قوقل ‏+‏ ‏
Use the English Language

ساخر سبيل .. الفاتح جبرا - جبرا في لندن (2)

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

29022016

مُساهمة 

ساخر سبيل .. الفاتح جبرا - جبرا في لندن (2)





ساخر سبيل
الفاتح جبرا
جبرا في لندن (2)

عند كاونتر البلاغات كان هنالك صول ضخم الجثة متورد الجضوم يجلس على كرسي جلدي دوار ويضع أمامه دفتر البلاغات وقفت أمامه وألقيت عليه التحية :
– صباح الخير
– صباح النور … هل من خدمة أؤديها لك !
– بالحيل يا خواجة
– أنا عاوزأفتح بلاغ
– عماذا تود التبليغ
– إتسرق لينا خط
– What do you mean? A line?….. هل تعني )لاين( ؟
– لا لا يا خواجة ما )لاين( .. ما لاين
– إذا لم يكن )لاين( فما هو إذن؟
وأسقط في يدي إذ يبدو أن حضرة الصول الخواجه يحتاج إلى أن شرح له القصة برمتها ، ليته كان يفهم اللغة العربية كان طوالي فتحتا ليهو مداخلتي مع الشريف )بدر( رئيس مجلس إدارة سودانير عند بيع الخط ففيها حكينا كل الحكاية وهي موجودة في عدد من مواقع الإنترنت .
قطع حبل تفكيري حضرة الصول وهو يقول لي :
– دعنا نقوم بفتح البلاغ وسوف نعلم لاحقاً القضيىة
ثم قام بفتح الدفتر الضخم بعد أن أخذ رشفة من كوب الشاي الذي أمامه وخاطبني :
– الإسم ؟
– الفاتح جبرا
– ما أن سمع حضرة الصول الإسم حتى أخذ في الضحك حتي أهتزت كرشه الضخمة وخاطبني قائلاً :
– أخبار خط هيثرو شنووووووووو ؟
– الله لا كسبك يا خواجه برضو إنتا متابع الحكاية دي وعارف؟
– كيف لا أعلم يا ساخر سبيل؟
– وبرضك عارف إسم العمود؟
– وهل هنالك أحد في العالم لا يعرف واوات هيثرو؟ )مواصلا( كم بلغ عدد الواوات الآن؟
– والله يا خواجة أنا لمن جيت خليت الكسرة الأصلية )واواتا( ذي سبعين كده وكسرة )توجيهات الرئيس( زي أربعين شهريعني )واو( كده !
– كم عمرك مستر جبرا؟
– 58 سنة لكن لمن الخط إتسرق كان عمري 49 !
– ومنذ ذلك الزمن لم تعثرو عليه ؟ وما عارفين الشالو منو؟
– ما ده الجابنا ليكم ذااااتو … أي مسؤول تسألو يقول ليك … التحقيق لسه ما إكتمل والملف حولوهو وين … والشنو ما عارف
– هل لديكم نائب عام ورئيس قضاء ووزير عدل وبرلمان؟
– كوووولهم قاعدين يقروا في الواوات دي .. بس ناس البرلمان ديل أنحنا خاتنهم )للصفقة( !
– لماذا يا سيد جبرا إخترت قسم الشرطة هذا تحديداً؟
– شوف يا خواجة نحنا علمونا في السودان لمن تمشي تفتح بلاغ يقولو ليك إلا في )دائرة الإختصاص( محل السرقة حصلت … يعني كان إتسرقتا في )بيت المال( إنتا تابع للقسم الشمالي وكان إتسرقتا في )الملازمين( إنتا تابع للقسم )الأوسط( مع إنو بيفرقهم شارع واحد .. أها أنا قلتا أجي القسم ده عشان أقرب حاجه لمطار هيثرو محل )السرقة( حصلت !
– تمام … تمام )يمسك بالقلم( : ما هي مهنتك مستر جبرا؟
– والله في الحقيقة أنا محاضر بتاع IT وكاتب صحفي لكن هسه )محقق متفرغ( !
– العنوان ؟
– هنا وللا هناك؟ كان هنا قول )بيت السودان( عشان عاوزين بعد ما نخلص من قصة الخط دي نشوف حكايتو كمان هي شنووووو بالمرة !
بعد أن قام حضرة الصول بكتابة البيانات على دفتر البلاغات الذي أمامه طلب مني أن أعطيه جواز السفر لتسجيل بياناته … وما أن نظر إلى ختم الدخول حتى عقد حاجبيه مندهشاً :
– مستر جبرا أنت لم يمض على وصولك ساعتين !
– أيوه يا حضرة الصول … ما عاوزين نضيع أي دقيقة … القصة دي طولت يااااخ وعايزين نحسما
أعاد لي حضرة الصول جواز السفر ومعه ورقة عليها رقم البلاغ وبياناته وأشار علي بالذهاب إلى مكتب الضابط المناوب لتصديقة !!
– ما أن دلفت إلى مكتب الضابط المناوب وقمت بإعطائه ورقة البلاغ حتى وقف يصافحني قائلاً :
– أخبار خط هيثرو شنووووو )بالإنجليزي طبعن(
– بالله هي القصة دي أتاري أي زول في الدنيا عارفا إلا المسؤولين عندنا .. والله حكمتو بالغة !
– )وهو يمسك بالقلم الأحمر ويوقع( : شوف مستر جبرا خلاس البلاغ بتاعك إتصدق تجينا بكره الساعة عشرة صباحا عشان نديك )الشاويش حسنين( يحقق في القضية دي
– لكن يا سعادتك تدوني شاويش وكمان حسنين !
– مستر جبرا القضية ده مش محتاج ضابط وما عاوز خواجه ذاااتو … ده قضية بسيطة .. وكيل عريف ممكن يشتغلو !
– كسرة :
في حلقة غداً نشوف الحصل شنوووووو … أبقوا معنا … الفاتح جبرا .. من داخل مبني القسم الأوسط … شرطة لندن غرب … العاصمة البريطانية(
كسرة ثابتة )قديمة(:
أخبار ملف خط هيثرو العند النائب العام شنو )وووووووووووو(+)وووووووووووو(+ )وووووووووووو(+)وووو(+)و+و+و+و(+و+)و(+و+و
كسرة ثابتة )جديدة( :
أخبار تنفيذ توجيهات السيد الرئيس بخصوص ملف خط هيثرو شنو)وووو وووو وووو(+)ووووووووو( +)وووو(+)و+و+و+و(+و+)و(+و+و

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى