السبت 28 مايو 2022 - 19:28
عابرة 46
:love_letter:مالا طولت الرسايل:love_letter:
كلمات / محمد احمد الحبيب
مابيحول بيناتا حايل
وإنتي عارفك مابتجافي
مالا طولت الرسايل
قولي لي إنشاء الله عافي
عابرة كل الحولي بارد
إلا بيك إحساسي دافئ
وعقلي دايما مني شارد
يحنو لي تلك المرافئ
كان زمن أحوالو هادي
تاني هسع زيو مافي
كل شئ بقي ما أعتيادي
إنتي ليك الحق تخافي
أمست أيامنا البعيدة
زكريات في قلوبنا صافي
كلما أسرح وأعيدا
تبقي ماروق للقوافي
أمنيات في الماضي رايحة
يا حليل زمنا الخرافي
في صور جوايا عايشة
ما بيشوفن زول خلافي
فوق بعير حظي المشاتر
لاني صاحي ولاني غافي
مابيخاف دايما مكاجر
قدر ما أضرب قرآفي
عابرة بالأحزان مشبع
وقلبي زي القشة طافي
والزمان لو كان بيرجع
كنتا بتحاشي إنجرافي
والدروب الكنا فيها
وليها كان كل إنصرافي
لايزال إحساسي بيها
في إزدياد يا عابرة ضافي
ولما وجهك مني يطفش
ويدوي في الأعماق هتافي
المصيبة بقيت أفتش
في الوجوه وأنا عارفو مافي
لو بقيت يا عابرة صحرا
وسئمت الأشجار جفافي
سر هواك يكسيني خضرا
وما بيطول في الحر وقافي
لو بقيت بحرن ممدد
إنتي حورية ضفافي
في سواحلو القمره تشهد
في الأرض قمرن إضافي
الحزن خات فوقي سرجو
ومافي زول بيقول عوافي
إلا من أعماقي برجو
الكريم يملاكي عافي