دق الدلجة – محمد عبد الماجد – اعادة توزيع )اي دمعة حزن لا لا( بلحن )تقوم بينا رب تقع بينا كب(

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

08092016

مُساهمة 

دق الدلجة – محمد عبد الماجد – اعادة توزيع )اي دمعة حزن لا لا( بلحن )تقوم بينا رب تقع بينا كب(





#الحديبة_نيوز
من رأسي:
لمن هلال الابيض فاز على  الهلال باربعة اهداف مقابل هدفين ..قلنا للمريخاب ترى نحن عندنا جوهرة من تلات طوابق ..بتصبرنا شوية..وتبقى لينا عزاء.
انتوا يا ناس المريخ من غير الجوهرة ولا طابق واحد ..بتتحملوا الخمسة دي كيف؟.
من كراسي :
متهيأ لى الناس بتدخل السينما عشان التكييف مش الأفلام.
محمود عبدالشكور
*.قاعدين ننقرقش في الكلام ….
*.نفرز في )التاء المربوطة(….
*.ونفتش في الهمزة العلي السطر…
*.ونبلع في حروف المد.
*.نفسنا قام..
*.نطقطق في اصابعينا…
*.بنتمطق وقت يجيبوا لينا سيرة هدف مهند الطاهر الاول…
*.نطلع الشارع ..ونجي راجعين..
*.نشرب الشاي بي بسكويت من غير بسكويت ..)كلمتكم انا(.
*.حدثتكم ..وفتحت ليكم شبايك المدرسة.
*.المعز محجوب اثبت عمليا انه بقبل القسمة على سبعة…
*.الزول دا اتقسم على سبعة اجزاء عشان يطلع كورة مهند الطاهر …جواربه ما قدر يطلعها…
*.اولادنا امس ..اصلو ما قصرو.
*.والله العظيم ..اولادنا في هلال الابيض اتقطعوا ..)مهند الطاهر والشيخ موكورو وفيصل موسى(.
*.واولادنا الفي المريخ برضو ما قصروا )المعز محجوب وعمر بخيت وعبده جابر(.
*.نحن امس قاعدين نتابع في المباراة زي كأننا بنحضر في تقسيمة للهلال.
*.الفرق  قبل العيد بقى )12( نقطة.
*.قبل الخروف..وصل 12 نقطة.
*.الدولار نزل ..والفرق ماشي زايد.
*.البحر نزل ..والفرق ماشي زايد.
*.ماشيين وين انتوا؟.
*.بعد الفرق ما بقى )12( نقطة ..مفروض يفصلو بين العرضة شمال والعرضة جنوب بي )سور( ..زي سور الصين العظيم.
*.زلط ما بفصل بينا.
*.الحكاية كبرت شديد.
*.في ترتيب الفرق ..لمن يكتبوا الجدول ..مفروض يكتبوا الهلال بعد )6( شهور حتين يكتبوا )الوصيف(.
*.او يكتبوا الهلال ثم يعملوا ليهم )مربعات( فاضية كتيرة – ثم يكتبوا المريخ.
*.و
*.)ونحن عايشين والحمدلله  )النفس( بينزل ويطلع إلى الآن..ولا ينقصنا شيء سوى رؤياكم الغالية(.
*.رأيكم شنو في شوربة عدس حارة.
*.يا زول شوربة شنو مع الخمسة دي؟.
*.ما تشتغلوا بالموضوع بتاع العدس دا – مرات قاعد اجيب لي حاجات برة العمود.
*.المريخاب وقت الهلال اتغلب من مازيمبي خمسة ..قلبوا الدنيا.
*.هم الخمسة بياخدوها من هلال التبلدي.
*.متل شاي العصر ..البجيبوه ليك الصباح..
*.عبداللطيف بويا ..اصيب في مباراة فريقه بارتجاج في المخ …طلعناه برة.
*.المعز محجوب بي الارتجاج الحاصل ليه كمل المباراة.
*.الشيخ موكورو دا فتنة.
*.ناس الهلال جابوه مخصوص للشغل دا.
*.الزول دا لو قاعد معانا – والله ما بيبسطنا قدر الانبساطة العملها لينا امس.
*.شيبولا ذاتو ودوه هلال الابيض وقت ليبيا بتفتح كدا.
*.رأيكم شنو في لقيمات سخنة كدا.
*.يا زول لقيمات شنو مع الخمسة دي.
*.الموضوع دا ما تشتغلوا بيه ..مرات بجيب لي حاجات برة العمود.
*.صلاح نمر تقول زارعنو ناس الهلال )طابور خامس( في دفاع المريخ.
*.معليش طبعا انتوا الايامات دي اي سيرة للخمسات ممكن تقوّم ليكم نفسكم.
*.تعمل ليكم حساسية.
*.تعالوا نطلع من الحتة دي..وما نشتغل بالموضوع كتير.
*.تعالوا نتراشق في حاجة تانية.
*.نقدر ظروف المريخاب ديل..الدينا عيد وما بصح كدا.
*.اتمارقنا…
*.يعني بقينا مارقين.
*.نفتح باب الحوش الكبير…
*.نقعد في كوم الرملة…
*.نشخبط في عويناتنا…
*.نجيب الشاي…
*.نقصقص في حكاوينا…
*.دروبنا زمان ..وقت نرجع ..
*.بتتعب من مشاورنا…
*.منو الجابرك على دا الحال؟…
*.منو القاسمك ..على العزال…
*.رأيكم شنو بي كباية ليمونة باردة كدا.
*.يا زول كباية ليمون شنو مع الخمسة دي.
*.موضوع كباية الليمون دا ما تشتغلوا بيه ..مرات قاعد اجيب لي حاجات برة العمود.
*.معليش …نفصل ليكم قبل ما ندخل الحصة التانية.
*.و
*.)ونحن عايشين والحمدلله  )النفس( بينزل ويطلع إلى الآن..ولا ينقصنا شيء سوى رؤياكم الغالية(.
*.اهداف الشيخ موكورو التلاتة ..تم تحويلها الى معمل الفحوصات العالمي في سويسرا.
*.عاوزين يشوفوا الحكاية شنو؟.
*.الفحوصات الآولية اثبتت ان هناك مشكلة في الحامض السيني في القون الاول.
*.قون موكورو التاني ما فيه مشكلة.
*.القون التالت ..شايلوه وودوه لي )سيحة(..ممكن بعد اجتهاد شوية كدا …يطلعو ليكم )تسلل(.
*.غايتو يا سيحة بكرة الجمعة …لو عاوز تتكلم عن كورة المريخ وهلال الابيض ، إلّا تستعين بي لقطات من مسلسل كابتن ماجد.
*.يتخيل لي كدا – صلاح نمر فاكر مباراة امس )فيلم اجنبي(.
*.الظاهر عليه ما فهم اي حاجة.
*.في اي هدف يجيبو هلال الابيض ..يجيبوه ليك جاري في اتجاه غلط.
*.الزول دا قاعد يفوت وين؟.
*.كسرة شمال بتطلعو يمين.
*.كسرة يمين بتطلعو برة الملعب.
*.الفيضان البتكلموا عنو في الايامات الماضية – عندو علاقة بي البعمل فيه الشيخ موكورو دا؟.
*.السيول القاصدنها ديك …هي غير الشيء البعمل فيه مهند الطاهر؟.
*.اول مرة في التاريخ اشوف لي )غزال( بجهجه ليه )نمر( بالشكل دا.
*.يا اخوي يا صلاح نمر ..عليك الله لغاية هنا كفاية ..جبت ليك سمعة ما كويسة للنمور.
*.جهجهت باكاتها.
*.ما في )نمر( بيعمل فيه البتعمل فيه دا.
*.رأيكم شنو في شوية فسيخ مع بصلة مولعة كدا.
*.يا زول فسيخ شنو مع الخمسة دي.
*.ما تشتغلوا بي موضوع الفسيخ دا مرات بجيب لي حاجات برة العمود.
*.و
*.)ونحن عايشين والحمدلله  )النفس( بينزل ويطلع إلى الآن..ولا ينقصنا شيء سوى رؤياكم الغالية(.
*.امس في هذه المساحة قلت ليكم شامي لي ريحة اي دمعة حزن لا لا.
*.قعدتوا تغالطوا.
*.الليلة عاوزين نعيد توزيع )اي دمعة حزن لا لا( بي )تقوم بينا رب تقع بينا كب(.
*.وشوفوا البحصل شنو؟.
*.صلاح نمر يقوم ويقع ..تقول بالع ليه )نقالة(.
*.يمشي يمين وشمال في نفس اللحظة.
*.بجري على الاتجاهين في نفس الوقت.
*.المعز محجوب ..متل الزول الماسك كشف البكا..
*.الشيخ موكورو عمل فيه اي حاجة…
*.نزل بيه..
*.ورجع بيه تاني.
*.وفتح ليه الباب.
*.غايتو يا معز لو عندك باقى قروش ..مع الجماعة ديل اقنع منها.
*.موكورو جاب فيه اقوان )قفة( كدا من اي حتة ..ومن اي موقع.
*.ضفر ننصحو يفتح ليه محل بتاع اسبيرات عربيات كورية في محطة الغالي.
*.موضوع الكورة دي صعب عليه.
*.كما اننا نطالب بتعين منتصر زيكو مدير للكورة في المريخ – عشان تاني لو حصل اي موقف زي دا ..زيكو يشيل الكورة ويطلع.
*.اصلو ما كان يخلوها تصل خمسة.
*.انتوا قايلين نفسكم لاعبين ضد )الوحدات(.
*.انتوا عارفين الكورة دي ناقصة شنو؟.
*.ناقصة اكرم الهادي سليم.
*.مازدا ما مشكلة ..ممكن نعتبرو ليكم محسن سيد.
*.ابراهيم جعفر ..قدم امس اسوأ مباراة له ..ظل في كل كورة مشتركة يعتدي بالضرب على لاعبي هلال الابيض.
*.ابراهيم جعفر رأسو كبر.
*.سمع ليه كلام – افتكر الموضوع قلع وضرب.
*.يا ابراهيم جعفر – لو الكورة بيلعبوها بي طريقتك دي …ناس صلاح دوشكا وبدرالدين بخيت كانوا لغاية الآن بيلعبوا.
*.وما كانوا اتاحوا فرصة لي زول زيك يلعب كورة.
*.كمان انت الكورة بتعرف ليها شنو؟..عشان تدور ضرب بالشكل دا.
*.ابراهومة – الظاهر عليه عندو مشكلة في )اللفة(.
*.او عندو فوبيا ..من الكورة عندما يقابله المهاجم.
*.ابراهومة حول الطرف اليمين للمريخ الى )مول للتسوق(.
*.تعمل فيه اي شيء.
*.ابراهومة بوابة عبدالقيوم ..بي ذاتها.
*.بي شحمها ولحمها.
*.رأيكم شنو في سلطة اسود مظبطة كدا.
*.يا زول سلطة اسود شنو مع الخمسة دي.
*.ما تشتغلوا بيها – مرات بجيب حاجات برة العمود.
*.و
*.)ونحن عايشين والحمدلله  )النفس( بينزل ويطلع إلى الآن..ولا ينقصنا شيء سوى رؤياكم الغالية(.
*.………..
و
*. التحية والتقدير لمدرب هلال الابيض ابراهومة الذي قدم مباراة كبيرة رغم الاتهامات التى طالته.
*.والتحية والتقدير لفريق هلال الابيض وهو يلعب بهذه الروح.
*.بقى عندنا هلال تاني يسر العين.
*.في انتظار هلال كادوقلي.
*.واهلي شندي.
*.الظاهر الفرق ح يبقى )40( نقطة.
*.مع الخمسة دي مفروض المريخ يسحبوا منه نقطتين زيادة.
*.…………..
*.
السيدة )ل( – اول مرة )الهلال( يكتمل )بدرا( يوم )5( من الشهر العربي.
*.
وقرّط على كدا.



ـــــــــــــــــــــــ




Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى