قوقل ‏+‏ ‏
Use the English Language

من هنا وهناك .. هيثم صديق .. مرقت كالعادة بالخلاطة

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

14012016

مُساهمة 

من هنا وهناك .. هيثم صديق .. مرقت كالعادة بالخلاطةn




من هنا وهناك
هيثم صديق
مرقت كالعادة بالخلاطة
من هنا وهناك هيثم صديق
.
وامس حينما كنت اقرأ في عمود الحبيب مامون ابو شيبة تذكرت نكتة طريفة عن زوج شكاك كان يشك في زوجته فيتصل عليها كثيرا يسال انتي وين.. وهي تجيب انا في البيت.. فيطلب منها تشغيل الخلاطـ ليتاكد.. وفعلا يسمع صوت الخلاط….وفي يوم اراد ان يباغتها في البيت فعاد من العمل بدري
سال ولدها اين امك
فقال له الولد شالت الخلاطة ومرقت زي كل يوم
مامون لا يزال يشك في الاتحاد ولجانه ابدا…صادق الحكام من كثر ما انتقدهم ..الواحد فيهم بقي يخون المريخ علشان اب شيبة ينتقدو.. بقوا يتقريفوا لانتقادات ابو شيبة…يعني الكورة تضرب من بلنت في الماسورة ويسددها منفذ البلنت تاني وتتحسب قون.. ده كلام زول عاوزين ينتقدوه بس
امس ابوـشيبة انتقد القرعة وعدها موجهة وهو امر ممكن مع الاتحاد الثعلب ده.. فلاحل في الموسم القادم الا ان يمثل ابو شيبة نادي المريخ ويشوف الخلاطة بنفسه من يدورها
…….
بداية المريخ هذه المرة فيها تعثر واضح وتعسر اوضح فمرة تظهر نمرة التاشيرات ومرة يبين هلال قلة الاموال مثل صديق الرميلة زمان لما يحاورو قلة مرتضي قلة قالوا يوم حاور صديق الرميلة طلع من الملعب وفنيلتو مقلوبة…الهلال مغلوب والفنيلة مقلوبة…هذه البداية الغير واصلة لمستوي التطلعات ليست مقلقة لمن يعرف المريخ.. المريخ حصان حر والخيل الحرة بتجي في اللفة
…..
كسكتة سادومبا دي تضحك…ياخي طارق والنقر ما شالوا قروشهم عايز يشيلها سادومبا ابو اما مرضانة…الزول ده الا يجي يلعب بي بطنو ..البخيل قال للشغالة بعد ما وصل معاها لحد تشتغل باكلها وشرابها بس قال ليها اها وفيك الخير
……..
كل ما نكتب عن عودة جمال الوالي الدماعة بطنهم تطم.. جمال زي امتحان الرياضيات مع زول بدقوه في جدول 2 عندنا زمان واحد لبد في الفصل لما كان الاستاذ بيكتب الامتحان في السبورة…زولنا نقل الامتحان ومرق.. اداه لواحد شاطر من فصل اعلي.. حلاه ليه…بقي عنده رخصة تدريب يعني.. الاستاذ دخل الفصل وقال اي زول يطلع ورقة ويسطرها.. الزمن داك الطباعة اندر من بطولات الهلال…الدولية…و …صاحبنا طلع برااااحة الورقة المحلولة وجمعها…الاستاذ بعد يومين جانا حالتو بالبلا.. دقنو ما محلوقة واول مرة القميص برة البنطلون وعيونو من طول السهر تلبس وشاح حرقة والم.. نحن قلنا الزول ده الا شوكشوه.. الزمن داك كنا ما قايلين في حاجة بتبكي وللا بتسهر غير الشوكشة.. لو لقينا ولد صغير بيبكي كنا بنقول الود ده مشوكش.. اغاني هاشم ميرغني كنا بنحفظها بي الكحة البتطلع من الشريط.. صلاح الدين صاحبنا كان بيغني.. انتي ما مشتاقة ليا والاا ما عارفة العليا…لما يصل للمقطع بتاع غريبة نعيش زي الاغراب وما نتهني بالريدة.. كان باشر لواحد فينا يكح.. الشريط الحفظناه فيه كحة هنا …المهم ..الاستاذ قال لينا والله يا جماعة حاصلة حاجة غريبة خلاص…شغلكم كعب لكن في زول مقفل الامتحان…الزول ده فاجاني بصراحة…جاد الله قوم…جاد الله كلنا كوركنا…جاد الله منو كمان البقفل الامتحان…الاستاذ رسل زول يجيب ليه موية..قلنا ليه رمضان يا استاذ.. قال لينا.. بقضي…جاد الله يقفل امتحان الرياضيات.. جاد الله ما بعرف يقفل شباك الفصل يقفل الرياضيات…لكن جاد الله غطي علينا السبورة ..اتنفخ عديل.. زرار بنطلو طار.. زراير قميصو اتقطعن…وفيسسسسسسي رجع تاني.. الاستاذ قال ليه يلا يا شاطر وري الاغبياء ديل يحلو الامتحان كيف

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى