الباب البجيب الريح .. د.عادل الصادق المكي .. غداً تعودُ مباهجي

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

06012016

مُساهمة 

الباب البجيب الريح .. د.عادل الصادق المكي .. غداً تعودُ مباهجي




الباب البجيب الريح
د.عادل الصادق المكي
غداً تعودُ مباهجي
الحديبة نيوز
.
شاهدت على الفضائيات المختلفة.. احتفالات عواصم العالم بقدوم العام الجديد 2016.. ألعاب نارية وزغاريد وهيصة.. دا النقلوهو لينا وشفناهو والما شفناهو داك ضمة الشافهو قالوا نضمو براهو.. وما دام داسنو ما سائل منو..
يحتفل الناس بانقضاء عام من أعمارهم.. ويحتفون بدنو آجالهم.. وهم ما مفكرين فيها.. "نظرة تشاؤمية من امها".. الواحد لما يكون في وضع كعب ومحبط.. يسأل من حاجة يقولوا ليهو مرّ عليها ستة شهور.. يصفق إيديهو ويقول: "بالله شوف الأيام دي بتجري كيف؟ إتذكرها زي أمبارح".. ويسرح ويرجع يقول: "دي كلها مخصومة من أعمارنا".. وبرضو لما يكون بيتذكر في حدث مفرح ومبهج.. يشوف إنو مرّ بسرعة..
الإنسان علاقتو بالزمن علاقة ملاواة ومعافرة ومباصرة.. وفي كتير من الأحيان علاقة طناش.. تقول للواحد: الامور كيف؟ يقول ليك: أهو ماشة.. يعني مطنشنها وتمشي بي مزاجها.. نحن الوحيدين يتخيل لي ما بنكون مخططين نعمل شنو خلال السنة الجاية.. ونخلف كراع فوق كراع ونخلي الأمور للقدر.. والقسمة والنصيب.. والحظ.. أبسط حاجة تكون مخطط تشتري بيت مثلا.. تقعد تلملم.. لتصل للسعر الدايرنو فيهو.. يقوم الدولار يعضي طرف عراقيهو ويقوم جاري.. ويكر البيت معاهو.. وانت برضك تعضي طرف عراقيك وتقعد تسكهم.. السنة تنتهي.. وتلقى روحك قضيتها مساككة.. وما وصلت.. وتشخت شخيت وتبدأ من اللول.. دا لو ما جات حاجة قدرية في النص وشالت القريشات ومشت.. وخلتك تتلفت وتقعد تبدا من الأول تاني.. تلقى عمرك كلو وانت قاعد تبدأ من الأول..
لكن برضو العزيمة مهمة والتفاؤل سمح.. التفاؤل هو وقود للحياة ويخليك فرحان حتى لو ما حصلت حاجة البركة في الفرحة.. قرأت كتاب لكاتبة أمريكية اسمها )رهوندا بيرن(.. "غايتو الأمريكان ديل شبعانين هامبيرقر وطظيانين ويكتبوا ويصوطوا في الدنيا.. ونحن ترانا نقرا ونعاين في محنهم وكل واحد يتمنى يتأمرك".. الكتاب اسمو )السر(.. ومقسماهو على أسرار.. سر الحب يعني كيف تخلي زول يحبك ويتكسر فيك بدون عرق محبة وكواديك ومساسقة على الفُكيا.. يعني انظر لعلاقتك بالزول نظرة إيجابية وفسر تصرفاتو تفسير إيجابي وحيكون صح.. مثلا لو حبيت واحدة وهي أبدت كجنة ليك.. إن جيت في حتة وهي قاعدة تقوم تمشي.. وإن شافتك في راس الشارع تخليهو ليك.. لا تيأس.. وانظر للسلوك من زاوية إيجابية يعني تقول هي دايراني علا يا قول الشاعر "يتمنعّن وهنّ الراغبات" وقرّط على كدا واتلايق فيها وإن شاء الله حتصل.. سر المال والغنى يعني كيف تجذب المال إليك وتبقى غني.. فكر إنك غني ما تفكر في الفقر.. ومن القليلة العندك أدي.. أدي من قلبك أدي المحتاج فعلا ما تدي بحثا عن البوبار "دا كلام الخواجية والله".. سر الشفاء من المرض.. برضو التفكير الإيجابي.. وإنك كويس ما عندك عوجة.. واختا الناس البيجو يتمحنو جنبك ويقتلوك قبال يومك "برضو نضم الخواجية".. يعني باختصار تفاءل.. وانظر للحياة من زاوية مشرقة.. ويا جماعة الخير النكد كعب.. اسمعوا نضمي ونضم الخواجية دي!!!
و.. غداً تعود مباهجي.. وغدا حبيبي حتماً يعود.

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى