بالعربى الكسيح .. محمد الطيب الأمين .. ولا زول عايز يقرأ )سورة يس( ما في !!

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

14102015

مُساهمة 

بالعربى الكسيح .. محمد الطيب الأمين .. ولا زول عايز يقرأ )سورة يس( ما في !!




بالعربى الكسيح
محمد الطيب الأمين
ولا زول عايز يقرأ )سورة يس( ما في !!

* في السودان عادة لما زول )يكتُل( ليهو زول ، وأهل )المكتُول( يعفو عن الكاتِل بيقوم الكاتِل بيرحل من )حله المكتُول( ..
* برحل من البلد خوفا على مشاعر )اهل المرحوم( ..
* ممكن واحد من اهل المرحوم يتذكر المرحوم ويقوم يتهور يمشى يكتل )كاتل المكتول( ..
* والله صحى ..
* عشان كده )الجاني( برحل وممكن يسيب البلد مره واحده ..
* إحنا في الهلال كنا نود إستجلاب )ساماتا( محترفا بصفوف الهلال العظيم لاسباب تتعلق بـ)أهل المكتول( ..
* كنا دايرين نجيب الزول ده لاسباب تتعلق بـ)المرحوم( ..
* لكن الله ما اراد ..
* ساماتا )الكاتل( رفض عرض الهلال بشكل شبه رسمى وقال عايز يلعب في اوروبا ..
* وخبر احتراف ساماتا خارج افريقيا ريح اهل )المرحوم( الساكنين في العرضه جنوب ..
* جمهور الحنطور من ناحيه نفسيه ارتاح لما عرف ساماتا عايز يلعب في اوروبا ..
* هو عليك الله فضل فيها نفسيات بعد استقالة )عزو( ؟؟
* غايتو جنس غايتو ؟؟
* الأستاذ أحمد بابكر كان مدربا لمنتخبنا الوطنى قبل )15( عاما ..
* والآن عاد أحمد بابكر مدربا لمنتخبنا الوطنى بعد )15( عاما ..
* السؤال البيطرح نفسو هو : )أحمد بابكر تتطور في علم التدريب ولا منتخبنا لحق أمات طه( ؟؟
* في دنقلا الحبيبه الهلالاب اكتر من )البلح( ..
* والهلال في دنقلا سيلعب نهائي الكاس وكأنه يلعب في المقبره ..
* وهذا يعنى ان المريخ في دنقلا سيكون )غريب عديل( ..
* وبما ان ذلك كذلك فمن الضرورى جدا ترسلو ليكم )فنيين عشان يفحصو ليكم هوا التكييف في دنقلا( ..
* الهلال بعد ما يغلب المريخ في الممتاز هنا )ان شاء الله( سنقابله في دنقلا على طريقه : )طالعني الخلا( ..
* نضربكم جوه البيت ونطلع معاكم الخلاء ..
* وفي الخلاء هناك الفيهو طيب بنشم ..
* فاروق جبره عندما كان لاعبا )ضرب الحكم بونيه( ..
* وفاروق جبره عندما اصبح مدربا فأن أحد لاعبيه )قذف الارض بالشعار( ..
* والغريب في الامر سوء السلوك عندو علاقه بـ)اللون الأحمر( ..
* اى سوء سلوك عندو علاقه باللون الاحمر والله اعلم ..
* أنا لاحظت الحاجه دى ..
* واى زول طبعا حر في )ملاحيظو( ..
* ملاحيظي وأنا حر فيها ..
* حاجه تكسف ..
* التاريخ سيكتب لجمال الوالى شرف انه اول من ادخل )الشوكه والسكين( في )طاوله تناول الطاعم بالمريخ( ..
* الشوكه والسكين في المريخ دخلت مع جمال الوالى أو كما قالو ..
* يبقى إنجازات الوالى )5( هى : )طابق شاخور وإدخال الشوكه والسكين وبلوغ مربع الكبار في الابطال( ..
* وعلى فكره ..
* مش الشوكه والسكين دخلت مع جمال الوالى ؟؟
* اها الشوكه والسكين برضو ح تطلع مع جمال الوالى ..
* والله صحى ..
* إذا كان السيد رئيس نادى الهلال الكاردينال يحب )الشو( و)الاعلام( فأن التسجيلات لا تحتاج لما يحبه الكاردينال ..
* )الشو( و )الاعلام( ممكن يكون في اى حاجة تانيه غير التسجيلات ..
* ممكن يكون في الجوهره الزرقاء او في السيخ او حتى في الطياف والصحيان ..
* لكن التسجيلات خط أحمر ..
* جربنا الكاردينال في )بوتاكو( وجربنا اللجنه الفنيه في )كيبى( وجربنا السماسره في )جوليام( ، يبقى السنة دى خلونا نجرب الناس البعرفو كوره صحى صحى ..
* حكايه لاعب من )وستهام( ولاعب من )مانشستر( دى تانى ما بتدخل رأسنا ..
* دايرين تسجلو جيبو لاعب من الاتحاد الجزائري ولاعب من الترجى ولاعب من مازيمبي ..
* دايرين لاعب )جاااااااارى في الميدان( مش لاعب )عاطل( يا الكاردينال ..
* شوف لينا لاعب تكون الجماهير شاهدته في دورى الابطال لهذا العام ..
* إحنا والله العظيم زهجنا وفترنا من حكايه لاعب من اوروبا وزهجنا من )مقاطع الفيديو( البيجيبوها للاعبين في مواقع التواصل ..
* زهجان عديل كده ..
* جيبو لينا لاعب نكون شفناهو في )بى آن سبورت( مش لاعب شفناهو في )مقطع فيديو( زي )رقيص العروس( كده ..
* يجيبو ليك لاعب في )الفيديو( لا تعرفو مصاب ولا سكران ولا صغير ولا كبير ..
* والسنة دى لو الكاردينال عايز يسجل من )الفيديو( و)الواتساب( والله الرماد كال حماد ..
* إحنا بنقدر جهود الكاردينال الكبيره وما يبذله من )طاقه ماليه( في الجوهره الزرقاء ولكن نطلب منه ان )ينجض التسجيلات( ..
* الهلال حاليا ما بيستحمل فشل جديد في التسجيلات ..
* عشان كده حتى لو يقيف العمل في الجوهره لفتره لازم نسجل تسجيلات مقنعه وتسجيلات في حجم وقامة الهلال ..
* وبمناسبه التسجيلات ..
* قالو المريخ بعد إستقالة الوالى رجع يفاوض الضوء قدم الخير وامير دامر وهيثم الرشيد وعثمان زكى ..
* غايتو السنة دى لو في لاعب مشى المريخ يكون شرب مقلب بـ)النعناع( ..
* الداير يشرب )مقلب منعنع( خلى يمشى المريخ ..
* المريخ بدون جمال الوالى زيو وزي اى )جزيره فيل( ..
* طبعا مع أكيد احترامنا وتقديرنا لحبايبنا في جزيرة الفيل ..
* والله السنة دى يا ناس المريخ )جرجيركم بغرق( ..
* وإحنا علينا نضحك وبس ..
* الله قسم لينا الضحك من ساماتا ولحدى الموسم الجاي ..
* نضحك بس ..
* وبعيدا عن الضحك نبارك لصلاح ادريس خساره اهلى شندى أمام المريخ ونقول لجمهور الاهلى شندى )هارد ليكم الخساره امام المريخ( ..
* فوز المريخ على الاهلى ربما يكون قد اسعد الارباب ولكن قطع شك جمهور الاهلى سيكون حزين بسبب هذه الخساره الكبيره ..
* واعتقد ان المباراة اثبتت ان )عمارى( مكانه شاغر في المريخ فهل يقدمه صلاح هديه للمريخ ؟؟
* ومحبه الارباب للمريخ ما عندها علاقة بوجود الوالى او ذهابه وذلك لان حب صلاح للمريخ عندو علاقه مباشره بوجود الكاردينال في )كرسى الهلال( ..
* غايتو جنس غايتو ؟؟
* المشاورات التى تتم الآن من اجل إختيار رئيس للمريخ تشبه المشاورات التى تتم في بيوت الأعراس من اجل إختيار )زول يقرأ سورة يس للعرسان بعد الجرتق( ..
* والله صحى ..
* بعد مرات )العرسان( ما بيلقو )زول حافظ يس( عشان يقرأ ليهم بعد الجرتق ..
* في عرسان مشو شهر العسل بدون )يس( وفي عرسان لقو )ود حلال يقرأ ليهم( ..
* وناس المريخ لحدى الآن ما لقو )ود حلال يقرأ ليهم يس( ..
* لسه بيفتشو ..
* وبعد ده كلو يقول ليك : )حواء المريخ ولود( ..
* ولود بـ)الساء( ..
* تلاته ايام ما قادرين تلقو ليكم رئيس وتقولو لي )حواء المريخ ولود( ..
* حواء المريخ لو ولود جمال الوالى ما بيسجل )14( لاعبا من الهلال ..
* في السودان في )حواء واحده القاعده تلد( ..
* حواء الهلال ..
* وحواء الهلال من شدة الكرم بتدى الهلال وبتدى المريخ ..
* المهم ..
* بنديكم فرصه لحدى بكره يا جبتو رئيس يا كمان بنشوف ليكم رئيس إعاره ..
* نشوف ليكم الخندقاوى أو مالك جعفر او سعادة اللواء حطبه او الفريق الطاش أو صالح سنار ..
* الفراغ الموجود في المريخ ده ما من المصلحه ..
* حكايه إنو تلاته ايام ما عندكم رئيس دى صعبه والله ..
* بالطريقه دى الكهرباء في الاستاد بتكمل ..
* عشان كده شوفو ليك رئيس سريع سريع ..
* أنا متوقع حاجة بتحصل في الايام الجايه ..
* قول لي شنو ؟؟
* جرايد المريخ ح تكب إنو رئيس نادى الاتحاد الجزائري ورئيس نادى الترجى ورئيس نادى مازيمبي إتصلوا على جمال الوالى وطالبوه بسحب الاستقاله ..
* ناس المريخ ديل بعد مرات عندهم وهم زي ده ..
* بعملو حاجات كده غريبه ..
* عندهم تصرفات ما بتتهضم ..
* ح يقولو ليك عيسىى حياتو إعتبر إستقالة الوالى خسارة للكره الافريقيه ..
* المهم .. لازم يعملو ليهم حركه كده ما مهضومه ..
* الحناطير ديل انا بعرف حركاتهم دى كويس والله ..
* والأيام ح تثبت ليكم الكلام ..
* غايتو إستقالة الوالى دى ما في زول مضرر منها غير )انديه سيكافا( ..
* تانى سيكافا ح تختفى من المشهد ..
* عموما وبما إنو إحنا أخوان وجيرانا ما بنقصر معاكم ..
* وعشان ما يبقى كلام ساى هاكم )006887979654( ده رقم )قابيتو( و)006543897659( ده رقم )الصلوى( و)00345648839( ده رقم )انقيدي( ..
* وللضمأن كده هاكم رقم بوتاكو )008985467388( ..
* الجماعة ديل اسعارهم مناسبه وكويسه معاكم ..
* فاوضوهم وان شاء الله يحصل خير ..
* خير بـ)الماء( ..
* و..و..
* وفي بعدك يا غالى …)إشتهينا البيتزا( ..

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى