قوقل ‏+‏ ‏
Use the English Language

في السلك .. بابكر سلك .. الضب حساي

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

01122015

مُساهمة 

في السلك .. بابكر سلك .. الضب حساي





‏في السلك
بابكر سلك
الضب حساي

< الرائع محمد عبد الماجد كتب عن المشكله
< قال المشكله الحقيقيه في اتحادنا العام دا
< محمد نساي والعقل حساي
< لانو المشكلة الحقيقيه بدت من اتحادنا العام داااااااك
< في مباراة الهلال ضد اهلي مدني
< المباراه المعروفه بمباراة البمبان.. بتاعت صلاح الامين رحمه الله
< من اليوم داك سموهوا صلاح بمبان
< نسيت الكورة ديك يا محمد عبد الماجد ولا عامل نساي؟
< لو انت نسيت انا ما نسيت
< ولو انت نساي التاريخ ما حساي
< الكوره ديك انتهت بفوز الاهلي مدني على الهلال بهدف صلاح الامين
< وقبل نهايتها بدقائق معدوده قامت جماهير الهلال بنفس العمل القامت بيهو يوم اتغلبوا من شندي في استاد الخرطوم
< ولان الوكت داك ما كان في انعاش
< رجل الخط ما ودوهوا الانعاش
< ولان التحكيم وقتها كان لا يخطئ كثيراً
< وبالتالي لا يظلم كثيراً
< انهي الحكم المباراه نتيجة ذلك الشغب قبل زمنها بدقيقه او اتنين
< الوكت داك الاتحاد ما كان فيهو معتصم جعفر ولا اسامه عطا المنان ولا لجنة الاستئنافات العليا
< كان في ناس تاني على مقاعد قيادة الاتحاد
< الناس التانيين ديل
< بي ليلهم داك
< اعتمدوا نتيجة المباراه فوز اهلي مدني واحد صفر
< وادوا النقاط في نفس الليل ومن نفس الاجتماع للهلال
< غريبه دي موش؟؟؟
< زول يغلب وتعتمد اللجنه الاداريه انو غالب
< وتدي النقاط للمهزوم صاحب الجمهور البوظ الكوره
< اوريكم كيف
< في الاجتماع داك قالت اللجنه
< نعتمد نتيجة المباراه كما وردت بتقرير الحكم وهي فوز الاهلي مدني علي الهلال بهدف
< وفي نفس الاجتماع بنفس الليل واصلوا قراراتهم
< ونقرر صحة شكوى الهلال واعتبار الاهلي مهزوما بهدفين للا شيء
< القرار ده كان في زمن الاتحاد داك ما كان في زمن الاتحاد دا يا محمد عبد الماجد
< ما تكون حساي
< ما تكون ضب في الشق
< ما تكون نساي
< الحكايه دي ما كريمه
< عرفت يا حماده المشكله الحقيقيه في الاتحادات من متين ولي صالح مين؟
< المهم
< اكتب قبل قفل السيستم
< واتمني ألا يكون باب السيستم قد اغلق في وشنا
< ففلس لجنة التسيير والظرف الضيق الاستلموا فيهو مقاليد الامور
< خلاهم مزنوقين زنقة الكلب في السوق
< اسي الجاب الكلب هنا شنو؟؟
< الكلب محلو هناك في لن ننساك
< المهم بالرغم من الفلس لم تتعامل اللجنه بلهفه تفقدها الحكمه عند الاحلال والابدال
< ودي محمده
< لكن برضك تعاملوا ببرود شديد مع قصة الاجانب دي
< لكن بالطبع نتمنى موسماً رائعاً فيه مريخ مميز كمريخ غرزه الذي ادهش الاعداء قبل ان يدهشنا
< وبمناسبة غرزه دي
< بالحكمه كان ممكن غرزه يجدد وتتحدد حدودو
< ويتجدد ابداعو
< لكن الاصرار من جانب المجلس على التأثر بالمديده الحرقتني
< وحماقة الخواجه الشديده
< ضيعوا علينا مدرب ممتاز
< وضيعوا علي غرزه فريق كان يمكن ان يحقق به نجاحاً افريقياً جديداً يضاف الى سيرته الشخصية
< واسي ما راح شيء
< لا الموسم بدأ
< ولا الخواجه اتفق مع غيرنا ومضى
< المهم
< كلما نقول شكرنا جمال على كل ما قدمه للمريخ
< ينط لينا جيمي بجديد يستحق عليه الشكر
< فالالتزام بسداد صفقة الوك هو هديه جديده من الوالي
< تحتاج شكر جديد
< تاني يا جيمي بنلم ليك الحاجات دي كلها
< وآخر السنه نشكرك شكره واااااحده عليها كلها
< فترنا من الشكر
< حالتنا بنشكر مجاني ساااااي
< يعني لو كلو شكرة دفعنا عليها دمغه
< كان فلسنا يا والي
< شكراً مجدداً
< المهم
< مزرعة طارق المعتصم نتوقع لها نجاحات كبيره
< البذور جيده
< والشتول محسنه ومحصنه وملقحه
< والارض خصبه
< والجنايني مؤهل
< والمشرف طموح ولا يمل العمل
< يبقى يا ونسي
< لو استمريت سنه سنتين
< جيب لواريك عشان تشحن اجود محصول والذ ثمار في تاريخ المريخ
< ونحن لن ننسى ان جيل مانديلا معظمه كان من المزرعه
< شكراً مقدماً طارق المعتصم واركان حربه
< شكراً عصام طلب وخالد الشفت
< شكراً قدامى اللاعبين ناس سانتو ومجدي وعادل امين وغيرهم
< ابقوا عشره على المزرعه
< اهلوا الاود كويس
< نرفع منهم من يستحق
< ونسوق من لا نحتاجه
< بجيبوا قروش تمام
< بلد شوال البصل فيها بمليون
< لاعبها ما بقل عن مليار
< بلد غازها وألغازها زي بعض
< اشبالها وكت تنجض بتمسك السوق
< بلد تغيرت ثقافتها وهويتها الغذائيه الى ساندوتش طعميه
< اكيد العودة للجذور واعادة ثقافة الكسره والشرموط والتقليه واتفضل وحرم تاكل هي الهدف
< فالاقتصاد يمكن ان يشكل هوية العباد والعادات والصفات
< لما كان اقتصادنا في السما
< كانت وشوشنا في السما
< كنا نشتهر بالكرم وحرم ونضبح ليك
< نسالم الضيف في ايديو وجارنوا لي جوه
< ولما اقتصادنا بقي يشبه الطعميه تغيرت صفاتنا
< على الأقل بقينا نسالم الضيف في ايدو ومارقنو لي بره ونتاكي الباب
< عيب الزاد ولا عيب سيدو
< لكن عدم الزاد بخليك تسوق ضيفك لي بره من ايدو
< وتمرق بيهو بره البيت
< شكراً طارق ورفاقه
< أيها الناس
< ان تنصروا الله ينصركم
< عارفين؟؟؟
< طيب راجيين شنو ؟؟؟ انصروهو
< عشان نعود لي اتفضل وحرم
< عشان ثقافة الكسرة والتقليه تعود
< عشان تعود
< الدود في العود ابوك موجود؟
< الخروف ضبح مسعود!!
< ومسعود معلق من كريعاتو في الصوره والعراقي مدلدل لي كتفو
< والخروف شايل السكين
< كوراع مسعود قبال السلخ كانن قادات عربي
< ما عارف بعد السلخ كيف!!!
< أها نجي لي شمارات والي الخرتوم
< كان شفت يا والينا
< اسي الكويس فينا
< بجيب اللبن لي اولادو بالرطل او بالكرستاله الصغيره
< تعرف زمان يا والينا
< من شدة العز الفينا
< لما كنا صغار اللبن بالرطل ما كانو بجيبوهو لينا
< كانوا بجيبوا لينا اللبن بالبقره يا والينا
< بي عجلها يجيبوها ويربطوها لينا
< وكان ما أخاف الكضب يا والينا
< بعد يجيبوا اللبن بالبقره لينا
< كنا بنجدع الفاضي يا والينا
< ديسبوسبل
سلك كهربا
ننساك كيف والكلب نسى صوت البقره.. زئير يا ربي.. صهيل يا ربي... يا ربي نعيق.. يا ربي خوار.. ولا يمكن بعر !!!!
وإلى لقاء.
سلك
