في السلك - بابكـر سـلك - بالغت يا جبص

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

23112016

مُساهمة 

في السلك - بابكـر سـلك - بالغت يا جبص





* عبدالله الشهير بجبص صاحب بقالة بشارع العرضه
* يعتبر شيخ البقالين فى الشارع
* بقالتو منتدى رياضى وثقافى وإجتماعى
* الراجل هلالابى وما داسيها
* لكنه هلالابى جناح حسن فاروق
* ما بحب المسكنات والبهرجة فى الفارغة
* وشدت ما جناح حسن فاروق
* يعترف بتفرد المريخ جوياً
* وقال لى انا هلالابى حر
* جنى وجن قولة تعال يا انت
* وهاك البس الكسكتة
* والراجل بقول إنو جمهور الهلال الواعى برغم تأييده للبابا وتقديسه له
* إلا أنهم يوماً ما لبسو عباية البابا
* لأنهم أتوا للهلال ولم يأتوا للبابا
* المهم
* أمس واقف مع جبص فى خشم باب بقالتو
* كنا بنتحدث عن المحترفين
* قال لى الجبناهم كلهم طلعو عيانين
* كردة ده يجيب لينا من الكرنتينة ولا شنو ؟؟؟
* قلت ليهو كردنة جاب ليكم أوكرا وضربنا فى مقتل يا جبص
* قال لى مقتل شنو ؟؟؟
* أنا عارف تسجيل أوكراه فى الهلال ما واجعكم لأنو شطبتوهوا براكم
* الزول يا سلك لما يخت كيس النفايات فى الشارع تانى ما بهموا تشيلوا عربية النفايات
* يفلفلوهوا الشماشه
* يشرطوا الكلب
* ما بهموا
* قلت ليهو أجنبيكم التالت الدبابة قالوا وصل
* قال لى مدافع؟
* قلت ليهو مهاجم
* قال لى دبابة مهاجم !!!
* ما تطلع الدبابة زى القنابل الفاتن
* باقى قنابل كردنة الصوتية أقوى من كشافات كردنة الضوئية
* قلت ليهو أسى فى الكشف الطبى
* أها
* جا إسعاف ماشى ومشغل السارينا طالع من شارع زريبة العيش
* جبص قال لى أمك ده محترفنا التالت الله يستر ما يمشى المشرحة بدل السيستم
* المهم
* الحبيب الرائع إبراهيم عبدالرحيم تناول تصريح أسامه عطا المنان بالتحليل كاشفاً
الكثير من التحايل على اللوائح والقوانين بواسطة الإتحاد عطا المنان
* أقصد أسامه عطا المنان
* وقال إبراهيم أن أسامه عطا المنان لوى عنق القانون
* لكن يا ابراهومه نسيت بعض الحالات التى كسروا فيها عنق القانون كششششش؟
* نحن فى بلد تهتم بتطبيق الحنة ولكنها لا تهتم بتطبيق القانون
* عشان كده حالتنا كده
* هذا الوضع يا ابراهيم يا ود عبدالرحيم أوجد لينا ناس ما كده
* وعاملين فيها كده
* متجدعين بالبرمودا والردا
* وبمناسبة الناس الكده أهدى ليك يا ابراهومة جزء من قصيدة حلمنتيشية تنتقد الزمن
الميل والشباب الإتغير
* بدرى الكلام ده
* أيام الجامعه
* القصيدة بتقول%3A
* جنى وجن الناس الكده )شخته بالأصبع على الخد الأيمن(
* البجوا الجامعه بالردا
* الواحد يكتل فى عويناتو ويغرودا
* وشلتو طاطى وفاطى وحاجات كده
* وجنى أكتر وجن الناس الما كده
* وعاملين فيها كده
* الواحد شادى القميص ومستلف الردا
* المهم جيت مرة ماشى جمب حديقة الموردة
* لقيت واحد من الناس الكده
* معاهو بنية مفردة
* قلت حا أكسروا ليك الود ده
* لكن اول أفرز عشان ما أدخل فى حرج وكده
* أفرز بى شنووووووو...افرز بى شنووووووووو...افرز بى الردا
* عاينت لقيتهم الإتنين لابسين ردا
* أفرز بى شنووووووو...افرز بى شنووووووووو
* أفرز بالرجول طالما الإتنين لا بسين الردا
* وشفت الرجول لقيت الأربعة كده
* أيها الناس ماذا اصاب شبابنا ؟
* الشباب وقود باكر البسوق البلد من القرى وبين الصخور فوق السهول ومن المدن
والفى البنادر
* مالكم يا ناااااااااس
* نرجع لى إبراهيم عبدالرحيم
* لوى عنق القانون وكسر رقبتو عديل كده أضحى سمة من سماتنا
* سماتنا دى بتشبه ليك شنو يا فطومة ؟؟؟
* ما تقولى لى ما عارفه
* سماتنا بتشبه ساماتا
* تهئ تهئ تهئ
* المهم
* ذهاب ناس أسامه مشكلة إذا كان القادم الفريق المدهش
* وفى الحالتين الحق ضائع
* ولكن ما ضاع حقٌ وراءه مطالب
* فمتى نطالب يا أمة المريخ !!!!!
* يا أمة الأمجاد ؟؟؟
* يا أممنا المتحدة !!!!
* المهم
* تسجيل أبوعشرين وإعارته فى نفس الوقت
* زى الزول البعقد ويخلى المرة عند أهلها عشان العرس السنة الجايه
* إنت وكت ما سايقها معاك أسى العقد لزومو شنوووووووو ؟؟
* أيها الناس
* إن تنصروا الله ينصركم ويسدد خطاكم ويرخس دواكم
* أها
* نجى لى شمارات والى الخرتوم
* أكان شفت يا والينا
* خايفين الدوم والحرجل وبذرة الخلة والقضيم يغلن علينا
* السوق عرض وطلب يا والينا
* والصيدليات بعد ده حرمن علينا
* تانى العلاج شنو عاد غير غبيش ورقية وحرجل وحبة زى وقعتنا سودا يا والينا !!
سلك كهرباء
** ننساك كيف والكلب قال أمسكوا فى الفاكوك قوى بعالجكم؟!!!
والي لقاء
ســــــلك

____________
اضغط اعجبني واحصل علي الاخبار بسرعة وبسهولة دون جهد

.
سبحان الله و بحمده عدد خلقه و رضا نفسه و زنه عرشه و مداد كلماته(3 مرات)

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى