في السلك .. بابكر سلك .. علبة الحلاوة بتاعت زمان

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

06012016

مُساهمة 

في السلك .. بابكر سلك .. علبة الحلاوة بتاعت زمان




في السلك
بابكر سلك
علبة الحلاوة بتاعت زمان

الحديبة نيوز
.
< شيبوب بالنسبة لينا بقي زي البشكير في الشتاء
< تعاين ليهو ما بتتمناهو
< ده لو ما جسمك قام صوف
< شعرة جلدك تكلب
< زول حكم على نفسو بالفناء
< اسي التوانسه داقين جرس في تسجيلو الخطأ ده
< المهم
< لا احد يتمنى البشكير في الشتاء
< ايها الناس
< امس لعبنا اولى تجاربنا في المعسكر
< الناس اتعودوا على معسكرات سبعه نجوم
< عشان كده ما مقنعين بمعسكر اديس ده
< معسكر التقول في الديم
< محل ما تقبل حبشي
< محل ما تقبل حبشي تاني
< معسكرات اديس دي بعرفوها جماعه معينين كده
< معسكرات الجمبات دي ما بتملي عينا
< ولكن العزاء في معسكر الدوحه
< رابطة الدوحه عملت كلو شيء
< ونحن في انتظار الميعاد
< وكمان ناس السعوديه جابوا تجربه ضد اهلي جده
< روابطنا ما شاء الله شغاله صاح
< لكن السؤال
< الهلالاب ديل محليين في كلو شيء؟؟
< في الفجيره ما سمعنا بي رابطة للهلال عملت شيء
< اسي في تونس
< عشان يخفضوا ليهم قالوا ناس بكري المدينه
< بكري المدينه في تونس مشهور اكتر من السفير الايراني
< المهم
< رابطة قطر سنوياً تقدم ما يدهش ناس قطر زاتهم
< عفارم عليكم يا مريخاب الدوحه
< ويا كل روابط المريخ بالخارج
< المريخ عالمي في كلو شيء
< حتى في روابط ناسو في المهجر
< المهم
< الحرب التي يشنها رئيس الهلال واعلامه على فلتات الزمان الهلاليه
< على فلذات كبد الهلال الكيان
< النقر اخوان وطارق وعاكف
< ما هي الا نكران جميل في حقيقتها
< نعلم يا ابو كسكته انو الشاعر قال
< ان الدراهم تكسو الرجال هيبة ومهابه
< فهي اللسان ان اراد كلاما
< وهي السيوف ان اراد قتالا
< لكن ما للدرجه دي
< فالتاريخ يشهد للنقر اخوان وطارق احمد آدم
< بالمناسبه
< طارق لا اشتكي ولا مشي مكتب عمل ولا قدم عريضه
< ما عارف الحرب دي تهديد ولا شنو؟
< وبعدين البقول حقي غلب
< يعني انتو يا روشا دايرين الناس تلعب وتشتغل في الهلال بالمجان؟
< اللاعب البقول داير حقو خائن وما شبه الهلال
< الفني الداير حقو خائن وما شبه الهلال
< المدرب الداير حقو
< هو زاتو ما عندو شيء
< ما بتخجلوا من الفيفا انتو؟
< غايتو قصتكم دي ذكرتني قصة الرباطابي
< قالوا في رباطابي
< بدري الكلام ده
< مشى لضيعه واحد من الساده وقتها
< شغال سنتين
< يقطع في الشجر ويزرع في العيش
< وساكن ليهو في جخنون
< الراديو جمبو شغال
< اوعك تقطع صفقة شجره عشان ما يجينا جفاف وتصحر
< السيد يقول ليهو اقطع في اليوم خمسين شجره
< عاد يسمع كلام الراديو ولا كلام السيد؟؟
< لحقك ليك الغابه راسي ده
< الأكل عصيده بي بصله مسلوقه
< سنتين شغال شغل صاح
< قام يوم قال لواحد من المقربين للسيد
< بدور حسابي عشان شايل اولادي
< الكلام وقع زي الصاعقه علي راس الزول
< مافي زول بقول حسابي في ضاحية السيد دي
< الناس كلها بتعمل سخره
< عدل قعدتو وقال ليهو
< حساب شنو؟ واولادك شايلهم موديهم وين؟
< قال ليهو شايل اولادي يعني ماشيلهم
< الزول صلح العبايه الادها ليهو السيد مستعمله وقال
< خلاص بكلم ليك السيد
< تاني يوم قابلو
< قال ليهو كلمت السيد؟؟
< الزول قال ليهو كلمتو وهاك امسك
< اداهو مفاتيح بتاعت علب الحلاوه حقات زمان ديك
< باقي زمان علبة الحلاوه بتجي بي مفتاح صغيييييييييير
< ما كان في زول بعرف الحلاوه غير السيد
< الرباطابي قال ليهو ونان ده شنو؟؟
< الزول قال للرباطابي دي مفاتيح بيت في الجنه
< السيد بنى ليك بيت في الجنه ودي مفاتيحو
< الرباطابي قال ليهو سنتييييين شغال هني
< وغايب من وليداتي
< ارجع اقولهم سويتلكم بيت في الجنة؟
< يا زول هوي
< ادني حسابي خلني النسوي ليهم بيت في الدنيا دي اول بعدين نسوي بيت الجنه
< اها يا روشا
< طارق والنقر اخوان والساده
< اديتوهم مفاتيح بيوتهم في الجنه يعني ولا شنو الحكايه؟
< ادوا الناس قروشهم بطلوا وهمه
< وكامبوس
< برضك اديتوهو مفتاح بيت في الجنه ؟؟؟
< عاد كيفن ؟؟يأجروا يعني ويرسلوا ليهو الايجار هناك محل اقامتو ولا كيف؟
< اسي قودوين ده بيت في الجنه يعمل بيهو شنو؟
< يسويهو وقف؟
< ادوهم يا روشا ولو من قروش بناء الجوهره
< بالمناسبه
< قروش بناء الجوهره من وين يا فطومه؟
< بوصفك ناطقه رسميه في الحته دي ما نطقتي لينا
< من اين لك
< اقصد من وين؟
< ايا الناس
< ان تنصروا الله ينصركم
< اها
< نجي لي شمارات والي الخرتوم
< كان شفت يا والينا
< نحنا مبسوطين بطردكم لي الزول البتدخل في الخصوصيات الداخليه لشعوب المنطقه وبتدخل فينا
< وعقبال الطرده لاي زول فارض نفسو علينا
< لكن يا والينا
< لو ناس السفير صالحوا الناس اللينا
< او لو الناس اللينا مكروا علينا
< او لو قلنا ليهم كيف وقالوا ابينا
< نودي وشنا وين يا والينا؟
سلك كهربا
ننساك كيف وفي كلب مسطول قال للكلب الما مسطول مفروض الانجليز يفرحوا بالاستقلال عشان خارجهم.. جر .. كلب ابن كلب مسطول
والى لقاء
سلك
ليه بس كده بس كده بس؟!تقييم المستخدم: / 0
التفاصيل
نشر بتاريخ الثلاثاء, 05 كانون2/يناير 2016 14:38
< يا قوم
< مجالس الادارات الجديده
< بالذات لجان التسيير ومجالس التعيين
< يلتف الناس حولها لمساندتها ومعاونتها على قيادة امر النادي
< فتكون مجالس او لجان لا معارض لها
< او قل يختبئ معارضوها خجلاً
< لأن الشيلة شيلة الجميع
< يا أهل الربع
< يتعاون جميع اهل الديره مع المجلس المعين للخروج بالربع الي آفاق ارحب
< ويفرد اهل تلك المجالس ساحات الديره بالورود والزهور استقبالاً لاهل الربع الداعمين
< واحتفالاً باهل الربع المتبرعين بالفكر والجهد قبل المال
< ايها الناس
< المتابع لسيرة ومسيرة مجلس تسييرنا يتعجب
< البعض بدأ يجاهر بالعداء للمجلس
< والبعض الآخر اعلن العداء بالعديل كده
< والمجلس ذاتو بقى يظهر خلاف ما يبطن
< فيظهر ما يبطن من خلال تصريحات تجلب له العداء
< ايها الناس
< من اهم الادوار المنوط بها لمجلس التسيير
< هو جمع الناس حول الكيان على قلب رجل واحد
< ولكن ميل لجنة التسيير تجاه كيانات داخل النادي
< يجعل أهل الكيانات الاخرى في الصف الاول لقتال المجلس
< فليس من الحكمة ميل لجنة التسيير لبعض الكيانات لدرجة اخذ الافكار »لا اريد ان اقول الاوامر« منها
< ايها الناس
< كثير من التصريحات المنسوبة للجنة التسيير تحسب عليها لا لها
< وتجعل الناس يتكالبون عليها لا معها
< ومن تلك التصريحات ما يحمل في طياته اشانة لسمعة المجلس المستقيل
< وانكاراً لدوره النبيل
< بل وتبخيساً لانجازاته اثناء التكليف
< يا مجلس التسيير
< يا قائد لجنة التسيير
< يا ونسي
< الزول ما بلوي الايد البتنقط ليهو
< ولا بعضي الايد البتغمت ليهو
< ولا بمنع الايادي البتدفع من انها تدفع ليهو
< ولا بحجم الاحجام الكبيره بسيرتها وانجازاتها من اجل ارضاء فئه تريد تصفية حسابات خاصه بها مع جهات بعينها
< ولا خلق عدائيات زي دي بزيد رصيد لجنة التسيير
< وعلى لجنة التسيير اول حاجه ان تضبط تصريحاتها
< وان تخصص من يصرح
< وألا تصرح الا بعد التأكد من صحة ما تريد ان تصرح به
< وان تنظر للناس بشفافيه وعين رضيه
< والا ترمي قصورها في جلب الدعم على الآخرين
< فمثلما استقطب الآخرون الاموال التي سيروا بها النادي في حقبتهم
< على لجنة التسيير ان تعرف دروب ذلك الاستقطاب
< ايها الناس
< نؤيد بشدة ونساند مجلس التسيير
< فهو حكومتنا
< فقط نشترط ان يعمل على جمعنا على قلب رجل واحد
< وألا يعادي الايادي التي بنينا صرحنا عليها
< وخضبناها بسيرنا على تلك الاكف الرزينه
< ايها الناس
< اخاف على لجنة التسيير ان تنجرف مع جهات تطيح بها كالهدام
< فنفقدها وتفقد وقارها عندنا والخاسر المريخ
< فهمتوني!!!!
< المهم
< كتب الحبيب احمد محمد احمد عن اموال تمويل الجوهره
< وقال يا خبر بفلوس بكره ببلاش
< الخبر الليله يا ابو حميد ببلاش
< راعي الضأن في الخلا سمع بيهو
< الخبر اليقين واضح وباين في الكسكته يا حبيب
< ايها الناس
< البرفض سداد حقوق طارق احمد آدم والنقر اخوان
< ما ظنيتو ببني جوهره مجاني للحمام
< يبقى تمويل الجوهره بجي من ويييييييييييييين؟
< افتو ؟؟؟
< جيبوا اضانكم
< وحياة كتاب الدين
< لكن ما تكلموا زول
< كلو زول بعرف براهو
< طيب المورده دي
< المورده دي اسي الدخلها شنو؟
< المهم
< هل نقصر في سداد حقوق شمس الفلاح
< ونطبق لائحة الجزاءات على شمس الفلاح؟
< دي دايره شرح يا ابو جريشه
< يعني شمس يقعد لحدي ما القروش تنهمر في يناير زي ما قال ونسي
< ولا يجي يواصل اعداد وبدل القروش تنهمر العيون؟
< ايها الناس
< لسه بنناصر ونؤيد لجنة التسيير
< بس حقو تحافظ علينا هي كمؤيدين ومناصرين ليها
< ايها الناس
< ان تنصروا الله ينصركم
< أها
< نجي لي شمارات والي الخرتوم
< كان شفت يا والينا
< في حاجات بتحير عقولنا الفينا
< في الصحف عن الاختلاس قرينا
< عن الاعتداء على المال العام قرينا
< عن لغف المال الغرق قرينا
< وعن اعادة المال المعتدى عليه المختلس من الخزينه
< برضك قرينا
< وفتشنا الجريده كلها يا والينا
< رجعوا المال من منو ما لقينا
سلك كهربا
ننساك كيف والكلب يرى أن المال لا يختلس نفسو براهو ايماناً منه بالمثل القائل ...الما بتهبشو الخمسه يبيت ويمسى.. عليكم الله شوفوا ليكم جنس كلب!!!
وإلى لقاء.
سلك

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى