تابعونا عبر فيس بوك

قوقل ‏+‏ ‏
Use the English Language

دق الدلجة .. محمد عبد الماجد .. مازيمبي جيبوا ليه )لجنة الاستئنافات( خلوها تلعب ليكم

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

19092015

مُساهمة 

دق الدلجة .. محمد عبد الماجد .. مازيمبي جيبوا ليه )لجنة الاستئنافات( خلوها تلعب ليكم




دق الدلجة
محمد عبد الماجد
مازيمبي جيبوا ليه )لجنة الاستئنافات( خلوها تلعب ليكم

• بشه امس زي الزول البفط ليه سطر ..عشان يملأ الورقة ..ويقلب الصفحة..بيشبح )صاح(.
• تشوفو في حتة – بعد لحظة بتلقى في حتة تانية.
• جدع ليك الحارس في حتة – ولجنة الاستئنافات في حتة.
• وبدون ما تحول )الطبق(.
• وتجيب )التقرير(.
• ناس النيلين ..شبكونا ليك ..حوّلوا الطبق – حوّلوا الطبق ..حوّلوا
الطبق ..لمن نزلوا الموردة.
• انتوا حولتوا الطبق ام الموردة؟.
• انتوا عارفين )الموردة( العريقة ما في حاجة نزلتها غير )طبقكم( دا يا
ناس النيلين.
• معقولة نحول الطبق عشان تقولوا لينا )الخلل من المصدر(.
• المصدر منو؟.
• المصدر انتوا!!.
• خلل شنو؟…تمسكوا ليكم في حاجات ما فاهمين فيها حاجة.
• الظاهر )خلل من المصدر( التى يشاهدونها في قنوات بي ان سبورت عجبتهم.
• قاموا قالوا يقلدوها في قناتهم )المجلية( دي.
• الكورة تكون في استاد الخرطوم – يجيبوا ليك دار الرياضة ام درمان.
• مرة قاعدين نحضر في مباراة مريخ الفاشر ومريخ ام درمان في امان الله
..جابوا لينا )سبق الخيل(.
• ما عرفنا المباراة من السبق.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• بشه امس ادانا )العطش(..تلقوا لجنة الاستئنافات قلبها اتقطع.
• الحاجات دي ما بتعجبهم.
• ولا بتريحهم.
• وبشه يجري ..ويجري…ما شاءالله.
• نحن القاعدين في تلفزيونا بنمشي بعد الحالة دي نقطع لينا )جردل( موية
ونرجع نكمل المباراة.
• بتمسكنا عطشة.
• يا ربي )المدافع( بتكون حالتو كيف؟.
• اكيد بفتكر نفسو في نص رمضان من )العطش(.
• الهدف ما فيه اي شيء – لكن مع ذلك خلونا نسأل )مريخاب الجنوب( رأيهم
شنو في الهدف؟.
• يمكن يكون عندهم رأي.
• وجهة نظر ساكت كدا.
• مريخاب الجنوب ديل بذكروني ليك بي )الصيوان( وقت يكونوا عاوزين يركبوه في الحلة.
• اي واحد من اعمامك الكبار بيجي يديك )نظرية(.
• في ناس بعد الصيوان ما يركب …بيصروا على نظريتهم وبقترحوا يفكوا
)الصيوان( ويركبوه تاني.
• عشان راكب غلط.
• حالتهم زي مريخاب الجنوب.
• خلوهم مريخاب الجنوب..سكرتير القضارف يمكن يكون عندو رأي.
• الزول دا ما عندو رأي.
• الزول دا عندو )تقرير(.
• التقرير بطلعوا ليك من اقرب معمل.
• زي نتيجة فحص الملاريا.
• وصلاح ادريس…
• صلاح ادريس مالو؟.
• صلاح ادريس اعار )سيلا( للمريخ ..بقى )شريك( عديل كدا في المريخ.
• صلاح ادريس بتكلم عن )الوطنية(.
• بعمل في )دروس(.
• شفتوا نحن وصلنا وين؟.
• دي اخر مرحلة يمكن ان تصل ليها الكورة السودانية.
• والله يا صلاح ادريس انت في )الالحان( خطير – خطير شديد ..لو دي كتابتك.
• بعمل مقارنة يا جماعة بين التلحين والكتابة ..وقت صلاح ادريس طلع يتكلم
عن )الوطنية(.
• طبعا اي زول عاوز يطلع من الموضوع …بقوم يتكلم عن )الوطنية(.
• الوطنية ما بتدخل في )تصفياتكم( دي.
• الوطنية – حاجة بعيدة عن )الشخصنة(.
• الوطنية اكبر من كدا.
• بعدين الزول الما قادر يتصالح مع الاخرين ..يبقى اخر زول يتكلم عن )الوطنية(.
• الوطنية دي ما كدا.
• الوطن بترفعوه بالمسؤلية.
• بالقانون.
• بالمشي الدغري.
• الوطنية ما كلام…ولا طحنية.
• ما سينما.
• اصلا ما كدا.
• احسن ليك يا صلاح ادريس تمسك في )التلحين( بدل كل يوم تجينا بي رأي.
• الرأي البكون زي )مروحة التربيزة( دا – احسن منو )الالحان(.
• وقبل جاي وقبل جاي.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• انتوا تعالوا هنا – ممكن الزول يسأل سؤال ويشغل )المروحة(.
• لو عندكم اعتراض على )المروحة( ..خليتها.
• خلوني اسأل سؤالي.
• جماعتنا بتاعين )ورق الهدايا( ديل …موش قبل كدا قالوا كورتهم زي كورة برشلونة.
• هي وينها الكورة؟.
• تتصوروا مرة كتبت في )قوقل( برشلونة …جاني )ضفر( جاري.
• قلت معقولة )لجنة الاستئنافات( وصلت المرحلة دي.
• كتبت البارسا ….جاني امير كمال.
• قلت الشغل دا كبير شديد.
• برشلونة لو زي المريخ ..مفروض برشلونة تقوم تشتكي )روما(…زي ما
جماعتنا ديل اشتكوا )هلال كادوقلي(.
• وقت المريخ بقى )برشلونة(….هلال كادوقلي ما كتيره عليه يبقى )روما(.
• هو قالوا ليكم )التشبيه( بي قروش.
• اسهل حاجة في السودان بعد الساعة تلاتة )التشبيه(.
• تشبه زي ما انت عاوز.
• تجيب ليك )قرع(..وتشبهو بي )سمك(.
• ولا في حد بقدر يسألك.
• لو في زول سألك ..قول ليه لجنة الاستئنافات قالت كدا.
• اصلها لجنة فارغة ساكت..كراسي وقاعدين فيها ناس.
• افتح المروحة ..واتخيلها )فريون(.
• قالوا ليك في زول كدا خلقتو ما بتتقابل.
• الزول دا ..قام اتجرأ كدا ووقف ليه قدام )مرايا(.
• زولكم شاف نفسو …طوالي قبل من المرايا ، واداها ضهرو – وقال والله
)مرايات( الزمن دا بقن )مطاميس( بشكل.
• الواحد يقف قدام المرايا )توم كروز( – تجيبوا ليك )لطفي لبيب(.
• خمسة نقاط.
• الواحد لو ما عندو صلعة ..بطلع في المرايا عندو صلعة.
• يا ربي الاستئنافات )المخلوعة( دي عندها دخل في الموضوع دا.
• معقولة ناس )سيحة( وصلوا هناك.
• محمد سيد أحمد في )الحج( وهو في الاراضي المقدسة ..طلع ليه تصريح يهاجم
فيه اسامة عطا المنان.
• يا زول انت في )الحج(.
• الكورة طايرة.
• ركز في حجك…دا ما وقت الكلام البتقول فيه دا.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• اتخيلوا برشلونة زي المريخ – طالما المريخ زي برشلونة.
• الحالة واحدة بي )سكرتير قضارفها(.
• وامشوا معاي خطوة – خطوة.
• برشلونة تقوم تشتكي روما.
• برشلونة تقول في شكواها – محمد صلاح لمن كان بيلعب في شيلسي )بصق( على
الحكم في مباراة المقاولون العرب ووادي دجلة.
• الله ..الله.
• الكلام دا حصل متين؟.
• تلاتة نقاط مضمونة.
• ح تقول لي الجاب محمد صلاح من شيلسي في مباراة المقاولون العرب ووادي دجلة شنو؟.
• ح اقول ليكم )الشبه(.
• انتوا موش قلتوا المريخ زي برشلونة.
• انتوا قايلين الشبه دا لعب.
• على كدا …برشلونة تقوم تسأل برشلوناب الجنوب.
• او تشوف سكرتير اتحاد مانشيتسر…)بعادل عندنا سكرتير القضارف(.
• عشان يشوف ليهم اي تقرير كدا وبيأخد حقو.
• اصلو ما في مشكلة.
• الدينا عيد.
• وبرشلوناب الجنوب ديل بعملوا اي حاجة.
• لكن اوروبا فيها لجنة استئنافات زي لجنتنا دي.
• كدا صعبت الموضوع.
• لجنة زي لجنتنا دي في ملجة في اوروبا ما بتلقاهو.
• ما في حاجة ذاتها اسمها اسئتنافات.
• وما في حاجة اسمها )شكاوي(.
• برشلونة من سنة 1899 …سمعتوها في يوم قدمت ليها )شكوى(.
• اسبانيا دي اتنين ما فيها.
• الشكوى والكمونية.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• قالوا ليك ناس المريخ لو اشتكوا هلال الابيض بشيلوا نقاط
المباراة…ناس هلال الابيض ديل عندهم )مريخاب جنوب( زي الورد.
• اصلو ما قاعدين يقصروا ليهم في تقرير.
• التقرير عندهم زي )الخيار والفقوس(.
• ولا بتلفتوا فيه.
• بالمناسبة نزّلوا ناس لجنة الاستئنافات تمارين.
• دخلوهم معسكر بدل ناس امير كمال.
• مازيمبي دا لا بتقدروا عليه ولا حاجة.
• خلوا لجنة الاستئنافات تلعب ليكم.
• يمكن يلقوا ليهم )سكرتير قضارف( كدا يقوم يطلعها ليهم )تعادل(.
• الكورة بقت لا كورة ولا حاجة.
• حكاية القون.
• وضربة المرمى.
• والكورنر ..والحاجات )التقليدية( دي ..كانت في كورة زمان.
• كورة الايامات دي )شكاوي( ساكت.
• وتقارير.
• بتتحسم بي )لجنة الاسئتنافات(.
• …………..
و
• على قناعة ان الظلم والاستهداف يزيد الهلال قوة.
• حكم مباراة الامس حرم الثعلب من هدف اكيد.
• الحكم طلع )لجنة استئنافات( برضو.
• كوناتيه )هندسة( تمريرات.
• كورتو زي )طب الاعشاب(.
• قناة الخضراء …احرجت النيلين والقومي والنيل الازرق والشروق.
• ديل كانوا كاتلننا بالكورة المسيخة.
• المباراة تقول بنقولها في صحن.
• مبروك لقناة الخضراء.
• قالوا مازيمبي ح يصل الخرطوم اليوم – كلموا لجنة الاستئنافات – خلوها تكون جاهزة.
• ………….
• السيدة )ل( – )المرارة( ما عاوزة ليها )ملح(.
• وقرّض على كدا.

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى