تابعونا عبر فيس بوك

قوقل ‏+‏ ‏
Use the English Language

رحيق الختام .. محمد عثمان الجعلي .. النسر الهلالي والفرنسى كافالي

إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

06122015

مُساهمة 

رحيق الختام .. محمد عثمان الجعلي .. النسر الهلالي والفرنسى كافالي




.
‎رحيق الختام
محمد عثمان الجعلي
النسر الهلالي والفرنسى كافالي


ماشاء الله وتبارك الله وعينى باردة على هلال العام الجديد هلال الشباب ياحلو يامستطاب ...الجوهرة الزرقاء تعانق عنان السماء وأفضل نجوم الوطن فى الكشف الأزرق... عمار الدمازين وولاء الدين وأحمد ميسى وأبوعاقلة أما المحترفين الأجانب فهناك مدافع الأشانتى والمنتخب الغانى صمويل إبيكو الذى فاز بجائرة أفضل مدافع فى غانا عامى 2013 و2014 بجانب صانع الألعاب الغانى كنيدى إيشيا ولاعب الوسط المهاجم العاجى شيخ موكورو ...تخيلوا فى الدفاع أفضل مدافع غانى إبيكو بجانب العميد مساوى وفى الأطراف بوى وفداسى وسيسيه وأطهر ...عن إذنكم ) فاصل ونواصل ( نظبط الرأس بى كباية شاى منعنع ونتحدث عن خط الوسط ...عدنا ليكم ياحبايبنا طبعاً عندنا فى خط الوسط الغانى نيلسون وكمان جبنا ليه صانع ألعاب غانى هو إيشيا وماننسى شباب السودان ناس نزار وبشة ووليد علاء الدين ...من هسه نقول ليكم شباك مكسيم أعتبروها مشفرة ...أنا خوفى ) فيصل الأقرع ( من هلالاب جدة ينط يقول لى )زول غيرك بجغم نجوم الهلال مافى ( آها يافيصل لن نذكر خط الهجوم خوفاً من العين الحمراء وشرارة والعين الأيام دى حايمة أكتر هزائم المنتخب القومى فى سيكافا !! والحمد لله هذه اللوحة الجمالية الزرقاء تم إكمالها بمدرب أوربى من عاصمة النور لأن الهلال الأفريقى به لمسات المدرسة الأوربية وتم التعاقد مع المدرب الفرنسى جون ميشال كافالى ...ماشاء الله النسر الهلالى مع الفرنسى كافالى ) حاجة ماتخلص ( جيب بخور التيمان ياالأمين جيفارا ) وهلالاب الهفوف ( ويمكن أن تستعين بخدمات أستاذنا وشيخنا سيف خواجة ...أكيد معظم الهلالاب عايزين يعرفوا السيرة الذاتية للمدرب الفرنسى الجديد طبعاً عمره 58 سنة ويعرف الكرة العربية والأفريقية جيداً ونال مع فريق النصر السعودى كأس الدورى عام 1994 وقام بتدريب فريق ليل الفرنسى من 1994 حتى 1997 وقام بتدريب فريق الرياض السعودى عام 1998 ثم الوداد المغربى وقام بتدريب المنتخب الجزائرى عام 2007 وآخر فريق عربى قام بتدريبه كافالى هو مولودية وهران حتى نوفمبر 2015 وهذا دليل على أن الهلال قد كسب مدرباً له وزن وصاحب خبرة وسوف يفيد الهلال فى الأبطال ...وهلال العشق الجميل يمتاز بالمواهب الفطرية والمهارات الفردية لذا سوف تكون الخلطة السحرية والتمازج النفيس بين أم درمان وباريس .
*** فى شمال العرضة العملة صعبة وفى جنوبها الحالة صعبة
هلال الحركة الوطنية إمتاز على مر الأزمان أن يتنافس بنوه ويتزاحمون على قيادته ) ومورد العذب مزدحم ( فإذا ذهب الطيب عبدالله جاء طه على البشير وإذا ذهب طه جاء صلاح إدريس وإذا ذهب الأرباب جاء البرير وإذا ذهب البرير جاء الكاردينال وهكذا ...والحمد لله أولادنا كلهم ) مرطبين لكن متواضعين ( أما الجيران جمال الوالى حكم منفرداً لمدة 13 سنة وعندما ) نفد بجلده ( جاء مجلس التسيير بشركاء متشاكسون عجزوا أن يسجلوا محترف من العيار الثقيل بل إن المدرب غارزيتو ترك الديار الحمراء لقلة الفئران فى بيته وإذا تباهى الهلال بالمحترف إبيكو وإيشيا تباهى أهل العرضة الجنوبية بالنعسان والعطرون ) هل تدرى يانعسان أنا طرفى ساهر !! ( وفى التدريب يفاضل المريخ بين مازدا وبرهان وجبرة ) ياجبرة الحكاية جابت لها جبرة ( ...ومما يدل على حالة البؤس التى ضربت جنوب العرضة أن أهلها أصبحوا يحتفلوا بتسجيل ألوك أكيج لاعب الملكية جوبا ومريخ كوستى ...) صراحة مزاحمة الهلال للمريخ فى هذا اللاعب شناة طبع ماليها أى داعى ( بينى وبينكم ألوك كراعو حارة جاء بعد جمال الوالى مافات لكن ألوك صحراوى ...والغريبة ناس المريخ صوروا الفطور مع ألوك وحتى القروش الدفعوها !! معقول عقدة الفلس وصلت الدرجة دى !! حوالينا ولا علينا ...وأحمدوا ربكم ياهلالاب وقولوا اللهم أدمها نعمة وأحفظها من الزوال ....إحتمال كبير يكون معسكرنا القادم فى باريس عاصمة النور ...غايتو الجيران إذا إشتاقوا للنور إلا يعسكروا فى خزان الحماداب ... عبارة البطن بطرانة تنطبق حتى على الأماكن والأحياء فنجد فى شمال العرضة الدولارات والعملة الصعبة وفى جنوب العرضة الحالة صعبة ...مش ملاحظين غارزيتو ) إنقلع ( بى جاى وتراورى رجع بى جاى !! بالمناسبة تسجيل راجى والباشا لسه ) مرهبن ومجوبق ( !! لذا لزم التنويه .
*** رسائل غنائية رياضية من الفنان خوجلى عثمان
نريد أن نرسل 3 رسائل غنائية رياضية من أغنية ) حبة حبة ( للفنان خوجلى عثمان ...الرسالة الأولى من هلال كادوقلى وهو ينحنى للظلم والظالمين ويرضى أن يسحب الإتحاد العام من رصيده نقطتين ويمنحها لإبنه المدلل المريخ وتقول الرسالة *** مازمان وصوك علينا وقالوا ليك خليك حنين ...نحن ماحبانك إنت أصلو حق الريدة بين ...بس فى سبيل ضحكة عيونك يبقى ظلم الدنيا هين ...والرسالة الثانية من إدارة الهلال التى ضحت بكأس الدورى من أجل ) فضح الباطل ( بينما إستفاد الأمل من الإستثناء والبقاء بالممتاز وكان تصريح مولانا جمال حسن سعيد غير الموفق بأن قرارات الجمعية العمومية أرضت كل الأطراف !! وتقول الرسالة *** نحن أصلنا ناس محبة زول نعزو وزول نريدو ...البفوت ريدتنا يمشى برضو نفرح بى جديدو ...من عمرنا أفراح حياتو وفى شقانا يلاقى عيدو ....الرسالة الأخيرة من إتحاد معتصم وهو يجامل المريخ فى تسجيل ألوك رغم الإساءة التى تعرض لها قادة الإتحاد من همد ومتوكل ويتعهد أسامة عطا المنان بخدمة المريخ فى الشهور الستة الباقية من عمر الإتحاد ويرفض حتى معاتبة المريخ وتقول الرسالة *** نحن مادايرين نعاتبك إنت مننا وإنت لينا ...إنت لو غلطان معانا حقك إنت يكون علينا *** نحن ناسك يامحبة... ليك عمرنا الباقى فينا .
*** همسة الوداع
حبايبنا الحلوين بعد إستقالة جمال الوالى أصبح ) حالهم يحنن الكافر ( فقر مدقع وعندما فشلوا فى تسجيل مدافع هلال الأبيض بكرى بشير بدأ إعلامهم يطالب بإنهاء إعارة عنكبة !! تخيلوا !! لكن عنكبة مرتاح فى كردفان بجانب الغزال وفى معية مولانا أحمد هارون ...مالو ومال الجفاف والتصحر ...مفروض يضيفوا كلمة المريخ لعبارة ) منكوبى الجفاف والتصحر ( حتى يستقيم المعنى وتصبح الجملة المفيدة ....منكوبى الجفاف والتصحر والمريخ ...بينى وبينكم هجوم المريخ فى عام 2016 محتاج بشدة لعنكبة لكن مافى طريقة وكما نعلم أن هجوم المريخ يقوده بكرى المدينة وعبده جابر ...عمياء وقايداها مجنونة كما يقول مثلنا السودانى ...فى حاجة مهمة ناس المريخ ما أخدوا بالهم منها غير فاتورة الكهرباء هناك إصابات الملاعب التى تحتاج سفر للخارج ودولارات ...وبهذه المناسبة نهمس فى اذن الإعلام الأحمر إنتوا لعيبتكم المصابين تانى بتعالجوهم عن طريق بنك الثواب ولا شنو ؟ مجرد سؤال .

Admin


الرجوع الى أعلى الصفحة اذهب الى الأسفل

مُشاطرة هذه المقالة على: Excite BookmarksDiggRedditDel.icio.usGoogleLiveSlashdotNetscapeTechnoratiStumbleUponNewsvineFurlYahooSmarking

 
صلاحيات هذا المنتدى:
تستطيع الرد على المواضيع في هذا المنتدى