تابعونا عبر فيس بوك

قوقل ‏+‏ ‏
Use the English Language

دق الدلجة – محمد عبد الماجد – انتظروا )الحلو(!!

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

13112016

مُساهمة 

دق الدلجة – محمد عبد الماجد – انتظروا )الحلو(!!





من رأسي :
ارتفاع متوسط اعمار لاعبي المريخ – تجعلنا نطالب مجلس المريخ )بص الوالي( ان يطالب من الاتحاد العام برمجة مبارياته في الموسم القادم لتلعب كلها )عصرا( – ناس باسكال وكلتشي وعاشور الادهم وعمر بخيت والتاج وجلال بينوموا ليكم من تمغرب…)العمر عندو احكام(.
من كراسي :
قال مذيع الراديو الامريكي :
)لقد تلقينا الآن نبأ عن كارثة لم يسبق لها مثيل في تاريخ البشرية …ولكن استمعوا اولا الى هذا الاعلان……..(.
*.نحن متفقين ..ان المريخ هذا الموسم سجل ليه لاعبين ، ازالوا الفروقات بين المريخ والنسور.
*.النسور هبط من الممتاز.
*.الهابط من الممتاز في الموسم القادم اتعرف.
*.واضح.
*.وظاهر.
*.ومتفقين ان المحترفين الذين تعاقد معهم المريخ هذا الموسم ..في )طلمبات بنزين( ما بنفعوا يشتغلوا.
*.عاشور الادهم ..شايفوا قبل كدا في مسلسل )ابيض واسود( مع محمود المليجي.
*.زمن فردوس عبدالحميد بتمثل دور الطالبة الجامعية.
*.محترف قديم شديد.
*.لكن مع ذلك – ناس المريخ طريقهم مرق …وحاجاتهم ظهرت…واضانهم بردت.
*.)ونحن عايشين والحمدلله، )النفس( بينزل ويطلع إلى الآن ..ولاينقصنا شيءسوى رؤياكم الغالية(.
*.و )دروووري ضروووري تروووري( تجونا في الاجازةالكبيرة!!.
*.موضوع المحترفين في الهلال حتى الآن عالق – وما معروف البيحصل شنو في هذا الملف؟.
*.خاصة ان خبرات الكاردينال في ملف المحترفين الاجانب وملف المفاوضات بصورة عامة ضعيف.
*.الوضع مخيف.
*.والظروف ما معروفة.
*.احتمال كبير تسجيلاتكم دي يتموها ليكم بي مصعب عمر.
*.امس كان لنا ان نتابع بعض مباريات المنتخبات الافريقية في التصفيات المؤهلة الى كاس العالم.
*.نيجيريا والجابون والكاميرون وزامبيا وساحل العاج وجنوب افريقيا ويوغندا والجزائر والمغرب ..كل هذه المنتخبات لعبت امس.
*.وسوف تلعب اليوم غانا ومصر – وغينيا وجمهورية الكونغو.
*.شهدنا كل المنتخبات الافريقية القوية تلعب امس – وبعضها سوف يلعب اليوم كما اشرنا.
*.الكاردينال اذا دفع مليون يورو في )محترف( ما بيلعب في منتخب بلاده – تبقى كارثة.
*.تبقى مشكلة.
*.بل يجب ان يكون منتخبه نفسه الذي يلعب له منتخب عندو سمعة ومكانة وبطولات في القارة الافريقية.
*.لا كاتلي ولا عاشور الادهم ولا اوجو ولا باسكال ..بيلعبوا في منتخبات بلادهم.
*.يعني ما عندهم اي قيمة.
*.الكاردينال كان قد اعلن الخميس قبل الماضي في مهرجان تكريمه عن الاعلان عن محترفي الهلال قبل يوم الخميس القادم حسب قوله وقتها.
*.والخميس هذا مضت عليه )72( ساعة.
*.والزمن ماشي.
*.مع ذلك إلى الآن ما شفنا لينا اي محترف.
*.اكرا متوقع ان يكون وصل في الساعات الاولى من صباح هذا اليوم – لكن برضو ما بنحسب للكاردينال اكرا.
*.الكاردينال قال بجيب ساماتا ..ومحترف اخطر من ساماتا ذاتو.
*.طبعا العبارة دي ..راح فيها 720 مريخابي.
*.غايتو نحن بقينا قاعدين نترقب في المحترفين ..ونتوقع.
*.نعاين لي طيارة ..وطيارة.
*.وكل مرة الكاردينال يبشر باقتراب )المفاجأة(.
*.والقنبلة.
*.خايفين الموضوع في النهاية يطلع ما بيستاهل.
*.نودي وشنا وين؟..لو طلع المحترفين الذين سوف يتعاقد معهم الهلال اي كلام.
*.نمشي وين؟.
*.ونحن قاعدين نتفاصح.
*.ولسانا قدر كدا.
*.حكاية الكاردينال ..وانتظار وترقب المحترفين ..ذكروني ليكم بي القصة الشهيرة بتاعة ناس محمد موسى )انتظروا الحلو(.
*.قالوا ليك ..جماعة ضاربهم ليك جوع من امو.
*.الجماعة ديل كانوا معزومين عند الكبير اوي.
*.الكبير اوي ..للامانة ما خلى ليهم شيء.
*.جاب ليهم القراريص والكسرة دي اشكال والوان.
*.جماعتكم ضربوا ليك في البلدي دا ..ما خلوا شيء.
*.الجماعة كل ما يقوموا من الصينية …الكبير اوي بوقفهم ليك ..وبقول ليهم : )انتظروا الحلو(.
*.يسمعوا ليك كلمة )الحلو( يهمدوا ليك في صينيتهم.
*.الحلو زمان طبعا كانت عندو مكانة رفيعة – وكانت عندو قيمة.
*.ما بتشوف )الحلو( ، إلّا في الشديّد القوي.
*.ما في )حلو( ساكت.
*.الجماعة ينوا يقوموا من الصينية ..الكبير اوي يوقفهم ليك : )انتظروا الحلو(.
*.حرم ما في واحد فيكم يقوم.
*.يرجعوا تاني للبصل والفجل ..يهرسوا ليك هرس الجن.
*.وهم في لحظات الترقب دي والصفاء الذهني ..)الحلو( جاء داخل الصالون – الكبير اوي اتلفت ليك على )الحلو( وقال ليه يا الحلو غسل لي اعمامك ، الله يديك البركة ويغطي عليك.
*.جماعتكم وقت شافوا )الحلو(..ايديه زي الطالوش ..شايل )الابريق( ويقابض في الناس عشان يغسل ليهم ايديهم…جماعتكم كانوا عاوزين يروحوا فيها.
*.اتصدموا ليك صدمة شديدة ..ونفسهم مرقت من الحياة.
*.هسع نحن خايفين …نكون قاعدين كدا منتظرين )الحلو(..نقوم نكتشف في النهاية ان )الحلو( هذا ..هو الزول البيغسل للناس ايديهم في المناسبات.
*.خايفين المحترفين يطلعوا اي كلام.
*.ونحن ما قاعدين نسكت.
*.نحن لسانا قدر كدا.
*.وما قاعدين نريح لينا زول.
*.دحين يا الكاردينال لو )الحلو( الجايبنو للهلال ..زي )الحلو( الفي قصة محمد موسى خلينا نقوم ساكت.
*.برانا بنغسل.
*.)ونحن عايشين والحمدلله، )النفس( بينزل ويطلع إلى الآن ..ولاينقصنا شيء سوى رؤياكم الغالية(.
*.و )دروووري ضروووري تروووري( تجونا في الاجازة الكبيرة!!.
*.بعد غد سوف يكون مضى نصف فترة التسجيلات.
*.طبعا في اخبار بتقول ان التسجيلات سوف تنتهي يوم 20 نوفمبر – وهذا غير صحيح.
*.التسجيلات سوف تقفل في نهاية هذا الشهر.
*.لكن ايام الزمن دا ما ايام.
*.الشهر بقى يروح في المواصلات.
*.والاسبوع بفوت في الاستوبات.
*.الكاردينال عليه ان لا يضايق نفسه ساكت.
*.الموضوع فيه فحص وكشف طبي.
*.ومفاوضات.
*.وكلما مضى الزمن ..كان عامل الزمن هذا لصالح اللاعب وناديه الذي سينتقل منه ووسيطه.
*.عشان كدا – احسن احسموا ملفاتكم من بدري.
*.خلونا نعرف رأسنا من كرعينا.
*.نشوف البينا والعلينا.
*.ونتفرغ على )جدودكم( بتاعين المريخ ديل.
*.اصبروا بس.
*.خلوا ملفاتنا تتحسم.
*.بنقبل على ناس عاشور الادهم.
*.عليكم الله دا محترف يدفعوا فيه )300( الف دولار.
*.وفي سنة اعارة.
*.طبعا هذا المبلغ سمعتو بي اضاني دي ..من كريم شحاتة في برنامجه كورة كل يوم.
*.كريم شحاتة قال صفقة عاشور الادهم كلفت المريخ )300( الف دولار.
*.واعارة سنة واحدة.
*.عاشور الادهم حسب كلامه براهو قال مواليد 1985م.
*.يعني الموسم القادم سوف يكون عمره 32 سنة.
*.32 سنة بالمصري ..بتساوي عندنا )37( سنة.
*.الزول دا عمرو على الاقل 37 سنة.
*.ما خلى ليه فريق في مصر ما لعب فيه.
*.المصري لعب فيه مرتين.
*.الاتحاد لعب فيه على فترتين.
*.والزمالك.
*.والمريخ بورسعيد.
*.حام اندية مصر دي كلها.
*.وفي النهاية قال يطلع ليه دولارات من جماعتنا ديل.
*.بس يا جمال الوالي ..عاوز اوصيكم.
*.عاوز اقول ليكم.
*.الزول دا اوعكم تعملوا ليه )حوض سباحة(.
*.ما تخربوا ليه طبعو زي الحضري.
*.لكن حوض سباحة وين ؟..مع الظروف التى يمر بها المريخ هذه الايام.
*.جماعتكم حالتهم صعبة.
*.ووضعهم نار.
*.)ونحن عايشين والحمدلله، )النفس( بينزل ويطلع إلى الآن ..ولاينقصنا شيء سوى رؤياكم الغالية(.
*.و )دروووري ضروووري تروووري( تجونا في الاجازة الكبيرة!!.
*.…………..
و
*. نتمنى في خلال اليوم يكون الكاردينال حسم موضوع المحترفين.
*.ونتمنى ان يكونوا بالحجم الذي بشر به الكاردينال جماهير الهلال.
*.طبعا حاجة الهلال للمدافع اكبر من المهاجم.
*.رغم الحاجة الشديدة للمهاجم.
*.اكرا اذا لم يمنح الهلال تصديق بالجنسية ..يبقى تسجيله في الهلال ما في ليه اي داعي.
*.الهلال محتاج لمدافع ومهاجم.
*.ما في حاجة للاعب وسط.
*.وان كان وسط مهاجم.
*.إلّا اذا حصل الهلال على تصديق بالجنسية.
*.ولا اظن ان الهلال سوف يفشل في الحصول على هذا التصديق.
*.ان شاءالله الامور كلها تسير على ما يرام.
*.وعلى ما يشتهى ويتمنى الهلالاب.
*.وعوجة ما في ان شاءالله.
*.وبرضو منتظرين )الحلو(.
*.)ونحن عايشين والحمدلله، )النفس( بينزل ويطلع إلى الآن ..ولاينقصنا شيءسوى رؤياكم الغالية(.
*.و )دروووري ضروووري تروووري( تجونا في الاجازة الكبيرة!!.
*.……………
*.
السيدة )ل( –قسمنا باقى الريد )كعك(.
*.
وقرّط على كدا



ـــــــــــــــــــــــ


.

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى