غيض من فيض .. خلف الله أبومنذر .. الاستقرار .. المعد النفسى وخبير التغذية

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

15052016

مُساهمة 

غيض من فيض .. خلف الله أبومنذر .. الاستقرار .. المعد النفسى وخبير التغذية




غيض من فيض
خلف الله أبومنذر
الاستقرار .. المعد النفسى وخبير التغذية
#الحديبة_نيوز
# نعم تسيد وساد هلال السودان معشوق الفرسان والحسان وأحباب الرحمن فى بلاد ملتقى النيلين والنخيل وتقابة القرآن ، ساد وتسيد وخوجل وقدل بدون منافس أو مشاكس أو مزاحم ساحة تسجيلات اللاعبين الوطنيين والأجانب فى شقيها الشتوى والصيفى للموسم الثانى على التوالى وضم خلال فترة التسجيلات الصيفية الحالية ما شاء من لاعبين ودعم خطوطه فى الفرق المختلفة ، كما تعاقد مع مدير فني له اسمه وتاريخه وانجازاته.
# ولكن كل هذه الجهود والاجتهادات التى بذلت والأموال الضخمة التى صرفت بمكونيها الأجنبى والمحلى لن تثمر شيئا وستذهب أدراج الرياح كما ذهبت من قبل ملايين الدولارات ومليارات الجنيهات فى التعاقد مع اللاعبين الأجانب والوطنيين والمدربين وتسديد مستحقاتهم المالية من رواتب وحوافز والمعسكرات الداخلية والخارجية وخلافه من أوجه صرف.
# كل هذا البذل والصرف المالى الضخم سيذهب كسابقه ولن يثمر شيئا ما لم نبسط الاستقرار فى النادى خاصة فى الشق الفني وأعنى الشق الفني بمعنى ومبنى الكلمة أى منح المدير الفني الروماني بلاتشى كامل السلطات والصلاحيات الفنية دون مشاركة أو مزاحمة أو تدخل من أحد ونمنحه أيضا المساحة والزمن ليختبر عناصره من اللاعبين ويقف على قدراتهم ومواهبهم وامكانياتهم ليوظفها وفق رؤيته وقراءته ورسمه التنظيمى والتكتيكى ، وتوفير كل المعينات والأدوات للجهاز الفني واللاعبين وبالطبع لن نشير للمستحقات المالية من رواتب وحوافز لأن المجلس بقيادة الأخ الأستاذ أشرف الكاردينال عهدنا به لم ولن يقصر أو يتأخر فى هذا الجانب
# لقد تعاقد المجلس مع الروماني بلاتشى ولابد وأن يمضى الى نهاية عقده وهذه أولى خطوات بسط الاستقرار أى التمسك والامساك ببلاتشى الى نهاية عقده دون تفريط وان كان لابد من قرار فى حال تقصيره أو تكرار أخطائه وتأثيرها على نتائج الفريق ) لا قدر الله ( فليكن تقليص صلاحياته على ان يبقى على رأس الجهاز الفني لنحافظ على الاستقرار الذى بدونه لن تتحقق النجاحات والانجازات التى عاش على اشراقها شعب الهلال الوفى.
# بجانب الاستقرار لابد من الاشارة الى بعض الضرورات التى لا نهتم بها وبتفاصيلها ولا نوليها اهتماما يذكر رغم ان العالم من حولنا يهتم بها بل يوليها الاهتمام المتعاظم وهى ضرورة الاستعانة بمعد نفسى يهئ اللاعبين لكل مرحلة قبل الاعداد وبعد الاعداد وقبل وبعد المشاركة فى المنافسات لأن الاعداد النفسى لا يقل أهمية من الاعداد البدنى ان لم يكن الأهم .
غيض
# لا ننسى خبير التغذية الذى لابد من تواجده بجانب المعد البدنى والطبيب لأن بعض اللاعبين سيعودون من الراحة وقد زاد وزنهم كالمحترف الغانى نيلسون وغيره ولابد من خبير تغذية يخضعهم لنظام غذائى يقلل من وزنهم
# زيادة الوزن قد تدفع للاستغناء عن لاعب متميز كما حدث مع الغاني نيلسون الذى عاد بزيادة فى الوزن أثرت على مردوده الفني والبدني ولم يعد نيلسون الذى قدم موسما متميزا مع الهلال ليستغنى النادى عن خدماته
# المعد النفسي أيضا من الأهمية بمكان ليهئ اللاعبين قبل المباريات المصيرية، وعند الخسارة لابد من المعد النفسى ليخرج اللاعبين من أجواء الاحباط كما حدث عقب الخروج غير المتوقع من البطولة الأفريقية هذا الموسم أمام الأهلى الليبي مما ترك أثرا سيئا وسط اللاعبين وفقدوا التوازن لفترة من الوقت قادتهم للخسارة أمام الأهلى عطبرة أحد متذيلى الممتاز.
# مساكين ناس نادى نجمة المسالمة حتى هذه اللحظة لم يسجلوا لاعب لا وطنى ولا محترف ولم يعيدوا تسجيل لاعبهم على جعفر الدق ليهم الجرس
# أخونا على جعفر قال ما بسافر المغرب ويخوض جولة الأياب أمام الكوكب المراكشى ما لم يستلم مستحقاته المالية المتأخرة كاش داون.
# أخونا عادل أبوجريشة فات لعلى جعفر فى بيتهم والتزم ليهو يسلمو المبلغ بعد العودة من المغرب ولكن على جعفر قال قروشى ناو يعنى ناو
# غايتو أخونا عادل أبوجريشة التزم يسلم القروش لأهل على جعفر اليوم الأحد وقبل قيام المباراة بأيام وبناء عليه وافق على جعفر يسافر مع البعثة
# بأمانة يا على جعفر أخوى ما كان تسافر مع الجماعة المغرب ما لم تستلم قروشك كاش داون لأنو عادل أبوجريشة عايز يورطك ويزوغ.
# تعرف يا على جعفر طالما سافرت المغرب لازم تلعب لازم تلعب لأنو هم عارفين ما ممكن الفريق ناقص مدافعين وانت ما تلعب عشان القروش .
# طبعا حا تلعب ويلموا فيك المغاربة يحاورك ويبشتنوك وتجلط ليك كم جلطة وتتسبب فى كم قون وبعدين تجى راجع السودان يقولوا ليك انت طلعتنا من البطولة الأفريقية وكمان عايز يجددوا ليك وتستلم قروشك كاش؟
# أحسن ليك ما تلعب المباراة قول ليهم عندى رباط صليبى وبرجم .
# أو أقول فكرة عشان تزوغ من المباراة وما يجهجهوك المغاربة ساكت.
# أول من تصل مطار الدار البيضاء شوف ليك أقرب ضابط فى المطار وأضربو كف تااااااح وقول ليهو أنا من تنظيم داعش وشايل معاى قنبلة.
# طبعا حا تكون قاعد معاهم شهرين ثلاثة ، قول سنة تحرى وفيش وحا يتصلوا بالسودان وسوريا والعراق وتركيا وليبيا والبوسنة والهرسك
# فى الأخير بعرفوا انك عايز تزوغ من المباراة وبحفزوك بالدولار.
# ألتمس وأستمح العذر والمعذرة من جمهور الهلال الوفى الغلاب المهاب ، فقد قدمت رقاع الدعوة للأخوين الزميلين الدكتور معاوية دفع الله ومزمل أبوالقاسم لحضور الحفل الحفيل الحافل بمناسبة افتتاح الجوهرة الزرقاء # قدمت الدعوة رغم اعتراض الاخوة الزملاء بقروب )اعلام وهلال( عبدالله القاضى وعامر تيتاوى وعصام ودالجبل الذين وصفوا مزمل بالحاقد
# غايتو مزمل قبل الدعوة ورجع لى فى الخاص عايز يعرف يلبس شنو # قلت ليهو أهم شئ أول حاجة تكون مآكل لحمة محمرة لأنو فى اليوم داك أخونا الكاردينال ضابح عشرين تور ومائة خروف وجبة لجمهور الهلال # وحذرتو قلت ليهو ما تجى مآكل فول أو طعمية لأنو الجهاز بصفر بفتكر الفول قنبلة ولا سلاح نووى وما تنسى تجى لابس بدلة فل سوت وكرفتة عاملة ماتشن مع البدلة ومتريح بريحة بلاك مجك وتشيل معاك دولارات
# أخونا مزمل رجع لى الساعة واحدة صباحا وسألنى أشيل جوازى معاى
# قلت ليهو لازم تشيل جوازك ورقمك الوطنى معاك عشان عندنا سوق حر فى الجوهرة الزرقاء ولما تجى داخل لازم تعمل ديكلاريشن للعملة
# الفترة الجاية فى احتمال أغيب عن الكتابة لأنو عايز أتفرغ وأعمل كورس لأخونا مزمل عشان يعرف يتعامل مع التكنولوجيا الفى الجوهرة
# لازم أعمل ليهو كورس عشان ما يمشى يهبش ليهو سلك يقوم يطرشق لينا جهاز ساكت، أو يدوس ليهو زر بالغلط ويلقى نفسو فى شارع الغابة

حمزه عوض


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى