تابعونا عبر فيس بوك

قوقل ‏+‏ ‏
Use the English Language

الغلطه في كلمه وحرف .. الحلة فى امن وامان

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

27022011

مُساهمة 

الغلطه في كلمه وحرف .. الحلة فى امن وامان




الغلطه في كلمه وحرف
غناء معاوية المقل
رائعة الشاعر: وراق المجذوب حاج علي
0000000000000000000000

الحلة فى امن وامان وناس البلد فى عيشتن زى عادتن
بعد الصلاة وشاى الصباح كل زول مرق لى شغلو راح
الراح على الدكان فتح والساق غنيماتو وسرح
والشالو طورية ونزل لى شغلو ما قام بى كسل
والشالو منجل دار يحش للفى المراح والدى الجنا
وللدار يبيعا تمصرفو ودون السعية يسمنه
حتى الصغير الفى المدارس فى المواعيد قام مشى
فى ايدو خرتاية كتب حاشيها كراسات حشى
وفى التانى كورية لبن بى كسرى بايتى من العشى
والاهلو حالن منصلح عاسولو قراصة قمح
* * *
وناس البلد فى عيشتن زى عادتن
* * *
حتى الحريم الشايلى مقشاشى وتقش
والعلقت سعنه وتخش والخاتى حلته للفطور
قبال تفور تنشمه ريحته فى الفريق زى البخور
والدوكى دخانه انطلق وحس الفنادك طق ... طرق
* * *
وناس البلد فى عيشتن زى عادتن
* * *
قسوة كفاح ما فيها لين
خدمة ضراع وعرق جبين ورغم الكفاح
عبر السنين ما اتغير الطبع الحنين
الناس تلاقيك بالبشر وماب تلقى بيناتن نفر
يوم فى وشى الضيفان كشر
طبعن مأصل فى البلد تلقاهو فى الراجل الكبير
فى مرتو فىالبت والولد يتفقدو الحال من بعض
* * *
وناس البلد فى عيشتن زى عادتن
* * *
واليوم يمر يتعدى فى ايام الزمن
وعند المغيرب كل بيت اتلمو ناسو على صحن فيهو الزلابية
يقرضو وفى ايدن الشاى اب لبن يتعدى من ضمن السنن
وكان الفريق راق من صراخات الصغار
الكانو يلعبو فى الشوارع كورة .. والشد والصراع
وصوت البهايم والنعاج فى الحلة تسمع ميغ وباع
ومر الوكت فسراع مشى وفى الخلوة اذنو للعشاء
عبد الرحيم ... اتناول السبحة ومرق
لاقاهو عند الباب حمد شايلو تلغراف معنون بالاسم
عبد الرحيم ... وكان فى وشى حمد اضطراب
فى راسو مية سين وجيم يمكن يكون
جاك من عمر
يا جاى يا رسل مصاريف الشهر؟؟؟
عبد الرحيم ... هزا اصبعو وقال : الشهر باقيلو سبعة .
تمانية يوم وكمان عمر برة البلد وما عندو اجازة
عشان يقوم .. كدى عاشة جيبى اللمبة جاى
انشاء الله خير من جناى
فتحو وقراهو وفجأة غز ايدينو فى الواطة وقعد
عمر الوحيد ؟ لا عندى غيرو البت ولا عندى الولد ؟؟
يا عاشة .... مات .... مات يا حمد
وطق التكاليب فى البلد
وعبد الرحيم فى حالو من القعدة ديك
كرعيهو لا شالنو تانى ولا مشن
لا اتحركن ... لا اتمددن زى التقول اتكسرن
والحلة تبكى بكا السواد والناس دموعا من الفؤاد
عمر ( الصبوح ) الكل بت تتمنى ليها شريك حياة
عمر الصبيح الكل زول بتمنى لو كان ود حشاه
اخلاقو سمحى وزول سمح دايما يلاقيك منشرح
طول عمرو ما غلط على زول فى البلد
تلقاهو فى الحارات سند
حتى الصغار وكتين يقولولك عمر
تحلف تقول الحلى غيرو بلا بشر
ما خت يوم فى نيتو شر كان قلبو انقى من الزهر
يا حليل عمر ... كان فى عيون الليل قمر
والليلى غاب خلانا للزمن السواد
حزنا اليم وبكى وحداد
وحال الحريم فى بشتنة وحال امو عاشة اسى وضنى
ولدا الوحيد الغيرو ما ولدت جنا
يا حليلا مساها الكبر واصبح دريبة اقرب من الحياة للقبر
وعبد الرحيم راجلا كبير واخر عمر
الليلى لازم العنقريب ساهى ومساهر للفجر
كيفن يعيش ويعيشا عاشة ونفسو ما قادر يحركه للعذر
وناس البلد فى عيشتن زى عادتن ما قطعو منهم العشم
البى دقيقو يزودن والشايل السكر مع الزين والفحم
وحاج البشير جاهن برا قال لا تقولو عمر مشى
واصبحنا نحنا بلا ضرا كل البلد ليكن ضرا
ولو كنتو دايرين اى شى لا تخلو غيرى يكون وشى
خلونى ليكن اكون عمر ودكانى لى حاجتكم انتو يكون ضهر
وسالت دموع عبد الرحيم واستغفر الله العظيم
ورفع ايدو ينده للبشير يتهنى فى خيرو العميم
وبعد البشير ما راح سرح عبد الرحيم
فى بالو يوم يوما قبل اربع سنين وكتين عمر جا...
وقالو يابا الليلة جيتك بى خبر
خير يا عمر انشاء الله خير قول يا عمر
يا يابا ناس الجيش جوا قاعدين فى كريمة وما بعاد
دايرين يعينو ناس جداد وباقيلى باكر اخير لى امشى مع الولاد
عبد الرحيم قالو : اَ عمر ؟
مالك علينا ودار تعلمنا السهاد يا ولدى ...
ولدا جيتنا فى اَخر عمر وامك وانا ...
الاتنين بقينا عقاب كبر ان رحت للسوق القريب دا
وراكا ينشغل الفؤاد نامن تجينا اَولدى صاد كيفن تقولى
اخير لى امشى مع الولاد دار تبقى دياشى
وبعد ماك فى عيونا نكون بعاد
الواطة ماله اَولدى ؟؟ اخير فقش الجراب
ريحة دقيقو التمسكك كرفة صبر غاية الحصاد
ولا شرارة الياها قفيلة بيوت ؟؟؟
موت يا جناى والموت فرض بس لاشنو
من جيهة الزناد نعمين فدايةَ للوطن
يا كم تقاند الطين سقت من دم جدودك وبتقت
انبل جهاد لكن عمر تب ما رضى
وما ليهو فى القعدة المراد
وكتين خلاص صمم يروح عبد الرحيم قالو ... اَجناى
الله المغتى هنى وهناك
واخدوهو فى الجيش يومو داك وفى كل اجازة يجى ويمش
من اهلو ما منع الخبر لا منهم قطع الرسل
نامن جا من عمر الجواب قال انو راح لبنان
وقوات الردع ومن مشى ماهيتو بالتوكيل تصل
بس مننا الخبر اتقطع لا شافو زول لا قال سمع
بى انو للخرطوم رجع
سالت دموع عبد الرحيم واستغفر الله العظيم
وحال امو بس جنت عديل
طول الوكت دمعاته فوق الخد تسيل
راح فارسه الداخراهو سناد البميل
راح حارسه الداخراهو ركازة التقيل
طول يومه لاب تنضم مع زول لاب ترد
فارق خلاص عقله وشرد
حتى الحواس حيلن برد بس عايشى ساكت بالجسد
وفى الحلى زول حالتو العليهو اتغيرت
صابر على الما دفين فى جوفو نيرانا سرت
دى ( امونة ) بت حاج البشير
تتبكى بالدمع الغزير لابساله توب الليل حداد
وصبحت حياته اسى وسواد
بعد الجمال الكان صباحه وحلته
وصدرا يشابى مع خطاها وقدلته
وشعرا غزير وجها منير يشرح قلوب الناس كلامه وضحكته
كل العليها صبح حزين حتى الحزن فى بسمته
ونار فى حشاها وفى الفؤاد مسخت حياته وعيشته
كانت تحب عمر المشى وهو كمان يحبها رايده
مشوار قديم داسنو من ناس البلد
حتى الحريم حتى البشير وعبد الرحيم
ومرت تلاتين يوم بعد خبر الوفاة
لا اتغير الحزن العلى الناس لا مشى
وكان القطر قطر كريمى زى عادتو متأخر وصل
وناس البلد فى الحلى كلها كانو متلمين على عبد الرحيم
جمعا غفير بينن بصير خاتيلهم نار جنبهم
تسمع شراره يطق يطير وتلات مراويدا رقاق
حاشرنهن وسط الجمر دايرنهن يبقن حمر
وكل القصد عبد الرحيم يكووهو فوق كرعيهو
كان يقدر يقوم خاصة الالم بقى كل يوم
يزداد على عبد الرحيم ينزاد وما بديهو نوم
وعبد الرحيم حلف انو ما يمشى اسبتالى
على صبيحه ما يحوم ناس البلد جابو الحكيم
عبد الرحيم ابى للحكيم قام البصير وقعد قصاد عبد الرحيم
شاف المراويد حمرن جرالو واحد منهن
وكل الخلوق الكانو قاعدين كب يقوموا
وطق طرق الباب نقر
ودخل على الناس زول عليهو اثر سفر
كانت ملامحو وشكلو كلها زى عمر
وكتين جا ماشى على الخلوق بينن ظهر
كان ياهو نفس الزول عمر
والخوف دخل كل القلوب بعضن جفل بعضن جرى
وبعضن يزحزح لا ورا
لكن عمر قال قولو بسم الله مالكن يا الاهل ؟؟
انا حالتى قلت وكت اصل القى البلد راجانى
بى دمع المقل يصل القطر والناس تلاقى احبابه
ما القى ولا نفر وانا حالتى مديكن خبر
كيفن تزحوا تفروا منى انا بينكم اتلوم حصل
قالولو ما حصل اَعمر لكن جا تلغراف
وليهو اسع شهر قال انت مت واندفنت غريب وطن وغريب اهل
قال اسمعونى انا عاد بوريكم شنو اَناس الحصل
ساقونا من الجيش جمع ودونا قوات الردع
ومن يوم وصلنا نزلنا لبنان ما شفنا الامان
وكان الحرب تلقاها فى البيت فى الشوارع
كل زول يضرب ضرب وانا رايى واحد
وهدفى لى هدفن معاند وكان رئيس الوحدة رائد
وجانا يوم لمانا كلنا فى المعسكر جنبو كوم
وسألنى انا قال لى مالك يا جنا دون الولاد ديل
قلت لا بتضرب ولا بتحمل سلاح
قت ليهو ايوة والف صاح انا قلت لا بضرب
ولاب احمل على زول السلاح انا ود عرب
وديل برضو ياخى ولاد عرب اخوانى فى الدين واللغة
اخوان مصير اخوان كفاح وانا جيت بينن للسلام
والله لاب اضرب نفر لا بينن احكم بالسلاح
ونهرنى قالى اسكت كفى روح نحن ما ناقصين فصاحة وفلسفة
قولك دا قولو هناك فى السودان بعيد
هنا ماب تعيش غير بالسلاح
وغير السلاح ما تبقى سيد ومن يومى دا
بقيتا لاب اسمع ولاب اجى لى ندا
ضاقت على الحاله واصبح فى ردى
وكل يوم على حكمن يمش طابورى فى حر الشمس
وبالليل بلا هدما على خاتنى فى البرد ارتعش
وسط الضرب وسط الحرب والناس شمال ويمين تهش
وانا لا انجرحت ولا انضربت رعايتى من رب العرش
قال اَجماعة انا لا اكتر فى الكلام قضيتا اسبوعين تمام
ووكتين خلاص البى عرفو انا بينن للسلام
كتبوهو تلغراف شديد اللهجة قام
كان خمسة كلمات كان زيادة معنون
الخرطوم قيادة الصول عمر عبد الرحيم
مدفعجى بالرقم اربعين استعفى من خدمتنا فى لبنان
وهذا للعلم واستعفى من خدمتنا وصلت للقيادة
اتوفى فى خدمتنا ..... شوفو الغلطة فى كلمة وحرف
كتلتنى قبل اليوم يتم خلتنى عايش بالاسم
وعبد الرحيم كب نط من العنقريب
قالد عمر حبو الحبيب
وصبت دموع الفرحة من نبض القليب
ومن يومو داك كل العلى كرعينو زال
ديك حكمة الله وقادر الله الحكمو ماب يعرف محال
وطقت زغاريد الفرح وناس البلد فى الحلى
لما الليل صبح لا نام صغيرلا نام كبير
عبد الرحيم فى الحال ضبح قضوهو ليلن فى مرح
وكترت كرامات الاهل دور مافى جزارا ضبح
ماشفتو حال امو القبيل نيرانا فى الجوف قادحة
الليلة وا زينه وعديلة عمر يماسيها
وصباحا بدرى تلقى مصابحه
وامونة عاد خلو الحديث اصلو الحديث
وكتين يفوت حد التصور كل زول فيهو اليقيس
خليتو ليكن قيسو كان واحد يقول لى وصلت الميس
والشى المحيرنى وقدر فكرت فيهو انا ما عرف
كيفن تفك الفرحة قيد عبد الرحيم
يقدر يلف دا بعد وجع كرعينو
بقى للناس عموم سيرة ووصف
غايتو السبب ... كان غلطة فى كلمة وحرف
اصلو السبب كان غلطة فى كلمة وحرف



ـــــــــــــــــــــــ


اضغط اعجبني واحصل علي الاخبار بسرعة وبسهولة دون جهد

.
سبحان الله و بحمده عدد خلقه و رضا نفسه و زنه عرشه و مداد كلماته(3 مرات)

حمزه عوض


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

الغلطه في كلمه وحرف .. الحلة فى امن وامان :: تعاليق

مُساهمة في الجمعة 14 أكتوبر 2016 - 8:55 من طرف Admin

الحله في امن وامان
غناء معاوية المقل

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
تستطيع الرد على المواضيع في هذا المنتدى