تابعونا عبر فيس بوك

قوقل ‏+‏ ‏
Use the English Language

توقيع رياضي .. معاوية الجاك .. الليلة يوم الرجال

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

19032016

مُساهمة 

توقيع رياضي .. معاوية الجاك .. الليلة يوم الرجال




توقيع رياضي
معاوية الجاك
الليلة يوم الرجال
#الحديبة_نيوز
# أحـمر لونـو مـن دم الرجال دُكَّـرنا
وتتبعنا السباع في رواحنا وإن بكَّـرنا
ويـن يجد المجال عازِلنا شِنْ أنكـرنا
تعـرفنا الدهـور تثبت نبانا ذِكِــرنا
* الليلة يوم الرجال.
* والرجال القاصدنهم مش لعيبتنا بس
* كل الرجال.. من جمهور وأقطاب وأعضاء مجلس ولاعبين وقدامى لاعبين وجهاز فني
* الليلة عايزين كلنا نكون مشجعين.. أي صحفي أو إداري أو قطب عايزنو مشجع ولابس لبس خمسة
* عايزين نلبس أحمر وأصفر كلنا.. ويا ريت نركز على الأحمر لأنو حلو وبنحبو أكتر وبنتفاءل بيهو
* عايزين كلنا نكون حُراس على المريخ الليلة ونراقب أي منفلت أو مندس عايز يخرب لينا كورتنا ويعرضنا لعقوبات الكاف
* أي واحد يحاول يرمي قارورة موية أو شمروخ أو حجر أو أي حاجة في إتجاه أرض الملعب نقبضو ونسلمو للشرطة طوالي أو ممكن الجمهور يقوم باللازم داخل المدرجات بسرعة قبل تسليمه للشرطة عشان مافي واحد نفسه تحدثو ويحاول مجرد محاولة يبوظ لينا كورتنا
* راقبوا المندسين وكلنا عارفين في جماعة بيدخلوا الكورة وهم حاقدين على المريخ وحا يستغلوا قرارات الكاف الأخيرة ويعملوا على أعمال التخريب عشان الكاف يغرمنا ويعاقبنا باللعب بره القلعة الحمراء وإحتمال بره السودان
* عشان كده كلنا نراقب الحولينا وأي واحد لو حاول مجرد محاولة يرمي قارورة أو طوبة أو حاول يشتم ويعمل ثورة ويهيج الجمهور طوالي نثبتو والجمهور يقوم باللازم زي ما قلنا
* الشغب والصياح في وجه اللاعبين مرفوض والقون ممكن يجي في أي ثانية من المباراة ونحن عايزين اللاعبين يلعبوا بدون ضغوط لكن عايزنهم يكونوا جادين زي الجمهور في المدرجات
* الجدية هي الطريق لعبور الذئاب اليوم وما دام بتحقق لينا الهدف لازم أي لاعب يكون جادي ومجتهد ويخلوا الباقي على أسود المدرجات
* المريخ محتاج لينا كلنا الليلة ولازم يلقانا جوه الإستاد عشان نحرسو ونساهم في رفعة إسمو فوق زي ما عملنا السنة الفاتت وكل سنة
* الكورة ما ساهلة وصعبة عديل حتى لو كنا فايزين على النيجيري بهدف عبده جابر
* عايزين ندخل كورة الليلة على أساس نحنا ما لعبنا في نيجيريا.. يعني نعتبرها الكورة للمريخ على أرضه عشان نكون جادين
توقيعات متفرقة
* ونسي ورفاقه مشكورين كتير على سماحهم بنقل الكورة لمريخاب الداخل والخارج لأنهم بيستحقوا بالجد
* في مريخاب في أقضى أطراف كادوقلي وأقصى مناطق النيل الأزرق وحلفا وديل فيهم ناس عمرهم ما شافوا الخرطوم ولا إستاد المريخ ولا لاعب واحد من المريخ إلا في الجريدة أو التلفزيون لكنهم بحبوا المريخ أكتر مننا وتلقاهم في قراهم بيغالطوا في الجماعة وكأنهم قاعدين جنب حوض السباحة بتاع المريخ
* عشان الحلوين الطيبين الصادقين ديل ونسي ورفاقه قرروا تلفزة الكورة ونحنا بنقول ليهم إنابة عن الجماعة البعيدين داخل وخارج السودان شكرًا ليكم كتير ونرفع القبعات مرات ومرات ليكم لأنكم قدرتو مريخاب الخارج والداخل وكده هم حا يحترموكم وحا يواصلوا في دعمكم في تحويل الرصيد وجمع التبرعات الشهرية عبر مجموعات الواتساب
* قرار تلفزة المباراة من أحلى القرارات للجنة التسيير وجمهور المريخ ما محتاج عدم تلفزة عشان يتجبر يجي القلعة الحمراء وناس المدرجات داخلين داخلين لو تلفزتوها أو ما تلفزتوها
* الإستاد حا يتملئ الليلة وده ما كلامي ده كلام مريخاب كتيرين قالوا نوصلوا للجنة التسيير وطالبوا كل المريخاب بالتدافع لإثبات أن الحشد بالآلاف مسئوليتهم الشخصية حتى لو الكورة متلفزة في عشر قنوات.. التحية لكل أنصار المريخ داخل وخارج السودان
* عشان كده فوق لما كتبنا الليلة يوم الرجال كنا واثقين من رجال المريخ وقوة شكيمتهم وعزيمتهم وحرصهم على تقديم صورة نموذجية زاهية لأنصار الأحمر الوهاج لكل العالم خاصة في أفريقيا بأن تلفزة مباريات الزعيم لا تثنيهم عن الدخول وتقديم الدور المعنوي زي ما شفنا الموسم الفات
* جمهور المريخ أصبح يلعب دوراً يفوق دور المدربين ولهذا يستحقون التحايا الصادقة وهم يؤكدون دومًا أنهم في المقدمة قبل الجميع
* نكرر يجب مراقبة المندسين لأنهم ممكن يخربوا لينا كل الجهود وممكن بسبب الشغب الكاف يعاقبنا وتاني ما نشوف الزعيم بلعب قدامنا وكده ما كويس
* اللجنة المنظمة للمباراة ما عايزين ناس حايمين حول الملعب وما عندهم علاقة باللجنة ولا الجهاز الفني
* في كل مباريات المريخ المواسم السابقة في أشكال محددة تلقاها حول الملعب حايمة قبل )سليمان معدات( يدخل شايل كورو.. وديل من أسباب عقوبات الكاف على المريخ
* المجاملات الضارة بالمريخ ممنوعة ولو عايزين تجاملوهم جاملوهم بعيد من المريخ والإخوة في لجنة التسيير نلفت إنتباههم لظاهرة التواجد الكثيف حول الملعب لشخصيات معينة بدون سبب
* مشجع المريخ محمد الروسي أرسل مؤكدًا إعجابه بمذيعة إذاعة حواس سلمى.. وقال: سلمى قالت كلام حلو وجميل في حق المريخ أمس فلها التحية من كل أنصار الأحمر الوهاج.

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى