في السلك .. بابكر سلك .. حصة التصحيح

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

08122015

مُساهمة 

في السلك .. بابكر سلك .. حصة التصحيح




.
في السلك
بابكر سلك
حصة التصحيح

< زمان لما كنا في المدرسه
< بدري الكلام ده
< الوكت داك المدارس كان فيها معلمين مؤهلين وكافين ومواهيهم بتكفيهم
< كان في مدير ووكيل وغفير
< المدارس كان فيها حيشان للتهويه والنشاط الطلابي
< كان في كل مدرسة مسرح وجمعيه ادبيه
< الكلام ده بدري شديد
< وكان في طبشير الحكومه
< الحكومه كانت بتجيب لينا طبشير مجاني
< ابيض وملون
< الملون لي حصص الجغرافيا والعلوم
< وكان في فصول
< والفصول كانت فيها كنبات
< الكنبات بتجيبها الحكومه اقسم بالله
< والكنبات كان بقعد عليها طلاب
< تلاميذ حلالالالالاتهم
< لابسين نضيف وظريف وهم زاتهم نضاااااف
< كان في طابور
< وفي الطابور كان في تفتيش
< تفتيش لنظافة الاظافر وضمان تقليمها
< تفتيش للملابس الداخليه ونصاعها
< وكان في فطور
< والله العظيم كنا بنفطر في المدرسه
< المهم
< كان في اهتمام مشترك من المدرسه والطالب والاسره
< بالذات في اول السنه
< فكنا نهتم بالكراسات
< نجلدها بالجلاد
< والبجلد بالفلوسكاب ده بكون اتجدع عديل
< الاسبوع الاول فجأه كده كانوا بقولوا لينا الحصه تصحيح
< اهتمام وانفعال بتاع اول السنه ساي
< ونصحح
< ونفرح لما يكتبوا لينا جيد
< الغريبه لو الاستاذ كتب لينا ممتاز
< التصحيح بتاع اول السنه ده
< تعالوا نعملوا لي مجلس التسيير
< الناس ديل لسه في أول السنه الدراسيه
< قابلتهم مشكلات عويصه
< انسحاب الهلال وسيادة حكم القانون
< نهاية الموسم واعادة القيد وتسجيل الجدد
< في سيادة حكم القانون نجحوا بدرجة امتياز
< رفضوا مقترح اعادة مباراة اب كسكته
< وجلدوا كراس الماده دي بالفلوسكاب
< في اعادة القيد قفلوا المجموع عديل كده
< اي زول مهم اعادوا قيده
< لا خلو كوفي ولا امير ولا راجي ولا مصعب
< بل اعادوا عنكبه وصعدوا شمس الفلاح
< اما في الابدال فحققوا نجاحاً كبيراً
< عطرون ما ساهل والنعسان طرفو صاحي
< والوك الظاهره يا خالد عز الدين قفلوا بيهو المجموع
< وفي دي جيد جداً
< لو سجلوا طرف شمال كان جابوا امتياز
< بس لما نجي نصحح الابدال
< بنلقاهم دقسوا
< في ناس كده
< قول ناستين
< قعادهم في الكشف برفع الضغط
< قعادهم زي قعاد انابيب الغاز اليومين دي في البيوت
< قاعدين ساااااااااكت
< في دي مافي بد غير نكتب ليهم كرر
< في حتة المدرب غرزه
< كلو زول بي رايو
< شخصياً بكتب ليهم أعد
< لكن النتيجه النهائيه نجاح ساحق يستحقوا عليه التكريم
< صفقوا ليهم
< فانجازات مثل كذلك انجازات في ظروف مثل كذا ظروف
< تعتبر ضرباً من ضروب الخيال
< ونسي وعامر واركان الحرب جميعاً
< شكراً لكم
< المهم
< دور المجلس في هذه المرحله انتهى
< سيتفرغ المجلس للاعداد للمعسكر
< ولكن دور الجماهير بدأ
< فقروبات الشفوت بالفيس والواتس الموسم الماضي كانوا خير داعم للكيان
< والمجموعات والجماعات التشجيعيه كانت في الميعاد
< بل اعطاها غرزه وسام الابداع حد الامتاع
< يبقى ناس زي ديل ما بوصوهم
< فقط نفعل »2870«
< نهتم بالعضويه والاشتراك والتجديد
< نساهم في دفع عجلة التنميه
< نشارك بالفكره والتمره
< ونساهم بالمال في دنيا الجمال
< ايها الناس
< قطاع السنيه قام بواجبو على اكمل وجه
< سجل الموهوبين
< استجلب المدرب المؤهل
< اجرى الاختبارات
< استورد كل المعينات والادوات التي تلزمه
< ليصدر لنا مواهب مؤهله ومدربه ومشربه بحب الكيان
< سلام تعظيم
< يبقى الموسم الجديد
< موسم شديد
< وانا ركبي حديد
< ايها الناس
< ان تنصروا الله ينصركم
< اها
< نجي لي شمارات والي الخرتوم
< اها يا والينا
< بعد اكلنا من زرعا لينا
< وبعد لبسنا من صنع ايدينا
< وحتى الساعه الغيرتوها لينا
< وبعد رفعتوا المعاناه عننا يا والينا
< بعد الخطه الخمسيه العملتوها لينا
< وبعد الخطه العشريه الراجنها سنين وسنينا
< وبعد طلحه وغازي بقوا من اجمل الاسماء لدينا
< ما عندكم شعار جديد لينا ؟؟؟؟؟
سلك كهربا
ننساك كيف والكلب ابن الكلب ساكت ساااااي
وإلى لقاء.
سلك
الصعايدة وصلواتقييم المستخدم: / 0
التفاصيل
نشر بتاريخ الإثنين, 07 كانون1/ديسمبر 2015 15:16
< مسرحية الصعايده وصلوا مسرحية رائعه جداً
< اعطت الفنان احمد بدير الشهره والنجوميه الكبيره
< احمد بدير ابدع فيها
< والكاتب تفنن في اظهار بساطة وسذاجة الصعايده
< الشارع المصري بطبيعته بتتريق علي الصعايده
< برغم انو الصعايده هم اصل المصريين
< لكن كمان فيهم واحدين لديهم غباء حير الحمار زاتو
< فيهم وحدين ابلد من الخروف
< لذا كترت نكات الشارع المصري في الصعايده
< قال ليك صعيدي بواب رسلوا ليهو جواب من الصعيد
< اول زول جا نازل من العماره عمك هريدي قال ليهو
< اقرالي الجواب ده يا بيه
< الراجل فتح الجواب
< من فرجاني لهريدي ولد عمي
< بعد السلام والاحترام
< ابلغك بان أبوك جالو ورم في المخ
< وهو دلوقتي كويس وفي غيبوبه
< هريدي صمت لبرهه
< موسيقى تصويريه حزينه
< المشهد مؤثر جداً
< الكاميرا تستعرض الحزن الذي خيم على المكان
< على الطبيعه على العماره على الماره وعلى كشك الخردواتي
< وتعود لتظهر الرجل وهو ممسك بالخطاب
< هريدي: اقرالي الحته الاخيره دي كمان يا بيه
< الرجل: ابلغك بان ابوك جالو ورم في المخ
< ويواصل: لا اله الا الله يا عم هريدي ... خلي املك في الله كبير ...انت حاتتجرس زي الستات ولا ايه !!!
< هريدي: انا ميش محيرني الورم ... انا المحيرني بويا جاب المخ منين؟!!
< نكات كتيره اتقالت في الصعايده
< في مسرحية الصعايده وصلوا
< احمد بدير واقف في محطة القطر ومعاهو صعايده كتار
< مستني القطر
< الصعيد كلو جاي يودعو
< احمد بدير قال ليهم
< زمان عم الراجل ده كان منحوس شديد خبطتو عربيه في الشارع روحه طلعت
< وهيا طالعه قابلتها طياره خبطتها
< نطه صعيدي قال ليهو: ومات؟!
< المهم
< تلاته صعايده عايزين يهاجروا هجره عشوائيه خطفوا مترو الانفاق قالوا ليهو اطلع علي ايطاليا
< لكن في صعايده بفهموا
< ما كلهم اغبياء
< قال ليك صعيدي سرق قروش كتيره
< يوم الجلسه اهلوا جابوا ليهو محامي
< المحامي قال ليهو بطلعك براءه بس تقسم معاي القروش بالنص
< الصعيدي قال ليهو موافق يا متر
< المحامي قال للصعيدي لما القاضي يسألك تعمل مجنون وفاكه منك
< الصعيدي قال ليهو ماشي يا متر
< في الجلسه القاضي سأل الصعيدي
< سرقت الفلوس ليه ؟؟
< الصعيدي قال ليهو
< تيرا تيرا رم.. تيراريرا رم
< القاضي قال الود ده عبيط ولا ايه !
< سرقت الفلوس ليه؟؟؟
< الصعيدي قال ليهو
< تيرا تيرا رم.. تيراريرا رم
< القاضي قال ما فيش فايده .. الود ده اهبل ومجنون.. يشطب البلاغ
< لما طلعوا بره
< المحامي قال للصعيدي يلا ايدك على نص الفلوس
< الصعيدي قال ليهو: تيرا تيرا رم.. تيراريرا رم
< قلت ليكم ما كلهم اغبياء
< اها
< قال ليك صعيدي اشتري تكسي
< وحايم في الشوارع بالتاكسي
< اي زول يقول ليهو تكس
< الصعيدي يقول ليهو ايوه تكس
< نكات الصعايده ومواقفهم كتيره
< لكن اشهرها قصة الصعيدي الباعوا ليهو تمثال رمسيس
< ده ابلد صعيدي على مستوى صعيد مصر والدول المجاوره
< في السودان حصلت مره واحده لما باعوا الصهريج لي صعيدي سوداني
< المهم الصعايده وصلوا القاهره
< وده ما الخبر
< الخبر هو صعيدي في جوبا
< الصعيدي الاشتري كرت ألوك من الملكيه ده فرقو شنو من الصعيدي الاشتري تمثال رمسيس؟!
< ما في فرق غير ده سوداني وداك مصري
< قال ليك صعيدي راكب الطياره
< شنطتو وقعت من الطياره
< قالوا ليهو شنطتك وقعت
< قال ليهم ما تخافوش المفتاح معايا
< قلت لي الكرت معاك يا هريدي!!
< صعيدي في جوبا ولابس كسكته
< حليلك يا احمد بدير
< ألوك ولا جوك جوك
< ولا شنو يا محمد عبد الماجد!!
< المهم
< الصعايده يظهر بعد وصلوا حاينسحبوا تاني
< والمرة دي مافيش يمه ارحميني
< ايها الناس
< لجنة التسير في ملف التسجيلات ابدعت
< بدون هيصه بدون ضوضاء بدون مغالاه وبوعي كبير
< نرفع لكم القبعات ونظهر لكم الصلعات احتراماً واعجاباً
< لكني اري عدم ضرورة الجري خلف بكري بشير
< مستواهو عادي جدا
< والخانه مليانه
< واذا في طريقه وخانه فاضيه اولي بيها طرف او مهاجم صريح صراحة ايداهور
< المهم
< خرج منتخبنا من سيكافا
< خرج لاسباب اهمها
< اننا ننظر للمنتخب من زاويه حرجه
< ما بننظر ليهو من زاويه منفرجه
< توسع الرؤيه وتفرجها علينا
< اسقاط الالوان امام علم الوطن واجب
< وفرض عين علي الجميع
< الناس القالوا اطهر يصعد بالسودان لما اطهر جاب الاقوان
< ما قالوا أكرم يصعد بالسودان لما اكرم انقذ الضربة الترجيحية التي اهلتنا امام منتخب جنوب السودان
< وما قالوا اطهر يطير السودان لما اطهر اطاح بالضربة التي اطاحت بنا خارج البطوله
< خلوا زاويتكم منفرجه
< وبطلوا تضييق زاوية النظر للمنتخب
< عشان تذوب في علم الوطن كل الالوان
< المهم
< قال ليك صعيدي لبس كسكته وكرفته قابلو صعيدي تاني قال ليهو
< ديه دي !!!!! هريدي كير !!!
< الصعيدي قال ليهو لع ......عطوان اموم
< الاول قال ليهو اكديه ؟؟؟كنت فاكرك جاسر وهدان
< روشا
< قلت لي الشنطه ما مشكله المفتاح معاكم!!
< ايها الناس
< اسامه عطا المنان اتحاد بي حالو
< يقوم بكل الادوار
< حتى دور الدوله عند غيابها
< الرجل يحتاج لاعتراف بحقه ادبياً
< ولتكريم نشكره فيه على عطائه الكبير
< ورجال في قامة اسامه
< لو وجدنا همتهم في ربع المسؤولين
< لاستمتعنا بدولة راقيه ومتطوره
< شكراً سمسم
< ايها الناس
< ان تنصروا الله ينصركم
< اها
< نجي لي شمارات والي الخرتوم
< اكتر الباعوض ولا الركشات يا والينا
< وياتو فيهن الببشتنا وبلوث البيئه علينا؟
< هو في بيئه يا والينا؟
< اكتر الضبان ولا المويات في الخيران يا والينا؟
< ولا اكتر النفايات في شوارع المدينه
< هي دي بتسموها مدينه؟؟؟؟
< قبل كده حضاريه قلتوا لينا
< لا حضاره ولا مناره ولا نضافه ولا قيافه يا والينا
< العاصمه دي تاني ما بتتصلح لينا
< بيعوها اسكراب وبيعونا معاها
< وعاصمة جديده اعملوا لينا
< شرطت عينا
سلك كهربا
ننساك كيف والكلب فاتح خيال بتذكر عمال البلديه ينضفوا وناس الزراعه يسقوا في الشجر وناس الكهربا يراجعوا في اللمبات والناس واقفه بادب في المحطات والبصات مغسلات ومكويات ....فبكي لحال الشارع زمان وشارع اسي.. الكلب بكي واتكي يتنهد ساكت برطم بي كلام ما عرفتو.. لكن كلامو صاح
والى لقاء.
سلك

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى