قوقل ‏+‏ ‏
Use the English Language

في السلك - بابكر سلك - المهم نقطت

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

في السلك - بابكر سلك - المهم نقطت

مُساهمة من طرف حمزه عوض في الخميس 21 يوليو 2016 - 17:03

.
في السلك
بابكر سلك
المهم نقطت


* بعد الجفاف الذي أصاب الزعيم دورياً
* هاهي المياه تعود لمجاريها
* تلبدت السماء خلف السحب
* والبرق يخطف الأبصار
* فنقطت
* الجو في كوستي عجب
* هذا العجب صاحب الإمكانات الكبيرة
* كلما وظفها للمجموعة
* لمع نجمه
* نتمنى ان يواصل بذات الفكرة
* المهم إنها نقطت
* وفي ناس كده خريفهم مويه ومصدقين
* عندنا نقطت
* وتنقط أسبوع تاني < وتصب
* شووووووو
* مريخ الشباب فعلاً
* المعز ضفر رمضان كوفي أوكرا
* تاني عرفتوا زول؟؟
* ده الشباب زاتو
* وناس روشا مساوي وأتير ومكسيم وبشه والحاج كاريكا ونزار وعمك الشغيل وفداسي أساسيين ويقولوا لينا هلال الشباب
* انتو المعاش عندكم كم سنة يا روشا وكت ديل شباب؟
* ولا انتو زي الوزراء سن معاش ماعندكم
* صالحين للعمل طول العمر
* قاعدين في الكراسي أي زمان أي مكان
* ياخ في ناس ياروشا
* أبوهم لما عرس أمهم كان وزير
* ولدوهم لقوهوا وزير
* قروا واتخرجوا وهو لسه وزير
* عرسوا وأبوهم وزير لسه
* ولدوا ولسه أبوهم وزير
* ولدهم كبر وبقى يقول للوزير جدو
* جضموا ولدهم وقالوا ليهو كيف تقول لسعادة الوزير جدو والبلد دي لسه راجياهو يخدمها كوزير لمدة تلتين سنة أخرى؟
* الشافع فتح خشمو دهشه وخاتي يدو محل اتجضم
* الدهشة ما كانت في الجضيمة
* الدهشة كانت من وطن مستني جدو يشتغل تلتين سنة تاني
* وقال في سرو ده جدو ولا كوبري أم درمان القديم؟
* قلت لي شباب يا روشا!!!
* المهم
* المهم النقاط
* جينا من رحلة كوستي بست نقاط
* وست نقاط تاني برضو
* الست نقاط الأولى بتاعت الكورة
* الست نقاط التانية كالآتي
* النقطه الاولة انو تسجيلاتنا ناجحة
* النقطه التانية انو امكانيات رمضان مهولة جداً
* التالتة كنانة موقع ممتاز للمعسكرات
* تونس لي شنو!!!
* الرابعة إنو الإصرار على الانتصار هو سبب اي انتصار
* أما النقطة الخامسة فهي ان لياقة بعض أولادنا لسه بعيده زي أوكرا
* دايرين شغل
* أما النقطة السادسة فهي أننا لم نشعر بالفرق بعد خروج لاعب الرابطة مطروداً
* لم نستفد تكتيكيًا من ذلك النقص
* لانو أساسا ماعندنا تكتيك
* ولا تنظيم لعب
* يمكن سوء الأرضية يكون سبب عند البعض
* لكن عندي السبب ليس سوء الأرضية بقدرما هو انعدام الخيال التكتيكي ومهارة التوظيف المناسب
* محسن سيد صديق حميم
* ويعامل الناس باحترام
* ولكن الأمانة تقتضي ان نفصل بين العلائق الشخصية ومصلحة الكيان العليا
* محتاجين مدرب بقامة الفريق
* والمجرب لا يجرب يا والينا
* عقد واضح ومحدد مع المجرب ونبقى مارقين على منصات التتويج
* وان صدقت الأخبار التي تقول ان المعلم قد طالب بمتأخرات
* حقو دي تبقى سبب أساسي لمراجعة الأمر مستندياً
* لا نعتمد على فلان قال وعلان حلف طلاق
* والوصول لحقيقة الأمر لا يستحيل على جمال
* نحن لا نخون طرفاً ولكن نطالب بمراجعة الأمر عسى بل لعل البقر يكون قد تشابه على البعض
* المهم
* نفرض جابسون مصاب منتهي
* هل يبخل جمال على الرجل بمستحقاته أو تكلفة علاجه؟
* فلنستصحب معنا ذكرى رحيل ايداهور
* ما فعله جمال وقتها لم يفعله السفير النيجيري
* ولن يتم فعله مع السفير النيجيري
* ولم يصدقه الشعب النيجيري لليوم
* يبقى الوفاء عند أهل الوفاء متوفر
* وتبقى إشكالية جابسون زوبعة ساكت
* وأصر أن هناك مفاجأة سارة مصدرها جيمي
* جيمي جا منو البرجا ياروشا
* أيها الناس
* ان أوفى جمال لإيداهور ميتاً
* لا يمنعه شيء من الوفاء لجابسون حيًا يرزق
* مستنين القرار المفرح يا والينا
* بون جو مسيو
* آسيتوا
* لا سغلبو
* كرسيك المناسب يا معلم
* أيها الناس
* إن تنصروا الله ينصركم
* أها
* نجي لي شمارات والي الخرتوم
* دايرين نواصل في الطريق والمرور يا والينا
* سيب الروزات والكريزات
* شفت الدرداقه الربطوا ليها مكنة وفكوها فينا؟؟
* ملونات كمان يا والينا
* السايقها تلقاهو زي السايق حمار يا والينا
* والدرداقة أم مكنة ترفس فينا
* تفتح خشمك تدخل واحدة
* نقفل خشمنا تنطحنا يا والينا
* والركشات لما يفكن مصفى العادم لينا
* ويربطن سماعات وصراخات يصرخن فينا
* الركشة تجيك ماشه
* تحلف تقول حوليه يا والينا
* ملكة جانسي شوية صوتها جميل وسريعة ما بتقفل شارعًا علينا
* لكن القديمات الزي الحفاطات ديل يا والينا
* حقو يشغلوهن سبيل في خشوم البيوت يسقننا ويقدمن خدمة لينا
* سلك كهربا
* ننساك كيف والكلب قال يا حليل النقل المكنيكي
* وإلى لقاء
* سلك

حمزه عوض


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
تستطيع الرد على المواضيع في هذا المنتدى