لقاء كل يوم – رمضان احمد السيد – الهلال والمريخ وآخر الاستعدادات لمباراة الحريق

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

15102016

مُساهمة 

لقاء كل يوم – رمضان احمد السيد – الهلال والمريخ وآخر الاستعدادات لمباراة الحريق




# الهلال والمريخ وآخر الاستعدادات لمباراة الحريق
# المريخ يسعى للثأر والهلال لتكرار الفوز ومواصلة الاحتفالات
# الموسم الكروي ما له وما عليه: سوء البرمجة الظاهرة الأخطر
# وماذا عن الممتاز بعد مشاركة ١٨ فريقا لأول مرة ..!!؟
# رغم الغياب الأفريقي تأثرت البرمجة كثيرا بالتاجيلات، والموسم المقلوب العلة !؟
# مباراة المريخ خصمت كثيرا من اهلي شندي ونجومه
# ردود الأفعال تتواصل حول خسارة اهلي شندي من المريخ…
# عضو سابق بدائرة الكرة المريخية: قضية شيبوب خاسرة والفيفا ستعاقب المريخ !!؟
# ابرز نجوم التسجيلات في الممتاز يتواجدون في ثلاثة فرق !!؟
# مباريات كاس السودان ثارية من الطراز الاول بمشاركة الخماسي…
# الأنظار تتجه للزمالك في مواجهة صن داونز الجنوب افريقي
# مواجهات مثيرة في الدوري الانجليزي والأسباني والإيطالي
# نيس الفرنسي على طريقة ليستر سيتي يواصل انتصاراته ويتصدر
# الان والممتاز على مشارف النهاية ، ونحمد الله انه اكتمل بعد معجزة ، وهذه المعجزة وللأسف الشديد تمثلت في الخروج المبكر لجميع فرقنا وكذلك المنتخب من التصفيات لنهائيات الامم وكذلك كاس العالم ، وبالتالي تم تكملة البرنامج، ولكن وللأسف ومع ذلك حدثت العديد من التاجيلات ، بمعنى ان الخرمجة فرضت نفسها ، ومع هذا فشلنا في السيطرة عليه وكادت ان تحدث كوارث…
والسؤال الذي يطرح نفسه دائماً لماذا نعجز عن البرمجة وتنفيذها برغم ان كل العالم والدوريات العالمية من حولنا ومع عدد فرق اكبر تلتزم وتستمر البرمجة كالساعة
وحتى هذه الدوريات مرتبطة ببطولات قارية سواء للأندية او المنتخبات وعلى كافة المستويات، ومع ذلك تلك البرمجة مضبوطة وعندنا هنا لا تفرز الأسبوع من الاخر ومن الطبيعي ان يكون فريق متقدم على فريق…
الكثيرون يرون ان الموسم المعكوس والذي لا يتماشى مع الدوريات العالمية من حولنا هو سبب الكوارث
والأمر الثاني ضعف وهوان الاتحاد وخنوعه لأندية القمة التى تتحكم في كل شيء ويكفي ان اهلي شندي كان المتضرر في كل ما حدث…
امر اخر يتعلق بالشكاوى وتساهل الاتحاد في الحسم والعديد من الثغرات والتأخر في الرد وغيره كلها لها تأثيراتها برغم انه لا يوجد سبب لعدم الحسم او إقامة الاجتماعات…
وحقه الأخ السكرتير ومن خلال البرمجة الافريقية وانضباطها ومواعيدها ان يعكس ذلك على الدوري السوداني…
#والمحير حقاً ان الاتحاد الذي كان يسعى لزيادة الفرق من ١٤ الى ١٦ فريق اصبح مجبرا وبقرار جمعية عمومية على تجاوز ذلك وزيادتها الى ١٨ بسبب قضية الموسم ، ولكن السؤال الذي يطرح نفسه لماذا عمل الاتحاد نائم ولم يدعو لجمعية عمومية لتراجع حتى يستقر الممتاز في ١٦ فريقا ، هل هناك مصالح للبعض وتقاطعات ام ماذا…
_وحقيقة لا ادري كيف كان سيكون حالنا وفرقنا لو كنا مستمرين حتى الان في البطولات الافريقية …!!؟
_وهل سيكون الموسم القادم بنفس المستوى والصورة ، برغم اننا نتحدث عن متخصصين في برمجة الممتاز ، من المفترض ان يكونوا استفادوا من هذه التجارب والعديد من السلبيات ، فماهو الحل !!؟
تواصل
وشهد شاهد من أهلها
ناصر محي الدين
عضو سابق دائرة الكرة في المريخ
–كتب عبر صفحته في الفيس بوك، ولما كانت آرائه جريئة وصريحة حول أزمة الموسم وشكوى المريخ وشيبوب، رأينا إعادة نشرها
–أنا ناصر مشجع مريخابي كان عايز يقول رأيو في قضية إنتقال اللاعب شرف الدين شيبوب الى الهلال عبر النادي التونسي لكن والأزمة الأخيرة عطلتني… طيب الكورة انتهت والمريخ فاز الحمد لله .. انا كمشجع مريخابي سعيد بالفوز رغم اني ما شفت الكورة طبعا وأتمنى الناس الماشافت الكورة ما تنظر وتفتي في اللاعبين.. طيب برضو كمشجع عندي رأي في الأزمة لكن ما شايفو مهم .. المهم أكرر مرة تانية وتالتة ومية
#أنا ناصرالمشجع داعم طوالي لقرارات رئيس النادي د. جمال الدين محمد عبدالله الوالي يلعب التيم ولا يسحبو هو الرئيس وحريص وبيعرف احسن مننا … وانا شايف الآن ممكن أقول رأيي كمشجع في موضوع شيبوب لأنه وده رأي أحد مشجعي المريخ بيقولو وما بيطلب من أي جهة تتبناهو وما بيفترض أنه كلامه ده صحيح مية المية..
أولاً ناصر كمشجع حالي وكمسؤول سابق في إدارة الفريق أقول شهادة حق شرف الدين شيبوب لاعب مميز وخلوق ولم أواجه أي صعوبات في التعامل معه في فترتين لمن كان لاعب صغير في الرديف وبعد بقى لاعب بيشارك مع التيم الأول أو لمن بقى نجم وأتمنى ليهو التوفيق كصديق وأتمنى عودته للمريخ لأنه خسارة بالجد
طيب كمشجع أنا شايف انه المريخ أخطأ بعدم التعاقد مع اللاعب كمحترف ومفروض نتحمل كلنا نتيجة الخطأ..
يلا انا حأتكلم في الشق القانوني فقط فيما أعتقد إنه صحيح بالمنطق وبالروح من غير المادة مش عارف إيه والقصص دي .. نمسك واحدة واحدة..
شرف لاعب هاوي في المريخ
نادي منافس للمريخ في نفس درجته قدم عرض مالي لشرف للإنتقال إليه )الهلال( عن طريق كبري في نادي أثيوبي ثم بقى نادي في دولة الجنوب الشقيقة وفي النهاية رست على نادي تونسي..
هل ده يعتبر تدخل طرف تالت ؟؟
أيوة نعم يعتبر تدخل طرف تالت ونص وخمسة
طيب هل حتقدر تثبت إنه تدخل طرف ثالث؟؟
أيوة حأقدر لو اللاعب إعترف او النادي التونسي إعترف أو نادي الهلال إعترف انه تدخل بالتأثير على اللاعب
طيب المريخ عمل شنو؟؟
عمل خطاب للاتحاد بيقول انه وقف اللاعب لمدة 3 سنوات لغيابه عن كم تمرين لفريق الرديف، تصدق أخي المشجع الكريم 3 سنة بحجة غياب من تمرين الرديف وهو لاعب هاوي!!!!! أنا ده ناصر المشجع المريخابي ده لو جاني خطاب زي ده كنت شرطتو ورميتو في أقرب سلة مهملات واخدت حبة الضغط طوالي بعده لأنه دي عوارة، ايوة والله عواااارة
لاعب هاوي غاب من كم تمرين توقفو 3 سنة !! ليه 3 سنة أصلو كاتل ليهو حكم أصلو؟
علماً بأنو اللاعب لو دق الحكم وجلده بالحزام ووجه ليهو عديد البلنجات والهوكات في وشه وأداهو كم شلوت في بطنو وطلع ليهو فوق راسو وكسر ليهو الراية في وشو وسب ليه وتف في وشو في مباراة على الهواء مباشرة عبر قنوات البي ان سبورت الشقيقة بيتم إيقافو لمدة عام واحد بس أيوة سنة واحدة ..مابي مبوتو ده سك الحكم في الميدان كلو وشنكلو ودقاهو وشلتو ورماهو في الأرض اخد سنة واااااااااااااااااااااااااااااحدة…
أسوأ حاجة ممكن يعملها لاعب كورة انه يوقع عقدين مع ناديين في وقت واحد ودي يا رعاك الله أقصى عقوبة ليها 4 شهور ..تقول 3 سنة
طيب أنا ناصر المشجع ده من البداية كان رأيي انه تدخل طرف ثالث مافي شك وكنت متحمس لأنه الاخوة في الهلال كانو بينشرو صور اللاعب مع رئيس النادي ومسئولي النادي وبيقولوا انهم خلف الإنتقال ده وده طبعاً كان حوديهم مكان ما ظريف لأنه ده عبط برضو… لكن فجأة يبدو إنه أخواننا في الهلال حصلوا على فتوى بعدم تبني الإنتقال ده رسمياً وده الحصل وتنصلوا عن كل حاجة رسمياً وقالوا رئيس النادي أتصور مع شيبوب لأنه معجب بأداءه وكده بس .. وفي اللحظة دي انا وصلت للقناعة التاليةNo Caseخلاص الموضوع انتهى قايم اوفر..
طيب أنا رأيي كشجع كان اليحصل شنو؟
المريخ ياكل الموضوع عادي لاعب ومشى ومافي كايس وانا ناصر المشجع ده لو الكايس ده مشى الفيفا وعينوني قاضي أوحد أنظر في القضية ما بأحكم للمريخ ..والله ما بحكم للمريخ ..
أقول ليك حاجة لو المريخ مشى للفيفا قال شرف شيبوب ده هاوي وانا كنت بأدفع ليهو راتب وحوافز بالدولار
حيتعااااااااااااااااااااااقب أيوة حيتعااااااااااااااااااااااااقب
لو المريخ مشى الفيفا قال شرف شيبوب ده هاوي عندي في التيم الرديف غاب من التمارين بتاعت الفريق بتاعي ولقى عقد إحتراف في نادي في تونس ومشى وأنا عاقبته بالإيقاف لمدة 3 سنوات
حيتعاااااااااااااااااااااااااااااا اااااااااقب
أيوة المريخ المشتكي ده حيتعاااااااااااااااااااااقب
طيب لو المريخ قال العقوبة دي مكتوبة في القواعد العامة بتاعت الاتحاد بتاعي الفيفا حيقول ليهو )قواعد عامة بتاعت فانيلتك( روح إسبلاها وأشرب ميتها
طيب المريخ يقول لاعب غير هويته من هاوي لمحترف وطلع بره بشهادة نقل هاوي وجاء راجع السودان كمحترف بالتي ام أس يرجع لي المريخ هاوي تاني تحت أنغام )أرجع تعال عود لي ..جدد حنانك لي( حيقولو ليهو ممكن نديك فرصة تهدي الإغنية للإخوة بلجنة شئون اللاعبين غير الهواة والأهل بالكسمبر… معقولة ياخي… عاد ده كلام
يبقى الجوطة والحاصل دي حتكون هزائم إضافية للمريخ وإزعاج للناس
ياجماعة خليكم مشجعين بس شجعوا ما تمعطو بعض ياخي…
الإدارة ولا النادي البيسيروهو المشجعين وبيسمع كلام المشجعين ما بتقوم ليهو قائمة ..بيروح في ستين داهية والله
الإدارة الصحيحة مابتسمع رأي العوام بل بتقود العوام .. مافي حاجة إسمها الجمهور عايز كده انت كإداري تقود الجمهور للصاح ياخي
لحن الختام
#اتفق معي كثيرون بان اهلي شندي شارك امام المريخ بتشكيلة ما انزل بها من سلطان ، اسماء البعض لأول مرة يسمع بها…
#وهل سيعود اهلي شندي غداً لمستواه في مواجهة الخرطوم الوطني ، الان لأهلي شندي وهلال الابيض ٧٠ نقطة نفس الرصيد ، فهل يفك أبناء ريكاردو الاشتباك ام يستمر على ماهو عليه…
الفريقان تنتظرهما مواجهة اخرى في كاس السودان للحاق بالهلال والمريخ وهلال الابيض في صراع اخر متجدد ومباريات ثارية بين الفرق…
#كثف الهلال والمريخ من اعدادهما للمباراة الخاصة في الممتاز الثلاثاء القادم ، وكلاهما في تجارب ودية من الفرق الصغيرة حققوا من خلالها الكثير…
الهلال نام على الخط بعد التتويج والاحتفال بالممتاز والأمر يحتاج لاهتمام اكبر ، خاصة بعد ان تغير الوضع او الخارطة بعد عودة الروح للمريخ وفوزه العريض بالأمس القريب على اهلي شندي…
الهلال مطالب بتكرار الفوز ً والمريخ سيسعى للثأر وإنقاذ موسمه وإفساد فرحة الهلال بالبطولة…
#اليوم ذهاب النهائي الحلم لابطال افريقيا في جنوب افريقيا بين صن داونز والزمالك ، والزملكاوية اهتموا بالحدث بقدر ما يستحق ويتطلعون للقب السادس في تاريخهم من أصل ٧ مرات يصلون فيها للنهائي…
الزمالك اكمل الجاهزية بقيادة جبر والحاوي حفني وباسم مرسي وشيكابالا والمحترف ستانلي
#في الممتاز الانجليزي ابرز المباريات اليوم شيلسي في مواجهة ليستر سيتي ، ومانشيستر سيتي في مواجهة ايفرتون ، والارسنال في مواجهة سوانزي ، وبالاثنين مباراة الجولة بين ليفربول ومانشيستر يونايتد…
#في اسبانيا تنطلق الجولة بمباريات طرفها الريال واتلتكو وبرشلونة
#في فرنسا قمة باريس سان جيرمان ومارسيليا ، وبالامس سقط موناكو امام تولوز بالثلاثة مقابل هدف وبقي في المركز الثاني ،وحافظ نيس على الصدارة بتخطي ليون بثنائية مستفيدا من النقص العددي بعد طرد نجم ليون من الشوط الاول ،نبيل فقير ، واهدر بالوتيلي ركلة جزاء
#في ايطاليا قمة الجولة بين روما ونابولي…
الحالة
اين اختفى طوال القامة في اهلي شندي في مواجهة مصعب اقصر لاعبي المريخ ، اين خطاب الفارع الطول وبقية اللاعبين…
اهلي شندي امام الكبار لم تعد له حلول…
قلت اسهم كلتشي وعديد اللاعبين من اهلي شندي بعد المباراة…
ابرز نجوم الممتاز يتواجدون في الخرطوم الوطني وهلال الابيض وهلال كادقلي ، وهلال كادوقلي سيعاني كثيراً لان هناك ١١ لاعبا تقريبا مطلوقي السراح…
_هل فرغ المريخ من تعيين حكام القمة؟؟؟



ـــــــــــــــــــــــ



Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى