مجموعة من اشعار سيد احمد عبدالحميد

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

30092016

مُساهمة 

مجموعة من اشعار سيد احمد عبدالحميد




نصيب واقسام
كلمات / سيد احمد عبد الحميد
أخلف لي وعودو عذرتو قلت نصيب واقسام
طاف كل الفريق في عيدو ودار كل البلد حام
لكن طول اجازتو أبانا .. لامن كملها وقام
حرام والله .. نحن البينّا أرحام
لا قال الله قال افشوهو بينكم سُنة الإسلام
لا اتذكر زمن لقيانا .. أيام كانت ايام
بلا أصبح حجر في طبعو .. جافي نفور وظلام
أصلو ما شفت النصيح ومعافى يصبح في شلل عام
كان اخيرلك تتعظ بالدنيا فيها دروس واحكام
وما شفت القمر في سماهو ينقص وكان امس تام
يا حليل اللى كان فوق زولو تلقى فصيح وكلام
يعرف للقوافى يجيدا كم كان ليها نظام
ما قال فيك شين غير عودى ان بقى فى بلاد شام
ــــــــ
كان قــــــــدري
كلمات: سيد احمد عبد الحميد
غناء: محمـد النصــــري
عبر الاثير يا السمحه صوت نغمك وصل
واتزعزع القلب القبيل طبيتو
من بعد اليقين تاني حيا وكتل
كان قدري لازم اغني ما نضب المعين
زي ايام زمــــــــــــان ومتل
كان قدر لازم اجترى ذكراك بالدريب وانزل
اتمعن النخل الطوال في ضلو كنا خليل وحل
برق الريدة شال من قبلي وإحتفل الشدر
بلداتها المجافي الحركة رشاها المطر
من بعد والفتي يا أخت الزهر
إنشطبت إقامتك بينا وإنكتب السفر
مجبورين رضينا القسمة قلنا قضا وقدر
مجبورين رضينا القسمة واﻷدهي وأمر
غنيتك ليالي حزينة مأتم في وتر
ــــــــ
مـوعـد ألاحـرار
كلمات : سيد أحمد عبد الحميد

لا غشت النسائم روضنا لا فتحت أزهار
لا حام الفراش في صباحو لا غازل النوّار
لا عادت ليالي غرامنا لا غنت الاطيار
آآه يااااا خوالي ايامي يا موعد الاحـرار
يا لحظات عشقنا السامي وينك ياصفا الانهار
ياساعة شقاي والامي ليشن جيتي غير انذار
لكن إلا لي مين اشكي واحكي انا قسوة الاقدار
غير الله الخلق أيامو سبع ليالي سبع نهار
يا قمر البوادي احكيلك نجمك وانت كنت شهود
كم ناجيت كمل ليلي ناحل والجسيم مورود
يجفاني الحبيب غير سِبّة كان فرقة المريود
آه ياااشقى ايامي وقسوة الاقدار
يا أصحابي ليكم بحكي بحكيلكم غرامنا الكان
كم نقعد سوي ونتناجا لامن نسمع الاذان
نـوثــــق لي عهودنا قسمنا ايدنا واعظم الايمان
مستقبلنا شيدناه ساسو وفاء سياجو حنان
ماعارفين رهود ألآمنا جاي من دردر الاحزان
آآه يا شقـــــا ايـامي وقسـوة الاقـدار
غافر برضي لي محبوبي يسعد ياهو كل مناي
يرفل في نعيم الدنيا اعيش انا في محيط مأساي
مايهمك عشيشنا البدري يومو الوصلتو الهبباي
هائم كل عزاي طمبوري بلهـج ولى الجمال غناي
ياما في الغرام في مظالمة محرومين وماني براي
ــــــــ
يا رمال حلتنا
كلمات / سيد احمد عبد الحميد
يا رمال حلتنا زولاً ، كان بآنسك ياحليلو
فات رحل من بلدو روح ، وفاتلو لى ناس ماها هيلو
الليلة يبكى دموعو سايلة ، نازلى ما بسرك حويلو
يبكى مطَّرطش مودر ، متلفت فاقد دليلو
يا حليلو الكان بيطلع ، ينزل ومرة يشرب من سبيلو
ومرة يترنم يحاكى ، حسو يرزم فوق نخيلو
الرمال تشكى وتعاتبو ، تبكى منو وتشتكيلو
تقولو ليه خليتنى فتَّ ، والسمر فتش بديلو
فاقد اللى إيدو يمسك ، يورى لى ضلو ومقيلو
وفاقد اللى دموعو يمسح ، يرتى ليهو وكت يسيلو
ينظر القمر المنور ، راح شعاعو مغتى نيلو
ينتشى ويعزف ربابتو ، لحنِ ما موجود مثيلو
يا سلام لو كان رجعلك ، يا بلدنا الهم يزيلو
يسمع القمرى المغرد ، ينسى حزنو مع هديلو



ـــــــــــــــــــــــ




Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى