الموسم يبدو افضل.
• وفي الوقت الذي تشير فيه الدلائل على افضلية الهلال في هذا الموسم..نجد ان المريخ كل دلائله تشير على انه اسوأ من الموسم الماضي.
• فلس ساكت …المريخ السنة دي ما عندو فرق من )الامير( البحراوي.
• المريخ لن يكون مؤهلا لكسب اي نقطة لا في شندي ولا في عطبرة ولا كادقلي ولا في الابيض.
• بل ان المريخ لن يكون مؤهلا حتى لكسب نقاط كوستي التى عاد بها الهلال كاملة في اسبوع واحد.
• اما نيالا ..فالافضل للمريخ ان يبحث ليه عن شكوى منذ الآن.
• المريخ السنة دي في استاد التحرير ممكن يتجهجه.
• المريخ في هذا الموسم مع السوء الذي ظهر به – يفتقد )لجنة الاستئنافات( التى قدمت للمريخ في الموسم الماضي ما لم يقدمه له جمال الوالي وبكري المدينة ورمضان عجب وراجي عبدالعاطي.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• عشان كدا ناس المريخ ديل بدل )المشاكل( البعملوا فيها ناس ابوجريشة وعبدالتام في اجتماعات المريخ ..افضل ليهم من هسع يشوفوا ليهم وسيلة جديدة لكسب النقاط.
• الناس ديل السنة دي لا عندهم فريق ..ولا عندهم لجنة استئنافات تجيب ليهم )النقاط( جاهزة كدا.
• ولا عندهم جمال الوالي.
• عشان كدا – احسن ليهم يشوفوا ليهم طريقة جديدة ..وحيلة مختلفة لكسب )النقاط( غير الوسائل الماضية.
• لا عندكم حاجة في )الميادين( السنة دي.
• ولا عندكم حاجة في )المكاتب(.
• اعملوا ليكم مسابقة.
• في زين او في ام تي ام او في سوداني.
• ممكن نحول ليكم )نقاط(.
• اعملوا ليكم )مشروع(.
• ازرعوا بصل..يمكن يطلع ليكم )نقاط(.
• جيبوا ليكم )فكي( هندي..ممكن يحسب ليكم )الكورنر( قون.
• انتوا قايلنها صعبة على الهندي.
• سمير فضل عملها اخطر من كدا.
• جيبوا ليكم فكي )نيجيري(…الجدعة لو فيها نفس بعيد ليكم المباراة.
• بالله الموسم الماضي ..برمجة الممتاز طلعت نسختين.
• نسخة للبرمجة العادية.
• ونسخة تانية للمباريات المعادة للمريخ.
• المريخ السنة الماضية اي مباراة خسرها ..عادوها ليه.
• المريخ في الموسم الماضي ..زي الطالب ..القدر ما يمتحن بجيب 54.
• وفي كل مرة بعيد ..بقول عاوز ادخل طيب.
• 54 بدخلك طيب يا ود الناس.
• والله 54 )قاعة الصداقة( ما تدخلك.
• عاوز تدخل لينا طب بـ 54.
• عاوز تكتل الناس.
• هو الناس الجابو 96 ودخلوا طب ..عملوها لينا كلو )تجارة(..انت بي 54 ..حقنة ما بتعرف تضربها.
• المريخ السنة الماضية جاب 54…وعاوز يدخل طب.
• يعيد وييجب 54 ..وعاوز يبقى طبيب.
• امانة فيك يا سمير فضل – يا اسامة عطا المنان في 54 بتدخل ليها )طب(.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• الفروقات الواضحة بين مريخ هذا الموسم ومريخ الموسم الماضي ..ان علي جعفر في هذا الموسم اصبح )اساسي(.
• ويا ريت لو وقف على كدا.
• على جعفر تتخيلوا بقى يجيب اقوان المريخ.
• كيف ما يجيب الاقوان اذا كان هجوم المريخ فيه عنكبة والنعسان وعبده جابر.
• من الفروقات الواضحة في المريخ ..هذا الموسم والموسم الماضي..ان عمر بخيت اصبح هذا الموسم هو النجم الاول للمريخ.
• واصبح تكل المريخ وعوضهم في )عنكبة(.
• في تراجع اكتر من كدا.
• اما لو اتحدثنا عن الوضع المالي ..فان ميزانية المريخ هذا الموسم لا تختلف عن ميزانية مريخ الفاشر.
• الفلس ممكن يعمل )اصابات(.
• من الفلسة الضربت المريخ هذا الموسم ..ان اي مباراة يلعبها المريخ يفقد فيها عنصر او عنصرين.
• الاصابات الكتيرة في المريخ ..اصابات )فلس( ساكت.
• تراوري اهو قدامكم كل ما يحتاج ليه قروش بيعمل فيها )مصاب(.
• وبكري المدينة شغال بالوردية.
• مباراة يشارك.
• ومباراة بيعمل فيها )مصاب(.
• ورمضان عجب قدمه دخلت الجبص.
• ومحترف المريخ النيجيري ..)اسمو طار مني( وما فاضي ليه ..عمل ليه عملية خشونة في الركبة.
• الحاجات دي في فترة جمال الوالي ما كنا قاعدين نسمع بيه.
• هسع لو شلتوا تقرير الطبيب عن اصابة المحترف النيجيري ممكن يعيد ليكم مباراة المريخ امام هلال الفاشر.
• الغريبة هلال الفاشر لعب 8 مباريات..عندو تلات نقاط فقط.
• التلات نقاط ..هلال الفاشر نقطة قلعها من المريخ.
• في حقارة اكتر من كدا.
• ………
و
• مباراة الهلال امام النسور في استاد الهلال ح تحقق رقم قياسي في الدخل.
• الجمهور بقى ما بيستحمل الهلال يغيب عنه 72 ساعة.
• والمتعة حاضرة.
• امام النسور ح يكون في فهم تاني.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• …
• السيدة )ل( – المطرة الفوق ديك – ما تشتغلي بيها.
• وقرّط على كدا.

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى