تابعونا عبر فيس بوك

قوقل ‏+‏ ‏
Use the English Language

نبض الصفوة .. امير عوض .. الهمباتي الأحمر

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

19122015

مُساهمة 

نبض الصفوة .. امير عوض .. الهمباتي الأحمرn




نبض الصفوة
امير عوض
الهمباتي الأحمر

.
★من داخل عرين الأسد.. حيث العيون جاحظة.. و الأنفاس مكتومة و دقات القلب تتسارع..
★بداية المقال مالها بدت زي فليم الرعب كده..
★خليتها ذاتو..
★واحد يديني لالوبه..
★اللالوب مفيد شديد في البرد ده..
★يا ربي درجة الحرارة في جوبا تكون كم؟
★ما عارفين معلومات عن المدينة الحبيبه..
★فارقناها فراق الطريفي لي جملو..
★مع انها مربوطة في التأريخ المريخي برباط وثيق من الأفراح الحمراء..
★حليل مقبول.. و حليل أيامو..
★أيامو في الشغل ذاتها بقت معدودة..
★إن شاء الله يكون عندك تأمين..
★بوليصة معاش..
★أوعه تكون مشاهره..
★كده حتكون ميتة و خراب ديار..
★الناس ديل دايرين ضحية يشيل وش القباحه..
★انت اتصورت واللا لا؟
★لو اتصورت تكون اتهورت..
★لو ما اتصورت تكون اتعورت..
★نرجع للتأمين..
★مؤمن حالك يا حبيب واللا قاعد في السهله..
★خرمجتك دي خرمجة زول حيطلع مولاي كما خلقتني من حقوقو..
★غايتو لو حصل المتوقع..
★إتصرف..
★عندك خميرة كويسه تبدأ بيها من الصفر..
★عندك جوازين كاملات..
★و كرت..
★و شنطة هدوم ولدنا..
★بيع الهدوم في سوق أم دفسو..
★و إتهبب بالجوازين..
★تعرف معتصم؟
★عندك معاهو بزنيس؟
★حقو يعرفوك بيهو سريع سريع..
★عشان تلبس الليله كلها..
★الغريبه معتصم ده بدون سيلفي حرن..
★في ريحة همبته هنا..
★الحرنه حصلت في نفس اللحظة الوصلو فيها الهمباته من جوبا..
★أقبض عندك جسر..
★الهمباته ديل بكونو عملوها..
★ديل دخلوا جوبا و مرقوا بدون زول يشوفهم..
★نهائي ما اتلقوا..
★عدو ناس جوبا ديل عشرين مره لقوهم تامين..
★ماف زياده..
★و الهمباته قاعدين..
★عرفوهم من العيش..
★الكمبيوتر قال في عيشتين ناقصات..
★في زول بياكل و ما داخل السيستم..
★من الحتة عرفو الهمباته قاعدين و مافيشين..
★والله المريخاب ديل حيقتلوا ليهم زول بالحول..
★قاعدين و مافيشين..
★يلهطوا في عيش جوبا و ما ظاهرين في الرادار..
★همبته حيرت العالم..
★شيبوب ابو رباط صليبي تلب من الطابق التالت..
★شالو الصليبي و خلو الرباط في الفندق..
★مقبول الان معاهو الرباط..
★ما عارف يستعملو رباط جزمة واللا عنق..
★اربط الجزمة يا اخوي..
★العنق دي احتمال تجيها خنقة في الاجتماع العاجل..
★والله بي عمايلك دي الخنق فيك حلال..
★اهم حاجة..
★شيبوب قال ليك في الشنطة في ضفارة رسلها ليهو..
★الباقي حلال عليك..
★حتي الرباط..
★في زول عندو تسالي؟!!
★نفسنا اتفتحت للأكل..
★يا ربي من البرد..
★احتمال كبير..
★من امس الأفران بتخبز ضعف حصتها..
★٩٠% من الشعب السوداني بقوا نهمين..
★نفوسهم فاتحة..
★١٠% ديل ببلعو في حبوب شيبونه و يتدمدمو ينومو..
★وحشتونا والله..
★في الشارع اختفوا..
★و الحايم فيهم تلقي لافي وشو بي شال..
★نظام الولد قلع ضرسو..
★لكن قلع الضرس امانة ما حار..
★تسمع صوت الجذور.. كررررككك..
★الغريبة لو اتكسر..
★بدوك قطعه زي كرت الوك..
★الضرس في محلو..
★و انت لايص بالكرت..
★قصدي بالقرمة..
★لو لقيت ليك زول مسكين و ما ناقش حاجة..
★بيع ليهو القرمة علي اساس انها ضرس..
★بس ما تنسي..
★إتصور سيلفي مع القرمة..
★صورة الأشعة دي فيها حلات سيلفي..
★النوع البظهر العضام داك..
★و لو حسيت بي حركة في لسانك..
★أثبت.. ما تتحرك نهائي..
★بتكون بلعت همباتي..
★و ربنا يعوضك في ضرسك بعدها..
★البركة في القرمة..
★آخر الأنباء الواردة من جوبا.. أنو العيش طابق العدد..
★العيشيتين البنقصو كلو يوم وقفن..
★طبعا في ناس للان ما مصدقين أنو الهمباته خلصو الموضوع..
★تقول ليهم انتهينا..
★يقولوا ليك وين الصور؟!!
★صور شنو في شهر اتناشر كمان..
★الدنيا نهاية سنة و قبايل عيد..
★راعوا للمولد طيب..
★انتو قايلين المريخاب ديل بتاعين صور و فيديو..
★حصل سمعتو بي همباتي إتصور..
★قال صور قال..
★ماف حاجة ضيعتكم إلا صوركم دي..
★تاني في الرقم الوطني ما تتصوروا..
★موبايل كاميرا ذاتو ما تشتروا..
★خليكم مع موبايل ربيكا..
★والله قدر ما احاول انسي الجنوب بجي راجع براهو..
★خلاص خلينا الجنوب..
★ساعة رياضة في الشروق..
★إستضاف د. مدثر..
★كمبيوتر قانون ما شاء الله..
★اتكلم عن تسجيل الوك..
★و عبر بي شيبوب..
★و جاب سيرة الكوبري..
★كل الكلام الكتبناهو قبل أيام أكدو..
★و ساهم معانا بفعاليه في حملة )ابلع حبوبك(..
★الإضافة الوحيدة الجابها..
★إنو حيخليهم يبدوا كورس البلع من أول و جديد..
★أتوقع بيان من مجلس الهلال يقاطع فيهو صحيفة الجوهرة..
★لازم يضحوا بي زول..
★كردنة – الأسياد – الجوهرة..
★إستخرج ضحية من الجملة أعلاه..
★الغريبة الإذاعة الرياضية ما عملت حوار مباشر للان..
★خجلانين.. واللا خجلان هو..
★بيني و بينكم ليهو حق يخجل..
★بعد الصورة.. و الإبتسامة.. و السلام..
★الهمباته يطلعوهو أي كلام..
★بالنسبة ل٢٥ ألف دولار الهدية..
★الهمباته قرروا يلهفوها..
★العندو حق يبرز ورقو..
★عشان نرسل صورة لفيفي عبدو..
★في زول عندو سمسمية..
★المقال قتلني بالجوع..
★كاريكا مالو..
★وحدة شنو في البرد ده؟
★سيدا جاء بي جاي كاريكا إتملص بي جاي..
★كدي راجعوا ملف الصور في ذاكرة العراب..
★يكون أعرب كاريكا نائب فاعل مملوص بالفتحة..
★بركاتك يا الأمير الساجد..
★طفشت الولد قبل يبدأ الإعداد..
★حتي نص الموسم اﻟ٧ الحيتمو ليكم الكورة قانوني ما حنلقاهم..
★كاريكا + معتصم..
★الكشف نقص خانتين.. و لسه ما قلنا يا هادي..
★مساوي عشان عريس للان ما طلع بيان..
★لما يرجع حتولع كويس..
★هو ذاتو موقوف أربعة مباريات أفريقية..
★الهلال السنة دي ما حيلعب أربعة مباريات أفريقية..
★معناها مساوي حيلعب أفريقيا موسم ٢٠١٨م..
★بكون إعتزل..
★مسكين.. إنقرض أفريقيا..
★معتصم الحرن ده بلعب قلب دفاع..
★الماضي و المستقبل راحو مره واحده..
★أقول ليكم حاجة.. إشتكوا الهمباته..
★إشتكوهم لي لجنة “حروق الإنسان”..
★بس ألقوهم أول..
★انا خايف لو لقيتوهم بدل تشتكوهم تقوموا تتصوروا معاهم..
★قال ليك الهمباته قرروا يسجلوا شيبوب محترف.. و العراب هاوي.
★نبضات أخيرة★

★الإتحاد لقي الناس جايطة في شيبوب.. رجع مازدا تلاتات تاني!!
★شكرا لكل من ساهم في معركة رد الكرامة و لو بالدعاء بالنصر..
★التحية بحجم الفضاء لكوماندوز المريخ رجال الحارة..
★مريخاب جوبا.. نعم المريخاب..
★و لا عزاء لمن كاد أن يفسد جهد الرجال “بشلاقته” المعهودة..
★درس بليغ قدمه المريخ بيان بالعمل كرد للتطاول..
★المريخ يحتاج لمثل هذا التقارب لحل الإشكال المالي الذي يمر به النادي..
★الإعداد علي وشك.. و عشرات الإلتزامات مستحقه الدفع العاجل..
★٢٨٧٠ يا صفوة..
★تبقي أقل من أسبوع لقفل باب نيل العضوية.. فسارعوا للحاق بركب العمومية القادمة..
★أسماء كالجكومي محمد سيد احمد تستعد لتقديم نفسها و تستحق مقاعدها..
★شخصية قوية كالجكومي الفارس هو من ينقص مجالس المريخ..
★محمد سيد احمد مثال حي للإداري الشفت الحافظ للقوانين و القادر علي المصادمة و المواجهة..
★هيا إقتربوا أكثر من ناديكم فهو يحتاجكم أكثر الآن..
★مريخاب أحبكم.
★نبضة أخيرة★
الهمباته.. لو عايزين.. بخطفو ساماتا.
تابعوني خلال صفحتي بالفيس بوك: ﻧﺒﺾ ﺍلصفوة

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى