غيض من فيض .. خلف الله أبومنذر .. سيكافا وما علينا ان لم تفهم البقر

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

07042016

مُساهمة 

غيض من فيض .. خلف الله أبومنذر .. سيكافا وما علينا ان لم تفهم البقر




غيض من فيض
خلف الله أبومنذر
سيكافا وما علينا ان لم تفهم البقر
#الحديبة_نيوز
# للأسف والوجع والحسرة معا ان الذين ناهضوا وانتقصوا من بطولة شرق ووسط أفريقيا )سيكافا( للأندية وعارضوا واعترضوا مشاركة الهلال فى البطولة لم يقدموا البديل أو الفكرة لاعداد فريق الشباب الذى نراهن عليه فى الحاضر والمستقبل بعد قرار المجلس الاعتماد على الشباب وذلك بعد رهاننا لأكثر من عشر سنوات على المحترفين الأجانب والوطنيين ولم نحقق غير الوصول للدور نصف النهائى للبطولة الأفريقية فى مناسبات.
# لم يقدموا البديل الفني لهؤلاء الشباب ليعجموا عودا مشبعا وصلبا بالخبرات والفنيات والثقة والثبات ويصبحوا الزاد والعتاد والعماد والبشرى والتبشير بهلال الحاضر والمستقبل، وانما قدموا )ونسة ستات شاى فى بيت ظار( رافضين المبدأ والفكرة بدعوى ان البطولة حائط مبكى النادى الأحمر
# سيكافا فكرة وخطوة لاعداد فريق وليس غاية أو هدف وهى فكرة وخطوة منطقية عقلانية لها فوائد فنية وبدنية ومعنوية بلا شك ان أبعدنا التبشير بالفوز باللقب كما أقر الفنيون وأصحاب الشأن هكذا نظرنا اليها وباركناها من أجل مصلحة الهلال وجمهوره وليس انحيازا لزيد أو عبيد
# الفكرة بداية مبشرة بالحاضر والمستقبل ونحن نراهن على الشباب الذى يجد الفرصة الكاملة للمشاركة فى بطولة سيكافا من ثم يواصل المشاركة فى بطولتى الممتاز وكأس السودان هذا الموسم ويجد فرصته فى الموسم القادم على مستوى التنافس الداخلى والخارجى مع مشاركة بعض العناصر المتمرسة وبعد هذا المشوار ان لم نخرج بفريق كامل الدسم عنوانه واسمه ورسمه الشباب فلا بشك سنكسب خمسة أو ستة لاعبين على مستوى من القدرات والخبرات والثقة والثبات وليس شرطا أن ينجح كل اللاعبين.
# هذه سيكافا التى ان بدأنا منها وواصلنا دون تراجع أو نكوص أو تقاعس ولم نستعجل النتائج لأن البناء ليس أمرا سهلا ولا يكتمل بين عشية وضحاها فبكل تأكيد وثقة ستقدم لنا مجموعة من اللاعبين يركضون فى المستطيل الأخضر لسنوات ويعيدوا الأمجاد وان لم يحقق هلال العصر الذهبى وهلال الثمانينات وهلال 2007 الطموحات والانجازات غير المسبوقة فسيكون رهاننا الظافر باذن ناصب السماء بلا عمد على شبابنا الذى سيبدأ من خطوة سيكافا وهذه فكرة سيكافا وما علينا ان لم تفهم البقر.
غيض
# انما الغبطة فكرة لهذا ان كانت الفكرة مفيدة ومثمرة ومبشرة ورشيدة )ما الرشيد على عمر عشان ما تتعقدوا ساكت ( يجب أن نثمنها ونشايعها وندعمها لمصلحة الكيان والمجموعة دون أن ننظر أو نفكر من أين جاءت
وبعيدا عن الأنا والمع والضد التى أقعدت أمم وشعوب وليس ناديا فحسب
# عندما تتبلور وتبرز ونرى مصلحة الهلال ماثلة وفى متناول اليد يجب أن ننبذ الخلافات والأحقاد والصراعات والسخافات حتى لا ندمر الفكرة
# الشئ المؤسف المحزن ان البعض نبذ المبدأ والفكرة وانبرى لتبخيسها وتقريعها دون فهم ) وبونسة ستات الشاى( دون أن يقدم فكرة أو مقترحا أو طرحا بديلا أو يدعو كوكبة من الفنيين المختصين ليقيموا البطولة فنيا.
# عندما كتبت عن موضوع زيارة البعض للأخ الأستاذ رئيس نادى الهلال بمنزله تناولت الأمر من حيث المبدأ الرافض اقتحام خلوة الانسان واقحام أسرته فى أمر قد لا يعنيها ويقلقها ويعصف بسكنها وسكونها والمنزل للسكن والراحة والهدوء ومناقشة قضايا أسرية وليس للعمل أيا كان
# أما فيما يتعلق بوجود كاميرات مراقبة وأجهزة تسجيل بمنزل الأخ الأستاذ رئيس نادى هلال السودان فهذا أمر يخصه ومن حقه فهذا منزله وله مطلق الحرية أن يضع فى منزله أجهزة مراقبة واتصال وتسجيل .
# ويضع كمان كلاشنكوف ودبابات وطيارات مقاتلة) اف16 ( وحرس من الحوثيين وما تنسوا هو رجل أعمال له استثمارات داخل وخارج السودان وقبل ذلك رئيس الهلال ورئيس الهلال زى رئيس أمريكا ولابد من حمايته.
# رئيس الولايات المتحدة الأمريكية داخل مقر اقامته فى البيت الأبيض عندو أجهزة مراقبة وتسجيل وحراسة وتصوير وكلها منفصلة عن نظام البيت الأبيض وممنوع الاقتراب من مقر اقامة الرئيس للكل مهما كان
# ونحن عندنا رئيس الهلال أهم من رئيس أمريكا بل أهم شخصية فى العالم لانو رئيس أمريكا ما عمل للأمريكان جوهرة ونحن رئيسنا عملها
# بعدين انتو البوديكم بيت رئيس الهلال شنو عشان يصوروكم وانتو بتسلمتوا الظرف الماخمج ويسجلوا ليكم وانتو بتشكروا فى الرئيس ؟
# البوديكم بيتو شنو وانتو عندكم الاستاد والنادى ممكن تقابلوه هناك من غير تزعجوا اسرتو ومن غير يصوروكم ويسجلوا ليكم وآدم شاهد
# أمشوا الاستاد ممكن تقبضوا بارتياح يا تمس النمس من غير آدم يشوفكم وكان شافكم زوغوا وسط الجمهور أو اللاعبين وكان آدم قبضكم وعايز يصوركم قولوا ليهو نحن أولاد خالة سيف مساوى وحبوبات مدثر كاريكا
# غايتو فى ناس ملحاحين فى القبض بشكل يعنى لازم يقبضوا لازم يقبضوا لا بعرفوا انك مع أولادك لا بعرفوا عندكم بكا لا ده لا ده
# مرة مشينا بيت بكا ادارى مرتاح أمو ماتت ولقيت صاحبنا هناك.
# أخدنا الفاتحة وجينا طالعين شايفو لافى بره الخيمة وتانى جا وقف فى خشم الباب والناس طالعة وداخلة وعرفت طوالى انو عايز يقبض.
# قلت ما معقول الادارى مهما يكون مرتاح ما ممكن يقبضك فى بكا أمو ويا كافى البلا أمو لسع تربتها لينة والفراش ما رفعوه والبكا لسع حار.
# عشان أخارج الزول الثقيل ده ما يحرجنا ساكت مشيت عليهو وهجمتو ليك قلت ليهو هل تصدق الريس ده نشلوه فى البكا ومشى يفتح بلاغ .
# يا جمصى ربنا يسألك يوم القيامة انت ما رسلت رسالة بالواتساب وقلت لى أنو الصحيفة ضد سيكافا لأنها فكرة صحيفة الأسياد وقلت لى أكتب فى أى موضوع الا ما تشكر سيكافا وده كان سبب الخلاف وتركت أنا قوون؟
# بالمناسبة الموضوع ده أنا ما بسيبو وعلى جثتى لأنو الافتراء ما بنفع معاى وبرجع ليك وما بسيب الموضوع ده لو مشيت اشتكيت للبنتاغون
# ووساطة ما عايز مع احترامى وتقديرى للمتصلين عايز اعتذار فى الصحيفة وفى نفس المكان ونفس الحجم والا معاك والزمن طويل.
# واذا اشتكيت لمجلس الصحافة بكتب ليك فى المواقع الالكترونية وفى صحيفة الواشنطن بوست ويديعوت أحرنوت وبطلع ليك فى القنوات
# مبروك أكبر دعم لمشوار نادى نجمة المسالمة الأفريقي وصلها من قروب مشجعى الدعيتة وارتاحوا الفنانين من الحفل الخيرى الكبير
# يعنى بعد ده ممكن الفنانين ناس سيف مشاكل واسماعيل بزيانوس وصديق بلنجة وسهام لديتر وعزيزة عجور، ممكن يسافروا القضارف
# بالذمة يا معاوية دفع الله أخوى معقول جمعتوا الفكة من قروب الدعيتة وعايزين تستعدوا لوفاق سطيف وتغلبوه وتصعدوا لدور المجموعات.
# غايتو كان القصة بقت فيها قروب دعيتة وشلل أطفال وكلام زى ده يا هو وفاق سطيف العمل فيكم نفس عملية الوحدات الأردنى ويمكن أفظع.
# انتو بدل تساهروا وتجمعوا فى الفكة من القروبات أحسن أمشوا للكاردينال وقولوا ليهو نحن من طرف شيبوب وهو ما بقصر معاك.
# خلاص أفطروا سمك ولحمة محمرة وأشربوا عصير برتقال بى فكة القروبات لأنو آدم جنو وجن زول يجيهو الصباح فاطر بى موية فول لأنو فى صورة أشعة وموجات صوتية والفول ما بظهر فى صورة الأشعة
# غايتو يوم السبت الساعة عشرة مساء بنسمع خرج ولم يعد حتى الآن أوصافه كالآتى: أحمر اللون، عيونه صفراء من اليرقان ، قصير العمر فى البطولة الأفريقية، شعره النعسان، مدعوم من قروبات الدعيتة والدخينات والشقيلاب ويقام المأتم بالعرضة جنوب بعد الهدف السابع لوفاق سطيف
# غايتو يا أسامة ونسى أخوى بقول ليك النصيحة عشان تريح نفسك بدل كل يوم تقوم بالليل مخلوع وتدور العربية تمشى النادى وتقيف الليل كلو تحسب فى فكة القروبات وترجع الصباح عشان تجدد الثقة فى على جعفر
# بنصحك يوم السبت من الصباح بدرى تقوم تسلمهم فكة القروبات يشتروا بيها طحنية فطور للاعبين وتجدد الثقة فى على جعفر والنعسان مرة واحدة وزوغ خليهم ياكلوا نارهم براهم لأنو وفاق سطيف بالطحنية دى ببشتنكم.
# كمان جابت ليها قروب الدعيتة ولقيط فكة للمعسكر يا ناس انتو جادين عندكم مباراة مع وفاق سطيف فى البطولة الأفريقية وبتعملوا فى الكلام ده؟

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى