في السلك .. بابكر سلك .. عبرت يا شيبوب وليس في ذلك شك

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

16122015

مُساهمة 

في السلك .. بابكر سلك .. عبرت يا شيبوب وليس في ذلك شك




.
في السلك
بابكر سلك
عبرت يا شيبوب وليس في ذلك شك


< شيبوب لاعب موهوب ليس في ذلك شك
< وهو لاعب رديف المريخ وليس في ذلك شك
< ومسجل كلاعب هاو وليس في ذلك شك
< ومن حقه التوقيع علي عقد احتراف بنادٍ يتبع لاتحاد رياضي اجنبي ليس في ذلك شك
< ويكون من حقه ذلك حتى ولو لم يوافق ناديه المريخ وليس في ذلك شك
< وفي الماده »55« من اللوائح العامه وليس في ذلك شك
< نص المادة واضح قطعا للشك
< والماده بتنص على انو اللاعب لما يرجع خلال طمنطاشر شهر للدولة حقتنا دي
< اول شئ برجع لي ناديهو يتم فترتو فيهو وليس في ذلك شك
< بعد داك كان داير يقطع وشو يقطع وشو وليس في ذلك شك
< اما عن اصابة شيبوب بقطع في الرباط ففي ذلك شك
< وحتي ولو استصحبنا ذهابه للامارات لتلقي العلاج اثناء الموسم برضو في شك
< لكن قول شيبوب اكمل الطمنطاشر شهر في جوبا ورجع قطعا للشك
< وقتها كردنه ما بكون رئيسا للهلال قطع شك
< ومن حق شيبوب البحث عن وضع افضل قطع شك
< ولكن ان يكون الوضع افضل بعيدا عن المريخ !!!! ده الشك
< ايها الناس
< من حق اي انسان ان يقيم نفسو
< والما بقيم نفسو مافي زول بقيمو
< ولذا من حق شيبوب ان يقيم نفسو بي مية مليار ان شاء الله
< ولكن ليس من حق انسان مهما كان وايا كان ان يلوي يدنا
< او لا يستطيع انسان مهما كان ان يلوي يدنا
< ففي رديفنا واشبالنا مية شيبوب
< وفي رديفنا واشبالنا مية افضل من شيبوب
< اذا اراد البعد عليهو يسهل وعلينا يمهل
< شيبوب لعاب ولكنه ما منقطها خااااالص
< المهم
< تتذكروا كورتنا ضد اتحاد الجزائر بالجزائر!!!
< تتذكروا لما شيبوب جاب قون والحكم نقضو؟؟
< الحكم قال عبرت
< وناس روشا قالوا عبرت
< رمضان احمد السيد خت يدو في الواطه وقال عبرت
< فطومة اتيمنت وقالت عبرت
< نحنا بس وقتها القلنا ما عبرت
< لكن بمراجعتنا للمباراه من زاويه اخرى
< لقيناها عبرت يا شيبوب
< عبرت وشبعت عبور
< بس كيتاً عليك كده
< المهم
< ما عرفنا الكضابة جوهرة رمضان لما قالت سيدا قال غلطة عمره اللعب في المريخ
< ولا الكضاب سيدا لما قال ما قلت ونفي ذلك رسمياً
< اسلام قالت لي سيدا ما بكضب يا بابا
< قلت ليها وانتي كمان ما بتكضبي يا بتي
< قالت لي يبقي الكضاب مييييييييييين؟
< قلت ليها اسأليني دبل
< قالت لي عندنا بت في المدرسه كضابه كضابه كضابه جنس كضب
< قلت ليها اسمها منو ؟؟؟؟
< قالت لي اسمها يا أساور يا جواهر
< قلت ليها الكضابه دي بتكون جواهر
< ضحكت وقالت لي انت وين جواهر وستونه؟
< قلت ليها اليومين دي ستونه ماسكه خشمها ما قاعده تكضب
< لكن جواهر بتبالغ
< كان ما كضبت ما بترتاح
< ايها الناس
< تقصيرنا واضح جدا في 2870
< وتقصير لجنة 2870 واضح برضو
< لأنو حتى الملتزمين بالاشتراك اصواتهم بحت من فشل الشركات في استقطاع المساهمه الشهريه
< ولا حياة لمن تنادي يا لجنة مشروع 2870
< فعلوهو كويس وراجعوا الشركات
< في البرد ده الشبكه بتكش
والشبكه لو كشت مابتشيل كتير
< اخير الشبكه البتطش
< تشيل كل الخطوط عشان تخصم حقها
< والمكالمات تجيك كأنو البتكلم معاك موبايلو جوه زير فاضي
< راجعوا الشركات يا مرتضى بتري
< المهم
< مجتمع الرياضه راقي ومهذب مهما بدر من القله من هنات
< وما قام به الرياضيون بمدني عند حادث بكري لهو خير دليل
< وعفارم عليكم يا ناس اهلي مدني بالذات
< شكراً احبتنا اهل الرياضه رجال الحوبه
< المهم
< لقينا المدرب
< البلقينا قروش المعسكر شنو ؟؟؟؟
< والزمن جاري
< والاعداد واجب
< والاستعداد ضروري
< ودور الاربعه السنه دي ما بملي عيننا
< والقصه صعبه يا ونسي
< ايها الناس
< العضويه ماشه صاح
< ام راس يا ناس
< ما دايرين العضويه بالراس
< لو جات العضويه ام راس
< بتكتل العضويه بالراس موت الضان بس
< ايها الناس
< عثمان بتاع الكشب الهلالابي
< من عشاق سيدا
< قال لي سيدا رجع مساعد مدرب
< قلت ليهو بدون كورس تدريب ؟؟؟
< قال لي السنه القضاها في المريخ بتاهلو لتدريب الهلال
< قالها بدون ما يشعر
< لكن كلامو صاح
< ايها الناس
< ان تنصروا الله ينصركم
< اها
< نجي لي شمارات والي الخرتوم
< كلام الناس كلو الوزير قال لينا الوزير قال لينا
< مافي زول يا والينا
< قعدنا وقال لينا
< الوزير جاب لينا
< بس قال لينا وقال لينا وقال لينا
< وكلامو كلو هوا يا والينا
سلك كهربا
ننساك كيف والكلب جنو وجن رب الاسره البجي راجع مدلدل ايدينو
وإلى لقاء.
سلك
أطلال ناستقييم المستخدم: / 0
التفاصيل
نشر بتاريخ الإثنين, 14 كانون1/ديسمبر 2015 16:24
< كونو انو حانبدأ افريقيا من دور الاتنين وتلتين
< ده ما معناهو اننا ننوم في العسل ونعمل حاجاتنا بي سلحفائيه
< الاعداد لازم يكون قدر المقام
< وما ننسى اننا لا نقبل التوقف عند النقطه التي ترجلنا فيها عن جواد المنافسه
< لازم بعدها محطة جديده
< والمحطه الجديده على اقل تقدير هي النهائي
< وعلى افضل تقدير هي البطوله
< الكلام ده ما بجي بالتمنيات
< لانو لو بالتمني
< كان ناس روشا شالوها زماااااان
< قالوا المحببه
< حب من طرف واحد
< يتمنوا ويطيروا
< سبعه وتمنين سنه
< لأنهم بتمنوا وما بعرفوا يشتغلوا
< لذا نحنا نشتغل صاح
< ما نبقى ناس ماهلين
< ما نبقي زي زيدان الكسلان
< يقيف وسط الحواشه ويصنقع مادي دقينتو
< ويقول بكره احفر هناااااااااك
< وبعد بكره ازرع هناااااااااك
< الأسبوع الجاي اسقي هنااااااك
< الأسبوع البعدو احرت هنااااااك
< وهكذا
< كلو يوم يصنقع ويمد دقينتو لمن وكت الحصاد يجي
< الناس تحصد وزيدان الكسلان مادي دقينتو التكتح ما سواها
< يعرف يتفاصح بس
< لازم نشوف قصة المدرب المناسب البحقق الطموح بالامكانات المتوفره
< لازم نشوف معد بدني رهيب وعجيب
< لازم نشوف مدرب حراس خطير
< لازم نوفر مدير كرة نزيه وصاحب شخصيه وخبره
< ولازم نستعد جيداً للمعسكر ونعد المعينات الماليه
< الضحاكات هي التي نضحك معها آخر الموسم
< بدون ضحاكات آخر الموسم تبكي بس
< فراش عديل كده
< بي صيوانو ورحمتاتو
< لذا ولكل ذلك حقو نيسر المسالك
< المهم
< استحقت الأستاذة ميرفت التكريم
< واستحقت اسرة البرنامج التكريم
< واستحقت النيل الازرق التكريم
< فالاشراقات الزمن ده نادره جداً
< ميرفت ليست من الاعلاميات اللواتي يعتمدن على الشكل في جذب المشاهد
< برغم انها مؤهلة لذلك بدون رتوش بدون شمارات وردم خمارات
< ولكنها تخاطب العقول قبل العيون
< فنالت الاحترام وحصدت النجاح
< اللهم سدد خطاها ووفقها دوماً
< دعوني اسميها ملكة الشاشه الرياضيه
< ايها الناس
< قصة بله والباشا يجب ألا تنتهي بمثل ما انتهت عليه
< فلهما علينا حق الشكر والتكريم الذي يليق بهما وبتاريخهما في الزعيم.
< ايها الناس
< في المريخ رجال قدموا سراً ما لم يقدمه الناس
< ضحوا بالنفيس من أجل اسعاد الناس
< قدموا ما لم يتوقعه انسان منهم
< فقراء نعم
< ولكنهم اغنياء بحب المريخ وبما قدموه
< انهم رجال كثر
< منهم انجلو
< ذلك الاسم الجميل من الزمن الجميل ما بين ام درمان واويل
< اجرينا حواراً طويلاً مع انجلو
< فيه من المفاجآت ما يدهش حقاً
< ترقبوا انجلو على صفحات الزعيم قريباً
< المهم
< مرت ذكرى مانديلا وكأنها لم تحدث
< نسينا ام تناسينا لا ادري
< ولكن من الواجب ان نحتفل بالذكرى سنوياً
< التاسع من ديسمبر عيد مريخي كبير
< المره دي فات
< سنحتفل بأثر رجعي
< وسنعلن التاسع من ديسمبر عيداً مريخياً وطنياً واجب الاحتفال به
< متأسفين يا جيل مانديلا
< ونكرر الأسف للكيان
< فمانديلا يميزنا عن الآخرين
< عن الزهرة ونيل شلعوها الجعليين ورابطة كوستي وهلال أم درمان
< ايها الناس
< ان تنصروا الله ينصركم
< اها
< نجي لي شمارات والي الخرتوم
< كان شفت يا والينا
< الشفع جابو كتابهم قالوا لي اشرح لينا
< وردت كلمة أطلال يا والينا
< قالوا لي أطلال يعني شنو ورينا
< شرحتها ليهم يا والينا
< عاينوا لي صورنا المعلقه على حيطاننا في صوالينا
< شافوا كضومنا وجضومنا ولونا رويان الكان فينا
< وعاينوا لينا
< وقارنوا يا والينا
< وقالوا لينا
< يعني انتوا اسي أطلال ناس يا والدينا؟
سلك كهربا
ننساك كيف والكلب شايفنا زي ديار عبلة أطلال احبة سااااااااي ... قرب يقوم يناجي جلق
وإلى لقاء.
سلك

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى