قوقل ‏+‏ ‏
Use the English Language

دق الدلجة .. محمد عبد الماجد .. السيستم قفل لكن ناس اسامة عطا المنان بي )صحن لقيمات( ممكن يفتحوه

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

دق الدلجة .. محمد عبد الماجد .. السيستم قفل لكن ناس اسامة عطا المنان بي )صحن لقيمات( ممكن يفتحوه

مُساهمة من طرف Admin في الثلاثاء 8 ديسمبر 2015 - 15:29

دق الدلجة
محمد عبد الماجد
السيستم قفل لكن ناس اسامة عطا المنان بي )صحن لقيمات( ممكن يفتحوه

• عليكم الله والدنيا صباح كدا ما تقولوا لي )السيستم( قفل.
• انتوا بتصدقوا الكلام دا.
• سيستم شنو؟.
• هو اتحادنا العام دا لو شغال بي سيستم المواضيع بتصل للمستوى دا.
• ديل شغالين من رأسهم.
• شغالين برة رأسهم.
• يا ريت لو بشتغلوا من رأسهم.
• عشان كدا ما عاوز اسمع منكم كلمة )السيستم( دا.
• السيستم انتوا شغالين بيه.
• بس فالحين يقولوا ليك السيستم قفل.
• البصل عندو )سيستم(؟.
• الغاز عندو )سيستم(.
• تمسكوا في الشيء من )عوج(.
• ولا عندكم ليه )رقبة(.
• ناس الامين ود طين البحر ..قالوا ليك اتحركوا من عصر بدري على الخرطوم.
• راكبين ليهم )لوري( من سنة 1911 ما كبوا ليه )زيت(.
• قالوا ماشيين على الخرطوم يخطبوا بنت الطيب المحلايبي.
• اللوري دخل بيهم الخرطوم مع المغربية.
• خليفة ود الفاتح المروحة.. قال ليهم بدل ما نمشي بي حالتنا دي ..اغشوا
بينا )ماسورة( نطشف فيها وندخل عليهم.
• واحد فيهم الشقفة كاتلاهو ..قال ليه يا زول انت جنيت )نشطف( في البرد
دا – الموضوع موضوع )خطوبة( ساكت ..الموضوع ما )عقد(.
• بعدين الطيب المحلايبي ذاتو ما عندو )بنت( بتستحق الزول يتشطف ليها.
• بنتو الماشين عليها دي عشان نخطبها قالوا ليك يوم داك طلعت )تكشح( ليها
موية في الشارع …شفع الحلة كلهم قاموا جاريين.
• بدون ما يشعروا.
• عمكم مصطفى ود المحريب …قال ليهم ودونا اي جامع نشطف فيها ..الكلام
البتقولوا فيه دا غلط …الموضوع يمكن يجيب ليه )عقد(…عاوزننا نعقد بي
حالتنا دي..احسن نمشي ليهم جاهزين.
• الزمن دا الناس بقوا شيالين حال ..وما عاوزين نتلوم لينا مع زول
..ونمشي بي خلقنا دي.
• السريرة الما عندها سنون ..قالت ليهم والله لو نحن عارفين الموضوع بجيب
ليه )شطيف( من الحلة ما كنا بنطلع معاكم.
• الالتهابات حايمة ونزلة الخرطوم 45 يوم ما بتروح ..عاوزننا نتشطف في )البرد( دا.
• عمكم مصطفى ود المحريب حلف عليهم طلاق يتشطفوا.
• مشوا البيت متشطفين…لكن كلهم الظاهر عليهم ضاربهم
)الالتهاب(…حالتهم صعبة ، دخلوا ليك البيت يقحقوا متل طلاب الصف الاول.
• يا زول الناس ديل بتطشفوا من العيد للعيد.
• وعيد الفطر )بيتمروا( ساكت.
• زي العدة.
• دخلوا البيت ..لقوا ليك الطيب المحلايبي )ابو البنت( واقف في الباب
شايل ليه )خرطوش( وبيسقي في )الشجر(.
• ما اشتغل بيهم الشغلة.
• عينو من الواطة ما رفعها.
• قالوا احسن يدخلوا فيه شمال طوالي ..قالوا ليه يا الطيب المحلايبي نحن
طالبين يد بنتك )علوية( لي ولدنا خوجلي ود السمع.
• الطيب المحلايبي عاين ليك في الساعة المعلقة في الصالون وقال ليهم
جايني بعد )السيستم( ما قفل.
• واحد من الجماعة الاتشطفوا قال ليه يا حاج نحن قلنا ليك اعمل لينا شغل
)ولاءالدين(..اعمل لينا شغل )الوك( ساكت.
• سيستم شنو كمان؟.
• الطيب المحلايبي قال ليهم طلبكم دا ممكن يعملوا ليكم اسامة عطا المنان.
• ممكن تجيبوه الصباح بدري ينفذ ليكم رغبتكم ..لكن انا )سيستمي( دا شغال زي الساعة.
• ولا بلعب فيه.
• السريرة الما عندها سنون وقت سمعت كلام الرجال ..مشت على اللوري عشان
تركب وهي بتقول يا خسارة )شطيفنا(.
• اتشطفنا ساكت يا عثمان ود المحريب.
• اتحاسبت بينا في )البرد( دا.
• والله ما عافين ليك من )البردة( الدخلت فينا.
• رجعوا في ليلهم …كباية شاي ما جابوها ليهم.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• اول مرة الزول يجي الخرطوم – بقولوا ليه ما تقطع )الزلط( لو ما عينت
شمالك ويمينك وفوق.
• تقول ليهم اعاين شمال ويمين مفهومة…فوق في شنو كمان؟.
• يقولوا ليك الخرطوم دي فيها )طيارات( شغالة من سنة 1804 ممكن في اي
لحظة تقع في رأسك واحدة.
• عشان كدا عاين في الاتجاهات الثلاثة قبل ما تعدي )الزلط(.
• بمناسبة الكلام دا – طبعا ما عندو علاقة بالكلام العاوز اقوله ليكم.
• زي علاقة الجماعة ديل بالمشروع الحضاري.
• قالوا ليك عطرون لمن كانوا عاوزين يسجلوه في المريخ صنقع في
)المرواح(..وقال ليهم ولاءالدين بيلعب وين؟.
• قالوا ليه ولاءالدين دا بلعب في بني ياس الاماراتي وقع ساكت ..ما بتجيك اي عوجة.
• عطرون قال ليهم : انا بقى كدا بوقع ليكم…لكن انا لو وقعت ليكم ولقيت
ولاءالدين في الخرطوم اليوم التاني برجع كوستي.
• ولا بقعد ليكم.
• ولا بجاملكم.
• دا مستقبل.
• دي حياة زول.
• هسع الكلام دا عندو علاقة بالزول البيقطع شارع الزلط.
• ابدا.
• بمناسبة ازمة الغاز عاوز اقول ليكم شيء.
• الغريبة الشيء العاوز اقولها ليكم ما عندها اي علاقة بي ازمة الغاز.
• قالوا ليك بمناسبة ازمة الغاز دي ..خالد النعسان لمن صحوه عشان يوقع في
كشوفات المريخ قام مهجوم.
• مخلوع عديل كدا.
• قال ليهم في شنو؟.
• صاحبكم قايل نفسو مصحينو للعشاء.
• عشان كدا قام )الخلعة( عاوز تكتلو.
• زولكم )نعسان( انا جبت حاجة من عندي ..اسمو كدا.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• يوم داك نحن كنا قاعدين لينا تحت ضل.
• قبل ما يشمعوا الضل.
• واقفين في امان الله.
• شفنا ليك )ركشة( دخلت ليها )عمود(.
• جرينا على )العمود(…عارفين )الركشة( ما بتجيها اي حاجة.
• بدل ما نرفع الركشة رفعنا العمود.
• بعد شوية انتبهنا انو الشيء البنعمل فيها دي غلط.
• مشينا على الركشة.
• لقينا ليك فيها 21 نفر.
• الغريبة الـ )21( نفر ما في زول فيهم جاتو حاجة.
• والسواق بيشاكل فيهم عاوز حقو.
• قالوا ليه نحن قلنا ليك كبنا في الحلة تكبنا في العمود.
• السواق قال ليهم انتوا قايلين العمود الكبيتكم فيه دا عمود ساهل..دا عمود كهربة.
• الـ )21( نفر قالوا ليه ان بقى كدا والله ما قصرت.
• دا السبب الخلانا نحن قبيل وقت حصل الحادث نخلي الـ )21( نفر ونجري على )العمود(.
• عليك الله هي وينها الكهربة البتدخل فيها )ركشة(.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• وانا بكتب كدا ..بسابق في السيستم.
• خايفو يقفل.
• قالوا لي ناس الهلال جابوا ليهم )قنبلة(.
• قلت ليهم اشتغلوا شغلكم ساكت ..)السيستم( ما تشتغلوا بيه.
• السيستم بتاع الجماعة ديل )صحن لقيمات( بفتحو.
• ناس اسامة عطا المنان ..شن خبرهم بي )السيستم(.
• القنبلة وصلت.
• ادخلكم ليكم في الفقرة القادمة.
• في البرد دا.
• ………………
و
• نيل شندي عملها وسجل فيصل العجب.
• قمة شندي خطيرة …الاهلي شندي كان قد سجل هيثم مصطفى كابتن الهلال
والنيل شندي سجل كابتن المريخ فيصل العجب.
• قمة شندي يبدو على انها قمة حقيقة.
• والتسجيلات شغالة.
• العاوز ينتظركم منو في البرد دا.
• لماذا لا ينسحب الهلال من ممتاز الموسم القادم ويلعب بالرديف.
• الممتاز بالشكل الحالي ناس بشه خسارة فيه.
• ألعبوا بالرديف بس.
• و
• )ونحن عايشين والحمدلله )النفس( بينزل ويطلع إلى الآن..ولا ينقصنا شيء
سوى رؤياكم الغالية(.
• …………….
• السيدة )ل(..الواحد لو عمل ليه )ورشة( يوم الثلاثاء ما بشتغل مع البرد دا.
• وقرّط على كدا.

Admin


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
تستطيع الرد على المواضيع في هذا المنتدى