تابعونا عبر فيس بوك

قوقل ‏+‏ ‏
Use the English Language

إن طال السفر محمد عبدالماجد ...حالتكم صعبة ..كمان بقيتوا تبيعوا في كراسي الجلوس ومكيفات فريون

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

22042015

مُساهمة 

إن طال السفر محمد عبدالماجد ...حالتكم صعبة ..كمان بقيتوا تبيعوا في كراسي الجلوس ومكيفات فريون




إن طال السفر محمد عبدالماجد .....
حالتكم صعبة ..كمان بقيتوا تبيعوا في كراسي الجلوس ومكيفات فريون

•انتوا السبعة قبل كدا اخدتوها )وحدات(..هسع امام الترجي ح تأخدوها )جرعات( عديل كدا
•ناس جمال الوالي عاوزين يمشوا بعد ما يبيعوا مكيفات فريون وكراسي الجلوس الفاخرة
•قبل ما ادخل ليكم في )اللحم الحي(.
•موضوع )الدلالة( دا ماشي ليكم عليه.
•العنوان الفوق ..برجع ليه.
•يعني فاكرين كاتبو ليكم )فيلم هندي(.
•نحن ورانا شنو يعني؟.
•ما تضيقوا.
•يعني ح يطيروا مننا وين؟.
•ح يمشوا وين؟.
•اجيكم من فوق.
•عشان ما تتحسسوا ساكت.
•ح استعمل معاكم الدبلوماسية.
•ما عاوز اجيب ليكم سيرة )الترجي(.
•اصلو الايامات دي سيرة )الترجي( بتعمل للجماعة انتفاخ في الغدد.
•بتعمل ليهم حساسية.
•ولا عاوز اجيب ليهم سيرة )الكونفدرالية(.
•مراعاة لظروفهم الصحية الحرجة.
•صحف المريخ امس كلها بدون فرز نفت تقديم ضباط مجلس المريخ للاستقالة.
•وطلعوا كلهم بعناوين رئيسية تؤكد استمرار مجلس المريخ.
•اصلو ما بصدق.
•اصلو ما ممكن.
•غايتو يا ناس المريخ عندكم )مجلس( زي )الصيوان(.
•كل يوم يركبوه في حتة.
•ويفكوه.
•كل مرة يقولوا نحن ح نستقيل.
•ولا بستقيلوا.
•حركات ساكت.
•امين خزينة المريخ )يكون ما عارف( طلع في كم جريدة كدا يؤكد فيها استمرار المجلس.
•ادروب دا اصلو ما عارف حاجة ..مهمتو بس انو بطلع في مثل هذا التوقيت ويقول المجلس مستمر.
•ما عندو شغلة في المجلس ..غير الموضوع دا.
•بس يقول نحن ما استقلنا.
•انت يا ادروب ..استقلت ..وإلّا ما استقلت واحد.
•يعني قاعد تعمل شنو؟..اكتر من تقول لم نقدم استقالاتنا.
•تلقوه ما عارف.
•تلقوه ما جايب خبر.
•وزارة الشباب والرياضة الولائية امس اصدرت بيانا اكدت فيه تقديم ضباط المريخ لاستقالاتهم.
•شتتوا.
•الترجي عمل في الجماعة ديل حاجات ما كويسة.
•زعزع )سليقتهم(.
•اوعك!!.
•ح تمشوا وين؟.
•ح تقولوا شنو؟.
•تاني في شنو؟.
•تنططوا لي في عيونكم متل )اوقات الفراغ(.
•متل شنط المدرسة.
•بيان وزارة الشباب والرياضة جاء فيه : )الاستقالات التي تقدم بها الاخوة الضباط الاربعة لنادي المريخ قد تم احالتها الى مفوضية تسجيل الهيئات الشبابية و الرياضية بولاية الخرطوم كجهة اختصاص(.
•يعني الاستقالات اتقدمت.
•ووصلت )المفوضية(.
•وشبعت شبع.
•وفات فيها الفوات.
•تاني ما في طريقة للتراجع ولا في فرصة للتحانيس.
•لكن خلونا نسأل.
•خلونا نقول ..دا وقت يقدموا فيه استقالات.
•دي شنو البتعملوا فيه دا؟.
•يعني )الترجي( دا ح تقابلوه بدون مجلس.
•هو الترجي بي مجلس ..ما قدرتوا عليه.
•عاوزين تقابلوه من غير مجلس كمان.
•الثبات كويس.
•ما تجروا لينا زي )بكري المدينة(.
•اثبتوا.
•انستروا.
•يعني شنو لو اتغلبتوا خمسة.
•قول سبعة.
•عادي.
•انتوا السبعة قدام )الوحدات( بتأخدوها.
•قبل كدا اخدتوها )وحدات(..هسع امام الترجي ح تأخدوها )جرعات( عديل كدا.
•لكن كان خمسة.
•وكان سبعة.
•وكان 710 ..اصلو ما في سبب بخليكم تستقيلو.
•الاستقالة شينة.
•لو اعلام المريخ سكت عليها ..وقت يطبطب ليكم ..نحن والله لا بنسكت ولا حاجة.
•ولا بنقبل كلام زي دا.
•لو انتوا بتقبلوا في المريخ كدا.
•نحن في )وصيفنا( ما بنقبل.
•ابقوا فاهمين.
•شنو كل )15( يوم مجلس المريخ يقدم استقالاته.
•مجلس المريخ يقدر موقف المريخ ويسحب الاستقالة.
•مجلس المريخ يتراجع.
•مجلس المريخ يؤكد الرحيل.
•لكن بس الوقت ما مناسب.
•دا شنو البتعملوا لينا فيه دا.
•في مجلس بيعمل في فريقو كدا.
•الفريق مقبل على مواجهة مصيرية ..ومباراة )حاسمة( انتوا تقعدوا تقدموا في الاستقالات وتسحبوا فيها.
•بتشغلوا الناس بي مواضيع بائخة.
•ما في ليها اي داعي.
•يا رمضان عجبنا.
•يا اخوي ..انت الجماعة لعبت معاهم امام الترجي خلعت )ضرسك(...تاني ح تعمل ليهم اكتر من كدا شنو؟.
•اعمل حسابك على باقى ضروسك دي.
•الهلال دا فيه لحوم واسماك ..عاوز تجينا بدون ضرس.
•ح تعيش لينا باللبن والفطير.
•بعدين المجلس ذاتو استقال ..البقعدك شنو في المريخ؟.
•ح تقعد لي ناس مصطفى عثمان اسماعيل.
•ح يعملها ليكم كلها )خطب وتصريحات(.
•قرش ما بتلقاهو.
•يا زول زي ما قلت ليك اتخارج.
•الجماعة ديل حالتهم ادهورت.
•ديل ما جماعة الزول يقعد معاهم.
•الشيء التاني.
•والما قادر اصبر عليه.
•وما لقيت ليه منطق.
•ولا وقع لي.
•ولا فهمتو.
•ناس المريخ امس طلع ليهم اعلان بتاع )مزاد( في الجرايد.
•هي حصلت!!.
•دلالة.
•يا ريت لو بقت دلالة عربات.
•يا ريت لو دلالة اراضي.
•الموضوع طلع دلالة )كراسي(.
•ناس الترجي لو سمعوا بالدلالة دي بيدوكم عشرة.
•معقولة بس.
•كمان الامور وصلت للدرجة دي.
•وصلت مرحلة )الدلالة(.
•والله دي حالة صعبة شديد.
•الاستقالة وجبت.
•مزاد بامر قاضي محكمة الخرطوم الجزئية...قرار رغم )688(
•كلام محاكم.
•امر عديل كدا.
•مزاد في نادي المريخ.
•المزاد يوم 6 مايو القادم.
•الما بيشتري يمشي يتفرج.
•كلنا بنحضرو.
•الفرجة ما كعبة.
•عارفين المزاد عن بيع شنو؟.
•عن بيع عدد من )الكمبيوترات(.
•خلاص جماعتكم بعد استقالة جمال الوالي ح يرجعوا للورقة والقلم.
•في حالة اصعب من كدا.
•المزاد ايضا لبيع عدد من )كراسي الجلوس الفاخرة(.
•الموضوع وصل )كراسي الجلوس(.
•ح يقعدوا في )الواطة(.
•وإلا اقول ليكم شوفوا ليكم )بنابر(.
•كراسي الجلوس الفاخرة مع )الكونفدرالية( ما في ليها اي داعي.
•ولا في ليها لزوم.
•كراسي شنو كمان؟.
•الشيء المؤسف ..المزاد فيه بيع )مكيفات فريون(.
•في زول في السخانة دي يا جماعة ببيع ليه مكيف.
•هي حصلت.
•رمضان على الابواب...وجماعتكم بيبعوا في )المكيفات(.
•السنة دي رمضان لا بتصام في نادي المريخ ولا حاجة.
•اها يا رمضان عجب ..دي )سخانة( يقعدوا فيها.
•يا زول اتخارج قبل يوم 6 مايو.
•قبل ما يبيعوا )المكيفات(.
•ألحق نفسك يا رمضان عجب.
•نحن ما بنرضى ليك )السخانة( دي.
•بعدين انتوا يا جمال الوالي حركتكم دي ما ظريفة.
•ما حلوة منكم.
•عاوزين تمشوا بعد ما تبيعوا مكيفات فريون وكراسي الجلوس الفاخرة.
•ناس علي جعفر وبله جابر بعد ما اتعودوا على المكيفات والجو البارد والكراسي الوثيرة ..عاوزين ترجعوهم تاني للمراوح والبنابر.
•ومزمل ابوالقاسم شابكنا الشركة الصينية شركة مرايل وبزازات.
•شركة مستلزمات اطفال.
•اخير نحن بزازات ومرايل..انتوا بقيتوا بتاعين كراسي ومكيفات وكمبيوترات.
•الموضوع اتقلب عليكم.
•دلالة في النادي.
•بقيتوا تبيعوا في )الكراسي(.
•وتنزلوا في )المكيفات(.
•..........
•ملحوظة : يوم 3 مايو لاعبين مع الترجي ..ويوم 6 مايو ح تلعبوا مع الترجي.
هوامش
•تسجيلات مايو ..هي اهم تسجيلات للهلال على الاطلاق.
•التسجيلات التكميلية اصبحت اهم من الرئيسية.
•لأن التكميلية بتأتي اثناء الموسم.
•وبتكون حسب الاحتياجات.
•حسب الطلب.
•وما بكون فيها ترهل.
•عشان كدا ..مجلس الهلال مطلوب منه ان يدخل التسجيلات بدراسة ودراية.
•الكوكي عارف احتياجات الهلال.
•مطلوب من مجلس الهلال ان يحسم تسجيلاته بعيدا عن الاعلام.
•اي لاعب محترف ما حسمتو امرو..ما تقولوه لينا.
•بغلي سعرو ساكت.
•الكتمان احسن.
•موضوع رمضان عجبنا ..خلوه لينا نقزقز بيه شوية.
•لو ناس المريخ ما جهزوا السبعة ..ما يقربوا على رمضان.
•عندكم سبعة مليار مبروك عليكم.
•لكن السبعة يجيبوها من وين مع بيع عدد من الكراسي والمكيفات؟.
•ناس ببيعوا في كمبيوتراتهم..تفتكروا بكون عندهم سبعة مليار.
•غايتو يا رمضان عجب إلّا يتموا ليك قروشك )كراسي(.
•اوعك تشيل ليك )كرسي(.
•اوعك تشيل ليك )كمبيوتر(.
•ولو شلت )مكيف( شيلوا بي كرت ضمان.
•خليك مفتح.
•الكاردينال قروشو كاش.
•بدفع كاش.
•............
•عاجل : تراوري ليه حق يتخارج ..ديل ما في زول بيستحملهم.

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى