تابعونا عبر فيس بوك

قوقل ‏+‏ ‏
Use the English Language

في السلك .. بابكر سلك .. طاير ليكم مطار ساي

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

17112015

مُساهمة 

في السلك .. بابكر سلك .. طاير ليكم مطار ساي




في السلك
بابكر سلك
طاير ليكم مطار ساي

*اول امس شفنا قافلة الاهله المتوجهه الي المطار
*الناس ديل طاير ليهم مطار ساي
*دفار وتلاته حافلات
*الدفار فيهو ساوند وعلمين وتلاته انفار
*التلاته حافلات فيهن طلطاشر نفر
*البشوفهم ماشين المطار يقول جابوا كاس
*ومشوا المطار
*جابوا الكاردينال ورجعوا
*نعتبروا ليكم جويه
*عشان ما تصوروا القصه فيديو
*وبعد ستين سنه
*تقولوا الهلال جاب كاس من الكنغو تاني وده فيديو للاستقبال
*بعد ستين سنه الناس بصدقوا
*لانو كردنه جا بالكسكته
*-والكسكته طبعا بتاعت الكنغو
*كاتومبي يا عمك
*الناس لما تمشي المطار بتجيب ليها عمار
*مابتمشي المطار سااااااكت
*ايها الناس
*الحقيقه انو الهلال لي الليله ماقدم خطاب انسحاب
*الزول البطلق وقنعان برسل القسيمه
*لكن البعمل حردان عندو خط رجعه
*ماتفلقونا
*قدموا الخطاب لو كنتوا اصحاب مبادئ زي ما بتقولوا
*مبادئ بالبا ؟؟؟؟
*قدموا الخطاب واقفلوا الباب
*ايها الناس
*تسجيلات الاجانب عندنا يجب ان تكون حسب توجيهات غرزه
*بدون تدخل الجماعه البجيبوا وكيل لاعبين قاطعنوا من راسهم الشين ده
*عشان اللاعب يقسم ليهو ويقسم ليهم الوكيل
*وعلي ونسي ان يؤدي بمنهجيه كما وعدنا
*وان يترك الخبز لخبازو
*مع توفير الدقيق الجيد والفرن الآلي والجنريتر عشان الكهربا مامضمونه
*مايعتمد علي كهربة الحكومه
*كهربة الحكومه بتقطع فجأه
*ولو قطعت فجأه عجينا ببوظ يا ونسي
*الخميره بتفورو
*والغريبه لو بقت خميرة عكننه
*ده من ناحيه
*ومن ناحيه تانيه
* يخبز ونسي جلب المال وتفعيل الاستثمار
*لانو ده الخبز الدايرنو منو
*ايها الناس
*جاهزين موية ونور
*العندو انسحاب يجيب جوابو وادونا كاسنا
*والماعندو انسحاب يجينا في الملعب وبرضو ادونا كاسنا
*ايها الناس
*بالصدفه حضرت حلقه علي اذاعة هلا الجميله للرائع حسن فاروق
*كان ضيفو الرائع كبوتش
*الموضوع كان الفساد والاتحاد وكلام من النوع ده
*اتكلمو واتكلمو واتكلمو
*كلامهم كلو داير في انو خمسه وعشرين سنه فلان وكيل وزراة ولائيه
*وسته وعشرين سنه علان وكيل وزراة اتحاديه
*والمؤتمر الوطني بجيب قيادات للرياضه ما عندها علاقه بالرياضه
*علي الرغم من انو في عضوية المؤتمر الوطني في رياضيين اصيلين
*وانو في فساد شديد
*والمنتخب اتغلب خمس كور ورا بعض
*الكلام ده كلو صاح
*لكن ماعرفتوهوا يا حسن وكبوتش الا بعد زوغان الهلال ؟؟؟؟
*يادوبكم عرفتو انو المرضي قاعد سته وعشرين سنه ومولانا قاعد خمسه وعشرين سنه ؟؟؟
*يادوبكم لاحظتو للفساد في اروقة الاتحاد عشان كده جيتوا تورونا ليهو ؟؟؟؟
*كنتوا وين يا حبايب لما الحكم اليوغندي شال التقرير الفيهو انذار عمر بخيت وسافر بيهو ؟؟
*ما سمعتوا بالاتحاد المابعرف يقرا برتغالي ؟؟؟؟
*الحيمودي لما اتفنقل براهو في واطات الله دي ما سمعتوا بيهو ؟؟؟
*يا دوبك المتخب بقي يخسر ويخرج من كل المنافسات ؟؟؟
*قصة سيدي بيه هل اتسجل كوطني بعد استخراج الجنسيه ام قبل التفكير في الرقم الوطني زاتو ؟؟؟؟
*والاعارات المكندشه ده اسم فيلم يا ود فاروق ؟؟؟
*وهل فعلا لاعب هلال كادوقلي من ابيي ؟؟؟؟
*الحته دي ماشايفكم جبتوا سيرتها
*اتنين واطناشر دي طبعا كنتوا صغار ما سمعتوا بيها
*يا حسن يا اخوي
*ويا كبوتش يا اخوي
*قولة الحق ممكن يراد بها حق
*ويمكن يراد بها باطل
*لكن من يضع مصلحة الوطن نصب عينيه ويتحدث عن منتخب ومصلحه عامه
*لا ينظر من زاوية الانتماء الضيق ويفصل الاشياء علي تلك النظره
*برنامجك يا حسن فاروق رائع
*وجدير بالمتابعه يوميا
*لكن زاوية نظرك في حلقة امس ضيقت مجالات البرنامج الواسعه الرائعه
*الضيق داير بيهو شنو يا حسن ؟؟؟
*كبوتش كان اضافه للبرنامج
*ولكن كبوتش برضك نظر من زاوية حسن فاروق
*برغم انو هبش حتات قوميه بشجاعه
*ياخذ مجراهو يا حسن فاروق
*القانون اذا اخد مجراهو الامور بتعود لي نصابها
*واحترام القانون وقراراته احترام للكيانات والآدميه
*اتكلم لينا عن عنتريات رفض الهلال للقرارات الصادره من لجنة الاستئنافات العليا بموجب سلطاتها التي منحها لها القانون
*اتلكم لينا عن الخطاب الكاردينالي الذي يخاطب به الاتحاد المفترض ان يخاطبه باحترام
*اتكلم لينا عن منصب رئيس الهلال ومكانته ومكانة الكيانات عنده
*واستعن بطيب الذكر الطيب عبدالله وطه علي البشير وعبدالمجيد منصور وغيرهم من اصحاب الخطاب الذي يشبه اهل الرياضه والمواقف التي تجبر الناس علي احترامهم
*واعجبني يا حسن آخر مشارك في الحلقه
*الزول ما دسه حاجه
*لكن بصراحه برنامج رائع مع امنياتي لك بالتوفيق وتحياتي للرائع كبوتش
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*الدولار تعبنا وعشان ننوم ما بخلينا
*نخاف ندقس ولما نصحي نلقاهو ارتفع لينا
*نساهر نحرسو يا والينا
*برضك ما بستقر لينا
*والسهر الكتير بودينا
*كلمو الدولا يا والينا
*يا ينزل لينا يا نطلع ليهو يا والينا
*نطلع ليهو من البلد الطيبه الحنينه
*البقت ما بتتقعد لينا
سلك كهربا
ننساك كيف والكلب واقف جمب برج البركه يعمل اصابعينو كده ….مسترزق في امان الله والبلد ضايعه
والي لقاء
سلك

حمزه عوض


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى