بدون حجاب .. خالد عز الدين .. شطب بأوامر عائشة !

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

14012016

مُساهمة 

بدون حجاب .. خالد عز الدين .. شطب بأوامر عائشة !n




بدون حجاب
خالد عز الدين
شطب بأوامر عائشة !
بدون حجاب خالد عز الدين
.
• قلنا من قبل ونكرر اليوم .. اسامة في .. أستقرار مافي .. نخليكم اليوم من أسامة يورو ونتكلم عن اسامة تسجيلات .. ورق ساي الليلة .. بدون شيكات .. لكن برضو شبك ومشاكل وامور ملخبطة !
• أسامة عطا المنان الراعي لفريق الوادي نيالا قرر ان يسجل لناديه لاعب كاميروني مسجل في فريق اسود دارفور وهو نادي تابع للاتحاد المحلي بالفاشر !
• السيد اسامة عطا المنان الذي لا يعترف باي ضوابط او حدود في عالم كرة القدم لم يجد اي مشكلة في تسجيل اللاعب بخطاب تعهد حملته استاذه اسمها عائشه تنشط في مجال تسجيلات اللاعبين منذ فترة ! ومع خطاب التعهد هذا بشطب اللاعب يوجد خطاب شطب بختم الفرقة السادسة مشاة ! ومشيناها خطي ومن كتبت عليه خطي مشاها ! نمشي مع اسامة عطا المنان يا وصلنا حدو يا وصلنا حدنا !!!
• أسامة عطا المنان راعي الوادي نيالا وصاحب وكالة تاكس بالشراكة مع اخرين من بينهم السيد السكرتير مجدي شمس الدين رئيس لجنة شؤون اللاعبين غير الهواة وفي رواية اخري والهواة ايضا ! اي حاجة في اتحاد الكرة جائزة ! اسامة رئيس لجنة التسجيلات ؟ معليش لخبطتكم شوية لكن اهو القضة جايطة !
• اسامة راعي الوادي نيالا قرر تسجيل لاعب اسود دارفور دون ان يتم شطبه من النادي .. اسامة رئيس لجنة التسجيلات .. علي الامين مقرر لجنة التسجيلات او العضو الدائم في لجنة التسجيلات ونائبه عصام شعبان ! ولما يقولوا ليك عصام شعبان يعني اسامة عطا المنان ! كده فهمتوا .. لجنة التسجيلات دي ممكن تقيف للهلال في تسجيل لاعب من ابيي وممكن تمنع المريخ زااااتو من تسجيل لاعب بشهادة ميلاد مزورة ! لكن ببساطة بتسجل لوادي اسامة لاعب اجنبي وما مشطوب من ناديه !
• المهم اللاعب ده كاميروني اسمو روجر سجلوا في الوادي نيالا .. ناس اسود دارفور ديل اسود عديل ! اعترضوا طوالي .. اسامة حاول بجاي بجاي .. لقي الجماعة عنيدين ..قام حول الموضوع لشروني .. وشروني ده شاب ممتاز وقانوني يتكلم معاك يقنعك .. تشوفوا في الاتحاد والاجتماعات تلقاهو راجل طيب خلااااص مافي فرق بينو وبين عضو مجلس تاني اسمو بكري المناقل الفرق الوحيد انو شروني ما بسافر مع البعثات !
• شروني وجد نفسه في مواجهة اسود دارفور .. غلبوا يحل القضية قام رجعها لاسامة عطا المنان !
• شروني مقرر لجنة شؤون اللاعبين غير الهواة والهواة طبعا ! يعني لجنة متخصصة في شيبوب .. مش شيبوب هاوي ومحترف في نفس الوقت !
• المهم لجنة شروني ومجدي دي اجتمعت ناقشت قضية اي لاعب الا زولنا بتاع اسود دارفور ده ! مع ملاحظة انو تسجيلوا معلق حسب افادات لجنة اسامة عطا المنان !
• ناس اسود دارفور لاعبين مباراة بعد ايام في كاس السودان ! ما عارفين مصير لاعبهم .. أسامة لسه ما قرر يخلي اللاعب يمشي الوادي نيالا ولا يمشي اسود دارفور ..! اصلا اسامة مشغول اليومين دي بموضوع اهم من التسجيلات .. عندو فروقات في دولارات الفيفا ! بالمناسبة عندي سؤال ثقيل !!! قالوا في الاجتماع الاخير قلتوا انكم بتبيعوا دولارات الفيفا بسعر السوق الاسود ! هي دولارات ولا يورو ! يا اسامة ومعتصم لو بتخموا ناس مجلسكم ديل نحن عارفين اي حاجة ! هي بتجيكم يورو السبب البخيليكم تتكلموا عن دولار شنو .. بس برضو محمد سيد احمد ثقيل قالوا ضربها ليكم سريع ؟؟
• المهم خلونا في روجر الليلة .. اتحاد الفاشر ارسل خطاب مستعجل قبل يومين لاتحاد الكرة بستفسر عن مصير اللاعب عسي ان لا يكون مصيره مثل عمر عثمان لاعب الامل عطبرة ! فجأة كده لقي نفسوا موقوف سنه .. عشان المادة وجوبيه ! وبكري المدينة )ينطط( رغم انو ضرب الحكم وشتموا بالفاظ بذئيه ! ومجدي شمس الدين قااااعد .. طبعا مجدي ما بقدر يقول حاجة لاسامة .. ما شريكوا في الوكالة وزولو في الانتخابات ! بالمناسبة مجدي ما عندو كتلة ولا نادي ولا اي حاجة لكن بجيب اعلي اصوات ! وما عندو )قروش( لكن كريم بشكل في نثريات الحكام .. مبااااالغة !
• اها ما اطلع بيكم من الموضوع واجهجكم زيادة علي جهجهة الاتحاد . روجر هسة لا عارف روحو مشطوب ولا ما مشطوب .. ولا عارف روحو في نيالا ولا الفاشر .. واسود دارفور زي المريخ كشفها ناقص لاعب ! هههه المريخ كشفوا ناقص لاعبين يا خالد عزالدين ! هواة ومحترفين !!
• ختام القصة .. لسه .. نشوف اسود دارفور بشيلوا اللاعب ولا بسرح في الوادي نيالا !
• لما يزعل .. بناقض نفسو طواااالي !
• عندما كان مزمل في قمة الرضاء من اتحاد الكرة مع نهاية الموسم الماضي كتب عن قوة الاتحاد الذي وقف في وجه الحكومة وقام بحل القضية خلال اجتماع جمعية عمومية وقال ان اتحاد صغير تقدم بمقترح الحل .. طبعا مزمل لما يزعل بناقض روحو طوالي ! تعالوا نقرا ما كتبه بعد غضبه من لجنة شؤون اللاعبين غير الهواة بعد قرار الوك شيبوب ! كتب مزمل )تدخلت الدولة وضغطت على اتحاد عهدنا به أنه لا يقوى على معاقبة الكبار، وهددته بالحل، فجزع وأدبر مولياً صوب لوائحه، وأوسعها خرقاً وانتهاكاً( خلي بالك طويل يا استاذ !

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى