في السلك .. بابكر سلك .. فريق الحله

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

30052016

مُساهمة 

في السلك .. بابكر سلك .. فريق الحله




.
في السلك
بابكر سلك
فريق الحله

< نسمع باسماء اندية كبيرة في البلد دي
< وهي في واقعها لا تتعدى في وصفها فريق الحله بتاع الشفع الزمان داك
< فسوء ادارة الرياضة في البلد هو ما أوصل الأندية الكبيرة عندنا لهذا المستوى الوضيع
< وهو السبب الأساسي في إدخال تلك الأندية وأمانيها داخل جيوب بعض الأقطاب
< وسائل التواصل الاجتماعي وإتاحة فرصة متابعة ما يجري في العالم حولنا رفع طموح جماهير الرياضة في البلد دي
< ذلك الطموح المرتفع لا تعرفه هيئات إدارات الرياضة في هذا البلد المحتار أهله
< ولا تعرفه إدارات الأندية ولا وزارات الرياضة الولائية المنتشرة انتشار البعوض الذي قيل لنا إنه لا يسبب الملاريا لكن منتشر ساي
< كذلك وزارات الرياضة عندنا منتشرة ساي ولكنها لا تسبب ولا تتسبب في وضع منهج يطور الرياضة في هذا البلد الذي يصوم أهله رمضان إيماناً واحتساباً لله ويفطرون بي ريقهم
< ووزارة اتحادية وأظن أن هناك وزير دولة كمان ودولة < هذا الكم الهائل لا يقدم للرياضة إلا الدمار ووأد سقف طموحات جماهير الرياضة في مهده
< قرارات متضاربة ترفل في الفوضى وعدم دراسة الأمر وتفتقد للإستراتيجية < فما تقدمه الدولة من هبات كعطية مزين للمريخ والهلال من فترة لأخرى لا يسمى دعماً للرياضة < ولكنه رشوة لجماهير أكبر حزبين
< ولو ما كان الأمر كذلك
< لماذا لم تدعم الدولة بيت المال وأبي روف والسهم أربجي والمهدية والنجوم مدني والسكة حديد كوستي والنصر أبو عشر؟؟
< تلك الأندية لا تتمتع بالثقل الجماهيري ولذا كانت خارج حسابات الدولة في عمليات رشوة الوسط الرياضي
< وسائل التواصل وانتشار القنوات الفضائية جعل شبابنا متابعاً جيداً للفعاليات الرياضية ومستويات العالم من حولنا
< فأضحى عندنا جيل بعرف أي حاجة عن الريال والبايرن والبارسا
< ولكنه لا يعرف أسماء أربعة لاعبين سودانيين
< ولكن يعرف كل شيء عن اتحاد جدة والنصر السعودي ودوري محترفي قطر
< بل لم يسمع بشاخور ولا الطيب عبد الله ولا يعرف من هو عبد الفتاح حمد
< الواحد لو سألتو عن سبت يقول ليك إجازة
< ما عارفين سبت ده كان لقبو صقر إفريقيا لما السعودية حرينا ما بتعرف تلعبها
< الوكت داك قطر ما كان بتعرف إنو في الدنيا دي في وسيلة نقل اسمها القطر
< هذا الجيل ستفقده الرياضة
< يبقي توسعة استاداتنا لي شنو؟
< أيها الناس < من في افريقيا من الأندية يمتلك استاد؟
< المريخ والهلال والموردة والتحرير وود نوباوي يمتلكون استادات
< الأهلي القاهري يسمو
< والبسمع بي أندية تمتلك استادات يقول وحاتك أغنى أندية في إفريقيا
< ولما يقرب يلقاها زي فريق الحلة
< يعتمد في تسييرو على تبرعات ناس الحله
< أو تبني حنفولي من الحله للفريق
< يجيب الفنايل والكور ويدفع حق الترحيل
< ولو سافر ذلك الحنفولي وطرشقت كورة فريق الحله
< يقيف نشاط فريق الحله حتى يعود الحنفولي
< ده حال الاندية الكبيرة عندنا
< واسي لو كردنه ده استقال ناس الهلال إلا يسقفوا على كده
< مع تمنياتنا للأهلة بان ما يقوم به كردنة لا يدخل النادي في مديونيات
< لو كده يبقى كردنة صعبها معاهم شديد
< أيها الناس
< اذا اردنا التطور لابد من الخروج من جلباب الأقطاب
< واذا أردنا الخروج من جلباب الأقطاب لابد من الاستثمار
< في هذا الزمان الموضة سيستم
< اندثرت موضة الجلباب وأضحى عند الأجيال الجديدة أضحوكة
< يبقى الاستثمار
< والى ان ننشئ الاستثمار ونستفيد من ريعه لا بأس من الاستعانة بجلباب أبي
< بشرط أن لا يكون ثمن الاستعانة بذلك الجلباب هو السكوت عن الاستثمار
< أيها الناس
< أيهما أفضل
< رب اسرة مسكن اسرتو في فيلا بالإيجار وبفسحهم بره السودان سنوي وبيأكلهم ما لذ وطاب
< نقول مات
< وحال اسرتو في صيوان العزاء شرود في كيف يدفعوا إيجار الفيلا في شهر العزاء
< ورب اسرة آخر ادخر واقتطع ومشى الاسرة بالمعقول واشترى ليها قطعة أرض < قول مات
< الأفضل ياتو اسرة من ديل؟؟
< الاستثمار الاستثمار الاستثمار
< وما قام به الزمالك مؤخراً دليلا جديدا على ان الفكر الاستثماري هو قمة النجاح الإداري
< المهم
< مشكلة المريخ ليست في لجنة التسيير
< وليست في تعيين لجنة بديلة
< وليست في جمعية عمومية وانتخابات
< وليست فيمن يدير المريخ
< ولكنها في كيف يدار المريخ
< الاستثمار الاستثمار الاستثمار
< ولو كان عندنا استثمارات تدر ريعاً
< لما استقال جمال
< ولما فشلت التسيير في إدارة الدفة
< ولما اضطر شفوت القروبات والمهجر في تحمل تبعات القصور المادي
< لا تعطني سمكة ولكن علمني كيف اصطاد
< هذه هي توصية الجماهير للمجلس القادم سواء كان معيناً أم منتخباًَ
< أيها الناس
< إن تنصروا الله ينصركم
< أها
< نجي لي شمارات والي الخرتوم
< كان شفت يا والينا
< البلد كلها تغني لينا
< يا الطالع الشجره

< ناس يقولوا بترميك يا اخينا
< جيب لي معاك بقره
< والناس يقولوا تأكلها من وين ورينا
< تحلب تعشيني
< ناس يقولوا إلا تشربو ني مع الغاز الغلى علينا
< بي ملعقة صيني
< ناس يقولوا السوق بالصيني اتملى علينا
< والملعقه انكسرت
< ناس يقولوا لازم تنكسر …صيني يا اخينا
< وأنا مين بعشيني
< ناس يقولوا العشا؟ الاسم ده لسه موجود عندينا
< مشيت لهم حيدر
< ناس يقولوا حيدر منو ورينا
< قاعدلو في بمبر
< ست شاي عمك حيدر ده يا اخينا!!!
< تحتو حمام أخدر
< البلد كلها مخدره وتخدر فينا
< يشرب موية سكر
< الحمام ولا عمك حيدر.. افصح لينا
< قال ليا اتفضل
< قبلت الدعوه وبعتنا يا المحسوب علينا؟
< قلت ليهو ما بقدر
< موية سكر وما بتقدر؟ تاني إلا في الجنه مع سعر السكر وصف العسكر وزحمة بندر وصبي يتبختر داقي السيستم بنطلونو يتنصل وما جايب خبر السكر سلك كهربا ننساك كيف والكلب قال الطالع الشجره لو جابليكم معاهو بقره يبقى سلمولي على اللبن. وقعد يغني العروس دايره المنديل والمنديل عند الجهال والجهال دايرين لبن واللبن عند البقر والبقر زمان كان في كافوري
وإلى لقاء
سلك

حمزه عوض


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى