قوقل ‏+‏ ‏
Use the English Language

في السلك "بابكر سلك" انطلقت

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

في السلك "بابكر سلك" انطلقت

مُساهمة من طرف Admin في الخميس 8 سبتمبر 2016 - 14:55


#الحديبة_نيوز
< اكتب قبل لقائنا بهلال الرمال البدي الناس اربعة
< فنياً هم في حال افضل من حالنا
< ولن نجني نصراً الا بالصدفة او باجتهاد خاص للاعبين
< لأننا نفتقد لاسلحة التكنيك والتخطيط
< فقط زئير الجمهور والعناية الالهية في الهجمات العلينا والتوفيق الرباني في الهجمات اللينا على قلتها هي اسباب انتصارنا لو حدث.
< فنحن نعيش فترة شعارها الفوز قسمة ونصيب.
< ولسه بكررها
< على التسيير تحمل تبعات إخفاقات الجهاز الفني وردات فعل الجماهير التي اضناها الصبر وهي تبحث عن العروض ويوجهها جهازنا الفني للسينما ان كانت تريد عروضاً.
< نسأل الله الستر واللطف والتوفيق
< المهم
< الصديق اسامة نجم الدين كتب على صفحته الشخصية حواراً اعجبني
< الأسعار طلعت مع الدولار اسي لما نزل لي اربعطاشر ما لها ما نزلت معاهو!!
< خايفة على سمعتها عشان ما يقولوا طالعة ونازلة مع الدولار.
< لكن يا اسامة يا اخوي سمعة شنو العند الاسعار؟
< الأسعار عندنا زمااان فقدنا فيها الثقة وبقت ماشه على حل شعرها يا سمسم يا اخوي
< انطلقت
< بدري الكلام ده
< الله يهديها
< لكن بعد ده الله اعلم
< اتحالت ليها
< ونحن أصبحنا كمان لا نثق في الدولار
< لأنه مصر شديد يستفزنا في كل يوم جديد
< والعيب مافي الدولار
< العيب في جنيهنا الزي بنطلون السيستم
< طوااااالي ناصل
< بي سبب وبدون سبب بنصل
< حتى أضحت خصوصياتنا في السهلة
< على عينك يا تاجر
< ويا ريت لو البوكسر كشفه
< بوكسر زي البوكس تمنية وسبعين
< مطفق ورفارفو يتراقصن ولونو باهت وصندوقو مشرط
< الأسعار تنزل مع الدولار كيف يا اسامة يا أخوي
< والكروت البتنزلها كلها ماتت
< والدولار ينزل كيف ونحنا نجدع ليهو في الدوهات بعد كتلنا الكروت البتنزل الدولار
< لو ما كتلنا كرت مشروع الجزيرة كان الدولار نزل واطمأن
< وكان جريناهو ليك خمسين
< الدولار ينزل كيف يا سمسم وهو قافل بالاسم على ود مشروع الجزيرة او بت سودانير او شايب قطر يلملم محاصيلنا ويصفر تووووت معلناً رحيله لثغرنا الحبيب لتسجل صادرات تجبر الدولار اللعين على لبس السيستم لينصل مجبراً كلما رأى جنيهنا أب شنب
< أنا يا سمسم برغم انطلاقة الأسعار وسيستم جنيهنا الناصل
< الا اني لا أؤمن بأن جنيهنا اب شنب سيحلق شنبو ويقعد ادروج ساكت
< فصباح القرود ولا صباح ادروج يا سمسم
< لكن الأسعار عملتها ظاااهرة
< ما عندها كبير
< المهم
< نرجو السترة امام هلال الرمال الذي ضرب ناس فطومة اختي بمازمبيه الا ربع
< ومن مظاهر عدم اهتمامنا
< اكتب الآن وانا بجوار الاستاد والساعة تشير للسابعة والكورة الساعة تمنية والشفوت جاهزين والابواب قافلة
< هكذا نعامل أهم أسلحتنا وهو الجمهور ونتحدث عن تفانٍ في العمل
< ايها الناس
< ان تنصروا الله ينصركم < اها
< نجي لي شمارات والي الخرتوم
< كان شفت يا والينا
< الدولار طلع الأسعار طلعت لينا
< الدولار نزل الاسعار ابت تنزل لينا
< تكون قافلة وناوية تجرنا خمسين يا والينا!!!
< ولا سيستم جنيهنا مطمئنا وجنيهنا ما مالي عينها!!!
سلك كهربا
ننساك كيف والكلب قال في كلامكم عن الدولار بتقولوا خمسطاشر وسبعطاشر واربعطاشر… كلمة الف دي سقطت عمداً ولا سهواً ولا خجلة؟!
كلب ابن كلب خلي بالك
والى لقاء
سلك

Admin


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
تستطيع الرد على المواضيع في هذا المنتدى