دق الدلجة .. محمد عبد الماجد .. حزب الكسكتة

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

09042016

مُساهمة 

دق الدلجة .. محمد عبد الماجد .. حزب الكسكتة




دق الدلجة
محمد عبد الماجد
حزب الكسكتة
#الحديبة_نيوز
• التمهيد الاول للخسارة.
• احسب ذلك ..احتسابا.
• في موسكو ..يضع امامك 100 عمود وشارع واحد …لتتجاوز الـ )100( عمود وتدخل في )الشارع(.
• في الخرطوم يضع امامك 100 شارع وعمود واحد.
• بتخلى الـ )100( شارع وتدخل في العمود.
• الروس ديل اعملوا حسابكم منهم.
• الدجاجة السودانية تضع في اليوم )بيضة( واحدة بتشيلها المحلية.
• الدجاجة المصرية تضع في اليوم بيضتين بيضة للمحلية وبيضة لصاحب الدجاجة.
• في روسيا الدجاجة تضع )طبق بيض( تذهب كليا لصاحب الدجاجة.
• في امريكا الدجاجة تضع )طبق بيض( بي سلطته ورغيفو.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• التمهيد الثاني للخسارة.
• قد يأتي اليوم الذي تدخل فيه مطعم )ناصية(.
• الناصية ما شرط.
• شرط المطعم.
• تسأل عن طلب الكبدة.
• فيقال لك ان طلب الكبدة بـ )95( جنيه – تفاصيلها كالاتي 13 جنيه )دمغة جريح(.
• 17 جنيه )رسوم محلية(.
• 15 جنيه )علاقات عامة(.
• 7 جنيه )دعم المجهود الحربي(.
• 12 جنيه )نفايات(.
• 11 جنيه )سياحة(.
• 10 جنيه )غاز(.
• 20 جنيه )خسائر الهلال(.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• تمهيد ثالث.
• اذا نزل )البصل( في انتخابات مع التفاح والحرجل.
• والحرجل ما عندو علاقة بالموضوع.
• البصل ما محتاج يكون عندو )رمز( في الانتخابات ..عشان )ريحتو( بتغني عن ذلك.
• تمهيد رابع.
• فكرت اكتب عمود عن خسارة الهلال في شندي باللغة الصينية.
• طلعت التربيزة.
• وجبت الورقة والقلم.
• وشربت الشاي.
• والقهوة.
• ونزلت.
• وطلعت.
• شربت عصير.
• واكلت تفاح ..وكلمة صينية واحدة ما قدرت اكتبها.
• ما عارف صعبة الكتابة الصينية..ام صعب الكتابة عن هزيمة الهلال.
• قلت اسيب اللغة الصينية – الجالية الصينية في السودان ذاتها ما بتتابع الكورة.
• وما عندهم قضية بالكورة.
• احسن اكتب باللغة البرتغالية.
• على الاقل اللغة البرتغالية هي لغة كورة القدم الحقيقية.
• طلعت التربيزة في الحوش.
• وجبت الورقة والقلم.
• والقهوة.
• والشاي.
• والعصير.
• والتفاح.
• واحضرت هذه المرة مع الحاجات دي )باسطة(..عشان امنطق ليكم اللغة البرتغالية.
• لكن لقيت نفسي كلمة واحدة بالبرتغالي ما قادر اكتبها.
• شربت القهوة والشاي والعصير واكلت التفاح والباسطة ..وحرف جر برتغالي ما قدرت اكتبو.
• ما عرفت صعبة الكتابة البرتغالية…ام الصعوبة في هزيمة الهلال.
• قلت لغة برتغالية على شنو؟..وانت مهزوم..احسن حاجة اكتب عمود باللغة الهندية.
• الهنود ديل خطيرين.
• وما قاعد افوت ليهم فيلم.
• افلامهم كلها عاملنها لي حب ونجيلة.
• طلعت التربيزة في الحوش.
• وجبت الورقة والقلم.
• وضربت ليك 12 تفاح.
• الهنود ديل جنهم تفاح.
• شربت القهوة والشاي والعصير.
• ومع الباسطة المرة دي جبت لي )سمك(.
• ضربت ليك السمك ما خليت فيه شيء.
• مع الهزيمة دي ..ما خليت لي حاجة في السمك.
• المفاجأة ..كلمة هندية واحدة ما قدرت اكتبها.
• الافلام الهندية دي كلها طارت لي في رأسي.
• هو قالوا ليكم الافلام الهندية انا قاعد احضرها من غير ترجمة.
• والله مرات بالترجمة ما تفهم فيها شيء وقت البطل يطلع البنت التى يحبها اختو.
• ما عرفت صعبة الكتابة الهندية ام ان الصعوبة في هزيمة الهلال.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• قلت على شنو يعني؟.
• انا متخصص في الروس.
• احسن حاجة اكتب لي عمود بالروسي.
• عشان اجهجه ليكم ناس بابكر مختار ديل.
• ناس فخري وعبدالمنعم ما يفهموا ليك اي كلمة في العمود.
• خلاص قررت اكتب بالروسي.
• جبت الورقة والقلم.
• وطلعت التربيزة في الحوش.
• وشغلت المروحة بتاعة الرزاز.
• وجبت ترمسة الشاي.
• والقهوة.
• وصبارة العصير.
• والباسطة والسمك.
• واضفت مع الحاجات دي )بطيخة(.
• شربت الترمسة ..ونفط ليك صبارة العصير.
• وقبلت على السمك والباسطة والبطيخة.
• البطيخة طلعت )سكر(.
• لكن بعد ما ضربت ليك الحاجات دي كلها )حرف( روسي ساكت ما قدرت اكتبو.
• طلعت زول بتفاصح ساكت.
• معقولة بس.
• الشاي دا كلو يروح ساكت.
• القهوة.
• والسمك.
• وصبارة العصير.
• والبطيخة التى طلعت مع السكر.
• حرف روسي ما اقدر اكتبو.
• والله طلعت اي كلام.
• ما عرفت صعبة الكتابة الروسية ..ام الصعوبة في خسارة الهلال.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• قلت ما مشكلة.
• يعني انا لو كتبت بالروسي ..العاوز يفهم لي العمود منو؟.
• انا احسن حاجة اعملها اكتب عمود بـ )الفرنسي(.
• اللغة الفرنسية لغة شاعرية وجميلة ..وممكن الواحد يتقلب فيها.
• ممكن تكتب ليك جملة ..وتتمها شعر فرنسي.
• الفرنسيون ديل اكتر من كتب عن ادب الخسارة.
• الثورة الفرنسية طلعت )ادب( جميل.
• وما في لغة بقدر اعبر بيها عن خسارة الهلال احسن من اللغة الفرنسية.
• كدا الواحد يحاول يطلع من علبو ويكتب ليه عمود فرنسي.
• طلعت التربيزة في الحوش.
• وجبت الورقة والقلم.
• وترمسة الشاي.
• وترمسة القهوة.
• وصبارة السمك.
• وصينية السمك.
• وصينية الباسطة.
• والبطيخة.
• وجهاز فني جديد.
• قلت المرة دي بعملها.
• ضربت ليك الحاجات دي كلها والله ما فتح لي بـ )شولة( فرنسية.
• يمين شولة فرنسية غلبنا اضعها.
• يا ربي الناس ديل علامات تعجبهم !! زي علامات تعجبنا.
• استفهام ؟؟؟ زي استفهامنا.
• غايتو لو استفهامهم زي استفهامنا ..ممكن اعمل ليكم العمود كل استفهامات فرنسية.
• لكن العاوز يفهم لي الاستفهامات منو؟.
• الموضوع غلبنا.
• يا ربي صعبة الكتابة الفرنسية ام ان الصعوبة في خسارة الهلال.
• ما عرفتها.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• قلت على ايه؟..احسن حاجة اكتب لي عمود بـ )الالماني(.
• خاصة نحن عندنا كشافات )المانية(..البخليني اكتب بالعربي شنو؟.
• العربي خليناه لي ناس سلك.
• اكتب عمود بالالماني …ناس مزمل وسلك ومعاوية وكابو ما بفهمو فيه اي حاجة.
• واحد فيهم بقدر يقول كلمة.
• او يعقب مافي.
• طلعت التربيزة برة.
• وجبت الشاي والقهوة.
• والزلابية.
• والباسطة.
• والطبيخة.
• والسمك.
• والتفاح.
• و7 محترفين اجانب.
• ضربت ليك الحاجات دي كلها ..ونقطة المانية ما قدرت اكتبها.
• ما عرفت صعبة اللغة الالمانية ..ام ان الخسارة هي الصعب.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• هسع الكاردينال بعمل في نفس الشيء.
• بعمل الجوهرة الزرقاء.
• وبجيب الكشافات.
• والسيخ والاسمنت.
• والجهاز الفني الاجنبي.
• والمحترفين.
• ومرة بشيل المدرب.
• ومرة بشيل المحترفين.
• والهلال برضو بيخسر.
• القصة ما في الجوهرة.
• ولا في الكشافات.
• ولا في المحترفين.
• ولا في الجهاز الفني.
• المشكلة في الادارة.
• وفي القرارات الفطيرة التى يصدرها الكاردينال.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• …………
و
• اخطر ما في مرحلة الكاردنيال ذلك )التحزب( الذي يقصد ان يقسم الكاردنيال وحزبه الهلال.
• كوم صلاح ادريس.
• وكوم طه علي البشير.
• وكوم الكاردنيال.
• والاخطر من ذلك ان حزب الكسكتة بقى يهتف ويرافق الهلال في كل مبارياته من اجل ان يهتف للكاردنيال.
• الهلال ما صلاح ادريس ولا طه علي البشير ولا الكاردينال.
• الهلال اكبر من الجميع.
• اي زول بيجي ويفوت.
• ويبقى الهلال.
• فليكن الدعم والمساندة للهلال بدلا من تقسيم الهلال بهذه الصورة.
• هذه التفرقة يمكن ان تهد استقرار الهلال كثيرا.
• ويمكن ان تكون سبب في الكثير من الخسائر.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• ………….
• السيدة )ل( – العشم ما عاوز ليه )اذن( من مصلحة الاراضي.
• وقرّط على كدا.

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى