الخميس 19 أغسطس 2021 - 22:32

كانت فاتنة الجمال
يرغب الجميع في الزواج منها
ودائما جوابها الرفض.
حتي ذهبت زهرة شبابها
واصبح لايطلب ودها احد.
)بنات جيلها ( امهات
تهرب من الجلوس معهم
حتي لاتتذكر قطار
الزواج الذي تركتها
في رصيف الانتظار.
اصبحت تجالس
)البنات الفي عمر الزهور( من اجل بصيص الامل
ولكن
يزعجها السؤال الذي
تهرب منه
) انت سمحه كدا
ليه ماعرسوك(
وعلي لسانها وللاجابه علي هذا السؤال كانت
هذه القصيده
بعنوان
بجاوب


... .... ....
بجاااوب
لي اماني
ولي تهااني
و نوره
ليه انا بي جمالي
الفاتن الرباني
اتعذب واعاني
عصرت جمر البوره
.. ... ...
بجاااااوب
غشتني السنين
ال بالامل ممطوره
واحلام الشباب
اترنمت عصفوره
ضاحكني الزمن مرات
وابيت الشوره
اغراني الجمال
والماني عارفه اموره
.... ..... ......
بجااااوب
ابيت العندو دين
حافظ الحديث والسوره
ابيت العندو مال
سيرتو البنات بتدوره
ابيت العندو طين
كم ساقي بي بابوره
اب حسب اب نسب
الناس تولي اموره
...
بجااااوب
المافيهو قول
شان نفسي ارضي غروره
ارفض بالنهار
بالليل انوم مسروره
الزول البعزل وايدو في المطموره
حتي الخالي عيب مرات يقول منقوره
..... ..... .....
بجااااوب
دقولي ونقز
في حضرتي المحضوره
شايفه الكون ورود
والدنيا فايحه عطوره
في نظري العريس
لازم يكون
اسطوره
جم تمثال فرنسا
معاهو اخد صوره
...... ..... ......
بجااااوب...
فقت من الحلم
اجري واصيح مزعوره
سايلات الدموع
فوق خاطرتي المكسوره
لا عندي اعتبار
لاعندي راي لاشوره
خدامة حريم اخواني
ديمه بامرهن ماموره
... .... .....
بجااااوب
حليلي حليل ابوي
يوم قال لي يامغروره
البت بالجمال مهما
تكون مشهوره
فاكهه موسميه
سريع تعدي شهوره
وكان فات موسمه
يتجنبه البيدوره
... ..... ......
بجااااوب
انا الصفر قطاري
دنيت من المحفوره
امالي العراض
صبحت بيوت مهجوره
احلامي الوهم
سكن الغراب في قصوره
هل من معتبر...
يسمع نغيم طنبوره
..... ..... ....
بجااااوب
وين ؟ طاف الفراش فوق روضه
زابله زهوره
وانا الحاحيت قبيل
طفش برايا طيوره
المره اصلها كان سادت المعموره
راحته مافي غير
في بيت حلال مستوره
بجاااااوب
الشاعر خليفه عثمان خليفه


مشاركة علي فيسبوك