الحوار الوطني.. التعايش السلمي والمأذون آخر من يعلمتقييم المستخدم: / 0
التفاصيل
نشر بتاريخ الإثنين, 30 تشرين2/نوفمبر 2015 15:19
< كردنه واعلام كردنه بضحكونا لمن نتفنقل
< بقينا نخاف يضحكونا نقوم نتفنقل نورم صلعتنا دي
< ياخ الناس ديل لليوم بتكلموا عن قضيه عادله للهلال
< وبتكلموا عن سعيهم لتثبيت ان الحاكميه للقانون
< وهم يساندون الانسحاب مخالفة للقانون
< يخالفون القانون لتثبيت الحاكميه للقانون
< والله دي ود ابرق ما يفهمها
< حيرتونا
< وفطومه اختي قالت قربت تنسحب
< دايره تخلي الكتابه
< الكتابه ما بتتخلي يا فطومه يا اختي
< اكتبي كلو يوم
< اكتبي اي شيء
< ان شاء الله تكتبي الهلال يخالف القانون وينسحب لتثبيت الحاكميه للقانون
< اكتبي يا اختي
< اكتبي قولي زعيم امة الهلال افصح العرب
< قولي هو الكلام بقروش
< اكتبي
< اكتبي عن الماده خمسه وتمنين وسبعه وتمنين
< سته وتمنين زاتها ما تخليها كيتا عليها كدي
< اكتبي
< اكتبي عن »الفقره« تلاته وتمنين القالها كردنه يوم مهرجان العداله
< ماده فيها تلاته وتمنين فقره؟؟؟
< سلسله فقريه يا ربي؟؟؟
< كدي النسألك
< يوم مهرجان العداله جبتوا تاتشرات ولا احتفلتوا ساااااي؟؟؟
< قال عداله قال
< ايها الناس
< ما خرجت به الجمعيه العموميه للاتحاد من قرارات ملزم
< وبرغم انه استثنى البعض ورفع العقوبات عنهم وحماهم من عقوبات تودي التوج
< الا ان القرار كان مُشبعاً »بضم الميم وفتح الشين« بروح القانون ومُشْبِعاً »بسكون الشين وكسر الباء« للمصلحه العامه
< لذا نجد انه
< محقق للوجدان السليم ومرضٍ لقواعد العداله
< لذا لم نتمسك ولم تتمسك الجمعيه العموميه بالتطبيق الحرفي للقانون
< فاستعملت الجمعيه سلطاتها التي منحها لها القانون لتحقق روح القانون وغاية المصلحه العامه
< افرض اتبعنا القانون ونزلنا الهلال
< جماهير الهلال ذنبها شنو تتكركر نص النهار جماعات وفرادي تمشي على الليق ؟؟؟
< وفيهم ناس فوق للسبعين
< الشمس دي ما بتحملوها
< وفيهم ناس سكانين بعيد وشغالين بره الولايه
< ديل لما يجوا بلقوا ابو الهل درن مع الصبابي الشمس بره
< لذا كان القرار عاقلا
< اكتبي يا فطومه
< اكتبي ان مخالفة القانون ممكن يكون فيها سعي لارساء قواعد حاكمية القانون
< اكتبي
< المهم
< مجلس التسيير برغم المال القليل
< الا ان الفكر يبدو كبيراً
< الاكتفاء باجنبي بعد دراسة القصه والامكانيات جيداً شيء جميل
< ولكن هل تراوري بدينا؟
< ادي منو قبل كده؟
< حقو الاعتماد على هذا التراوري ما يكون كبير
< الزول ده بنط
< وبغيب
< وبتمرد
< بكري مكسب زي بكري
< وقالوا فقري كمان
< وألوك ود ابيي وود قلبها مكسب كبير
< بس الشطب والاستغناء حقو يكون عن المجرب وما قدر يقدم شيء
< يجب الا يصل المقص للناس المالقوا فرصة اثبات الذات
< ايها الناس
< الخطاب اليومين دي عن الحوار الوطني والتعايش السلمي
< حقيقة فترنا من الخلافات والاختلافات
< فترنا من المداولات والمناقشات
< فترنا من القعاد في الدوحه وفي اديس وفي كينيا وفي نيجيريا
< فترنا من اتفاق يقود الطرف الآخر للقصر الجمهوري الى حين
< ثم يخرج ليعلن خلافاً بعد الاتفاق، وبرضك الى حين
< فنسمع باتفاق مع غير الطرف الآخر يقود ذلك الغير للقصر
< وهكذا
< دايرين اتفاق واحد
< دخول القصر ما شرط فيهو بس شعارو القصر للجميع
< دايرين اتفاق اطرافو يتكلموا عن اهلنا في الجبال وفي التلال وفي الصحارى
< ماداير تقسيم سلطه وثروه
< دايرين العمل على زيادة الثروه مع الايمان بان السلطه تكليف وليست تشريفاً
< الدايرنو كتير
< دايرين اعتراف بالآخر واحترام للكل
< دايرين اي سونكي يبقى مسطرينه
< دايرين المال العام يبقى في خزينه امينه
< دايرين مواصلات تتوفر وحافلات جديده وسنينه
< على جنيه تودينا حتى لو تلاته صباحا جينا
< ودايرين غاز يكفينا
< دايرين اي تاتشر تبقى حاصدة قمح لينا
< دايرين اي دبابه تقيف في الحدود تحمينا
< ما دايرين مدفع حقنا يترفع علينا
< وما دايرين صرف كتير اربعين موتر وسارينا
< دايرين العالم يشهد لينا
< ايها الناس
< التعايش السلمي ما جديد علينا
< في ام درمان تجسيد للمعنى بدون شعارات بدون بهارات بدون عناء
< في ام درمان ما بنلقى قبليه
< لا فيها حلة جعليه ولا فريق شايقيه
< في ام درمان النصارى ونحنا جيران
< ممكن وحصلت
< جارك النصراني يعزمك فطور رمضان
< يحترمك ويحترم دينك
< ونحترمو ونحترم دينو
< وممكن وحصلت
< تلقانا في كل مناسباتهم اهل وحبان
< في أم درمان كان النفاج
< نفاج العفه
< نفاج اخو البنات
< نفاج التواصل بدون نت
< تواصل النفاج شغال اربعه وعشرين ساعه
< لا شبكه ضعفت
< ولا رصيدك كمل
< ولا هذا المشترك لا يريدك حاليا
< المشترك يريدك دوما ويحبك من قلبو
< هكذا كنا
< وكانت الطاقه
< طاقة التكافل والتراحم وتبادل الثروات من مفروك وطبيخ
< ومن ام درمان ظهرت لغة الوسط اللمتنا وربطتنا وجعلتنا وحده واحده لا قبليه ولا جهويه ولا حزبيه ولا حاجات غير مرئيه
< يبقى قصة نتعايش سلمياً في محبه ممكنه وحصلت وبتحصل
< كنا كده.. وكدا.. وكده.. وكدا
< يلا خلوها جد تحصل في كل السودان
< زمان واسي الناس فكرت تمرق تخلي البلد
< اسي البلد فكرت تمرق تخلي الناس
< من عمايلهم
< يا ريت المرق من البلد وخلاها لينا يكون آخر المارقين وان شاء الله ما يمرق الباقي
< ايها الناس
< دايما نسأل ...البلد دي عملت لينا شنو؟؟؟ قدمت لينا شنو ؟؟؟ موديانا وين؟؟؟
< لكن حقو نسأل ...البلد دي عملنا ليها شنو؟؟؟ قدمنا ليها شنو؟؟؟؟ مودينها وين؟؟؟؟
< أيها الناس
< ان تنصروا الله ينصركم
< أها
< نجي لي شمارات والي الخرتوم
< كان شفت يا والينا
< الشجر القصوهو لينا
< لسه في شارع العرضه مجدع ولافي زول شغال بينا
< وكان شفت يا والينا
< المصرف المحفور لينا
< برضك في شارع العرضه يا والينا
< لي اسي مقفول وعفن ومليان باعوض يعضينا
< وناس المخالفات شايلين اوامر قبض علينا
< وطايحين فينا
< حقو لو ما بتخجلوا مننا وما بتخجلوا لينا
< تخافوا الله فينا وتحنوا مرة علينا
سلك كهربا
ننساك كيف والكلب يضحك.. قال زمنكم ده حيرنا.. المأذون آخر من يعلم !!!!
والى لقاء
سلك

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى