في السلك .. بابكر سلك .. شكيتكم علي الله

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

18092015

مُساهمة 

في السلك .. بابكر سلك .. شكيتكم علي الله




في السلك
بابكر سلك
شكيتكم علي الله

*اصدرت لجنة الاستئنافات قرارا بصحة شكوتي المريخ في مباراتي عطبره وكادوقلي
*طيب من زمان مالكم !!!
*موش قلنا ليكم الشكوتين مسألة وكت ليس الا ؟؟
*المهم
*محمد خير ود عمي
*هلالابي نايم شخيرو صفير
*من تسمع صفيرو في شخيرو تعرفو هلالابي
*يصفر ساااااي
*متاثر بي الصفر شديد
*اليوم داك كان نايم
*اتصلت عليهو تلفونيا
*جرس ساااااي
*واتلحتو ليك
*موش في ناس كده لو مارفعت ليهم ما برفعوا من التلفون اصلو ؟؟
*النوع البنزل ليك البطاريه داك
*لا بقول الزول ده مشغول
*لابقول الزول ده نايم
*لابقول الزول ده بعيد من التلفون
*لا بقول الزول ده في بيت بكا
*لا بقول الزول ده بصلي
*ولا بقول الزول ده المره مشغلاها ليهو
*داقه جرس عشان كده ما سامع جرس التلفون
*ضغطه وااااحده يجيب ليك خبر البطاريه
*المهم
*عملت ليك ليهو زي الزول ده
*جرس زي الجرس
*تلت ساعه حتي رفع
*قايم من النوم
*الو مع النعسه ديك واظنو كان مزكوم كمان
*الو طلعت انو
*قلت ليهو انو ساي ؟؟
*كسبنا الشكوتين
*قال لي احلف
*قلت ليهو والله العظيم
*قال لي شكيتكم علي الله انتوا
*نحنا طول عمرنا ده نشكي
*شكينا اكتر من كبسور
*وصلنا بي شكاوينا لوزان
*قربنا نمشي مجلس الامن
*شكوي واحده ما كسبناها
*انتوا تشتكوا بالجوز
*وتكسبوا بالجوز
*حيرتونا
*قلت ليهو قلنا ليكم جوز لا يخسر ماصدقتونا
*المهم
*في شكوي عطبره
*قصة اللاعب في تقرير الحكم ثبت انو بصق علي وجه الحكم
*لكن اتحاد القضارف ما عاقبو
*وده قصور من اتحاد القضارف
*القصه دي ما داخله راسي
*حقو نمشي في الموضوع لي قدام
*اذا المريخ متأكد انو اللاعب اتعاقب من اتحاد القضارف بالايقاف
*وبعد داك حسب مابنسمع انو القرار اتلحس
*حقو خدمة للرياضه وللرياضيين
*نمشي في الموضوع جنائيا
*والبينه رااااقده لو اساسا في عقوبه صدرت
*اولها رئيس نادي القضارف الكان بلعب فيهو الزول المعني علي اليمين
*وصلك خطاب رسمي بايقاف لاعبك فلان الفلاني سنه ولا ما وصلك
*علي اليمين الكلام ده
*لو وصلوا يبقي الزول الدسه القرار ياخد عقابو
*ولو ما وصلو يبقي اتحاد القضارف قصر في العقوبه
*لانو لو وصولو واتغير القراراو اتلحس
*الوضع بتغير
*المريخ بشيل النقاط بدون ما تعاد المباراه
*ايها الناس
*سمعنا انو امل عطبره زاتو عارف بالعقوبه
*وبقولوا انو الامل طلب من نادي القضارف البتبع ليهو اللاعب ان يستانف ليهو
*وفعلا حدث زي ما قالوا
*برغم ان الواقعه تشمل تلاته لاعبين
*اتنين تانيين مع الزول المعني
*الاستئناف كان للزول المعني بس
*وقالوا اتحاد القضارف رفض الاستئناف بتاع قرار الايقاف
*وعلي الرغم من ذلك امل عطبره سجل الزول المعني
*وقالوا بعد داك فريق القضارف استرحم للاتنين الباقيين
*والاسترحام جاب حقو
*اذا ثبتت صحة هذه الروايه
*يبقي الموضع جنائي عديل يا ناس المريخ
*النيابه هي الحل
*اما موضوع تسجيل لاعب الجنوب كلاعب وطني في اتحادنا ده
*ده مفروض نمشي بيهو وكيل النيابه الاعلي طوالي
*دي مستندات دولة رسميه
*لها عزتها وكرامتها واحترامها
*والتلاعب بيها اهدار لقيم الوطن وقيمته الكبيره
*العوده للمستندات الموجوده التي تسجل بها اللاعب
*تحدد جرم من براءة القصه دي
*وحقو برضك مجلس المريخ يسك الموضوع ده لي جوبا
*ايها الناس
*معارضة بعض المريخاب ساقتهم بي رجلينهم للند التقليدي
*ليس حبا في الند التقليدي
*ولا امتثالا لخلق رياضي
*ولكن كيتا علي جمال
*زي ديل حرقوا روحهم
*بقوا زي صديقي ياسر عرمان
*مشوا مع الجنوب ولما انفصل ماعرفوا يمشوا وين
*رجعتهم استحالت
*تاني دار الرياضه بس يا حبايب
*القعاد بي هناك ما بجي
*الرجعه شينه
*والغريبه لما نجيب الاميره الحمراء ان شاء الله
*تقابلونا في الدوحه حول مائدة تقريب وجهات النظر والسلام
*لكن حاجه نستند عليها عشان نقرب بينكم وجهات النظر ما خليتوها
*دفقتوا مويتكم علي السراب
*اقول ليكم
*لما نشيل الكاس الافريقي
*اعملوا ماعارفين واقعدوا صفروا
*المهم
*امس مشيت لي عبدالسميع
*عبدالسميع اشطر زول بلف موتورات في البلد دي والشرق الاوسط
*في امدرمان الشارع البجي غرب التيجاني الماحي
*هلالابي كبير
*صفرو يقابلك قبلو
*اداني موتور سرعه واحده بي تلتمية الف
*قلت ليهو يعني بكري بي سرعاتو المية ديل بستحق الاتنين مليار
*ضحك
*قمنا اتونسنا
*قلت ليهو غرزه عامل تمارين زيادة سرعه لي بكري
*قال لي الخواجه ده خرف ولا شنو ؟
*يعني تاني لو سمعنا شوووووو
*نعرف بكري جا بي هنا ؟؟؟
*قلت ليهو شووو ساي
*شووو وكوووو ورووووو وبلنت
*ايها الناس
*في المريخ رجال يعملوا في صمت
*يقاتلوا في صمت
*فيهم اللو اسمو ورد ما مشكله
*وفيهم اللو اسمو ورد ما ظريفه
*مجهود كبير قام بيهو الصديق حامد بدوي ومهند ميرغني في خصوص الشكوتين
*واسماء تانيه حامياني
*بحتوا بحت
*لما جابوا الحقيقه
*بالمستندات
*الو
*جباك
*توك كونق تيم كور جوك شايقي ؟
*اباقيق جوك رث تيب ؟؟شايقي اباقيق ؟
*يعني الكلام ده قالوا منو ؟ شايقي كيف يعني ؟؟
*والله يا سعادتك قالوا شمالي
*جنوب نجاركوك اسلي
*الود ولدنا جنوبي اصلي
*وبعدين ؟؟
*خطاب استدعاء اتحاد جنوب اتحاد شمال نجاركوك بار بار بار
*اسي بنرسل خطاب لاتجحاد الشمال نستدعي فيهو اللاعب ويقولوا ليهو اهلك قالوا ليك تعال تعال تعال
*لله درك يا حامد بدوي
*بقيت تتكلم لغات
*يعني لو عمر ولدك جا يعرس ووديت بقر ما نستبعد
*ولك الشكر والموده اخي مهند ميرغني الفارس
*وعشت يا مريخ موفور القيم
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*لاخسرت شكاوينا
*ولا لقينا البكاوينا
*نفلق روحنا يا والينا وبي ايدينا ندواينا
سلك كهربا
ننساك كيف والكلب عارف نتيجة الشكوي من بدري وكان مستغرب
والي لقاء
سلك

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى