دق الدلجة – محمد عبد الماجد – علاقة المطرة بـ )شاحن الموبايل الرايح( شنو؟

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

11102016

مُساهمة 

دق الدلجة – محمد عبد الماجد – علاقة المطرة بـ )شاحن الموبايل الرايح( شنو؟




من رأسي :
لا الفسيخ…
ولا العدس..
ولا القرع..
ولا البطيخ…
عندو علاقة بتأجيل مباريات المريخ – بنقول ليكم كدا عشان الامور تبقى ليكم واضحة من البداية.
ما تشيلوها ساكت مع الحاجات دي…خايف واحدة من الحاجات دي تطلع لينا في نتيجة )الفحص(.
من كراسي:
سأل القاضي السيدة :
*.كم يبلغ عمرك ..ولا تنسى انك اقسمت اليمين.
فقالت السيدة : 21 عاما وبضعة اشهر.
*.كم شهرا بالتحديد؟.
108.
*. زمان – ايام )الفأر( كان عندو احترام وتقدير للكديسة مبالغ فيه – قبل ان تتساوي الكتوف وتتدخل الامم المتحدة ومنظمة حقوق الفأر وحريات دوت كم جيري…كان عندنا اعتقاد راسخ ان المطرة عندها علاقة بـ )شاحن الموبايل(.
*.زمن الكديس عندو شخصية.
*.هسع الشخصية في النمر بقت ما في.
*.علما اننا لمن كبرنا وفهمنا – لقينا الموضوع ما عندو علاقة بما كنا نحمله من علاقات في وقتنا داك.
*.علاقة شاحن الموبايل بالمطرة زي علاقة مواصلات الجريف غرب بمواصلات الكلاكلة القبة.
*.ما في حاجة بتجمعهم.
*.شفتوا لو في زول سألتو عن مواصلات الجريف غرب وقام وصف ليك مواصلات الكلاكلة )أيا كانت الكلاكلات البوصف ليك فيها( بكون عاوز يمقلبك.
*.طوالي اتخارج من الزول دا..وشوف ليك اقرب )امجاد( واركبها.
*.انتوا قالوا ليكم الامجاد بيركبوها متين؟.
*.بيركبوها في مثل هذه الحالات.
*.تقوم تنفعل وتركب ليك امجاد.
*.و
*.)ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
*.و)درررروري ضروري( تجونا في الاجازة الكبيرة!!.
*.بعض الاعتقادات تكتسب رسوخها من التكرار والعادة والتقليدية.
*.هذا الاعتقاد كنا قد استخرجناه من صاحبنا – الذي كان ما ان تهطل )مطرة( بمشي يفتش ليه عن )شاحن الموبايل(.
*.وفي الغالب )شاحن الموبايل( بكون رايح في ذلك التوقيت الغريب.
*.في زول منكم بلقى ليه شاحن موبايل في مطرة.
*.تقلب البيت سما ارض ..ما بتلقاه.
*.ما حصل شفت لي )مطرة( صبت في الدنيا دي ..وشاحن الموبايل موجود وما رايح.
*.ما عارف علاقة شاحن الموبايل بالمطرة شنو؟.
*.لكن اكيد الخواجات ديل ما بعلموا ليهم حاجة ساكت.
*.رغم ان الموضوع ما عندو علاقة بالخواجات.
*.والخواجات ما عندهم علاقة بالمطرة.
*.لكن الموضوع ما بيستاهل ليه علاقة.
*.ممكن يأجلوا ليك المباراة لي اي سبب.
*.ما ضروري تكون في علاقة.
*.المهم رسخ في رأسنا ان المطر لمن تصب – الزول تلقائيا كدا يقوم يفتش )شاحن الموبايل( ويركب الموبايل في الشاحن.
*.يمكن )لوجستيا( – في قناعة ان المطر لمن تصب الكهربة بتقطع ..عشان كدا احسن الزول يشحن موبايلو.
*.الظروف ما معروفة.
*.ما عارف من الاساس ناس الكهربة جابوا )الحرص( على ارواح المواطنين دا من وين؟..عشان يقطعوا الكهربة اول ما تصب مطرة.
*.بس دا البيعرفوا ليه.
*.رغم ان الاضرار التى يمكن ان تلحق بالمواطنين في )الضلمة( من المطرة – اكتر من الاضرار التى يمكن ان تلحق بهم عند استمرار التيار الكهربائي مع المطرة.
*.الموضوع دا هسع ما موضوعنا.
*.موضوعنا علاقة المطرة بي شاحن الموبايل الرايح شنو؟.
*.عاوز افهم المباريات دي اجلوها ليه؟.
*.المشكلة في شنو؟.
*.الفحص عندو علاقة بالحوار.
*.الحوار عندو علاقة بالكورة.
*.المطر عندها علاقة بي شاحن الموبايل.
*.و
*.)ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
*.و)درررروري ضروري( تجونا في الاجازة الكبيرة!!.
*.استاذنا بتاع العلوم – زمان الله يطراهو بالخير كان بحب البطيخ.
*.حب مبالغ فيه.
*.لدرجة ان استاذ العلوم كان لمن يكون عاوز يعمل لينا )الكشاف( ..بقول لينا بكرة اي طالب فيكم يجيب ليه )بطيخة(.
*.نحن كنا بنقول وقتها – طيب علاقة البطيخ بالكشاف شنو؟.
*.استاذنا كان وقت يكون عندنا اختبار علوم – كان بقول لينا بكرة اي واحد فيكم يجيب ليه معاهو بطيخة.
*.ونحن كنا بنقول طيب علاقة البطيخ بالاختبار شنو؟.
*.زي علاقة الحوار بتأجيل مباريات المريخ.
*.حاجات ما عندها علاقة بي بعض.
*.و
*.)ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
*.و)درررروري ضروري( تجونا في الاجازة الكبيرة!!.
*.ممكن تلقى ليك واحد مسافر تركيا عشان يعمل ليه بحث في لبن الغنم.
*.هسع دا عاوز ليه سفر لي تركيا.
*.شن رقد عندنا بلا لبن الغنم.
*.الموضوع ما عندو علاقة بي تركيا.
*.ولا بي لبن الغنم.
*.الواحد يكون بياكل ليه في )سمك( – يقول ليك والله السمك دا لو لقى ليه )عشرة وست(.
*.علاقة الوست بالسمك شنو؟.
*.لو ما عدم شغلة منكم ساكت.
*.مرات بتكون بتحضر في التلفزيون ..بتشاهد في مباراة.
*.من غير ما تشعر تلقى نفسك مشيت فتحت التلاجة وجيت راجع تاني تتابع المباراة.
*.التلاجة الفتحتها ولا بتكون شربت منها موية.
*.بي حركة غير ارادية كدا ..خلتك وانت بتحضر في مباراة منقولة في التلفزيون تمشي على التلاجة تفتحها وتجي راجع تاني.
*.مرات بتلقى ليك زول يكون واقف في الشارع.
*.تسألو وتقول ليه مالك؟.
*.يقول ليك والله عندنا قريبنا راجع الليلة من السعودية.
*.طيب علاقة الرجعة من السعودية والوقفة في الشارع شنو؟.
*.لو ما حركات منكم.
*.الزول دا عاوز يوريك من غير مناسبة كدا – عودة قريبو من السعودية.
*.طيب لو كان راجع من المانيا كنت ح تكون واقف في رأس البيت.
*.و
*.)ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
*.و)درررروري ضروري( تجونا في الاجازة الكبيرة!!.
*.مرات التلفون تكون شبكتو طاشه.
*.يلاقيك بتاع الحركة ..يسألك من الرخص.
*.تقول ليه والله التلفون دا من الصباح شبكتو طاشه.
*.علاقة رجل المرور بشبكة الموبايل الطاشة شنو؟.
*.عريس في حفلة العرس..
*.من غير مقدمات..يطلب من فنان الحفلة يغني ليه اغنية )يوم قسموك يا هم كتبوا عليك اسمي(.
*.هسع الاغنية دي ..دا وقتها.
*.واحد تأني يسألك ..يقول ليك اسمع يوم الخميس فاضي.
*.تقول ليه ايوا فاضي…يقول ليك خلاص بجيك يوم الاتنين.
*.وواحد تاني تلقوه بيفتح التلفزيون عشان ينوم.
*.وفي واحد بنوم عشان ما يحضر التلفزيون.
*.حاجات ما عندها علاقات بي بعض.
*.زي الحاجات البتعملوا لينا فيها دي.
*.العزابي ممكن يجيب ليه عدس ..ويعمل ليه حلة عدس كاربة ..يدخلها )التلاجة( ويمشي يجيب ليه طحنية يتغدي بيها.
*.طيب من الاول كان في داعي للعدس.
*.في زول يكون ما عاوز تعزيه في بكاء ابوه.
*.تسأل منو – وتقول ليهم هو الزول دا المات ليهم منو؟.
*.يقولوا ليك ابوه.
*.تقول ليهم هو الزول دا ابوه بموت )9( مرات.
*.المعنى مشيت ليه قبل كدا في وفاة ابوه – وفترت عديل كدا من الموضوع دا.
*.و
*.)ونحن عايشين والحمدلله )النفس( بينزل ويطلع إلى الآن..ولا ينقصنا شيء سوى رؤياكم الغالية(.
*.و)درررروري ضروري( تجونا في الاجازة الكبيرة!!.
*.في حاجات ما عندها علاقة بالتأجيل.
*.اصلو ما بقتنع ليكم بيها.
*.ولا بناقشكم فيها.
*.اها لو فالحين بكرة شوفوا ليكم سبب أجالوا بيه مباراة المريخ مع الاهلي شندي.
*.افتحوا التلفزيون.
*.لو لقيتوا ليكم حاجة في العراق او سوريا.
*.او اندونسيا..
*.او الصين..
*.او الصومال.
*.طوالي أجلوا المباراة.
*.نحن ما عندنا اي مشكلة.
*.عشان الحركات دي شلنا البطولة قبل اسبوعين.
*.وريحنا اضانه من )الجكة( دي.
*.…………………
و
*. يوم 18 ما بعيد.
*.يوم 18 فرتكة )بص الوالي(.
*.بص الوالي ح نعملوا ليكم )ركشة(.
*.…….
*.
السيدة )ل( – في جرس!!.
*.
وقرّط على كدا.

____________
تابعونا عبر فيس بوك
.
سبحان الله و بحمده عدد خلقه و رضا نفسه و زنه عرشه و مداد كلماته(3 مرات)

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى