تابعونا عبر فيس بوك

قوقل ‏+‏ ‏
Use the English Language

اعمدة الصحف الرياضية اليوم الخميس

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

21022013

مُساهمة 

اعمدة الصحف الرياضية اليوم الخميس




وان طال السفر
محمد عبدالماجد
العجب بقى حارس (الصبارة)
< حالة فيصل العجب في المريخ بقت (تحنن)..وصل فيصل العجب لمرحلة المشاركة في آخر 15 دقيقة من عمر المباراة ..وبعد أن تكون المباراة حسمت ..وانتهت.
< العجب ...بكملوا بيه (الكنبة).
< مباراة المريخ أمس أمام فريق اتحاد مدني ..تؤكد أن المريخ يبحث عن الصيغة النهائية للتخلص من فيصل العجب في يونيو القادم.
< الزول المفارق ظاهر.
< العجب ...مهمتو كلها تتمثل في القعاد في (الكنبة)..وحراسة (صبارة) الموية.
> بلة جابر يعطش ...العجب يسقيه.
< نجم الدين ..يعطش...العجب يسقيه.
< علاءالدين يوسف يعطش...العجب يسقيه.
< والساقية لسع مدورة.
< آخر نص ساعة من المباراة ..يقولوا ليه قوم سخن ...(نظام أنت الكبير).
< العجب بقوم يسخن.
< آخر ربع ساعة ..وبعد أن تحسم المباراة ...يقوم العجب يشارك ...مشاركة زي المشاركة البتكون في المسابقات.
< ممكن اشارك في المسابقة.
< ممكن.
< طيب ممكن أهدي.
< ممكن.
< معاي أخوي ...عاوز يشارك...ممكن يشارك.
< ممكن.
< العجب مشاركته أصبحت على هذا النحو.
< أو خلوني أقول ليكم حاجة أوضح من كدا.
< حاجة بذكرني ليها (معجون) العجب دا.
< عارفين الحكاية دي شنو؟.
< فيصل العجب دا بذكرني ليك بالزول الكبير في البيت...أكبر (ولد) في البيت.
< دايماً بكون شايل الهم..ودايماً بدخل في (جلابية) أبوه.
< الولد الكبير من يبقى بلبس من دولاب أبوه ...بقول ليك يا حاج أنا عاوز أعرس.
< عشان كدا ..أحسن من البداية تحسمو ...وما تعطيه فرصة يلبس من دولابك.
< يمكن في (آباء) بحسوا بالفرحة ..وقت ولدهم الكبير..يبقى بيلابسهم.
< بشعروا بالسعادة وقت الولد يبقى (طولهم).
< تابعوا معاي الحكاية دي...عشان تقع ليكم كويس..وعشان ما تقولوا أنا بتكلم ليكم ساي...وعشان كمان تعرفوا أنا ليه قارنت (العجب) بي أكبر زول في البيت.
< بعدين لو كلامي طلع غلط ...قولوا لي كلامك غلط.
< فيصل العجب دا بالظبط زي (الولد الكبير) في البيت...الولد (البكر).
< موش عندكم ..زي ما هو عندنا ...الوالد دائماً بكون فرحان بي ولدو الكبير.
< دائماً الأب بكون واضع المسؤولية في ولدو الكبير...وهو بكبر قدام عينو..ومنتظرو متين يحل محلو.
< وقت الولد يكبر شوية...الأب عشان يحس بي انو بكبر في ولدو ...وبربي فيه..بقوم يخلي يمشي على خطو.
< قولوا لي كيف؟.
< أقولكم.
< الولد الكبير ..(البكر)...الأب دائماً لمن تحصل مناسبة في البلد ...بقوم يرسل ولدو.
< يحصل عرس ..بقول للولد ..يا ولد تمشي تجاملناس عمك عبدالرحمن ..وتقولليهم أبوي رسلنا ليكم...عشان هو ما بقدر يجيكم..عندو عملية عيون يوم الخميس القادم ...(وهو بكونلا عندو عملية ...ولا عندو عيون).
< الأب قصدو من الحكاية دي بس ..يعلم ولدو كيف يجامل..وكيف يتحمل المسؤولية؟.
< تحصل وفاة...الأب ما يقدر يسافر ..بقوم يعمل شنو؟.
< يقوم يرسل ولدو الكبير.
< وعشان الولد يطلع (نجيض)..بقوم الأب يعطيه (قروش)..ويقول ليه القروشدي اكتبي في (الكشف) بي اسمي ..وقول لي عمك (عثمان) أبوي ما قدر يصلكم...عندو عملية عيون الخميس القادم.
< وعملية العيون دي عليكم الله (ما تطلع من العمود دا)...عشان عمكم دا بتكلم ساكت ...ما عندو الحبة.
< القصد كلو من الحكاية دي...يعلم ولدو المسؤولية.
< العيد يجي ..عمك يقطع ليه في ولدك (جلابية)..ويقول ليه تسافر البلد تعيد مع ناس عمتك آمنة.
< الأب ..عاوز يطلع الولد...زول واجب.
< ناس البلد كدا ...ما تقعدوا تتلفتوا لي ..لقيتوا (البيرقر) دا..ونسيتوا الواجب.
< أها (العجب) بقى زي الزول (البكر) دا.
< الولد الكبير في البيت.
< الولد البدخل في (جلابية) أبوه...ولمن الأب يكون غير موجود في البيت ...الولد بعمل فيها هو المسؤول منالبيت ..ما في زول يمرق من البيت ...ما في زول يرفعصوتو ...(موش هو الكبير).
< أها العجب ..بقى يقوم بالدور دا ...بقى (الولد الكبير) في البيت.
< العجب ..زول الواجب.
< ناس المريخ ..بقوا يرسلوه للمناسبات ساكت...حصل عرس ..حصل بكا ...جا عيد ...برسلو (العجب).
< يدوه مصاريفو ...ويسفروا.
< وبقوا كمان ...يقولوا ليه (خت) القروش دي في (الكشف).
< قروش الكشف ..بطلعوها ليه في (ظرف) براها.
< والعجب ..بقوم بالدور علىاكمل وجه.
< يا العجب ...انت عاوز الجد...ولاّ عاوز الجنبو...كورتك دي بقت كورة (صبارات) ساكت.
< كورة زول حارس (الصبارة).
< كورة (كشف).
< كورة ..مهرجانات ...كورة آخر 10 دقائق...تلعب قدام الاتحاد ...تلعب قدام أهلي عطبرة ..قدام النيل الحصاحيصا ...اكتر من كدا ما بجافزوا بيك ...ولا تصدق.
< عشان كدا ...أحسن تتخارج من بدري ..قبل يونيو.
< عشان أنت لو (شطبوك)...ما بتلقى غير (النيل الحصاحيصا وجزيرة الفيل) عشان يفاوضك ...مع احترامنا الشديد ليك.
< يعني بالواضح كدا ....يا العجب اوعك تفكر في مصير هيثم مصطفى.
< اوعك تفكر في الهلال.
< لو عاوز تجي الهلال يا العجب ..بنشوف ليك (خانة) في المدرجات.
< أول حاجة تشجع ناس مهند وترواري ديل ...لي 2020م.
< بعد كدا ..بنشوف ليك وظيفة في قطاع الناشئين.
< موضوع (العجب) دي هسع حاخليه ...برجع ليه تاني ...أنا أصلاً كنت عاوزأحدثكم عن (الحضري).
< الحضري الرفض يشارك.
< دا موضوع براهو.
< ما تلخبطوا لي مع الموضوع الأول.
< عشان الأولو شرط ..آخرو نور.
< بعد أن كان تسجيل عصام الحضري في المريخ ...نوع منأنواع (الفشخرة) ..واعتبره المريخاب يرد لهم بعض مايفقدونه أمام الهلال...ويسلط عليهم الاضواء..التى يفقدونها في (الميادين)....أصبح الحضري اليوم (مصدر) لإثبات (فقر) المريخ ولتأكيد (شقفه)...وحاجته..والمواقع والفضائيات بقدر ما كانت تتحدث عن قدرة المريخ المالية ...أصبحت اليوم تسخرمن (فقر) المريخ ..وفشله حتى في أن يوفر راتب حارسه المصري عصام الحضري.
< والأيام دول ...والذين كانوا يتحدثون في الأمس ...عن المريخ بشيء من التعالي والاستخفاف بالآخرين ...اليوم يسألون الناس الحافا لتوفير مرتبات المحترفين.
< هذا زمان (عصام الحاج)..الذي يكاد أن ينادي كل شيء بي مائة ...والاستادمحجوزًا على طابقه ...وفاتورة الكهرباء تدفع بعد أن يدخل النادي في ظلام دامس لبعض الأيام.
< عصام الحاج سوف يذهب بكم أبعد من ذلك ..وأنتم تبلغون حد أن تبيعوا في (صور) هيثم مصطفى من أجل سداد فاتورة الكهرباء..وتوفير نثرية المعسكر.
< كان اتجاه مجلس إدارة المريخ بقيادة جمال الوالي لتسجيل عصام الحضري ..أمرًاأرادوا به اثبات القدرة المالية للمريخ ...وقد تحدثت وقتها الكثير من المواقع والفضائيات العربية عن هذه الصفقة (الضخمة) ...والمريخ يحل اشكالية عصام الحضري المقعدة وقتها بسبب القدراتالمالية الضخمة لرئيس نادي المريخ جمال الوالي.
< كانت اشكالية عصام الحضري وقتها كبيرة ...حتى أن عصام الحضري أصبح ميئوس من أن يلعب في مصر...لذلك فكر في أن يلعب في السودان ..وقبل باللعب في المريخ ...طالما كان (الدولار) حاضرًا ...وإذا حضر (الدولار) فإن الحضري جاهز لأن يلعب (خلف الشمس) إذا كان ذلك سوف يدر عليه المال.
< وقد ثبت ذلك ...والحضري يرفض أن يستحمل المريخ (أسبوع)...وابى حتى اللعب أمام (اتحاد مدني) في الأسبوع الأول للممتاز...بعد أن جف الدولار وابتعد جمال الوالي ...وجاء عصام الحاج الذي يقول لكل من يدخل إلى مكتبه (اصبروا شوية).
< مجلس المريخ أيام (البقرات السمان) كان يتعامل بكل لطف ولين مع الحضري..ويذكر الناس عندما احضر مجلس إدارة المريخ الحضري من القاهرة (من بيت أبوه)...أو شقته ليلعب أمام الأهلي شندي في شندي.
< من المطار إلى استاد شندي (مباشرة).
< الحضري الان بعد أن عجز مجلس إدارة نادي المريخ منتوفير مرتباته ومقدم العقد فيسنوات عصام الحاج (العجاف)...رفض الانتظار إلى حين.
< وخيرهم بين الدفع أو الرحيل ...ونسى ما قدمه له المريخ ...وأن خرج يتحدث الانبلغة (الاحتراف)..وبأنه لاعب (محترف) ...وهذا الكلام الذي نسمعه فقط من المصريين عندما يكونوا في مثل هذه الحالة التى فيها عصام الحضري الان.
< نسى الحضري ...ما قدمه له المريخ ...حينما كان مهددًا بالإيقاف من الاتحاد الدولي لكرة القدم (فيفا).
< الأهلي المصري عبر الفيفا كان يطارده ..وشبح الحرمان من ممارسة كرة القدم يلاحق الحضري ...وأزمته المادية تضرب باستقراره في الاسماعيلي وتصله حتى وهو في الزمالك ..ليأتي إلىالمريخ ويدفع جمال الوالي للجميع ...(الحضري والأهلي والزمالك والاسماعيلي).
< جمال الوالي دفع لمصر كلها ..نعم مصر كلها استفادت من ذلك...وقد تمثلتتلك الاستفادة في مشاركة الحضري مع المنتخب المصري ...فى وقت كانت الأندية المصرية نفسها...عاجزة من أن تحل اشكالية الحضري.
< حلت اشكالية الحضري بواسطة جمال الوالي رئيس مجلس إدارة نادي المريخ وقتها ...وقدم المريخ (عربياً) على أنه نادي ذو قدرة مالية كبيرة ..ويمتلك إدارة نجحت في حل اشكالية الحضري..بعد أن كان الحضري قريباً من أن (يبقى إلى حين السداد) ....العبارة التى ترمي بأصحاب الشيكات خلف القضبان.
< الحضري واضح انو قنع منالجماعة ديل.
< قالوا ليك بعد جمال الوالي ما فات من المريخ...(الجبنة المضفرة)انقطعت من معسكر المريخ.
< البيض زمان كان بجيبوه بالطبق.
< هسع بقى يجيبوه في كيس ..حبة وحبتين.
< عصام الحاج دا ما عندو ليكم قدرة لي (طبق).
< والحضري الحاجات دي ما بتنفع معاه.
< ولا بقعد ليكم.
< خاصة ...بعد ما شاف (تراروي).
< ملحوظة : يا الحضري شيل شنطتك ..واتخارج.
هوامش
< غايتو جنس (تقليد).
< تلاولي يجب هدفين...مونيزا يجب هدفين.
< تلاولي يطلع نجم المباراة ..مونيزا ..يشيل نجم المباراة.
< التقليد دا يوم بكتلكم يا مريخاب.
< أها نحن المباراة القادمة...سنكارا بجيب ليه (هدف).
< وكمان بطلع نجم المباراة.
< دي بتحلوها كيف؟.
> باسكال ما بقدر على الحاجات دي.
< ولا تجازفوا بيه ساكت.
< بقوم يكسر رقبتو ساكت.
< أمس في واحد ..شاف (لحية) باسكال ..والشعر صلعة.
< زولكم طوالي قال لي : أنت تعال هنا ...الكوكي دا عكس (رأس) الزول دا ولاّ شنو؟.
< قلت ليه (عكس) رأسو كيف؟.
< قال لي : قلبو يعني..قلبو.
< ما قدرت أقول ليه حاجة.
< عشان باسكال بالجد ..ما أدانا فرصة ..عشان ندافع عنو.
< العجب في المنتخب احتياطي هيثم مصطفى.
< في المريخ برضو احتياطي هيثم مصطفى.
< طيب زمان كاتلننا بالمقارنات مالكم.
< إلا نجي نطبقها ليكم عديل كدا.
< يا المريخاب ..انتوا ما بتقتنعوا بالشيء ..إلا تشوفوا الشيء قادم عينكم.
< أمس شفت هيثم مصطفى بيلعب مع ناس نجم الدين وبلة جابر ..ومصعب ..قلت دا شنو دا ...زي (الفول) القالبين فيه طلب كبدة.
< يا هيثم ما تتعب ساكت..ديل ما بفهموك.
< ديل إلا تدخل ليهم بي مترجم.
< شفتوا ناس مهند ..وكاريكاوعمر بخيت ونزار حامد..زمان كانوا بفهموك كيف؟.
< ناس الباشا ديل المباراة كلها (صارين) ليك.
< تلقاهم بقولوا (الخواجة) دا جانا من وين؟.
< الناس ديل ما فتحوا إلا مع العجب.
< لعب (الغتاته) نحن بنعرفو.
< عاوزين يتغاتتوا عليك.
< غايتو الأسبوع الرابع ..ما تنتظرونا بي (غتاتكم) دي.
< عندنا مهاجم جديد (غول) أقوان ...عديل كدا.
< عاجل : أنت مالك عاوز (نجمالدين) النوم يطير منو من هسع دي.

حمزه عوض


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

اعمدة الصحف الرياضية اليوم الخميس :: تعاليق

مُساهمة في الخميس 21 فبراير 2013 - 8:27 من طرف حمزه عوض

لقاء كل يوم
رمضان احمد السيد
هدف تراوري الأجمل حتى الآن لا مقارنة بينه وهدف موانزا
جماهير الهلال ستتدافع لمشاهدة الهلال الجديد
الهلال يدخل نيل الحصاحيصا في مطب الجولةالثانية
الاتحاد كتم أنفاس المريخاب طيلة الشوط الأول
الباشا وأمير كمال الأفضل بعد موانزا.. والبرنس مال للاستعراض
مبادرة جلال شرام لإطلاق أكاديمية لكرة القدم باسم أمير قطر
{ ولا تزال ردود الأفعال للفوزالهلالي على مريخ الفاشر تتواصل، ويكثر الحديث في كل المنتديات عن هدف تراوري والذي يعتبر حتى الآن الأفضل والأجمل من خلال ما شاهدناه من أهداف خاصة لقاء المريخ واتحاد مدني وقد يكون هدف جاكسون موانزا الأقرب له ولكن القوة في هدف تراوري وكذا التسديد من مسافة أبعد ومن كرة ثابتة ثم أنه كان هدف الافتتاحوالأغلى وليس هدف تعزيز.
{ وبلا شك أن هدف تراوري ومستوى الهلال وظهوره في هذه الجولة بهذا المستوى والعودة من بعيد بثلاث نقاط وما أدراك ما هدفتراوري الثاني، وتألق المعز محجوب وخط الدفاع والحفاظ على الشباك نظيفة كلها ستجعل من لقاء الهلال القادم أمام نيل الحصاحيصا الخميس القادم أكثر سخونة وأكثر حضوراً جماهيرياً فالهلال قدم نفسه بصورة جميلة ورائعة عكس نيل الحصاحيصا والذي خسر على ملعبه من أهلي الخرطوم.
{ وفوز المريخ الكاسح بالأمس يؤكد المطاردة المبكرة بين طرفي القمة قبل جولة الثاني عشر من مارس القادم والتي تصادف يوم الثلاثاء!!!
{ والمريخ في الجولة الثانية بملعب استاد الخرطوم يواجه النسور الأربعاء 27 فبراير والذي يلعب ويظهر لأول مرة خلال الموسم الجديد عندما يواجه أهلي شندي مساء اليوم بالخرطوم أيضاً.
{ حتى الآن النجمان المميزان والمؤثران في طرفي القمة المحترفان تراوري وجاكسون موانزا. سجلا هدفين لكل وتوجا بجائزة سوداني!! وسيكون الصراع بينهما أكثراشتعالاً في المراحل والجولات القادمة، والأهم في كل هذا التألق وهذه الحيوية أنهما يظهران لأولمرة مع فريقيهما بعد التدعيمات الأخيرة.
{ الهلال تألق على مدار الشوطين في لقاء مريخ الفاشر وسجل على مدار الشوطين، والمريخ تواضع في الشوط الأول ولم يبدأ التسجيل إلا من خلال الشوط الثاني ومن هجمة مرتدةفي نهاية الشوط الأول كاد المريخ أن تهتز شباكه ويخسر لولا سلبية مهاجم الاتحاد وحسن توقيت وخروج الحارس أكرم الهادي سليم.
{ يقول البعض إن الشوط الثاني شوط المدربين ولا ندري ماذا قال حداثة للاعبيه بين الشوطين!! وأسرع هدفين يلجان الشباك.
{ الاتحاد صمد في الشوط الأول وانهار في الثاني!!
{ النجم الثاني في المريخ بعد موانزا هو الباشا الذي خطف الهدف الأول وصنع هدفاً وتألق أمير كمال وهو يشارك بعد طول غياب وكان مميزاً في تمريراته خاصة كرته لجاكسون موانزا الذي سجل منها الهدفان الثاني والثالث.
{ البرنس لعب متحفظاً في الشوط الأول وتألق في الثاني بعد أن اطمأن للفوز مال للعب الاستعراضي واستبدل في النهاية بالقائدالعجب.
{ خسارة اتحاد مدني هي الأكبرحتى الآن برباعية.
{ ولحق نيل الحصاحيصا بمريخ الفاشر وهو يخسر علىملعبه.. مشكلة نيل الحصاحيصا أنه سيخسر الجولة القادمة في مواجهة الهلال.
{ أهلي مدني استفاد من تجربة الهلال وفاز على أهلي عطبرة بهدف البلدوزر علاء الدين.
{ بله جابر أول لاعب من المريخ ينال كرتاً في أول مباراة وفي هذا الموسم وقولوا واحد.
ربما لايلحق بله جابر بهذه الطريقة بلقاء القمة.
} كلتشي رغم دخوله بديلاً لكنه خطف هدفاً.. لم يخرج من المولد بدون حمص.
٭ لحن الختام
{ وما أحلاها من ليلة للميلان وهو يقسو على البرشا بثنائية في ذهاب أبطال أوربا!!
ترى ماذا يحمل لقاء الإياب في برشلونة من مفاجآت.. بالمناسبة البرشا والبايرن الأكثر ترشيحاً لإحراز الكأس.
{ مساء السبت وأمام ساحة برج الاتصالات يدشن بنك النيل الاسم والشعار بصورة رسمية في حضور والي الخرطوم وعدد من المسئولين والاقتصاديين والإعلاميين. مبروك.
{ وجه السيد جلال أحمد شرامالنور عبدالله الدعوة للإعلام لتشريف المؤتمر الصحفي مطلع مارس القادم للإعلان عن المبادرة بقيام وإطلاق أكاديمية لرياضة كرة القدم باسم أمير دولة قطر الشقيقة.. تهتم بالبراعم والناشئين والأشبال والشباب والسيدات.
المكتب التنفيذي للأكاديمية سيكون بالخرطوم... والاستاد المقترح سيكون بولاية شمال دارفور الفاشر.. مبروك مقدما

الرجوع الى أعلى الصفحة اذهب الى الأسفل

مُساهمة في الخميس 21 فبراير 2013 - 8:28 من طرف حمزه عوض

بهدوء _ علم الدين هاشم
الخبت بدأ !
بدا المريخ موسم ( الخبت ) كما قال امينه العام عصام الحاج عندما خاطب جماهير المريخ فى المهرجان الذى اقامه النادى استقبالا لنجومه الجدد , فلا يوجد وصف لفوزالفريق الاحمر على ضيفه الاتحاد باربعة اهداف ذكية وملعوبة , سوى انه ( خبت جامد ) فى استهلالية مشوار الفريق فى الدورى الممتاز الذى يعود اليه المريخ من اجل هدف واحد هو استعادة اللقب والعودة لمنصة التتويجمن جديد والتى غاب عنها فى موسمه السابق لاسباب معروفة نتمنى ان لاتعود مرةاخرى !
اكتفى المريخ باربعة اهداف فى شباك الرومان مع الرأفة بعدما وضح ان ( حداثة ) كان يقصد بتحدياته التى اطلقها قبل المباراة ( الشوط الاول ) فقط بينما انزوى واختفى فريقه فى الحصة الثانية التى كانت حمراء بجدارة من كل النواحى اداءا وتكتيكا وتشجيعا حماسيا على المدرجات ,, حيث توالت الاهداف بعد سبعة دقائق فقط من انطلاق الشوط الثانى لينال الباشا شرف اول لاعب يفتتح رصيد الاهداف للمريخ فى دورى 2013 واعقبه موانزا بالثانى والثالث قبل ان يختتم البديل كليتشى الرباعية الحمراء بذكائه المعهود , ولكن يبقى صاروخ موانزا الثالث الاكثر جمالا واثارة وروعة فى انتصار الامس , وهو امر متوقع بعدما دخل اللاعب الى قلوب وعقول جماهير المريخ قبل ان تشاهده فى اللعب التنافسي وذلك من خلال ماتنشره عنه الصحف من تقارير اثارت الاعجاب خلال مشاركته فى التجارب الودية السبعة التى خاضها المريخ فى معسكر تونس ,, اعتقد ان موانزا قدم نفسه بالامس بشكل افضل واكد من جديد انالمريخ على موعد فى ان يجنى ثمار ( صفقات التقشف) ويكسب من ورائها المزيد من الانتصارات اذا كفى الله اللاعب شر الاصابات والعوارض واستمر على النحو الذى ظهر به بالامس وهو يصول ويجول بين الوسط والهجوم ويمرر ويسجل ويتحرك فى كل اركان ملعب فريق الاتحاد فكان الورقة الرابحة التى اعتمد عليها الكوكى فى افساد تكتيك حداثة وتكسير ترسانته الدفاعية التى بنى عليها خطته و فرض بها التعادل على المريخ فى الحصة الاولي .
استهل المريخ المباراة بتشكيلة مثالية تحسب للمدرب الكوكى وكأنه اراد ان يؤكد على مصداقيته وواقعيته عندما صرح عقب انتهاء معسكر تونس بانه قد اصبح على معرفة ودراية والمام كامل بقدرات اللاعبينومدى درجة عطاء كل واحد منهم فى المباريات ,, حيث اختار العناصر الاكثر جاهزية والافضل تجانسا رغم انه خاض خمسة مباريات فى تونس دون ان يثبت مجموعة واحدة من اللاعبين , فالاداء الذى قدمه المريخ فى الشوط الثانى بدد المخاوف التى اعتلت البعض من سياسة الاحلال والابدال التى ظل يستخدمها المدرب الكوكى خلال فترة الاعداد والتحضير فى ان تؤثر سلبا على بداية الفريق فى الدورىالممتاز ,, كذلك فان تفوق المريخ فى الحصة الثانية يعكس مدى توفر المخزون البدنى الذى اكتسبه اللاعبون فى معسكرى مروى وتونس حيث كانت نسبة الاستحواذ الاعلى للمريخ والسيطرة الكاملة على مجريات المباراة التى ادارها الكوكى لمصلحة فريقه فى شوط المدربين حتى حسم النتيجة باربعة اهداف من جملة الفرص الكثيرة التى صنعها المريخ لنفسه .
كذلك كان قرارا موفقا من المدرب الكوكى فى ان يمنح الفرصة للكابتن هيثم مصطفى ليشارك كاساسي منذ البداية وفى ذلك دعم معنوى كبير لسيدا الذى كان محل اهتمام الجماهير وتحت انظار وعيون الاعلام رغم انه لم يجد الحماية الكافية من الحكم فى الحصة الاولي وتعرض لعنف غير مشروع كاد ان يخرجه عن طوره , الا انه تماسك على اعصابه وكان ايجابيا فى الحصة الثانية قبل ان يستبدله الكوكى فى الجزء الاخير من المباراة لمصلحة زميله الملك فيصل العجب ,, ولكن رغم ذلك لانتوقع ان تمر المشاركة الاولي لهيثم مع المريخ فى الدورى الممتاز دون ان تجد الاستهزاء والسخرية من اعداء الكابتن !
عموما بداية موفقة للمريخ ومدربه ونجومه وان كانت هناك بعض الهنات والهفوات التى ظهرت فى الشوط الاول لاسيما فى وسط الملعب الا ان الاداء ارتقى فى الشوط الثانى الذىتوجه المريخ بالانتصار الكبير كاحلى واجمل هدية لجماهيره التى كانت كالعهد بها حضورا على المدرجات ونأمل ان تتواصل الانتصارات فى الجولات القادمة باذن الله .

الرجوع الى أعلى الصفحة اذهب الى الأسفل

مُساهمة في الخميس 21 فبراير 2013 - 8:29 من طرف حمزه عوض

أصل الحكاية
حسن فاروق
بالغت يا خالد شرف
عمم أمين خزينة نادي المريخ خالد شرف تصريحات لعدد من الصحف المحسوبة علي النادي، ملخص هذه التصريحات دفاع عن رئيس مجلس إدارة نادي المريخ جمال الوالي، حول ما تردد عن أن الوالي لم يودع مبلغ صفقة إنتقال المهاجم الزامبي ساكواها لفريق مازيمبي الكنغولي والبالغ 250 ألف دولار.
فقد جاء في هذه الجزئية وعلي لسان خالد شرف مايلي : ( من المؤسف أن يتحدث البعض بهذه الصورة عن جمال الوالي ويقولون أن المبلغ المالي الخاص بصفقةإنتقال ساكواها ذهب إليه، هل نسي هؤلاء مافعله جمال الوالي للمريخ وماقدمه كما أن مايروجون له ليس صحيحا، وواصل شرف حسب التصريحات المنشورة بالزميلة (الصدي) بقوله: الوالي أحدث طفرة فيالمريخ بمجهوداته وفكره وماله وكان وراء الإنجازات التي حدثت علي صعيد المنشآت والنقلة في التعاقدات والوضع الذي يعيشه المريخ، والسمعة الكبيرة التي تمتع بها مؤخراوأنفق جمال الوالي علي المريخ إنفاق من لايخشي الفقر، ولذلك كان علينا أن نشير إلي ماقام به وأن نقدر جهده بدلا من أن يقابل البعض جهوده بالجحود والنكران، وأقول بكل أمانة الوسط الرياضي أصبح طاردا ولم يعد وفيا وإذا كان جمال الوالي الذي فعل ما فعل من أجل المريخ يتحدث عنه البعض بهذه الصورة فماذايفعلون مع الآخرين؟ وأتصور أن الأندية لن تجد من يدعمها طالما أن هناك من يشكك ومن يتحدث بهذه الصورة عن رجل دفع بسخاء نادر، وساهم نهضة المريخ، ولكم أن تتخيلوا أن جمال الوالي لم يكتف بكل مادفعه خلال فترة رئاسته في عشرة أعوام، وإستمر يدعم حتي بعد الإستقالة ودفع مليارين ومائتي مليون، هل هناك رجل يدفع مثل هذا المبلغ بعد إستقالته؟ وهل هناك وفاء وحب للنادي أكثر من ذلك؟ وبعد كل هذا يتحدثالبعض عنه بهذه الصورة غير اللائقة .. أقول يجب علينا أن نقدم الشكر لجمال الواليعلي جهده وبذله في ساحاتالمريخ) إنتهي.
قصدت تقديم هذه القطعة الأدبية الرائعة من خالد شرف لجمال الوالي، لنقف معا علي الولاء الحقيقي والوفاء لأهل العطاء في زمن الجحود كما جاء علي لسان خالد، ولولا أن الزمن غير الزمن لقلت أن (المتنبي) ظهر في القرن الواحد وعشرين، ولا أخفي أنني في لحظة تخليت أن من يتحدث أمين خزينة جمال الوالي، وليس أمين خزينة نادي المريخ، فالحماس والإجتهاد الذي بذله الرجل في الدفاع عن إتهامات لا أساس لها لاحقت رئيس مجلس إدارة النادي السابق، كان أولي به الدفاع عن المجلس الحالي الذي تحيط ضبابية كبيرة بملفاته المالية، فالوالي لا يحتاج خالد شرف للدفاع عنه بهذه الطريقة المستميتة، لأنه ببساطة قادر علي الدفاع عن نفسه، خاصة أن الإتهامات المذكورة حديث مجالس بمعني أنها لاتستند لمصادر بعينها، حتي ينفعل معها أمين إلي هذه الدرجة، وهو الذي لم ينفعل مع غياب المعلومة المالية في ملفات مختلفة منها ملف أموال المحترفين، وغيره من الملفات التي كانت بالكامل تحت يد جمال الوالي وأعضاء مجلس الإدارة وعلي رأسهم خالد شرف آخر من يعلم، كان أولي أن يغضب لذلك، بدلا من أن يغضب لغضب رئيس المجلس السابق.
وإن كان لابد من دفاع في هذه القضية إذا جازت التسمية، فإن الشخص الوحيد الذي لديه هذا الحق هو جمال الوالي وليس خالد شرف .. وبدلا من يأسف كما جاء في بداية تصريحه للطريقة التي تناول بها البعض موضوع ال250 ألف دولار، كان عليه أن يأسف لحاله وهو يصرح في ذات المكان بأنه لا يعلم شيئا عن أموال (الكاف) ويطالب محرر الصحيفة بتوجيه السؤال للمدير المالي، أيهمايدعو للأسف ياصديقي؟

الرجوع الى أعلى الصفحة اذهب الى الأسفل

مُساهمة في الخميس 21 فبراير 2013 - 8:30 من طرف حمزه عوض

على صفيح ساخن
نادر التوم
يوم الأربعة!!
تسخينة:
مريخنا ماضى حاضر كمان وحداثة
رياضة البلد هو البحرك دوم أحداثا
إن قلت البطولات (ساسا) وكمان أثاثا
وفى المثل القديم السواى (موحداثا)
أغرب حاجة أن مبارة المريخ يوم (الإربعا) إنتهت بالأربعة
لكن هناك ما هو أغرب، فالأربعة رقم علاء الدين (الجديد)
وبعملية حسابية أخرى إذا تأملت رقم سيدا الظاهرة شيخ هيثم
لوجدت أن رقمه ثمانية(رقم الرصيد الزمان) فإذا قسمت هذا الرقم
على موانزا (إثنين) لوجدت أن النتيجة أربعة، على هذا نحذر الفريق
الذى سوف يلاقينا فى الإسبوع رقم (أربعة)
شوط ليك وشوط عليك!
فى الشوط الأول كان كل واحد منا يردد (مافى جديد) بعد ان لعب المريخ ببطء
وتفنن اللاعبون فى إضاعة الفرص (الأربعة)
وفى الشوط الثانى شفنا (العجب) وعرفنا ان المريخ عنده(أهداف) جملة
سيحققها هذا الموسم بعون الله وهذا يؤكد لك تماما ان المريخ كسب مدربا شاطرا
أولم يقولوا عنه شوط المدربين؟؟
قدييييمة
قلت لأخى وأبنائه ونحن نتابع المباراة قبل أن أخلع ملابس سفرى
إن دوام الحال من المحال والإتحاد سوف ينهار فى الشوط التانى
قال لى ابن أخى أخشى أن تكون مثل مباراة الأمل العام الفائت
قلت له إن الإتحاد لم يقسم اللياقة صاح وإستنفذها فى (شوط واحد)
واتى للثانى يلهث، لدرجة جلت حداثة يتسمر فى كرسيه
وكيف للإتحاد بهذا المد الهادر والغعصار الأحمر أن يمصد؟؟
التحكيم
فى السعودية يدير مباراة النهائى غدا إن شاء الله طاقم تحكيم إيطالى، وهذا ياعزيزنا صلاح صالح لا يعنى ان التحكيم السعودى كعب، ولايعنى انهم غير واثقين فى حكامهم السعوديين، لكن لكى يلعب الفريقان كورة دون ان يتوجس أحدهما من ان يظلم وبهذا يكسب الجميع الإتحاد والفريقين والجماهير.. الإتحاد يكسب الإحترام ويكون بعيدا عن الشبهات والتأويلات والتلميحات
ليتك إقتنعت الآن ان تبريراتك بعدم إسناد المباريات الكبيرة (القمة) غير مقنعة بل فطيرة جدا
ملاحظة: بداية حكامك أيضا سيئة فى مباراتى الإفتتاح إنأردت أن تفتح بلاغا إفتح وإن أردت ان تفتح شرائط المباراة فأفتحها حتى تتاكد من صدق حديثنا لاننا بتنا
لا نثق ولا نقتنع فى تحليل إمبراطورييكم وإمبراطوريتكم
ولا يكون دورينا قبل الدورى السعودى عربيا شان كدا ما مقتنع
سؤال وجيه: صحى هو نحن التانى عربيا بعد منو؟؟
لو السودية معناتها تعمل زيهم وتجيب حكام أجانب للقمة
ولو دولة تانية برضو تلتزمبحكام أجانب لأن هذه رغبة فرقك وجماهيرك!
مريخ حديد
هو المريخ.. يغيب من يغيب مهما كان إسمه ويبقى ناحتافى الدواخل رسمه
الروح الغائبة أحياها الكوكى فى جسد لاعبينا بد ان مرقت روحنا
كم كنت اتمنى ان يواصل المريخ إحراز الأهداف حتى لآخر دقيقة
حتى لا تسول لاى مدرب نفسه ان يتحدى المريخ فى ملعبه مهما كان حجمه
ومهما كان حجم فريقه، المفخرة نريدها هذا الموسم روعة ولوحة وملحمة
أكرم تألق وأنقذ المريخ من هدف مضمون من إنفراد كامل
أمير كمال عاد بقوة، اما هيثم سيدا فقد أبدع غير أن تباعد اللاعبين عنه
فى الشوط الأول لم يمكنه من ممارسة هوايته المحببة وتمرير باصاته غير المرئية
العجب ورغم دقائقه القليلة التى شارك فيها إلا أنه بدأ بلياقة جيدة
وإن اخفق فى تسديد كرتين نحو المرمى بطريقة لا تشبه العجب
الباشا أثبت أن إختياره لمنتخبأفريقيا لم يكن محض مصادفة رغم أن البعض حاول ان يجرده من إنجازه كذبا وتلفيقا حسدا وإنتقاصا، تخريمة إنتو بشة لعب مع الهلال؟
رمضان عجب واصل هواية إضاعة الأهداف
قلناها من قبل المريخ محتاج روح وليس قروش
ومع هذا نطالب الجميع بدعم الزعيم حتى يواصل إمتاعنا
الفنان محمد النصرى مريخى حتى الثمالة وحتى النخاع
وفن الطنبور له عشاقع ومحبيه، وحمد الريح مريخى
وعصام محمد نور وطلال حلفا مريخاب يتنفسون احمرا
هذا بجانب عدد كبير من نجوم الغد.. هؤلاء يمكن ان يدعموا المريخ بحفلات جماهيرية مخفضة ومتناوبة ومستمرة
محمد صديق الكوميديان مع بقية رفاقه المريخاب يمكن انيدعموا المريخ
عمر محمود خالد يمكن ان نستفيد منه طبيبا وشاعرا
أطباء المريخ علاجات وايام صحية بقيمة مخفضة للمرضى (هلالاب) ومريخاب
مرضى الهلال الزمن دا أكتر، وكذا الشعراء المريخاب يمكنأن يقيموا منتديات شعرية (مدفوعة القيمة)
وهكذا كل فى مجاله يمكن ان يمزق المريخ فاتورة الإعتماد على الأشخاص إلى الأبد
صحيفة المريخ يمكن ان تحقق_كما حدث من قبل_ دخلا إضافيا لخزينة النادى
جماهير المريخ وصفوته منجم وتحتاج لمن ينفض غباره و(ينقب) وحتما سيحظى بالذهب مثل مانديلا وليس (كاس البنك)
الصديق المشجع المريخ جحا كتب فى إصدارته: (على حداثة تقبل الرباعية بصدر رحب) وقد اتت الرباعية، فهل كان صدره رحبا؟؟
جحا خطر فى التنبؤ بالمباريات وقد حكى له انه تنبأ لمباراة النمور ضد النسور بهدفين لهدف وقالها لحكم المباراة قبل اللقاء.. المباراة مضت نحو النتيجة والحكم قال له مددت الزمن ولكنها انتهت بهدفينلهدف.. شكرا جحا، وشندى فيها كم حرف؟؟
ويظل المريخ الحاضر والمستقبل والتأريخ وكلنا مريخاب
ويبقى المريخ فوق الأشخاصوالولاء للكيان
وأخلع يا حضرى.
ليس الفتى من يقول تراورىإنما الفتى من يقول (موا نزا)!
وما يضير البحر أمسى زاخرا إن رمى فيه غلام بحجر
تشه فنية: (شعر الحداثة) ليس له رواد كثر
آخر قطرة: البداية باربعم ما اروعا!
وهذه بصمتى

الرجوع الى أعلى الصفحة اذهب الى الأسفل

مُساهمة في الخميس 21 فبراير 2013 - 8:32 من طرف حمزه عوض

القلم الاحمر
داوود عبدالحق ابورونق
بداية مبشرة ///--
• بدأ مريخ السعد وفخر البلد مشوار الممتاز وسحق الرومان برباعية مستحقة وجميلة ورائعة كفلت له الصدارة .
• بداية موفقة واعلنت عن مريخ 2013 الذي قدم افراده عرضا بهيا وشيقا وفرض الزعيم اسلوبه وقهر الطريقة الدفاعية الحداثية التي لعب بها الرومان .
• بداية رائعة ادخلت الطمأنينة في قلوب الصفوة , اليوم شاهدنا الزعيم يلعب الكرة الممرحلة والسريعة خاصة في الشوط الثاني وظهرت بصمات الكوكي
• نجح الكوكي في وضع تشكيل مناسب مكون من اكرم وباسكال ونجم الدين ومصعب وبلة دفاعا وفي الوسط امير كمال ورمضان والباشا والبرنس هيثم وفي الهجوم موانزا ومحمد موسي
• الشوط الاول طغت عليه حمي البدايات ولم يقدم المريخ العرض المتوقع وتحركالمريخ في الجزء الاخير بفضل حيوية ولمسات النجم هيثم مصطفي
• تغير الحال في الشوط الثاني حيث نجح الكوكي في قلب الطاولة علي مدرب الرومان حداثة ساعده في ذلك لاعبي المريخ الذين استشعروا المسئولية وبدأ واضحا انهم يرغبون في تحقيق نتيجة ايجابية ولعبوا بعزيمة واصرار وحققوا المراد
• قدم اولاد الكوكي في الشوط الثاني عرضا رائعا وبسطوا سيطرتهم علي الملعب طولا وعرضا وامطرواشباك الرومان برباعية جميلة اسعدت الصفوة .
• الشوط الثاني كان شوطا للمتعة والابداع الاحمر فواصل من الامتاع بقيادة الامير هيثم والهداف الداهية موانزا
• ظهر المريخ بمستواه الحقيقي في الشوط الثاني وتألق كل لاعبيه واشيد بمستوي المدافع الايفواري الصلد باسكال الذي كان صمام امان في خط الدفاع وايضا تألق النجم امير كمالفي وظيفة لاعب المحور خاصة في الشوط الثاني وكان من صناع الفوز ولعب بهدوء وبتركيز عال وكنا نشاهده في كل ارجاء الملعب وكانت تمريراته سليمة اما هيثم ود مصطفي فقد تحرك في الملعب وأعاد الهيبة لخط الوسط وصنع عددا من الفرص وكانت له لمسات سحرية .
• الباشا ودالباشا لعب بمزاجرايق وقدم مستوي طيبا وتحرك شمالا ويمينا واحرز الهدف الاول وصنع هدف كلتشي الرابع .
• المهاجم الزامبي موانزا قدم أداء ممتاز وكان نجما ساطعا تحرك في خطي الهجوم والوسط ولعب برشاقة وحرفنة ويمتاز بالحيوية والنشاط وقوة التسديد واحرز هدفين رائعين ونهدي الهدف الثاني الي جعلي الهلال واستحق نجوميةالمباراة وهو مكسب كبير للمارد الاحمر ربنا يحميه من العين الزرقاء .
• ايضا تألق الحارس اكرم وانقذ المريخ من هدف محقق في الشوط الاول ولم نشعر بغياب الحضري وحقيقة اكرم حارس رائع اذا تخلي عن الاستهتار وطبعا بلة جابر لم يتخلي عن عادتة وهو يتلقي كرت اصفر .
• نجح الكوكي في اول اختبارله مع الزعيم وكسب شوط المدربين ولكن نعيب عليه الزج باللاعب محمد موسي من البداية وايضا لم يكن الكوكي موفقا في ادخال اللاعب فيصل العجب ونعتقد انه جامل العجب وكان من الأفضلالزج بفيصل موسي او راجي .
• اللاعب محمد موسي يمتاز بالقوة الجسمانية نتفق مع المحلل محمودالسادة الذي طلب من الكوكي توظيفه في الوسط او الاطراف .
• ظهرت نجيلة ملعب المريخ بصورة سيئة وحالة يرثى لها وبانت الحفر والمطبات وهي لا تشبه المريخ نرجو من مجلس الأدارة الاهتمام بصيانة الملعب فالمنظر اغضب كل اهل الصفوة .
• حقق حبايبنا الزرق فوزا مستحقا علي مريخ الفاشر بهدفين بالرغم من ان الهلال لم يقدم العرض المتوقع لكن بصراحة نقول ان الهلال كسب مهاجما خطيرا وهو تراوري والتحية لسلاطين الفاشر

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
تستطيع الرد على المواضيع في هذا المنتدى