مع )الحمام( دا الهلال مفروض يشارك في )المجموعات( بالرديف؟ ..دق الدلجة |محمد عبد الماجد

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

04052015

مُساهمة 

مع )الحمام( دا الهلال مفروض يشارك في )المجموعات( بالرديف؟ ..دق الدلجة |محمد عبد الماجد






• جنس )حمام(.
• سموحة ..المغرب التطواني …اتحاد الجزائر …مولدية العلمة….المريخ السودان.
• الفرق دي زي الزول القاعد يوصف ليك في شارع.
• قدر ما يوصف ليك ..ما بتعرف وصفو.
• فرق كلها مجهولة.
• هسع نقول شنو لي )عيالنا(؟.
• نشرح ليهم الموضوع كيف؟.
• نوصل ليهم الفكرة بي ياتو طريقة؟.
• نقول ليهم نحن بنلعب في )المجموعات( مع الاندية دي.
• سموحة ..المغرب التطواني …اتحاد الجزائر …مولدية العلمة….المريخ السودان.
• يعني الواحد لو جاب ليه )عدس( مع الاسماء دي ..ولا يفرزوه.
• يمشي ليك مع هذه الاسماء زي الحلاوة.
• ولا في زول بحس بيه.
• ولا في زول بيشعر ليك بالعدس.
• سموحة ..المغرب التطواني …اتحاد الجزائر …مولدية العلمة….المريخ السودان.
• لو جبت ليك )نبلة(..بتفرتك الفرق دي كلها.
• فريق – فريق.
• كلها بتطير.
• حمامة – حمامة.
• نحن نلعب مع ديل في مجموعة واحدة.
• دي ما فرق يلعبوا معاها في المجموعات.
• الموضوع دا بالنسبة لينا زي الزول الكبير ..وقاعد في الشارع يلعب ليه مع )شفع(.
• ما بيمشي معانا.
• ولا بيقسم.
• ولا بنقبلوا لي نفسنا.
• رأيكم شنو نلعب في المجموعات بالرديف؟.
• الرديف بس.
• اصلا نحن وصلنا المجموعات بي ناس اطهر الطاهر ومحمد عبدالرحمن ووليد علاءالدين.
• يعني مفروض نكمل جميلنا.
• ونشارك في المجموعات بشكل رسمي بالرديف.
• سموحة ..المغرب التطواني …اتحاد الجزائر …مولدية العلمة….المريخ السودان.
• ما عندنا للاندية دي اكتر من )الرديف(.
• بس لو كان الاتحاد الافريقي بيسمح لينا نضيف لينا )25( لاعبا من الرديف
كنا شاركنا في المجموعات بي ناس الجعلي والبرنس والصيني.
• ناس بشه ومساوي ولا بنخسرهم مع )الحمام( دا.
• المجموعات الشايفها دي ما عاوزة اكتر من )رديف( الهلال.
• يمين بالرديف نطقطقهم ليكم زي الما حصل حاجة.
• سموحة ..المغرب التطواني …اتحاد الجزائر …مولدية العلمة….المريخ السودان.
• معقولة.
• دي مجموعات دي.
• المجموعات بقت زي حفلة الشاي.
• المجموعات السنة دي عاملة )سيستم(.
• الاندية دي زي اعمدة الكهرباء البكتبو فيها )ذكري من فلان(.
• ديل إلّا يعملوا ليهم )ذكري(.
• البنقول عليهم )صقور( كلهم يطلعوا )حمام(.
• عليكم الله لو )الترجي( ما حمام يصعد بيكم )ضفر(.
• ضفر )الطابق التاني( ما بقدر يصعد ليه.
• يصعّد بالمريخ للمجموعات.
• حِكم.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• بس )الامين ود المخوتلي( قال لو دي مجموعاتكم ..الموضوع ولا محتاج ليه
لـ )الجوهرة الزرقاء(.
• الموضوع دا ساكت كدا ممكن نحسمو.
• جوهرة زرقاء على شنو؟.
• خلينا في استادنا دا يا الكاردينال.
• سموحة ..المغرب التطواني …اتحاد الجزائر …مولدية العلمة….المريخ السودان.
• ديل مفروض نلعب معاهم في دار الرياضة ام درمان.
• استاد الهلال بي حالتو دي كتير عليهم.
• غايتو مفروض توجهوا شكر خاص لاحمد عبدالله )ضفر(.
• وصلكم المجموعات.
• وشكر خاص كمان لي مجدي شمس الدين.
• مجدي شمس الدين دا مفروض تمنحوه )وشاح(.
• تجيبوه في استاد المريخ وتكرموه.
• مجدي شمس الدين مالو كمان؟.
• لو ما مجدي شمس الدين – المجموعات دي تشوفها بس في بي ان سبورت.
• تسمعوا بيها بس عند ناس الهلال.
• ما عاوز اقول ليكم )ضربة الجزاء( المنحوه ليكم في ام درمان في )اغاثة(
ما بحسبوها.
• في برنامج الكاميرا الخفية ما بحسبوها.
• يعني ضربة الجزاء بتاعة بكري المدينة دا …في ايام السيول والامطار
والفيضانات ما بعدوها.
• لو عندكم ظروف ما بحسبوها ليكم.
• الطريف محمد فضل الله في مباراة الهلال وسانغا في مخالفة خارج الخط قعد
يكورك )ضربة جزاء(.
• محمد فضل الله قايل نفسو بعلق على مباراة للمريخ.
• يا محمد فضل الله نحن الحاجات دي ما بيحسبوها لينا )ضربة جزاء(.
• الحاجات دي عندكم هناك في المريخ.
• ولا عاوزنها.
• ولا تكورك فيها.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• بس )خليفة ود الشوفعلي( قال الترجي السنة دا زي )الممرض( البعمل ليك
فيها )دكتور(.
• لكن برضو عشان نكون واضحين معاكم اشكروا ضفر ومجدي شمس الدين.
• ضفر ما قصر.
• ومجدي شمس الدين برضو ما قصر.
• ومجدي قبل ضفر كمان.
• مجدي جاب ليكم حكم في تونس ما فيه اي كلمة.
• جاب ليكم حكم نضيف.
• ما فيه اي كلمة.
• اول مرة اشوف لي حكم افريقي )دغري( كدا.
• الحكم الجنوب افريقي امس في تونس الخمس دقائق الزمن البدل الضائع كلها
جمال سالم كان بتعالج فيها وبمثل.
• مع ذلك انهى المباراة قبل الزمن الذي اضافه.
• الزمن البدل ضائع ما كملو.
• انتوا الحكام ديل بتجيبوهم من وين؟.
• سموحة ..المغرب التطواني …اتحاد الجزائر …مولدية العلمة….المريخ السودان.
• المدير الفني لنادي الترجي زي اي مدير فني قال بعد الخروج في تصريحات
نشرت له في احد المواقع : )أرجع المدير الفني للترجي التونسي، جوزيه دي
مورايس خروج فريقه من دوري ابطال افريقيا لأخطاء الحكام في لقاء الذهاب
أمام المريخ السوداني.وأشار الى ان حكم اليوم الجنوب افريقي بينات كان
جيدا ولا يجامل، وأضاف خلال المؤتمر الصحفي الذي عقده مباشرة بعد مباراة
الامس لحساب إياب الدور الــ16 لدوري الأبطال: ضربة الجزاء الذي منحها
حكم لقاء الذهاب لمنافسنا هي التي كانت وراء اقصائنا من المسابقة.. فبعد
هزيمة الذهاب كنا مطالبين بعدم قبول أي هدف والفوز بثنائية نظيفة وذلك
وضع اللاعبين تحت ضغوطات حتمية تسجيل هدفين وهو ما اثر على أدائهم طوال
اللقاء وجعلهم يهدرون فرصا سانحة للتسجيل بسبب التسرع والرغبة في التهديف
بسرعة(.
• زولكم لغاية الآن ماسك في )ضربة الجزاء( بتاعة بكري المدينة التى
احتسبت في ام درمان.
• اي مدرب بطلع بهاجم الحكام.
• ما تشتغلوا بكلام المدير الفني.
• صراحة الترجي الذي شاهدناه في ام درمان وفي رادس …)الكونفدرالية( كتيرة عليه.
• فريق )الحمام( شوية عليه.
• شابكننا الترجي – الترجي ..وهو )حمام( ساكت.
• الغريبة ان الحمام السنة دي ليس الترجي براهو.
• الاهلي المصري برضو طلع )حمام(.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• بس )السرة بنت عثمان( ..قالت الكونفدرالية السنة دي زي )بيت البكا(.
• حالة الفرق فيها تحنن.
• حالتهم صعبة.
• خرج الصفاقصي التونسي امام فريق مولدية العلمة الجزائري امس لتصبح هناك
ثلاثة اندية من الجزائر في المجموعات باعتبار ان وفاق سيطف كان بطل
النسخة الاخيرة ..لذلك شارك الجزائر بثلاثة اندية في بطولة الاندية
للابطال الافريقية وصلت جميعها لمرحلة المجموعات.
• ومثلما اخرج وفاق سطيف فريق الرجاء المغربي واخرج اتحاد الجزائر كالوم
غينيا ..استطاع مولدية العلمة ان يخرج الصفاقصي التونسي عبر الاحتكام
لضربات الترجيحية.
• الناقصة تمت.
• حمام على اصوله.
• الكونفدرالية بقى فيها اربعة اندية تونسية ..هي الترجي والنجم
والافريقي والصفاقصي.
• يعني الكونفدرالية اصبحت )دوري تونسي( مصغر.
• وهناك الاهلي المصري والرجاء المغربي وليوبار واسيك العاجي وفيتا كلوب.
• الاندية دي كلها في الكونفدرالية.
• ديل يلعبوا في الكونفدرالية .. وسموحة ..المغرب التطواني …اتحاد
الجزائر …مولدية العلمة….المريخ السودان يلعبوا في المجموعات.
• هانت المجموعات.
• سموحة ..المغرب التطواني …اتحاد الجزائر …مولدية العلمة….المريخ السودان.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• بس )الكهربة( امس حاصل عليها شنو؟.
• الكهربة امس في الخرطوم زي )صينية( الغداء في المناسبات ..يجيبوها هنا
..ويشيلوها من هناك.
• لكن اقول ليكم.
• مع ضفر ومجدي شمس الدين اشكروا جمال الوالي.
• ما عشان بدفع ليكم.
• ولا عشان سافر تونس.
• اشكروا جمال الوالي عشان لو ما استقالتو دي ..كان المجموعات تسمعوا بيها سمع.
• جمال الوالي استقالتو فيها )بركة(.
• كل ما يستقيل المريخ بمشي لي قدام.
• جمال الوالي امس في تونس اكد استقالته.
• بالطريقة دي ..المريخ ممكن يشيل كاس البطولة.
• عشان كدا مفورض ناس الهلال يكونوا ليهم وفد يقعد مع جمال الوالي عشان
يقنعو بالاستمرار.
• عشان المريخ يرجع تاني ويطلع من )التمهيدي(.
• جمال الوالي استقال امام )عزام( المريخ اتأهل بعد ان كان متأخر 0 / 2.
• واتأهل المريخ على حساب الترجي بعد ان اكد جمال الوالي استقالته.
• الاستقالة دي فيها بركة.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• بس السنة دي البطولة الافريقية فيها )مجموعات( زي الديوان الديمة مرشوش.
• ……….
و
• في موقع )كفر ووتر( امس : )اعلن السيد جمال الوالي رئيس نادي المريخ
انه قرار مغادرته لكرسي رئاسة النادي اصبح امرا واقعا وسيتم بعد عودته من
تونس مباشرة ، مشيرا الى ان 24 ساعة فقط هي التي تفصله عن ترك رئاسة
النادي ، وعلمت “كفر ووتر” من مصادر مقربة من الوالي ان رئيس المريخ اسر
لاحد المقربين منه انه اكتفي تماما بالفترة التي قضاها رئيسا للمريخ
منوهاً إلى انه شعر بالتعب حتي وصل الفريق لهذه المرحلة ، وطالب الوالي
اهل المريخ بأن “يبقوا عشرة علي الفريق” وأن يحافظوا عليه بمساندته ودعمه
في مشواره المحلي والافريقي مشددا على ان قرار استقالته نهائي ولا رجعة
فيه مهما حصل(.
• ناس ود الياس ..ح يقولوا اخير لينا )الكونفدرالية(.
• المجموعات ح تبقى ليهم ملح – ملح.
• لكن ما تخافوا يا مريخاب ..طول ما جمال الوالي قال ان استقالته قرار
نهائي ..يبقى استقالته ما قرار نهائي.
• وطول ما قال ليكم لا رجعة فيها ..يبقى فيها رجعة.
• كمان نحن ما بنعرف الوالي.
• كل مرة بقول كدا.
• الزمالك المصري امس حقق انتصار على الفتح المغربي في مباراة مثيرة.
• قلنا ليكم الكونفدرالية ولعت.
• والحمام مشى المجموعات.
• لو عارفنها بتولع كدا ..كنا نزلنا الكونفدرالية.
• نحن الحمام ما قاعدين ندورو.
• ………..
• السيدة )ل(…جوز الحمام الجانا في المجموعات دا عاوزنو )شوربة(.
• وقرض على كدا.

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى