دق الدلجة .. محمد عبد الماجد .. يا محمد سيد احمد ديل كم؟

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

24052016

مُساهمة 

دق الدلجة .. محمد عبد الماجد .. يا محمد سيد احمد ديل كم؟




دق الدلجة
محمد عبد الماجد
يا محمد سيد احمد ديل كم؟
#الحديبة_نيوز
• زمان نحن )قبل لوائح الفيفا دي( ،والكلام البفكوه لينا في الجرايد ساكت، كان الواحد فينا بقوم بتحريك كف يده بصورة دائرية سريعة مع عرض )الاصابع( قدام عيون الطرف الاخر والسؤال عن عددهم.
• ما في زول كان بعرف عدد )الاصابع( المفتوحة ونحن بنسأل )ديل كم؟(.
• الحكاية دي كانت اخطر حاجة عندنا.
• بنفتكرها منتهى العبقرية.
• البقول ليك تلاتة.
• والبقول ليك اتنين.
• ما في زول طبعا بقول سبعة – لأن اليد كلها فيها خمسة اصابع.
• اظني احتاج ان اسأل محمد سيد أحمد بنفس الحركة ..ومحمد سيد احمد يتحدث عن )شيبوب(.
• ملزم ان اسأله بالطريقة ذاتها واقول له يا محمد سيد احمد ديل كم؟.
• بس ما تقول لينا تسعة.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• مساعد رئيس الاتحاد العام لكورة القدم – احسبه وضع ضمن برنامجه الانتخابي عودة شيبوب للمريخ في برنامجه الانتخابي وهو يعلن عن رغبته للترشح )امين عام( للمريخ.
• شيبوب دا خلاص انسوه.
• شيبوب فات.
• إلّا ترجعوه في )قروب(.
• او في عمود صحفي.
• او في تصريح لمحمد سيد احمد.
• لكن في الاتحاد او في كشوفات المريخ ..بتبقوا بتحلموا.
• شيبوب دا الكاردينال شالو من المريخ تلات مرات – انتوا قاعدين وين؟.
• مرة من النادي.
• ومرة من البيت.
• ومرة من تونس.
• نصيحة ليكم يا مريخاب )الكلام ما بكرره مرتين( …)الجفلن خلهن اقرعوا الواقفات(.
• اقرعوا الوك.
• ومازن شمس الفلاح.
• وابراهومة.
• علاءالدين يوسف ذاتو اقرعوه …المباراة كلها بيسك في )المصور(.
• شيبوب احسن تنسوه..عشان لو دخلتوا )رمضان( بي حالتكم دي ببقى صعب عليكم.
• ببقى عليكم عطش ..وطيران شيبوب.
• السخانة دي مع مغادرة شيبوب للهلال ما عارف بتستحملوها كيف؟.
• لو رمضان جاكم وانتوا في حالتكم دي ..بتفطروا من الساعة واحدة.
• يتخيل لي كدا ان محمد سيد احمد دا لو قام الصباح وما لقى ليه موضوع، ممكن يطلع في الجرايد ويقول : )حلايب مصرية(.
• الزول دا عاوز يخالف بس.
• عاوز يعمل ليه )جوطة( وخلاص.
• الرجل يبحث عن )الاثارة(، والتصريحات )المشاترة( التى تجعله على صفحات الجرايد ومواقع التواصل الاجتماعي.
• ويبحث عن ارضاء المريخاب في كل )القضايا( التى يكون المريخ طرفا فيها.
• محمد سيد احمد بفسر اللوائح والقوانين حسب )مريخيته(.
• لو المريخاب قالوا الليلة السبت …محمد سيد احمد بقول السبت.
• ولو ناس المريخ قالوا )نزار حامد( لاعب الهلال الحالي – هو لاعب للمريخ ، ممكن محمد سيد احمد يشوف ليه )لائحة( يثبت به ادعاء المريخ هذا.
• اسهل حاجة طبعا تقول المادة 43 من اللائحة بتقول نزار حامد لاعب للمريخ.
• والمادة 43 من اللائحة ممكن يجيبوها ليك من سوق صابرين.
• ما عندهم اي مشكلة.
• في سبيل المريخ ممكن يعملوا ليهم لائحة مخصوص.
• ومحمد سيد احمد لو ناس المريخ قالوا الليلة نزلت )مطرة( – حدها )الركبة( ممكن محمد سيد احمد يزيد الحكاية ويقول حدها )النخرة(..ونقطة ما بتكون نزلت.
• المادة 72 من اللائحة بتقول حدها النخرة.
• مشجع المريخ الشهير )ود الجنيد( بيحمل )طبلته( ويشجع بها المريخ في كل الظروف من المدرجات – داخل وخارج البلاد منذ اكثر من ربع قرن ..ولا يلومه احد على ذلك لأنه )مشجع( وهو فخور بذلك والمريخ فخور به.
• محمد سيد احمد الذي يُعرف نفسه بانه مساعد رئيس الاتحاد العام لكورة القدم يحمل نفس )الطبلة( ليشجع المريخ في كل القضايا التى ينتظر ان يكون فيها محمد سيد احمد )حكما( وليس مشجعا.
• انت يا محمد سيد احمد حكاية الاتحاديين مع )المساعدين( شنو؟.
• اي اتحادي يقولوا ليك )مساعد الرئيس(.
• ما فيهم زول ببقى رئيس.
• حدهم )مساعد رئيس(.
• في الكورة ..يقولوا ليك )مساعد للرئيس(.
• في السياسة )مساعد الرئيس(.
• الواحد لو بالغ فيهم بيبقى )مساعد اول(.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• محمد سيد احمد تعالوا شوفوا في قضية شيبوب ماذا نشر عنه.
• )قال مساعد رئيس الاتحاد العام لكرة القدم محمد سيد احمد ان اللاعب شرف الدين شيبوب هو لاعب المريخ وان لجنة اللاعبين الهواة ستعيد اللاعب للمريخ وفقا للمادة 55 وقال ان اللاعب تم تسجيله ببطاقة مؤقتة كيف ينتقل للهلال ببطاقته المؤقتة و اصلا هناك بطاقة سارية المفعول بالاتحاد العام و قال ان الشبيبة ان اراد اطلاق سراح اللاعب كان عليه اخطار المريخ باخلاء خانة له و لكن قام ببيع اللاعب للهلال دون وجه حق وهو انتهاك لقوانين الانتقالات و قال ان شيبوب لاعب المريخ و سيفجر ازمة مستقبلا و كشف في حديثه لصحيفة المريخ ان شكوى المريخ للفيفا سنخلق ازمة وستوقع اطراف كثيرة في طائلة العقوبات الدولية(.
• من الله خلقكم ..شفتوا ليكم )لخبطة( قدر دي.
• كأن شيبوب دا في شبيبة القيروان ..كان )طبيب الفريق(.
• انتوا كنتوا قاعدين وين يا محمد سيد احمد؟.
• محمد صلاح لغاية الآن في روما بيلعب من غير بطاقة.
• حكاية البطاقة دي انتهت زمان..نحن الآن مع )السيستم(..وبيانات شيبوب توافقت مع نظام الفيفا.
• يعني شيبوب دا تاني )قطر( ما بثبتو.
• المادة 55 من اللائحة البتتكلم عنها ثبّت بيها الوك.
• ثبّت بيها مازن شمس الفلاح.
• موضوع شيبوب دا انتهى خلاص – شوفو غيرو.
• محمد سيد احمد قال ان شبيبة القيروان كان يفترض ان تخبر المريخ عشان يخلي خانة لشيبوب.
• فالحين والله.
• هو ناس شبيبة القيروان شالوا شيبوب من المريخ ..عشان يقولوا ليهم اخلوا ليه خانة.
• ناس شبيبة القيروان عندما سجلوا شيبوب ما اشتغلوا بالمريخ – عاوزهم يشتغلوا بيه وقت اطلقوا سراحه للهلال.
• دا كلام شنو؟.
• ما في لجنة هواة ..عندها سلطة على لاعب محترف.
• شيبوب لعب في شبيبة القيروان لاعب محترف.
• وجاء للهلال )محترف(.
• لجنة الهواة قولوا ليها قراراتهم بلوها واشربوا مويتها.
• افعلوا ذلك قبل رمضان.
• نحن بنتكلم عن )السيستم(..تقول لينا لجنة الهواة.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• بعدين يا محمد سيد احمد – عشان نثبت ليكم انك بتتكلم ساكت ..وبقى ما عندك سلطة في الاتحاد العام ..انت كنت بتتكلم عن استحالة ان يلعب جمعة جينارو في الهلال.
• وجمعة جينارو الآن بيلعب في الهلال.
• وانت يا محمد سيد احمد كنت بتقول ما في مباراة من الدورة الاولى للممتاز سوف تتأجل لتلعب بعد فترة التسجيلات.
• واتأجلت )4( مباريات.
• بتتكلم ساكت يا محمد سيد احمد.
• وكنت بتقول يا محمد سيد احمد بنعاقب الهلال بعد الانسحاب الموسم الماضي من الممتاز.
• وبنعاقب الكاردينال.
• لا الهلال اتعاقب.
• ولا الكاردنيال.
• معاوية فداسي ما بتقدروا تعاقبوه.
• محمد سيد احمد لو كان حقا مساعد رئيس الاتحاد العام كان يحدثنا في )الخبط( الذي حصل في المغرب.
• في بونية حاتم محمد احمد.
• وجرية علاءالدين يوسف.
• حدثنا عن الحاجات دي – بدل ما تحدثنا عن )شيبوب(.
• شيبوب بقى لاعب فريق تاني ..ما عندك معاهو قضية.
• اتكلموا عن لعيبتكم …مازن شمس الفلاح وامير كمال.
• شيبوب ما فاضي ليكم – عندو مباراة يوم الخميس.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
• …………
و
• الخميس في الجوهرة الزرقاء حفلة.
• منقولة على انغام.
• طرب شديد.
• ……..
• السيدة )ل( – الواحد لو لقى ليه )كهربجي( شفت كدا، ما بقلب لينا )مروحتنا( مُكيّف موية قبل رمضان.
• وقرّط على كدا.

حمزه عوض


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى