في السلك .. بابكر سلك .. حكاية البطولة اليتيمة

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

02092015

مُساهمة 

في السلك .. بابكر سلك .. حكاية البطولة اليتيمة




في السلك
بابكر سلك
حكاية البطولة اليتيمة

*لا يهزم المريخ الا المريخ
*وامس هزم المريخ نفسه
*لان مدربنا لايهتم بالمنافسه المحليه
*الجميع يعلم بان علي جعفر قد فقد الثقه في نفسه منذ مباراة عزام
*والكل يعلم ان المدعو الريح علي كارثه
*ووجود الريح علي وعلي جعفر سويا داخل طائره فيه خطر كبير علي الركاب
*ناهيك عن وجودهما في خط دفاع فريق داير يغلب
*هزم المريخ نفسه لان ادارته اعارة عنكبه واجبرت الفريق علي الاعتماد علي عبده جابر في حال غياب العقرب
*الاعاره دي كان احق بها الريح علي قبل عنكبه
*هزم المريخ نفسه لان لاعبيه لعبوا باستهتار غريب
*فشيبوب الموهوب كان خبوب
*اظنه اقنع نفسه بان لاعب كبير جدا
*وديديه ادي كانه مجبور علي المشاركه
*اما اوكرا فلم نعلم بانه كان مشاركا الا بعد المباراه
*هزم المريخ نفسه
*لان السيد عبده جابر لعب ضربة الجزاء الصحيحه باستهتار لايحسده عليه مهرج
*وبدل يزيده هذا الضياع اصرارا
*زاده استهتارا
*ايها الناس
*المريخ هزم نفسه
*لان الجهاز الفني لهلال الابيض اخرج عنكبه يوم لقاء الهلال وهو وقتها كان اخطر لاعب في هلال الابيض
*هزم المريخ نفسه
*لان الجماهير رمت بهزيمة الامس علي الحكم
*وفي اعتقادي ان خطأ الحكم الوحيد كان في عدم احتساب المخالفه الواضحه لصالح المريخ التي اتي منها الهدف الاول لهلال الابيض
*وفضيحه لما نقول الهدف الاول
*لان الامر يعني ان هناك اهداف اخري
*ايها الناس
*اذا لم نهتم بالبطوله المحليه
*اذا لم نترك الاستهتار والخيلاء
*سنفقد البطولتين المحليه والافريقيه
*وكان الله في عون جماهير صابره
*جماهير عاشقه
*جماهير لن تقبل اي استهتار جديد
*ايها الناس
*رضينا ام ابينا
*جمال سالم مستواه في النازل
*وهدف عنكبه ماكان بدخل في شباك جمال
*لان الزاويه التي ولجت منها الكرة لا يوجد خيار غيرها امام عنكبه
*برغم ذلك ولجت
*فهل هناك مشكله في تدريب الحراس في المريخ كما نسمع ؟؟؟
*طريقة جمال سالم دي ما طريقة نهائيات
*الزول ده اتكلموا معاهو
*عشان يعود لمستواهو البنعرفو
*المهم
*بالامس كتبت عن مأدبة السفير البريطاني بالخرطوم
*وقلت كنا حضورا والحبيب محمد عبدالماجد بتشريف الريس
*لم يسقط مني سهوا ذكر الباشمهندس محمد عبداللطيف هارون
*بل اسقطته عمدا
*لان الرجل يحتاج لمساحات شاسعه للحديث عنه
*انسان صاحب خلق رفيع
*فاهم وهاش وباش
*رجل تحتضنك ابتسامته قبل ان تتلقفك احضانه الصادقه
*رجل تفسر بسمته نقاء معدنه وسيرته وسريرته
*لاول مره التقيه
*ولكن اشراق حناياه علي وجهه ارتسمت فابتسمت
*وابتسمت له الدنيا
*حقيقة الرجل عظيم ومسالم وفاهم ويحترم نفسه باحترامه للآخر
*تشرفت به وبمعرفته
*واقول للحقيقه
*هنيئا للاهله بهذا الاداري الرائع
*هنيئا للوسط الرياضي بهذا القيادي المهول
*هنيئا لنا بك اخي المهندس محمد عبداللطيف هارون
*فالرياضه تسامح ومحبه واخاء ونقاء واحترام متبادل
*لك مني الف تحيه
*ومأدبة اتلسفير البريطاني كانت رائعه
*غايتو لو في سفير تاني عزمني
*ماتستغربوا لو لقيتوني غيرت لوحة عريبيتي من خ3 الي هيئه دبلوماسيه
*بعملها خلي بالك
*المهم
*كتب الرائع بابكر مختار بزاويته علي صفحات جوهرة رمضان تحت مسمي حكاية البطوله اليتيمه
*قصد مانديلا
*اعترف فيها بانها البطوله الوحيده للانديه
*ولكنه شنفها وغلفها في قالب نقدي بحيث يحط من قدرها
*وفرض بعض التساؤلات
*ولكني اواصل في موضوعك اخي بابكر مختار
*صحيح انها البطوله الوحيده للانديه السودانيه
*ويعترف بذلك الواقع والتاريخ
*والحكاية مادايره اعتراف منك او مني او من غيرنا
*التاريخ وسجلات الاتحاد الافريقي والواقع يعترفون بمانيدلا 89
*وفي محاولة منه لتبخيس القصه
*قال كلها تمنيه مباريات ضد اربعه فرق
*ياصديقي
*انسحب الاهلي الليبي مثل انسحاب الهلال من امام وفاق سطيف
*يعني كان نجيب اهلي ليبيا بالانتر بول ؟؟؟
*وبعدين لما الهلال وصل للنهائي في سبعه وتمنين
*لعب ضد خمسين فريق ؟؟؟
*ياهن خمسه فرق يا الحبيب
*الوكت داك مافي مجموعات
*تلعب في دور الاتنين وتلتين ضد فريق
*وفي السطاشر ضد فريق وكذلك التمانيه
*كده تلاته فرق
*دور الاربعه فريق والنهائي فريق
*ياهن الخمسه
*الغريب شنو في بطولة المريخ يا بابكير ؟؟؟
*ولسه
*في محاولة منه لتبخيس مستوي الفرق
*قابل المريخ يا عزيزي البنزرتي التونسي حامل اللقب في 88
*يعني كان يهز ويرز
*وقابل قورماهيا الكيني صاحب اللقب القبل البنزرتي
*يعني كان برضك بهز ويرز
*وللتاريخ والامانه
*البنزرتي التونسي ما زنطور
*لانو سجل اسمو علي لوح الشرف في 88 باحرف من نور
*وقورماهيا ما زنطور لانو سجل اسمو علي لوح الشرف في 87
*وشال كم سيكافا كده
*فكم سيكافا شالها الهلال البضحك علي قورماهيا الكيني .؟؟؟؟
*مع العلم بان قورماهيا بالذات اقصي الهلال من سيكافا قريب اربعه مرات
*فيهن تلاته في السودان الحبيب ده
*وفيهن اتنين انتهن تلاتهلي قورماهيا ضد الهلال
*تبقي البطوله اليتيمه تاج يشرف جبين الوطن يا بابكير
*وبطولة الكؤوس التي احرزها قورماهيا تتشرف بها كينيا
*وبطولة الكؤوس التي احرزها البنزرتي التونسي تتشرف بها تونس
*فمتي يتشرف هذا البلد بانجاز قاري للزناطير يخرجهم من زمرة الزناطير الي عالم البطولات الكبير ؟؟؟؟
*يتيمه اخير من عديمه يا بابكير يا اخوي
*كعب العدم
*ايها الناس
* هلال التبلدي افضل هلال بلعب كورة في البلد دي
*باقي الهلالات مع احترامنا لهم جميعا
*يعانون ضعفا فنيا ومهاريا وتكتيكيا
*فيهن هلال واحد يستفيد دوما من اخطاء التحكيم
*ولو لاها لنافس الهلالين الباقيين علي الهبوط
*وامل عطبره شايفو قرب يودع
*وده حال المابخت بالو في مصلحتو
*البهمل في البدايات
*المهم
*ريحة المطار عبقت شديد
*ناس امجاد يقيفوا جمب جاد ويشموا
*يشموها قدحه وبس
*لكن يتعطروا فده مستحيل
*ايها الناس
*خبر الشوم خبر الروم لو اتناقلنو الحروم في مصر
*تبقي عاد الدباره كيييييفن ؟؟؟؟
*لايلاقينا لا نلاقيهو لانتلاقي لانتلم
*لوح الشرف الافريقي مابلمنا الاتنين
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*في خور عملوهوا وسقفوا في شارع العرضه لينا
*الدكاكين والكافتريات موصلات صرفهن فيهو يا والينا
*والخور زي القزازه مفتوح من جهة ومن جهه مقفول علينا
*بقي مستشفي ولاده للباعوض يعضعض الليل كلو فينا
*بقي مصنع روائح تقرفنا علي القرف الفينا
*بقي تصنيع امراض حاتقرضنا يا والينا
*يا شوفوا الخور ده وين يكب لينا
*يا قفلوهوا يا والينا
سلك كهربا
ننساك كيف والكلب لما يجي جمب خور العرضه بقفل نخرينو…يقرب يطرش يا والينا
طرشتو الكلب زاتو
والي لقاء
سلك

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى