تابعونا عبر فيس بوك

قوقل ‏+‏ ‏
Use the English Language

دق الدلجة .. محمد عبد الماجد .. اللقيمات وصلت )المفوضية(

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

14112015

مُساهمة 

دق الدلجة .. محمد عبد الماجد .. اللقيمات وصلت )المفوضية(




دق الدلجة
محمد عبد الماجد
اللقيمات وصلت )المفوضية(

• هلالابي شفت – النوع الما بخت كباية الشاي مرتين.
• برفع كباية الشاي المرة الاولى وبنزلها )فاضية(.
• والله لو جبت ليك )فحيص( ملاريا – عشان يعرف ليك )الكباية( دي كان فيها
شنو؟..ما بعرف.
• زمان عندنا عمنا صعب …رأسو كلو )حكمة(.
• لو فتحت ليك )ماسورة( بقول ليك )حكمة(.
• لو قعدت في الصينية بقول ليك )حكمة(.
• زول خبرة ..رأسو فيه 32 جلحة…غير )الصلعة( الرئيسية.
• عمنا دا كان بقول لينا الواحد العشا ما يتقل فيه…الواحد فيكم لازم ينوم خفيف.
• نقول ليه خفيف كيف يعني؟..ياكل شنو مثلا؟.
• بقول لينا كيلو باسطة ..و35 قطعة بسبوسة من الحجم الكبير.
• بنقول ليه يعني الباسطة براها ..والبسبوسة براها يا حاج؟.
• البسبوسة دي ممكن تروح ساكت مع )الباسطة( – عشان كدا افصلوها لي.
• بنفتكروا ح يقيف هنا.
• عمك بواصل …وفرختين )جداد( وجوز حمام ..وكراع خروف..تفصل بين الحاجات
دي بي )قفة( برتقال…وشوال جوافة صغيّر.
• وعشان ما تغلط معاك )اللحمة(..تشرب ليك )13( رطل لبن كفواصل اعلانية.
• مرات بكون في زول قاعد ياكل معاك في الصينية بطلع فاصل اعلاني للتلاجة
وبرجع يواصل.
• عمك طبق لينا نفس النظرية.
• زولكم بواصل في كلامو بعد السلسلة الغذائية دي وبقول لينا بعد كدا تخش
على )الفطائر(.
• نثبتو ليكم قبل ما يتم كلامو ونقول ليه يا حاج انت دا عشاك وإلّا عشاء
الفرقة الثالثة مشاه.
• عمك كأنو ما سمعنا بواصل في كلامه ويقول لينا )السمك( في الليل احسن يكون مشوي.
• نقول ليه سمك مع اللبن؟.
• يقول لينا عادي ..ما بعمل اي حاجة ..ما تسمعوا لي نظريات بي ان سبورت دي.
• ديل بنظروا ساكت – وهو قاصد )الدكاترة( ما بي ان سبورت.
• نقول ليه يا عمك طيب لو عشاك ما )خفيف( ح تعمل شنو اكتر من كدا؟.
• يقول لينا لو عشاي ما خفيف ..الحاجات دي كلها بضربها ليك مع )المغرب(
وبدخل على العشاء بعد )الجولة( دي.
• قلنا ليه والله )جولتك( دي – لو ربطوا ليك تسع بقرات في حشوكم الكبير
دا )لبن( ساكت ما بكفوك.
• في ناس كدا.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• نحن مالنا ومالهم – نرجع للهلالابي الشفت ..الكلمتكم عنو في بداية العمود.
• الواحد بقى إلّا يذكركم.
• هلالابي شفت!!.
• زول صعب – عندو )29( نضارة للقراية.
• الصحف الرياضية بقراها بي نضارة ..والصحف السياسية بقراها بي نضارة
)عدساتها( غلاد ..عشان ناس الصحف السياسية ما بقولوا الحقيقة.
• هلالابي شفت ..لمن يقيف ليه في مباراة ..من اول خمس دقائق بعرف ليك
الحاصل – بقول ليك : الليلة الهلال غالب سبعة.
• بالمناسبة يا الكاردينال نحن عاوزين نرجع للزمن داك.
• الزمن البغلب فيه الهلال سبعة.
• نلعب مع الخرطوم الوطني – سبعة.
• مع مريخ الفاشر – سبعة.
• مع النسور – سبعة.
• مع المريخ العاصمي – سبعة.
• بس المريخاب ما بنتظروها تصل سبعة ..من الرابع بيشيلوا )الكورة( ويتخارجوا.
• ويطلع ليك زيكو بعد )14( سنة يقول ليك انا ما شلت الكورة.
• شالتها )المحلية( يا ربي؟.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• الهلالابي الشفت قال لي رأيك شنو نطبق في المريخاب ديل نظرية عمرهم ما
سمعوا بيها؟.
• ولا في الافلام الهندية.
• انا بتعجبني النظريات في المريخاب ..قلت ليه طبق فيهم )النظرية(..ما في
احلى من كونك تطبق )النظرية( في المريخاب.
• الهلالابي قال انت ناس الاتحاد العام ديل موش وضعوا مباراة القمة يوم
20 نوفمبر الجاري.
• قلت ليه بلحيل ..لكن إلّا يلعبها ليهم اسامة عطا المنان.
• الهلالابي قال لي انا عندي فكرة..عندي نظرية.
• قلت ليه نظريتك شنو؟.
• قال لي الهلالاب ديل يلبدوا على كدا ..ويظهروا بعد )10( دقائق من بداية
المباراة ويلعبوا امام المريخ بـ )الاجانب( الجدد ديل يوم 20 نوفمبر.
• عاوزين نشوفهم ..عاوزين نختبرهم.
• عشان نشوف النافع من الما نافع.
• بدل ما نعمل لينا اختبارات ..وفحوصات طبية ..نجرب الجماعة ديل قدام عيونا.
• وندخل ليك معاهم ناس عمار الدمازين وولاءالدين وابوعاقلة وصهيب الثعلب
وبشه الصغير.
• نلعب ليك بيهم.
• قلت ليه لكن الجماعة ديل ما بحق ليهم يشاركوا الآن.
• الهلالابي قال لي اول ناس سمير فضل والفاتح خضر بحق ليهم يشاركوا
..تاريهم بشاركوا مع المريخ.
• ولا في زول قال ليهم حاجة.
• قلت ليه كدا المباراة بتكون ما قانونية.
• قال لي نحن ذاتها قاصدين تكون ما قانونية ..عشان نديهم درس…ونتتهي
ليهم من البطولة دي.
• القانوني شنو في البلد دي؟.
• واهم من الحاجات دي كلها ..نضرب ليك المريخ سبعة ..نقول لي ناس
ولاءالدين وابوعاقلة وكنيدي وتيفون ادو وكرستيان اتفسحو في الجماعة ديل.
• نضرب ليك المريخ ونضرب ليك الاتحاد العام.
• سبعة ما بتمقرهم مننا.
• قلت ليه لكن المريخاب ح يقدموا )شكوي(.
• الهلالابي الشفت قال لي مالو ما عندنا مشكلة؟ ..خلوهم يشتكوا ..على
الاقل المرة دي يكون قدموا ليهم شكوي صحيحة.
• قلت ليه لكن ناس امير كمال ورمضان عجب لو شافوا ناس ولاءالدين واحمد
ميسي وايفون ادو بيثبتو؟.
• الهلالابي قال لي نحن ذاتو عاوزين نشوف )جريتهم( دي ..عشان )الجرية(
بتاعة زيكو نكروها.
• عليكم الله اتخيلوا الموقف دا – يمين ناس بكري المدينة )خلعة( ساكت يروحو فيها.
• بس الكلام دا يا جماعة ما يطلع برة.
• خلوه )سر(.
• والله نحن كان ممكن نطبق )النظرية( دي في المريخ ..لكن عشان ناس
الاتحاد العام ما يلقوا ليهم )مخرج( ويقولوا الهلال رجع تاني ..ما ح نعمل
كدا.
• كما ان مشاركة الهلال في المباراة تعني ان يمنح المريخ البطولة.
• ودي حاجة ولا يحلموا بيها.
• ولا يعشموا.
• اقول ليكم شيء.
• جيبوا ليكم اي )11( ..تموهم بالمحترفين الاجانب ..عشان نشوف مقدراتهم
..ولبسوهم شعار اخر.
• شعار مختلف.
• هلالنا ما بلعب في الفوضى دي.
• لبسوهم فنائل )سوداء( مثلا …حدادا على ضياع القانون ..واضربوا لي
المريخ دا سبعة.
• يمين ولاءالدين موسي دا لو لعبو معاهو اي عشرة بغلب ليك المريخ سبعة.
• ولا بتلفت.
• فرتكوهم.
• بس زي ما قلت ليكم ..خايف الموضوع دا يبقى )مخرج( للاتحاد.
• الاتحاد الآن في ورطة وما عارف يعمل شنو؟.
• معتصم طلعوا اشاعة قالوا استقال.
• ومجدي في البرلمان.
• واسامة عطا المنان قال مسافر برة البلد.
• ولجنة الاستئنافات ما عارفة تعمل شنو؟.
• والمفوضية …هي ذاتها طلعت بتاعة )لقيمات(.
• الظاهر )اللقيمات( دي وصلت اي حتة.
• الاستئنافات.
• والمفوضية.
• والوزارة.
• والله يستر كدا من البرلمان.
• اللقيمات دي اتمددت.
• وصلت بعيد.
• نحن اصلو ما بنلعب.
• ومجلس الهلال مفروض منذ الآن يطلع بيان ويؤكد فيه عدم مشاركته في
الموسم القادم ان لم تحل الازمة بصورة عادلة.
• الهلال لن يشارك في الموسم القادم.
• الهلال لن يشارك في ظل هذه الاوضاع.
• على مجلس الهلال ان يؤكد انسحابه من الموسم القادم.
• الجماعة ديل شايفين )تسجيلاتنا( دي …وناموا قفا.
• كلموهم.
• قولوا للاتحاد.
• وقولوا للسلطة ..هذا الموسم اذا لم تحسم قضاياه فان الهلال لن يشارك في
الموسم القادم.
• الهلال ضحي بموسمه هذا وهو متصدر ..عاوزنو يشارك ليكم في الموسم القادم.
• عشان تاني في نهاية الموسم القادم تطلع لينا لجنة استئنافات وتمنح
المريخ )5( نقاط اضافية.
• الهلال لن يشارك في الموسم القادم.
• هذا امر يجب ان يصل للسلطة والاتحاد.
• بالطريقة دي ما عاوزين )كورة(.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• ………….
و
• بعد ناس سمير فضل والفاتح خضر ظهروا لينا ناس سبدرات و ازهري وداعة الله.
• الحكاية خربانة ..خربانة.
• ديل قراراتهم حسب لونيتهم.
• ما في حاجة اسمها قانون.
• ما في عدل.
• ديل مع )المريخ(…في الحق والباطل.
• في ظل تمدد المريخاب في هذه اللجان يبقى مشاركة الهلال في بطولات
الاتحاد العام نوع من السخف.
• الموضوع دا لازم يتحسم.
• منو البكون هذه اللجان.
• كفاية علينا في الوزير وكيل الوزارة المريخي الذي لا يقل تعصبا للمريخ
من ود الجنيد مشجع المريخ الشهير.
• ود الجنيد بعملها في المدرجات.
• لكن ديل بعملوها في المكاتب.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• ……….
• السيدة )ل( – الايامات دي )الضل( عمل ليه ضنيب قش.
• وقرّط على كدا.

حمزه عوض


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى