بدون حجاب .. خالد عز الدين .. الخرطوم يعدل البرمجة… !

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

25042016

مُساهمة 

بدون حجاب .. خالد عز الدين .. الخرطوم يعدل البرمجة… !




بدون حجاب
خالد عز الدين
الخرطوم يعدل البرمجة… !
#الحديبة_نيوز
○ اولا لابد ان نشيد بالاخوة في لجنة البرمجة فهي اللجنة الوحيدة في السودان التي تعمل خلال الاربع وعشرين ساعة طوال الموسم .. حتي لجان الكوارث الطبيعية تعمل مرة كل خمسة او عشرة سنوات .. ولجان الانتخابات تعمل مرة كل اربع سنوات ولجان تحديد وزن وسعر الرغيف تجتمع مرتين في العام .. ○ ولجنة امتحانات الشهادة الثانوية تجتمع اجتماع عادي لوضع الامتحانات واجتماع طارئ لمناقشة امر تسريب الامتحانات !! لجان ولجان ولجان في السودان ولكن للحقيقة فان اللجنة الاكثر اجتهادا هي لجنة البرمجة في اتحاد كرة القدم السوداني فلها التحية خصوصا وان النثريات التي ينالها اعضاء اللجنة غير معروفة !! فربما كانت اقل بكثير من النثريات التي ينالها اعضاء لجنة التسجيلات رغم سهولة عملهم مقارنة بلجنة البرمجة فلجنة علي الامين وعصام شعبان والزملاء والزميلات تنال في كل يوم من ايام التسجيلات نثريات عالية ثم ينال عصام شعبان ومن معه نثريات لتسجيلات اجانب ثم نثريات لتسجيلات اجانب مرة اخري ولا تسألوني عن السبب لانني ابحث عنه منذ ان وجدت هذه المستندات !!
○ كيف تكون هناك تسجيلات اجانب ثم تسجيلات اجانب !! الا اذا كانت هناك تسجيلات سرية في اتحاد الكرة وبرضو جائز طالما ان هناك ثلاثة فترات لعب في السودان في المواسم الاخيرة .. الدورة الاولي .. والمباريات المؤجلة من الدورة الاولي .. والدورة الثانية !!
○ نشكر لجنة البرمجة التي كانت في اجتماعات طوارئ منذ بداية مباراة الخرطوم الوطني والمريخ وهي تنتظر اي هدف للخرطوم الوطني لتعدل مباشرة بقية مباريات المريخ لانها تعرف جيدا ان المريخ لو انهزم فان الدوري كله لن يكتمل الا اذا عاد عمو سمير والفاتح خضر رد الله غربته ومحامي باجعفر ازهري الطريفي ولكن المريخ لا يستعين بهولاء الا في الدورة الثانية اما الدورة الاولي فانها مهمة لجنة البرمجة وكل اللجان رئيسها اسامة عطا المنان طبعا .. سواء كان بالانابة او رئيس مباشر وفي كل الاحوال فان الختم جاهز والتوقعيات جاهزة . يورو .. دولار .. ريال ..شيك سياحي نحن جاهزين !
○ لجنة البرمجة وبعد مرور عشرة دقائق من بداية مباراة الخرطوم الوطني والمريخ اصدرت قرارا بتأجيل مباراة المريخ وهلال الابيض الي اجل مسمي ورفع مباراة المريخ وهلال كادوقلي الي اجل غير مسمي ودي جديدة في نهاية دورة هذا الاتحاد الذي يبدو انها ستكون في برنامجه الانتخابي للدورة الجديدة ) مباريات مؤجلة لاجل غير مسمي ( .. عشرة دقائق فقط كانت كافية لتؤكد للجنة بان دفاع المريخ لن يكون قادرا علي الصمود امام هلال الابيض وهلال كادوقلي دعك من هلال السودان الذي يطالب اعلام المريخ بعدم تأجيل مباراته !!
○ خسمة دقائق زمن اضافي من شخص متفائل في لجنة البرمجة جعلت قرار تأجيل مباراة هلال الابيض يصدر بعد ربع ساعة من تلاعب عاطف خالد وقلق بدفاعات المريخ هذا العمود من .. وبعد مرور نصف ساعة تم تأجيل مباراة هلال كادوقلي الي اجل غير مسمي وفي الدعوات ما بعد صلاة العشاء كان التركيز علي عدم هزيمة المريخ حتي تكتمل الدورة الاولي وهي ناقصة مباريات فقط !!
○ المريخ تعبان .. عايزين اسبوع .. المريخ فلسان .. عايزين اسبوعين .. المريخ زعلان .. عايزين دورتين .. المريخ مغلوب .. ونسي يطير .. عايزين عمو سمير .. كل طلبات الاندية مستجابة .. هلال الفاشر يهدد في حال اتخاذ اي قرار ضده في شكوي الاهلي مدني .. ○ يتم تأجيل البت في الشكوي من لجنة الحالات الطارئة .. لاحظ لجنة الحالات الطارئة اجتمعت لتناقش شكوي ! رفعت لجنة الحالات الطارئة الشكوي لاجتماع اللجنة المنظمة !! مسكين صديق المعليق عضو لجنة الحالات الطارئة .. حضر من المعيلق في حالة طارئة فتم تأجيلها لاجتماع اللجنة المنظمة !! لم تجتمع اللجنة المنظمة حتي الان .. مجدي مسافر ؟؟! وييين ؟ ما معروف .. اخر ظهور له كان في القاهرة حيث يقيم هناك بالقرب من بنك )عوده( في حساب في البنك ده لازم يتحرس !!
○ المهم هلال الفاشر اجبر الاتحاد علي عدم اتخاذ قرار .. هلال الخرطوم عايز سيكافا .. طبعا سيكافا دي لازم تقوم عشان خاطر عيون الكاردينال الذي اتهم الاتحاد بالفساد او لتاكيد فساد الاتحاد في سيكافا ! وقروش سيكافا القديمة وين يا اسااااامة ؟! تقول ولا نقول نحن ! وين الـ150 الف دولار .. وقعت انت ولا وقع جمال !!! كلو جاينو مافي مشكلة .. المهم الهلال رضوه بسيكافا وهلال الابيض قال اشمعنا انا .. قناة النيلين دي ما بتدخل استاد الابيض !! مش رضا مصطفي الشيخ ما بجيب اخبار هلال الابيض في برنامج الرياضة ؟؟
○ نحن زاااتنا ما بنخلي القناة تجيب خبرنا !! ولا زول في الاتحاد بفتح خشم .. كلوا ولا هلال الابيض .. احمد هارون وانتخابات الاتحاد وطارق عطا نائب رئيس وامين الخزانة مسكين . يلا مع السلامة يا نيلين .. وناس النيلين زاتهم ما عارفين يسافروا متين .. مش احتمال لجنة البرمجة تجتمع تاني وتلغي المباراة او تحولها لاجل غير مسمي ويكونو سافروا ساكت ! والله المساكين ناس عرب سات .. باعوا ليهم الترام .. يا حرام وناس سوداني في عالم تاني .. بدفعوا تلاتة مليار عشان يشاهدوا كاس العالم في البرازيل وكاس العالم للاندية في اليابان ومباراة المريخ وبارين ميونخ في الدوحة .. ده العقد ولا شنو يا طارق حمزة !!
○ لجنة البرمجة تستحق الاحترام .. تصحي والناس نيام .. تشتغل ليل نهار .. تقرر بالنهار وتلغي بليل .. تبذل مجهودا غير عادي لارضاء كل الاطراف .. شكرا لكل هذ التضحية من الاخوان في لجنة البرمجة .. بس اوعه تعدلوا في النثريات كمان !!!!!!!!!!

حمزه عوض


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى